Read idoma USAKARÍYA 14 Bible Online

USAKARÍYA 14 - idoma bible

USAKARÍYA 14

¹Ɛ̄cī nɛ̄ Óndú ā géē kɛpɔ̄ tū ācɛ ā má kwu ajaajɛ ɛɛ́. Ɛ̄cī ɔ́ɔmā, aólɛlā kú aá géē wu agbénú kú aá ŋmá Ujerúsālɛm. É klla í kpó aɔ́dā nēé wu ā kɔ̄ ipéyī aá.

²Óndú ā géē kpó odúúdú aéwo ā wā í túbá tɔ̄ɔ̄há kéē kpɛ́fú tá Ujerúsālɛm, é géē mīyɛ Ujerúsālɛm, kē í je agbénú kpó wu ŋmá ipú aínu alɛwa. É klla í hɛ ācɛnyā kú uwā bá ajɛ abɔ̄fú. É géē kpó āyā éyi kú ācɛ ā ga ajɛ kú ɔfiyɛ, amáŋ, é gáā kpó āyā o hile ɔhá ā ŋmá Ujerúsālɛm ŋ́.

³Cɛ́ɛ́ Óndú ā í nyɔ̄ í nuunu tá aéwo ɔ́ɔmā ɛ́gɛ́nɛ̄ ó tɛtɛ ī nuunu lɛ ā.

⁴Eko ɔ́ɔmā, Óndú ā géē háyi ɛyí ɛfu nēé hī ka ólīfu nōo yɔ̄ ɛnɔ̄ɔ̄cī kú Ujerúsālɛm ā. Cɛ́ɛ́ é géē je ɛfu kú ólīfu ā kɔ̄ ɛpa ŋmá ɛnɔ̄ɔ̄cī ga ɛnɔ̄ɔ̄nɛ̄, ɔpɛ́ nɛ̄hi géē tá ɔtāhɛ̄ nū. Āyā éyi kú ɛfu ā géē kwu kiili ga ɛhíícō, āyā ɔhá géē kwu kiili ga ɛháajɛ.

⁵Aá géē kwu gaá bū ɔpɛ́ nōo kɔ̄ ɛfu ā ɛpa ā. Aá géē kwinya ohígbū oyēeyī kú aá, ɛ́gɛ́nɛ̄ aádáádā á kwu eko nɛ̄ ajɛ hɛ́ wulu eko nɛ̄ Usíya wɛ ɔcɛ́ kú Ujúda ā. Óndú, Ɔwɔicō kú um, géē wā, ó í kpó odúúdú aálelékwū otɛ̄hɔ̄ ā wā mla iyī nū.

⁶Eko nɛ̄ ɛ̄cī ɔ́ɔmā gā ā, ofū í gáā ŋmó ɛ́ɛ́ nɛ̄ ajɛ géē hīlaŋdɔ́ ɛ́ɛ́ gɛ ŋ́.

⁷Ɛ́ɛ́ nɛ̄ obū gē du gɛ ŋ́. Ɛnɔ géē yɔ̄ ī cɛ̄ eko dóódu. Óndú ā ōfōōfūnū jé ɛlpléeko nɛ̄ ɔdā nyā géē yá á.

⁸Eko nɛ̄ ɛ̄cī ɔ́ɔmā gā, éŋkpɔ̄ géē yɔ̄ ī pɛ́ ŋmá Ujerúsālɛm, āyā éyi kú nū géē yɔ̄ ī pɛ́ ga ísu kú ɛnɔ̄ɔ̄cī, āyā ɔhá géē yɔ̄ ī pɛ́ ga ísu kú ɛnɔ̄ɔ̄nɛ̄. Ó í yɔ̄ ī pɛ́ eko ɔnɔ̄ ga ɔgwā iháyí dóódu

⁹Cɛ́ɛ́ Óndú ā géē wɛ ɔcɛ́ kú odúúdú ɛcɛ. Eko ɔ́ɔmā, odúúdú ācɛ géē gbā Óndú ā ɛ̄gbā ka anú ɔ́ɔ wɛ Ɔwɔicō á. É klla í jé ɔ́ mla iyē ékpónú nɛ̄ ó lé ā.

¹⁰É géē je odúúdú ajɛ nōo gbɔɔ́ ŋmá Ugɛ́ba nōo yɔ̄ ɛhíícō ā, ga Urímmɔn ɛháajɛ kú Ujerúsālɛm ā cīlatū. Ujerúsālɛm géē hile kwu licō fíyɛ́ ajɛ dóódu nōo yɛ ɔ́ jīla tá ā. Igelī nɛ̄hi ā géē yɛ ga ɔwɛ kú ɔ́kíkā, ɛga nɛ̄ ɔwɛ éyi kwu aflɛ́yí ā. Cɛ́ɛ́ o yɛ ŋmá inɔ̄ɔda o gbāajɛ kú Uhanánelu ga ɛga o yá ejé kú ɔlɛ́ ɔcɛ́ ā.

¹¹Ācɛ ā í lā abɔ́ɔ ɛbɔ́, ufi kú ɔ̄cɛ o kpó ūwā yíífi í gáā yá uwá ɛ́ɛ́ gɛ ŋ́.

¹²Óndú ā géē bī ōcē obɔ̄bī wā í klá odúúdú aéwo nēe kpɛ́fú tá Ujerúsālɛm ā. Ɔkpíyē kú uwā í je wā eko nēé yēeyī kpɔ́ ɛ́ɛ́ mā. Īkpēyī mla ígblɛ́nyī kú uwā géē je wā dúú.

¹³Ɛ̄cī ɔ́ɔmā ā, Óndú ā géē cɛ̄ lɛ uwá gbájí nɛ̄hi klla í tū ūwā ufi nɛ̄ɛ̄nɛ̄hi, nōo í je uwá ɔtū gbájí nɛ̄hi, nōo klla í cɛ̄ lɛ uwá í gbɔɔ́ ō yúufi nɛ̄ ɛjɛ̄ɛ̄jī ācɛ géē kwú ɔ̄cɛ nōo yɔ̄ pī ɔ̄, cɛ́ɛ́ ó gbɔɔ́ ō nuunu tá ɔ̄.

¹⁴Ācɛ kú Ujúda ā géē kpɛ́fú cɛ́ɛ́ kéē lɛ Ujerúsālɛm nyatá. É géē kpó agbénú kú odúúdú aéwo ɔhá wu ŋmá ajɛ. Kwu oje nɛ̄hɛ́, ugóolu (oje ɔdɔ) mɛ́mla īlī kú uwā.

¹⁵Ōcē ōbɔ̄bí nɛ̄hi géē wā í klá aɔ́nya, aɛ́na, aínyakwūlūmī, aíjakī mɛ́mla odúúdú ɛbɛ́ kú aólɛlā kú Ísrɛ̄lu ā.

¹⁶Cɛ́ɛ́ odúúdú ācɛ ohile kú éwo nēe kpɛ́fú tá ācɛ Ujerúsālɛm ā, géē wā Ujerúsālɛm iháyí dóódu gaá gbā Óndú ā nōo lɔfú fíyɛ́ dúú, nōo wɛ ɔcɛ́ ā ɛ̄gbā. Cɛ́ɛ́ kéē wā í lé ucɛ kú áklɔ̄kpɛ

¹⁷Éwo dóódu, nēe tá kóō nyɔ̄ ī gbā Óndú, nōo wɛ ɔcɛ́ ā ɛ̄gbā, ɔwɔ í gáā yā ajɛ kú éwo ɔ́ɔmā ŋ́.

¹⁸Ɔ́dāŋ ka ācɛ kú Íjīpiti tá kéē lé ucɛ kú áklɔ̄kpɛ ā, ōcē obɔ̄bí ā géē je uwá kpó ŋmó. Óndú ā klla í tū ōcē obɔ̄bí ā klá éwo dóódu nōo tá ō nyɔ̄ á.

¹⁹Ɛ̄nyā wɛ italā nēé géē yá ācɛ Íjīpiti mɛ́mla odúúdú aéwɔhá nēe tá kéē nyɔ̄ Ujerúsālɛm gáā lé ucɛ kú áklɔ̄kpɛ ā.

²⁰Ɛ̄cī ɔ́ɔmā ā, é géē tá tū áma nōo playi ɔŋgbá kú aɔ́nya ā kahíníī, “É le ɛ̄nyā yá tīihɔ lɛ Óndú ā.” Aɛ́tɛ́ kú ipú Agblīihɔ-nɛ̄hi kú Óndú ā géē tīihɔ bɛ̄ɛka ocíbú kú ɛyí ede kú Agblīihɔ-nɛ̄hi kú Óndú ā dúú.

²¹Ɛjɛ̄ɛ̄jī ɛhī kú Ujerúsālɛm mɛ́mla ákú Ujúda ā géē wɛ otīihɔ lɛ Óndú ā. Cɛ́ɛ́ odúúdú ācɛ nēe géē wā í gwɛ́ɛya ā, géē bī uwā le he ɛbɛ́ kú ɛya nɛ̄ ó gwó ā ɛyí ɔlá. Cɛ́ɛ́ ɔ̄cotɔ́sú í gáā yɔ̄ ipú Agblīihɔ-nɛ̄hi kú Óndú ā, nōo lɔfú fíyɛ́ dúú ā ɛ̄cī ɔ́ɔmā gɛ ŋ́.