Read idoma USAKARÍYA 2 Bible Online

USAKARÍYA 2 - idoma bible

USAKARÍYA 2

¹N je eyī gicō, anɔ́ɔ n má ɔ̄cɛ éyi lɛ ɔ́ŋgbá ō bī miya ɔdā bī abɔ̄.

²Anɔ́ɔ n da ɔ́ ɔ̄kā kahíníī, “Iní nāa gē nyɔ̄ ā?” Anɔ́ɔ ó tá um ohi ka anúɔ gē nyɔ̄ gaá miya Ujerúsālɛm, ká anúɔ má ɛ́gɛ́nɛ̄ olīkpō mla olɔwá kú nū lɛ ā.

³Usekaríya ka anúɔ má Alelékwū ōtɛ̄hɔ̄ nōo húmáyī kɛlā lɛ anúɔ ā, yɔ̄ ī gɛcɛ, anɔ́ɔ Alelékwū ōtɛ̄hɔ̄ ɔhá wā í le jīla mla anú.

⁴Anɔ́ɔ ó da ɔ́ ká ɔ̄ kwinya nyɔ̄ gaá da ɔyípōklōbīya nōo bī ɔdā ōmiya odée abɔ̄ ā ka, ācɛ mɛ́mla ɛbɛ́ ɔlɛ́ géē lɛwa Ujerúsālɛm nɛ̄hi, nɛ̄ ācɛ Ujerúsālɛm í gáā hɛ́ ɔdɔ jīla igeli nɛ̄hi ā tá glá ŋ́.

⁵Óndú ā abɔ̄yīnū cokónu ka anúɔ géē gbō igelī ā bɛ̄ɛka ɔdɔ kú ɔlá nōo yɛ ɔ́ jīla tá ā. Anɔ́ɔ ó klla ka anúɔ géē lā ipú abɔ́ɔ mla odúúdú ɛgahi kú anúɔ ā.

⁶Óndú da ācɛ ɔlɛ́ nū ka, éē páápá! kéē kwu ŋmá Ubábīlɔn. Ohígbū ka anúɔ lɛ uwá pahīla ga ɔ́kíkā ɛnɛ kú ɛcɛ nɛ̄ owu gē tá ŋmá ā.

⁷Ó kéē yá fíyaa, kéē kwinya gā Ujerúsālɛm, uwá nēe lā Ubábīlɔn ā.

⁸Ó klla ka ɔ̄cɛ dúúmā, nōo lɛ abɔ̄ kwu uwá, ayíka ɔ́ɔ lɛ abɔ̄ wu anúɔ eyī ɛɛ́. Ó ka anɔ́ɔ Óndú ā nōo lɔfú fíyɛ́ dúú ā, tɛ̄hɔ̄ fu aéwo nēe ca uwá tā ajɛ, klla kpó uwā yíífi ā kahíníī,

⁹“Ami, Óndú ā abɔ̄yīnū géē nunu tū aá. Cɛ́ɛ́ ācɛ nēe tɛtɛ wɛ ɔfiyɛ kú aá ā géē je aá wúla tāajɛ. Eko nɛ̄ ɛ̄nyā le yá ā, odúúdú ācɛ géē jé ka Óndú ā nōo lɔfú fíyɛ́ dúú ā, ɔ́ɔ tū um ɛhɔ̄ á.”

¹⁰Óndú ā kahíníī, “Aá gwííjē kú aá, gwéeyē, ācɛ kú Usáyɔn. N géē wā í lā ipú aá.”

¹¹Ó ka eko ɔ́ɔmā ā, aéwo alɛwa géē wā ɛgiyí Óndú ā, klla géē je pīya ācɛ ɔlɛ́ nū. Óndú ā kē í lā mla uwá, cɛ́ɛ́ é géē jé ka Óndú ā ɔ́ɔ tū anúɔ ɛhɔ̄ á.

¹²Ujúda géē je pīya ákú Óndú ā, ipú ajɛ otīihɔ kú nū ā kpɔ́ ɛ́ɛ́. Ujerúsālɛm klla í wɛ igelī nōo í he ɔ́ ɔtū fíyɛ́ kpɛ́mm ā.

¹³Ó ka odúúdú ācɛ, kéē bá hímm iyɔ̄bū Óndú ā, ohígbū koó yɔ̄ ī wā ŋmá ɛga otīihɔ kú nū ā ɛɛ́.