Read idoma USAKARÍYA 3 Bible Online

USAKARÍYA 3 - idoma bible

USAKARÍYA 3

¹Usekaríya klla ka Óndú ā le Ujóssuwa, otrɛ̄yí kú ācogwɛ́ɛya ā mafú lɛ anúɔ, abɔ̄ ó háyi iyɔ̄bū alelékwū-ōtɛ̄hɔ̄ kú Óndú ā. Anɔ́ɔ ebilíi háyi abɔ̄lɔ́ná kú Ujóssuwa, le tútū kóō kpɛ́lā ce ɔ́.

² Anɔ́ɔ Óndú ā da alelékwū nōo ī kpó ācɛ ɔlɛ́ Ɔwɔicō ɛpɔ̄[1] ā kahíníī, “Usétan, lɛ okónu klá cíí. Óndú ā nōo fu Ujerúsālɛm ā, kóō lɛ ɛpɔ̄bí ŋmó uwɔ. Ɔ̄cɛ nōo yɔ̄ nyā lɛbɛ̄ɛka ɛfú nēé nú ŋmá ipú ɔlá ā.”

³Ujóssuwa māháyi abɔ́ɔ lɛ áhingílí wiyē.

⁴Anɔ́ɔ alelékwū-ōtɛ̄hɔ̄ ā da aálelékwū ōtɛ̄hɔ̄ nēe cɛ̄ ɔ̄ ɛhɔ̄ ā kahíníī, “Aá lɛ áhingílí ɔ́ɔmā plla ŋmá anú iyē.” Anɔ́ɔ ó da Ujóssuwa ka anúɔ kwú íne nɔ́ɔ bīya ā ú yá ɔ̄ ɛhi ɛɛ́. N géē kpó úwé ɔ̄cogwɛ́ɛya ɛ̄yīpɛ̄ nōo tū ɛgahi ā gā uwɔ kú ā le wiyē.”

⁵Anɔ́ɔ n ka é kwú ɔláwonī oyéŋēē ú kpó gbō ɔ̄ ɛyí, cɛ́ɛ́ é kwú úwé ɛ̄yīpɛ̄ ú kpó wu ɔ́ iyē, abɔ̄ alelékwū-ōtɛ̄hɔ̄ kú Óndú ā háyi abɔ́ɔ ā.

⁶Anɔ́ɔ alelékwū-ōtɛ̄hɔ̄ ā da Ujóssuwa ka,

⁷Óndú, nōo lɔfú fíyɛ́ dúú ā ka ɔ́dāŋ ka ɔ́ɔ géē lɛyítáajɛ lɛ anúɔ klla í yúklɔ́ nɛ̄ anúɔ je lɛ ɔ́ ā, ɔ́ɔ géē yɔ̄ ī leyīkwu Agblīihɔ-nɛ̄hi mɛ́mla aínu kú anúɔ ā piyóó. Ó ka anúɔ kē í je íkwu lɛ ɔ́ kú ɔ̄ wā iyɔ̄bū anúɔ ɔwɛ ékpónú ɛ́gɛ́nɛ̄ aálelékwū ōtɛ̄hɔ̄ nēe bá nyā gē wā iyɔ̄bū anúɔ ā.

⁸Jāhɔ̄, Ujóssuwa, nōo wɛ otrɛ̄yí kú ācogwɛ́ɛya ā mɛ́mla aá ācogwɛ́ɛya ɔ́mpa nū, nēe ī yúklɔ́ ɛhájɛ nū ā, aá wɛ ɔdōcābɔ̄ kú ɔdā olɔhi nōo géē yá ɛcɔ̄bū á. N géē mafú ɔ̄cocɛ̄hɔ̄ kú um nēé hī ka Ābɔ̄ ā!

⁹Ó ka anúɔ géē je ɛcɔ̄ éyi nōo lɛ ɔ́kíkā ahāapa tá iyɔ̄bū Ujóssuwa. Ó ka anúɔ géē tɔ́kpá tū ɛyí nū. Ipú ɛ̄cī ékpónú ā, n géē kpó íne nɛ̄ odúúdú ācɛ kú ajɛ ā bīya ā bónū.

¹⁰ Eko nɛ̄ ɛ̄cī ɔ́ɔmā gā ā, ɔnyɔɔnyɛ kú aá géē hī ɔ́mpa nū igwú wā í gwéeyē kú ɛbɔ́ mla oōbá ɛbɔ́ kú aá. Eko ɔ́ɔmā ɔcí ufáyin mɛ́mla ɔcí kú ufígi géē yɛ aá jīla tá.