Read idoma USAKARÍYA 4 Bible Online

USAKARÍYA 4 - idoma bible

USAKARÍYA 4

¹Anɔ́ɔ alelékwū-ōtɛ̄hɔ̄ nōo húmáyi kɛlā gā um ā, gā igbɔhá, anɔ́ɔ ó le um jíleyē bɛ̄ɛka ɔ̄cɛ nēé héyī ŋmá iyɔ̄lā ā.

²Anɔ́ɔ ó da um ɔ̄kā ka ɔdí nɛ̄ ami ɔ́ɔ má āā? Ó ka anúɔ tá ɔ̄ ohi ka anúɔ má ɔdā ō lɛ agege ce ɔ̄ kú ugóolu (oje ɔdɔ). Ocíbú éyi nɛ̄ anɔ̄ yɔ̄ ipú nū ā ce ɛyí nū. Agege ahāapa nɛ̄ éyééye kú nū lɛ okónu ahāapa nēé gē lɛ owú bū ɔ̄ ā, klla ce ɛyí nū dúú.

³Anɔ́ɔ ɔcí nēé hī ka ólifu ɛpa háyi pī ɔdā ōlɛ agege ce ɔ́ ā. Éyi háyi abɔ̄lɔ́ná, ɔhá háyi abɔ̄lúfīyē kú nū.”

⁴Anɔ́ɔ n da alelékwū-ōtɛ̄hɔ̄, nōo hímáyi kɛlā mla um ā ɔ̄kā kahíníī, “Ɔ́dí bá yɔ̄ ā, Óndú um?”

⁵Anɔ́ɔ ó tá um ohi ka ami í jé ɔ̄da nēe bá abɔ́ɔ ā ŋ́ nɛɛ? Anɔ́ɔ n da ɔ́ ka, ehéee, Óndú.

⁶Anɔ́ɔ alelékwū ofɛ̄hɔ da um ka ami ɔ́ da Usɛrúbábɛlu ka, Óndú ā ɔ́ɔ kahíníī, “Ó wɛ ɔfú kú aícɔ́ɔja ámāŋ ka ɔfú kú abɔ̄yī uwɔ nāa gáā le yá ɔ̄ ā ŋ́. Amáŋ o ŋmá alelékwū kú ami nōo lɔfú fíyɛ́ dúú ā.

⁷Ɔdōŋmɔ́wɛ tū ɔ̄cɛ nōo lɛbɛ̄ɛka ɛfu nɛ̄hi géē mɛ tāajɛ dúúdú iyɔ̄bū uwɔ. A géē tú Agblīihɔ-nɛ̄hi gwó. Eko nāa í je ɛcɔ̄ ámōōmɛ ce ɛga nɛ̄ ó cíkā ō ce ā, ācɛ géē bá ī dɛgba ka ó héyifuú nɛ̄hi.’”

⁸Óndú ā klla le ɛlā ka gā um kpɔ́ kahíníī,

⁹“Userúbábɛlu nōo le ikpíinu kú Agblīihɔ-nɛ̄hi nyā tá ajɛ ā, anú piíí ā gáā gwó ɔ̄ kwɛyí á. Eko nɛ̄ ó le gwó kwɛyí, cɛ́ɛ́ ācɛ ɔlɛ́ um géē cɛ̄ ka ami Óndú nōo lɔfú fíyɛ́ dúú ā tū uwɔ ɛhɔ̄ á.”

¹⁰Ɔ̄cɛ dúúmā nōo lɛ eyī gwō ɛ̄cī kú ɔdā nōo gbɔɔ́ lígíí nyā bónū, géē gwéeyē, eko nēé lɛ úklɔ́ nɛ̄ Userúbábɛlu bī abɔ̄ yɔ̄ ī gwó Agblīihɔ-nɛ̄hi ā gɔbū ā má. “Aágege ahāapa ā wɛ īkpēyī kú Ɔwɔicō nēe bá í má odúúdú ɛcɛ ā á.”

¹¹Anɔ́ɔ n da ɔ́ ɔ̄kā kahíníī, “Ɔdí kē wɛ ɛyí kú ɔcí nēé hī ka olīfu nēe háyi ābɔ̄ ɛpɛlɛ́ɛpa kú ɔdā ō lɛ agege ce ɔ́ āā?”

¹²N klla da ɔ́ ɔ̄kā kpɔ́ kahíníī, “Ɔdí wɛ ɛyí kú abɔ̄ kú ɔcí kú ɔ́lifu ɛpa nēe bá igbīhi kú aúlo kú ugóolu (oje ɔdɔ) nēé gē bī le pīya anɔ̄ tū agege āa?”

¹³Anɔ́ɔ ó da um kahíníī, “Á jé ɛyí ɔdā nɛ̄ ɔdā nēe bá nyā wɛ ā ŋ́ nɛɛ?” Anɔ́ɔ n tá ɔ̄ ohi kahíníī, “Ehéee, Óndú um!”

¹⁴Anɔ́ɔ ó tá um ohi kahíníī, “Aɛ́nyā wɛ ācɛ ɛpa nɛ̄ Óndú ā fu, le anɔ̄ tū uwā ɛyí kéē yúklɔ́ iyɔ̄bū Óndú kú odúúdú ɛcɛ ā piyóó ā á.”