Read idoma USAKARÍYA 6 Bible Online

USAKARÍYA 6 - idoma bible

USAKARÍYA 6

¹Anɔ́ɔ Usekaríya ka anúɔ je eyī gicō igbɔhá, anɔ́ɔ anúɔ má aúgbɔ́ɔ́nya ɛnɛ nɛ̄ ɔnya ɛpɛɛpa gē pi ā le bɛ̄cɛ ŋmá ɔtāhɛ̄ kú aɛ́fu kú ugóolu (oje ɔdɔ) ɛpa.

²Aɔ́nya nɔ̄wá ɛpa bá ī pi Úgbɔ́ɔ́nya kú aflɛ́yí ā. Aɔ́nya nōbí bá ī pi ɔ́mpa ā.

³Aɔ́nya nɛ̄hɛ́ ɛpa bá ī pi ɔ́mɛtá ā. Aɔ́nya o tína poópoó bá gē pi ɔ́mɛɛnɛ ā á.

⁴Usekaríya yɔ̄ ī kɛlā gɔbū kpɔ́ kahíníī, “Anɔ́ɔ n da alelékwū-ōtɛ̄hɔ̄ ā ɔ̄kā ka ɔdí wɛ ɛyí ɔdā nēe bá nyā ā?

⁵Anɔ́ɔ ó tá um ohi ka e géē ga ɔ́kíkā ɛnɛ kú ɔkpáncō ā, é wā bōōbū ŋmá iyɔ̄bū kú Óndú kú odúúdú ɛcɛ ā.

⁶Úgbɔ́ɔ́nya nɛ̄ aɔ́nya nōbí ā gē pi ā gē ga Ubábīlɔn. Aɔ́nya nɛ̄hɛ́ ā bá ī ga ɛnɔ̄ɔ̄nɛ̄, aɔ́nya o tína poópoó ā bá ī ga ɛháajɛ.

⁷Abɔ̄ aɔ́nya o tína poópoó ā le pɛ́ wɛ̄ɛcɛ ā, é bá ī nwúleyīkwū kéē nyɔ̄ í jila ɛcɛ ā. Anɔ́ɔ alelékwū-ōtɛ̄hɔ̄ ā da uwá kéē nyɔ̄ í lɛ ɛcɛ jila. Anɔ́ɔ é le yɛ nyɔ̄ í le ɛcɛ jila á.

⁸Anɔ́ɔ alelékwū-ōtɛ̄hɔ̄ ā le ɔkɔ cɛyí kɛlā gā um ka aɔ́nya nēe bū ɛhíícō ga Ubábīlɔn ā le ícɔ̄nū kú Óndú ā tú wāajɛ abɔ́ɔ ɛɛ́.”

⁹Anɔ́ɔ Óndú ā klla kɛlā gā um kpɔ́ ka,

¹⁰“Kwú aɛ́hi nɛ̄ Uhɛ́lidāyi. Utóbīja, mɛ́mla Ujɛdáya bī wā ú, kú ā nyɔ̄ bōōbū ga ɔlɛ́ Ujosáya, ɔyí kú Usafɛníya. Odúúdú ācɛ nēe bá nyā pīyɛyí ŋmá Ubábīlɔn ɛɛ́.

¹¹Kwú oje nɛ̄hɛ́ mɛ́mla ugóolu (oje ɔdɔ) nēé kpó gā uwɔ ā, a lɛ ɔflla yá ŋmá anú, cɛ́ɛ́ a kwú ɔ̄ ú kwu otrɛ̄yí kú ācogwɛ́ɛya, Ujóssuwa, ɔyí kú Ujehósādāki ā ɛyí.

¹²Cɛ́ɛ́ a da ɔ́ ka Óndú ā nōo lɔfú fíyɛ́ dúú ā ka ɔ̄cɛ nēé hī ka “Ābɔ̄” ā géē jɛ̄ gɔbū monómonó ɛga nɛ̄ ó yɔ̄ ā mɛ́mla ɛga nɛ̄ ó gáā tū Agblīihɔ-nɛ̄hi kú Óndú ā gwó igbɔhá ā.

¹³Anú ā wɛ ɔ̄cɛ nōo gáā gwó Agblīihɔ-nɛ̄hi ā klla í mīyɛ ojīlīmā nōo cíkā lɛ ɔcɛ́ á. Ó klla géē gbō ācɛ ɔlɛ́ nū. Ɔ̄cogwɛ́ɛya ā géē háyi iyɔ̄bū ‘Akpa’ kú ɔcɛ́ kú nū. É í yúklɔ́ tɔ̄há lɔhi mla iyī ūwā ɛbɔ́.

¹⁴Ɔflla ā géē wɛ ɔdā ō bī blatū ipú Agblīihɔ-nɛ̄hi kú Óndú ā piyóó. Kóō wɛ ojīlīmā kú Uhɛ́lidáyi[2] Utobíja, Ujedáya mɛ́mla Ujosáya.” [3]

¹⁵Ācɛ nēe lā ɛga oligbó ā géē wā í tá abɔ̄ kú Agblīihɔ-nɛ̄hi kú Óndú ā oōgwó igbɔhá. Eko nēé lɛ Agblīihɔ-nɛ̄hi ā tūgwó igbɔhá ā, aá géē jé ka Óndú, nōo lɔfú fíyɛ́ dúú ā ɔ́ɔ tū um ɛhɔ̄ fu aá. Ɛnyā géē yá ɔ́dāŋ nē aá lɛyítáajɛ lɛ odúúdú íne kú Óndú, Ɔwɔicō kú aá.