Read idoma USAKARÍYA 7 Bible Online

USAKARÍYA 7 - idoma bible

USAKARÍYA 7

¹Ipú ɛ̄cī ɛnɛ kú ɔyā ahāanɛ nōo wɛ ɔyā nēé hī ka ‘Ukísilēfu’ kú ipú iháyí ɔ́mɛɛnɛ nɛ̄ Udáriyɔ̄si wɛ ɔcɛ́nɛ̄hi ā, Óndú kɛlā lɛ Usekaríya ka.

²ācɛ kú Ubɛ́tɛlu lɛ Ussɛrɛ́sa mɛ́mla Uregɛmɛ́lɛ̄ki mɛ́mla ācɛ ɔlɛ́ uwā tɛ̄hɔ̄ ga ipú Agblīihɔ-nɛ̄hi kú Óndú ā kéē gbɔ̄ɔkɔ lɛ Ɔwɔicō cɛ́ɛ́ kú ō hɔ́hā ce uwá.

³Kéē klla da ɔ̄cogwɛ́ɛya ā mɛ́mla ācomɛ́ɛbɛ ɔ̄kā, ka aá ɔ́ɔ̄ yá ɔtū nōbí ohígbū ō catāajɛ kú Agblīihɔ-nɛ̄hi ā, cɛ́ɛ́ kú aá klla gwū okónu ipú ɔyā ɛhɔ̄ ɛ́gɛ́nɛ̄ aá tɛtɛ húmáyī yá iháyí alɛwa nēe yɛ āā?

⁴Anɔ́ɔ Óndú ā da um kahíníī,

⁵“Le ka lɛ odúúdú ācɛ kú ajɛ ā mɛ́mla ācogwɛ́ɛya ā ka, eko nɛ̄ aá gē gwū okónu gē yá ɔtūnōbí ipú ɔyā ɔ́mɛhɔ̄ mɛ́mla ɔyā ɔ́mahāapa kú ipú iháyí ofɛtá cigwó nēé yɛ nyā, ohígbū um nɛ̄ aá gē gwū okónu á ā?

⁶Eko nɛ̄ aá gē lé gē gwá ā, aá gē lé gē gwá lɛ iyī aá ŋ́ nɛɛ?”

⁷Ɛ̄nyā wɛ ɔdā nɛ̄ Óndú ā ka bū okónu kú ācomɛ́ɛbɛ́ nēe bá íkée eko nɛ̄ ācɛ nēe lā Ujerúsālɛm lɛ agbénú nɛ̄hi, nɛ̄ igelī nɛ̄hi kē mu mla ācɛ alɛwa nɛ̄hi. Ācɛ klla lā aígelī nɛ̄ŋcɛ́ nēe bá kwu ɔ́ biílí ā. Ācɛ klla mu aígelī nɛ̄ŋcɛ́ kú ɛháajɛ mɛ́mla ɔpɛ́ kú ɛnɔ̄ɔ̄nɛ̄ ā dúú ā.

⁸Olɛhɔ̄ nɛ̄ Óndú bī gé lɛ Usekaríya yɔ̄ á.

⁹Óndú ā da ɔ́ kahíníī, “Aá kɛpɔ̄ okpaakpa, aá gbonɛnɛ, aá ményinyi ayínɛ́ aá.

¹⁰Aá híī pīya anyōkwū, ayókwū, aógbɛhá mɛ́mla ɔ̄cɛ ɔhá dóódu nōo wɛ ugbɔga nōo lā ɔlɛ́ aá ā tū ŋ́. Aá yá ojuju kú ɔdōbɔ̄bí tū aɔ́mpa aá ŋ́.

¹¹Amáŋ, ācɛ ɔlɛ́ um, tá kéē pó ɛlā nɛ̄ n ka lɛ uwá. Ikɔkɔ ɔ́ɔmā é kwú ɔtū kú uwā í gwū ŋmá ɛgiyí um.

¹²É le ɔtū kú uwā yá lɔfú bɛ̄ɛka ápátɛ́cɔ̄ ā, ohígbū nēé í lɛ ɛlā nɛ̄ n nwū uwā bū okónu kú ācomɛ́ɛbɛ́ kú íkée ā pó.

¹³Abɔ̄ é jāhɔ̄ gā um, eko nɛ̄ n gē kɛlā lɛ uwá ā ŋ́ mā, ń ke jāhɔ̄ lɛ uwá eko nēé gbā um ɛ̄gbā klla gē gbɔ̄ɔkɔ gā um ā gɛ ŋ́ dúú.

¹⁴N le uwá fíyákátā ga ipú ācɛ kú éwɔhá nēé jé jéjéē ɛ́ɛ́ ŋ́, ɛ́gɛ́nɛ̄ ofúlutu ī fíyɛ́ odée ákátā ga ɛga dóódu ā. Ajɛ olɔhi kú ɔlɛ́ uwā má tá áncā, nɛ̄ ɔ̄cɛ dúúmā í lā anú ŋ́.”