Read idoma USAKARÍYA 8 Bible Online

USAKARÍYA 8 - idoma bible

USAKARÍYA 8

¹Óndú ā nōo lɔfú fíyɛ́ dúú ā kɛlā gā um kahíníī,

²“N piyɔtū kú ācɛ Ujerúsālɛm nɛ̄hi. Ihɔtū nɛ̄ n yá tú ācɛ ā, gē cɛ̄ gā um ī cɔ̄nū nɛ̄hi mla aólɛlā kú uwā.”

³Óndú ā klla kahíníī, “N géē cīgbīhi ga ɛgiyí ācɛ Ujerúsālɛm gáā lā ipú ācɛ ā, cɛ́ɛ́ é géē hī ɔlɛ́ uwā ka ɔlɛ́ otīihɔ mɛ́mla ɔlɛ́ kú ācɛ ō cɛ̄ɛ̄lā Ɔwɔicō mɛ́mla ɛfu otīihɔ kú Óndú nōo lɔfú fíyɛ́ dúú ā.

⁴Anyākwɔ́cɛ ācɛnyīlɔ mɛ́mla ācɛnyā nēe le okwutɛ̄ kwaajɛ ohígbū ka é kwú hīla ɛɛ́ mā, géē cīce aúláyi kú Ujerúsālɛm kpɔ́ ɛ́ɛ́.

⁵Ayípɛ̄ nɛ̄ŋcɛ́ ācɛnyīlɔ mɛ́mla ācɛnyā klla géē mu aúláyi kú Ujerúsālɛm bá gē hijā kpɔ́ ɛ́ɛ́.

⁶Ɛ̄nyā géē yā ācɛ nēe hile ā eyījii, abɔ̄ ó géē yá lɛ glá ā, amáŋ ó gáā lɔnɔ tū um ō yá ŋ́.

⁷N géē hɛ́ ācɛ kú um tá ŋmá ipú aɔ́lɛ́ kú ajɛ ɛnɔ̄ɔ̄cī mɛ́mla ɛnɔ̄ɔ̄nɛ̄, nēé kpó uwā nyɔ̄ ā.

⁸N kē í kpó uwā kwúcē wā í lā ipú Ujerúsālɛm ŋmá ajɛ ɛnɔ̄ɔ̄cī mɛ́mla ɛnɔ̄ɔ̄nɛ̄. É géē wɛ ācɛ ɔlɛ́ um, n kē í wɛ Ɔwɔicō kú uwā, kú n̄ gbō uwā ɔwɛ ɔ̄kwɔ̄ɔ̄kwɛ̄yi mɛ́mla okpaakpa.”

⁹Óndú nōo lɔfú fíyɛ́ dúú ā klla kahíníī, “Aá lɔfú tīīyē. Aá yɔ̄ ī pó ɛdɔ ɛlā éékpó nɛ̄ ācomɛ́ɛbɛ ka, eko nēé lɛ ikpó kú o túgwó kú Agblīihɔ-nɛ̄hi kú um nyā táajɛ aflɛ́yí ā.

¹⁰Gbɔbū lɛ eko ɔ́ɔmā ā, ɔdā ō je lɛ ācɛ ámāŋ ka aɛ́bɛ́ kú úklɔ́ nēé yá í kōō yɔ̄ ŋ́. Ɔ̄cɛ dúúmā í kē yɔ̄ ɛbɔ́ ŋmá aólɛlā kú nū gɛ ŋ́. Ohígbū ka n cɛ̄ lɛ ācɛ kéē lɛyí gbɛyí mla ɔ́mpa uwā.

¹¹Amáŋ, ń gáā yá mla ācɛ kú um, nēe hile nēé kpó ŋmá ɔlɛ́ abɔ̄fú ga ɔfiyɛ ŋ́ mā bɛ̄ɛka ɛ́gɛ́nɛ̄ nɛ̄ n yá mla ācɛ otɛtɛ ā gɛ ŋ́.

¹²Ɔwɔ géē yá lɛ uwá nɛ̄hi. É géē hí ɛhɔ̄ kú uwā, cɛ́ɛ́ é lɛ ɔdɛ̄hɔ̄ kú uwā nyi. Ɔdɛ̄hɔ̄ kú uwā géē yá lɔɔlɔhi. É géē cē ɔdɛ̄hɔ̄ kú uwā ɛbɔ́. Ɔcí ufáyin kú uwā géē gwá. N géē kpó odúúdú aɔ́dā nēe bá nyā lɛ ācɛ ɔlɛ́ um, nēe hile ā.

¹³Ācɛ kú Ísrɛ̄lu mla Ujúda! Eko tɛtɛ ā, aéwo ɔhá gē bī ɔdā nōo yá aá ā lɛ tókónu lɛ iyi uwá ka, ‘Ká ɔdōbɔ̄bí mɛ́mla ífi nōo klá Ísrɛ̄lu mla Ujúda ā kóō wā í klá aá!’ Amáŋ, n géē nya aá tá. Cɛ́ɛ́ aéwo ɔhá ɔ́ɔmā géē da iyī uwā ka, ‘Kéē lɛ ɛdɔ ɔhā ékpónú nēé hɛ́ ce ācɛ Ísrɛ̄lu mɛ́mla ācɛ Ujúda ā hɛ́ ce aá dúú.’ Ohígbū ɔ́ɔmā aá lɛ ɔtū lé, aá híī yúufi ŋ́.”

¹⁴Óndú ā nōo lɔfú fíyɛ́ dúú ā kahíníī, “Eko nɛ̄ aádáádā aá yá um cɔ̄nū ā, n lɛ ífi tútū gbēyī uwā, ń pīya ɔtū kú um abɔ̄ ŋ́ jāā gbéeko nēé le kpó yíífi.

¹⁵Amáŋ, abālɔbányā ā, n yɔ̄ ī tútū ō hɔ́hā ce ācɛ kú Ujerúsālɛm mla Ujúda. Aá yúufi ŋ́.

¹⁶Ɔdā nɛ̄ aá cíkā ō yá ā yɔ̄ á. Aá kɛlā ɔ̄kwɛ̄yi lɛ iyī aá. Aá kɛpɔ̄ okpaakpa únɛ́pɔ̄ lɛ ācɛ nōo géē bī ɛbɔ́ wā

¹⁷Aá yá ojuju ká aá yá aɔ́mpa aá ɔdōbɔ̄bí dúúmā ŋ́. Aá gwá ɔkpá ɛ̄kɛ̄mgbɛ̄ ŋ́. Ohígbū ka ucē nēe bá ā í he um ɔtū ŋ́.”

¹⁸Óndú ā nōo lɔfú fíyɛ́ dúú ā kɛlā nyā lɛ ami Usekaríya kahíníī,

¹⁹“Okónu nɛ̄ aá gē gwū ipú ɔyā ɔ́mɛnɛ, ɔyā ɔ́mɛhɔ̄, ɔyā ɔ́mahāapa mɛ́mla ipú ɔyā ɔ́migwó ā géē le pīya eko kú ucɛ kú éeyē mla ɔtū nɛ̄hɛ́ lɛ ācɛ kú Ujúda. Ohígbū ɔ́ɔmā ɛlā ɔ̄kwɛ̄yi mɛ́mla ɛbɔ́ í he aá ɔtū piíí.”

²⁰Óndú nōo lɔfú fíyɛ́ dúú ā klla ka kpɔ́ kahíníī, “Eko géē wā nɛ̄ ācɛ alɛwa géē ŋmá ipú aígelī nɛ̄hi alɛwa wā Ujerúsālɛm.

²¹Ācɛ nēe ŋmá ipú igelī nɛ̄hi éyi ā géē da ācɛ kú ipú igelī nɛ̄hi ɔhá ka, ‘Ālɔ̄ nyɔ̄ gaá gbā Óndú nōo lɔfú fíyɛ́ dúú ā ɛ̄gbā, cɛ́ɛ́ kú ālɔ̄ klla gbɔ̄ɔkɔ lɛ ɔ́ Ujerúsālɛm, kóō lɛ ɔhá hɛ́ ce alɔ.’

²²Ācɛ alɛwa mɛ́mla aéwo nēe lɔfú nɛ̄hi ā géē wā í gbā Ɔwɔicō nōo lɔfú fíyɛ́ dúú ā ɛ̄gbā Ujerúsālɛm. É klla kē í gbɔ̄ɔkɔ lɛ ɔ́ kóō lɛ ɔhá hɛ́ ce uwá.

²³Ɛ̄cī ɔ́ɔmā, ācɛ kú aéwo ɔhá igwó géē wā ɛgiyí ɔ̄cɛ Ujíyu ékpónú gaá lɛ abɔ̄ bī okónōgwu kú awulú kú nū, géē da ɔ́, ‘Ká ālɔ̄ nyɔ̄ mla awɔ, ohígbū ka alɔ le pó ka Ɔwɔicō yɔ̄ mla awɔ.’”