Read idoma USAKARÍYA 9 Bible Online

USAKARÍYA 9 - idoma bible

USAKARÍYA 9

¹ Ɛ̄nyā wɛ olɛhɔ̄ kú Óndú ā á. Ó le italā nɛ̄ ó í yá ajɛ kú Uhádirāki mɛ́mla igelī kú Udamáskɔ̄si ā ka tɛ́ɛcɛ ɛɛ́. Eyī kú Óndú ā kwu odúúdú alɛɛcɛ ɛ́gɛ́nɛ̄ ó kwú odúúdú aípɔ́ɔma kú Ísrɛ̄lu dúú ā.

²Uhámāti nōo tū ɛjī kwu Uhádirāki ā wɛ ákú nū dúú. Ɛ́gɔ́ɔmā nɛ̄ ó wɛ lɛ aígelī nɛ̄hi kú Utáya mɛ́mla Usídɔn, nēe jéeyī nɛ̄hi ā.

³Ācɛ Utáya le igá o lɔfú kú ɔdɔ hɛ́ yɛ jīla iyī uwā tá. É le oje nɛ̄hɛ́ mɛ́mla ugóolu (oje ɔdɔ) tīkwū bá bɛ̄ɛka ɛ́gɛ́nɛ̄ úmúlá gē bá ajɛ ipú úláyi ā.

⁴Amáŋ, Óndú ā géē mīyɛ ɔdā dóódu nēé lɛ ā. Ó géē kpó agbénú kú uwa tɛ́cɔ̄ tū ipú ísu. É kē í je igelī nɛ̄hi ā yɔlá tā ajɛ.

⁵Ācɛ kú Áskɛ̄lɔn ā í má ɛ̄nyā klla í yúufi. Ācɛ Ugása dúú ā géē hīla ayīnu ipú ɔnɔ nɛ̄hi nēé í yɔ̄ ī jé ā. Ɛ́gɔ́ɔmā nɛ̄ ó géē wɛ lɛ ācɛ Ékrɔn dúú á. Eyīyōce kú uwā géē je pīya áncā. É í ŋmó ɔcɛ́ kú Ugása. Áskɛ̄lɔn géē je pīya ipú alácɛ̄, ohígbū ka ɔ̄cɛ dúúmā í gáā hile ipú nū gɛ ŋ́.

⁶Ācɛ kú éwɔhá o pɔ́há ipú géē lā Ássidɔ̄du. Óndú ā kahíníī, “N géē yá kú ɔbɔ́ɔ́cɛ nɛ̄ ācɛ Ufilístiya gē yá ā kóō mɛ.

⁷É klla gáā lé ɛbɛ́ nɛ̄ oyī yɔ̄ anú ámāŋ ka ɔdōlé elihɔ ā ɛ́ɛ́ gɛ ŋ́. Odúúdú ācɛ o hile kú uwā ā géē je kpó pīya ācɛ ɔlɛ́ um. É géē lɛbɛ̄ɛka ipɔ́ɔma éyi kú Ujúda ā ipú eyī kú um. Ācɛ kú Ékrɔn géē je pīya ācɛ ɔlɛ́ um, ɛ́gɛ́nɛ̄ ācɛ Ujébusi lɛ ā[4]

⁸N géē gbɔ́ɔ ō gbāajɛ ɔlɛ́ um, nɛ̄ ń gáā cɛ̄ lɛ aícɔ́ɔja yɛ ipú nū ɛ́ɛ́ gɛ ŋ́. Ń gáā cɛ̄ lɛ ācobɔ̄bíipú ā lɛ abɔ̄ da ācɛ ɔlɛ́ um ɛyí tāajɛ ɛ́ɛ́ gɛ ŋ́. Ohígbū ka n lɛ ɛ́gɛ́nɛ̄ ācɛ ɔlɛ́ um móōwē lɛ ā má ɛɛ́.”

⁹Aá gwéeyē nɛ̄ɛ̄nɛ̄hi odúúdú ācɛ kú Usáyɔn! Aá dɛ̄gba gbōmgbōm, aá, nēe wɛ ācɛ kú Ujerúsālɛm ā! Má ɔ̄, ɔcɛ́ kú aá gē wā ɛgiyí aá ɛɛ́. O le yálé klla yɔ̄ ī gbogwú wā ɛɛ́. Amáŋ ó lɛ iyīnū tú wāajɛ klla gbonɛnɛ, abɔ̄ ó yɔ̄ ī ce ijakī wā a. Ó ce ɔyí ijakī.

¹⁰Óndú ā kahíníī, “N géē kpó aúgbɔ́ɔnyā o kpɛ́fú bónū ŋmá Ísrɛ̄lu. N klla í kpó aɔ́nya o kpɛ́fú ŋmá Ujerúsālɛm bónū dúú. N géē kpó aɔ́tā ō bī kpɛ́fú yíífi ŋmá ajɛ. Ɔcɛ́ kú aá géē ka aéwo kú ipú ɛcɛ nyā gwó, cɛ́ɛ́ kéē bá ɛbɔ́. Ó géē gbāajɛ ŋmá ísu éyi ga ísu ɔhá. Ó klla í gbāajɛ ŋmá Uyúfarétīisi ā ga oŋmɛ́yí kú ɛcɛ kpátáá ā.”

¹¹Óndú ā ka, ohígbū ɛka nɛ̄ anúɔ gbo lɛ uwá, nɛ̄ oyī kú ɛbɛ́ nēé le gwɛ́ɛya ā kwú pīya bɛ̄ɛka ɔja nēé ja klá ɛka āā. Ó ka anúɔ géē hɛ́ ācɛ ɔlɛ́ nū tá ŋmá ipú agbá kú ajɛ ɔfiyɛ nɛ̄ ó tīile ŋ́ bɛ̄ɛka obugā nɛ̄ ó lɛ éŋkpɔ̄ ŋ́ mā.

¹²Aá pīyɛyí wā ɛga nɛ̄ aá géē lā ɛbɔ́ ā. Aá nēe bá ajɛ kú ɔfiyɛ, nēe lɛ eyīyōce ā. N da aá abālɔbányā, ka n géē cíla aá ulé kú ífi kú aá ɔ́klá ɛpa! N klla í hɔ́hā ce aá ohígbū odúúdú ōwē nɛ̄ aá má ā.

¹³N géē bī Ujúda mɛ́mla Ísrɛ̄lu yúklɔ́ bɛ̄ɛka ɔtā kú ícɔ́ɔ́ja ā, n géē bī Ísrɛ̄lu yúklɔ́ bɛ̄ɛka aɔ́yī ā. N géē bī ācɛ kú Usáyɔn yúklɔ́ bɛ̄ɛka ɔkpacaŋ́gelī ā, kéē nuunu tá ācɛ kú Ugríisi.”

¹⁴Óndú ā géē hɛ́bɛ̄cɛ icō kú ācɛ ɔlɛ́ nū bɛ̄ɛka ojuja ā. Ó géē tá ɔyī kú nū bɛ̄ɛka ɔwɔ o límanya ā. Óndú, Ɔwɔicō géē dɛ̄ bɛ́ɛka opo nēé yɔ̄ ī tá ā. Ó géē bɛ́yíkwu aólɛlā kú nū bɛ̄ɛka ofúlutu nōo ŋmá ɛháajɛ.

¹⁵Óndú, nōo lɔfú fíyɛ́ dúú ā géē gbo ācɛ ɔlɛ́ nū. Cɛ́ɛ́ é géē kpó aólɛlā kú uwā nēē tá ítū mɛ́mla ɔyī lɛ uwá ā yíífi. É géē bá ī gbogwú ɔgbɛ́fú bɛ̄ɛka ɔ̄cɛ nɛ̄ ejé lɛ ɔ́ kwú ā, abɔ̄ é géē bá ī ŋmó aólɛlā kú uwā ā. Oyī kú ācɛ nēé géē yɔ̄ ī ŋmó ā, géē yɔ̄ ī pɛ́ cɛnyi ŋmá uwá iyē bɛ̄ɛka oyī kú ɛya nēé gwó, nōo le mu ocíbú cɛnyi ā. Ó klla í lɛbɛ̄ɛka oyī nōo ī pɛ́ klá ɛyí ede ā.

¹⁶Eko nɛ̄ ɛ̄cī ɔ́ɔmā gā ā, Óndú ā géē nya ācɛ ɔlɛ́ nū tá, lɛbɛ̄ɛka ɛ́gɛ́nɛ̄ ɔ̄cogbāálá gē nya álá kú nū tá ŋmá ikwū ā. É géē bá ī ceyī ipú abɔ̄ kú Óndú ā ipú ajɛ kú nū bɛ̄ɛka ɛcɔ̄ o gbɔɔ́lá kú ɔfulā kú ɔcɛ́ ā.

¹⁷Ɛ́gɛ́nyā nɛ̄ ɛgahi kú ajɛ ā gáā lɛ á! Aklóbīya mla áncɛ́nyā géē bá ī jɛ̄ lɔfú ŋmá o lé ɔdōlé kú īkpɔ̄dɛ̄hɔ̄ mɛ́mla ejé nēé í gwá ā.