Read idoma UMÁLAKĀYI 1 Bible Online

UMÁLAKĀYI 1 - idoma bible

UMÁLAKĀYI 1

¹Ɛ̄nyā wɛ olɛhɔ̄ kú Óndú ā nɛ̄ ó ka lɛ Umálakāyi, kóō cɛ̄ lɛ ācɛ kú Ísrɛ̄lu.

² Óndú ā da ācɛ ɔlɛ́ nū ka anúɔ kē húmáyī yíihɔtū tá uwā. Amáŋ é da ɔ́ ɔ̄kā ka, ɛ́gɛ́nyā nɔ́ɔ yíihɔtū tá aá lɛ ā? Óndú ā tá ūwā ohi ka Ísɔ ɔ́ɔ wɛ ɔyínɛ́ kú Ujékɔ̄pu ŋ́ nɛɛ? Nááná Ujékɔ̄pu nɛ̄ anúɔ yíihɔtū tá ɔ̄ á.

³Ó ka amáŋ Ísɔ mɛ́mla aípɔ́ɔma kú nū í he anúɔ ɔtū ŋ́. Ó ka anúɔ kwú ɔlɛ́ kú ɛyí ɛfu kú nū ā gblífi, klla cɛ̄ lɛ ɔ́ má tá alácɛ̄ lɛ ɔgwú kú ipú ígbíli kéē lā anú.

⁴Ɔ́dāŋ́ ka ācɛ kú Ɛ́dɔm, ipɔ́ɔma kú Ísɔ ā kahíníī, “É le aígelī nɛ̄ŋ́cɛ́ kú alɔ catāajɛ, amáŋ alɔ klla í tū ɔ̄ gwó igbɔhá ɛ́ɛ́.” Óndú ā í tá uwā ohi kahíníī, “Kéē lɛ uwá tū gwó igbɔhá mɛ́ɛ́nɛ, amáŋ n géē kpó uwā wúla tāajɛ jāā gbéeko nɛ̄ aéwɔhá gbɔɔ́ ō hī uwā ka ācobɔ̄bíipú, mla ‘éwo nɛ̄ Óndú ā le cɔ̄nū mla uwá piyóó.’”

⁵Umálakāyi ka ācɛ kú Ísrɛ̄lu géē má ɛ̄nyā eyī abɔ̄yī uwā, cɛ́ɛ́ é géē ka kahíníī, “Óndú ā lɔfú nɛ̄hi, ō kōō ipú ajɛ kú Ísrɛ̄lu ŋ́ nááná.”

⁶Ó ka Óndú ā nōo lɔfú fíyɛ́ dúú ā da ācogwɛ́ɛya ā kahíníī, “Ɔyí gē lɛ ojīlīmā ce ádā nū. Ɔfiyɛ gē lɛ ojīlīmā ce óndú nū. Ɔ́dāŋ́ ka ami wɛ ádā aá á nɛɛ, ɔdíyá nɛ̄ aá lɛ ojīlīmā ce um ŋ́ mā ā? Aá le eyī gwō um bónū, nááná, aá gē da um ɔ̄kā ka ɔwɛ nyá nɛ̄ alɔ gē le eyī gwū uwɔ bónū āa?’’

⁷Ó ka Óndú ā da uwá ka ɛ́ɛ nyā anúɔ ojīlīmā, o ŋmá lɛ ɔdōlé icííci nēé gē bī wā í le gwɛ́ɛya ɛyí ede kú anúɔ ā. Anɔ́ɔ ācɛ ā dɔɔ̄kā kahíníī, “Ɔwɛ nyá nɛ̄ alɔ nyí uwɔ ojīlīmā ā?” Óndú ā ka anúɔ géē da uwá ka, o ŋmá lɛ ojīlīmā nēé le ce ede kú anúɔ ŋ́ mā.

⁸Óndú ā ka, eko nɛ́ɛ gē bī ɛbɛ́ nōo le eyī pu mɛ́mla ɛbɛ́ o nyɔ́nyí mɛ́mla ɛbɛ́ ō doōcē wā í le gwɛ́ɛya lɛ anúɔ ā, ɔ́ɔmā ɔ́ɔ wɛ ɔdōbɔ̄bí ŋ́ kpɔ́ɔ̄? Ó keé kwú ɛdɔ ɛbɛ́ nēé gē bī gé lɛ anúɔ ā ú lɛ igbómína kú ūwā, ɔtū ɔ́ɔ géē he ɔ́ nɔ́ɔ géē ka olɔhi kú ūwā āa?

⁹Ɔwɛ ékpó ɔ́ɔmā, aá kōō lɛ ɛbɛ́ yá Ɔwɔicō, cɛ́ɛ́ kú aá kwú ɛdɔ kú ɛhi ɛ́gɔ́ɔmā ú lɛ ɔ́, o yá ɛ́ɛ́ kú aá téeyī olɔhi kú nū. Aá gbɛlá ka ó géē yá ɔdā olɔhi lɛ aá mɛ́ɛ̄ nɛɛ? Óndú ā nōo lɔfú fíyɛ́ dúú ā, ka anúɔ í gáā yá ɔdā olɔhi lɛ aá ŋ́.

¹⁰Óndú ā nōo lɔfú fíyɛ́ dúú ā kahíníī, “Eyī yá um kú ɔ̄cɛ éyi kóō lɛ ɔwɛ kú Agblīihɔ-nɛ̄hi kú um gwū, o yá ɛ́ɛ́ kú ɔ̄cɛ dúú kóō nyɔ̄ í gwɛ́ɛya kú ɔdā icííci ɔ́ɔmā ɛyí ede kú um ŋ́. Ɔtū aá í he um ŋ́. Ń kē gaá mīyɛ ɔdā ɛ̄gbā nɛ̄ aá bī gé um ɔ́ɔmā ŋ́.”

¹¹Óndú ā ka ācɛ o ŋmá ɔ́kíkā éyi kú ɛcɛ ā ga ɔ́kíkā ɔhá ā ɛ́ɛ gē lɛ ojīlīmā ce anúɔ. Anɔ́ɔ ó klla ka ɛga dóódu, ācɛ ɛ́ɛ gē fú ɔtulalī tū ɔlá lɛ anúɔ, ɛ́ɛ klla gē gwɛ́ɛya ɛdɔ ɛya nēe he anúɔ ɔtū ā lɛ anúɔ. Odúúdú ūwā ɛ́ɛ gē lɛ ojīlīmā ce anúɔ.

¹²Óndú ā ka amáŋ, ɛ́ɛ gē nyí anúɔ ojīlīmā, eko nēé gē ka ka ede kú anúɔ ɔ́ɔ́ wɛ ɔdā dúúmā ŋ́, anɔ́ɔ ɛ́ɛ gē je ɔdōlé nɛ̄ uwā abɔ̄yī ūwā í cē lé ŋ́ mā gwɛ́ɛya ɛyí ede ā.

¹³Óndú ā ka ka é bá ī ka klla bá ī cɛ̄nwū lé lɛ anúɔ. É ka aɔ́dā nēe bá ā, le jɛ̄ aá ɛ̄jɛ̄ ɛɛ́. Óndú ā ka, é gē bī aɛ́bɛ́ nēé kpó uwī ámāŋ aɛ́nɛ̄ o gē doōcē mɛ́mla aɛ́nɛ̄, wɛ o cīikpó ā, wā í lɛ gwɛ́ɛya lɛ anúɔ. Ó ka ka ɛ́ɛ gbɛlá ka anúɔ géē mīyɛ ɔdā ɛ́gɔ́ɔmā ŋmá ɛgiyí ūwā nɛɛ?

¹⁴Óndú ā ka, Ohóō ɔ́ɔ yɔ̄ lɛ ɔ̄cɛ nōo gē pīya anúɔ tū, o ŋmá lɛ o bī ɛbɛ́ icííci wā í lɛ gwɛ́ɛya lɛ anúɔ, nááná nɛ̄ ó lɛ ɛbɛ́ olɔhi nɔ́ɔ le hɛ́ anúɔ oji ā. Ó ka anúɔ wɛ ɔcɛ́ nɛ̄hi nɛ̄ odúúdú ācɛ kú ipú ɛcɛ gē yúufi anúɔ.