Read idoma UMÁLAKĀYI 2 Bible Online

UMÁLAKĀYI 2 - idoma bible

UMÁLAKĀYI 2

¹Óndú ā nōo lɔfú fíyɛ́ dúú ā da ācogwɛ́ɛya ā kahíníī, “Íne nyā wɛ ákú aá.

²Aá géē lɛ ojīlīmā ce um piíí, ŋmá lɛ ɔdā nɛ̄ aá gē yá ā. Ɔ́dāŋ́ ka aá jāhɔ̄ lɛ ɛlā nɛ̄ n gē ka ā ŋ́, n géē tókónu lɛ aá. Cɛ́ɛ́, aɔ́dā nɛ̄ aá gē mīyɛ ŋmá ɛgiyí um kóō tá aá abɔ̄ ā, kóō híī tīile lɛ aá gɛ ŋ́. Ohígbū ka aá je íne kú um koó wɛ ɔdā dúú ŋ́.

³N géē yá ayí aá italā klla í lɛ ácílubu kú ɛbɛ́ nɛ̄ aá gē bī le gwɛ́ɛya ā nyā aá eyī. N klla géē nū aá bɛ̄cɛ ga ɛga nēé gē pīya ácílubu kú ɛbɛ́ bónū ā.

⁴Cɛ́ɛ́, aá géē jé ka ami ɔ́ɔ je íne ā lɛ aá á. Cɛ́ɛ́ kú ɛka nɛ̄ n gbo lɛ ācogwɛ́ɛya, ayí kú Ulífāyi ā, kóō híīī bīya ŋ́. Ami, Óndú ā ka á.

⁵Ipú ɛka nɛ̄ n gbō lɛ ayí kú Ulífāyi ā, n cokónu ka n géē je oyēeyī olɔhi lɛ uwá. N je ɛ̄nyā lɛ uwá, cɛ́ɛ́ kéē lɛ ojīlīmā ce um. Eko ɔ́ɔmā, é kē le ojīlīmā ce um klla yúufi um

⁶É nwú ācɛ ā ɔdā nēe le kpaakpa ā, é nwū uwā ɔdōbɔ̄bí ŋ́. É lā ɛbɔ́ mla um. Abɔ̄ nɛ̄ uwá abɔ̄yī uwā gē yá ɔdā olɔhi ā, é klla gē tá ācɛ alɛwa abɔ̄ kéē pīyabɔ̄ ŋmá íne nēé bīya ā.

⁷Ó wɛ úklɔ́ kú ācogwɛ́ɛya ā kéē nwū ācɛ ā ɔdā nēé jé lɛyíkwu Ɔwɔicō ā. Ācɛ kéē ga ɛgiyí uwā gaá klɔ́ɔcɛ̄ ɔdā nɛ̄ n miya lɛ uwá ā. Ohígbū ka é wɛ ācocɛ̄hɔ̄ kú ami nōo wɛ Óndu, nōo lɔfú fíyɛ́ dúú ā nɛ.

⁸Amáŋ, abālɔbányā, aá nēe wɛ ācogwɛ́ɛya ā, kwú eyī ú pīya ŋmá ɔwɛ okpaakpa ā ɛɛ́. Ɔdā nɛ̄ aá yɔ̄ ī nwū ā, cɛ̄ lɛ ācɛ alɛwa gbɔɔ́ ō yá ɔdōbɔ̄bí ɛɛ́. Aá le ɛka nɛ̄ n gbo mla aá ā nyílá ɛɛ́.

⁹Ohígbū ɔ́ɔmā ā, n géē yá ācɛ kú Ísrɛ̄lu kéē lɛ eyī gwū aá bónū, ohígbū ka aá lɛyítáajɛ lɛ ɛlā kú um ŋ́. Eko nɛ̄ aá ī nwū odée nɛɛ, aá gē je ɔ̄cɛ éyi fíyɛ́ ɔ̄cɛ ɔhá.”

¹⁰Umálakāyi kahíníī, “Odúúdú alɔ í lɛ ádā ékpónú ŋ́ nɛɛ? Ó wɛ Ɔwɔicō ékpónú ā yá alɔ ā ŋ́ nɛɛ? Ɔdíyá ɛ́ɛ́ nɛ̄ alɔ gē bīya okónu nɛ̄ alɔ ce lɛ iyī alɔ ā?

¹¹Ācɛ kú Ujúda lɛ okónu nēé ce lɛ Ɔwɔicō ā nyílá ɛɛ́. É klla lɛ ɔdōbɔ̄bí nɛ̄hi yá Ujerúsālɛm mɛ́mla odúúdú ajɛ ā. É klla lɛ Agblīihɔ-nɛ̄hi kú Óndú ā, nōo he Óndú ā ɔtū ā nyílá. Ācɛ klla le anyā nēe ī gbā ɔwɔ kú aéwo ɔhá ɛ̄gbā ā kpó lɛ ɛɛ́.

¹²Ó klla ka Óndú ā kóō lɛ ɛdɔ ācɛ nēe gē yá ɔdā ɛ́gɛ́nyā ā, ɔkwu fu ŋmá ipú ójīla kú Ísrɛ̄lu, cɛ́ɛ́ kóō híī cɛ̄ lɛ uwá wā í gwɛ́ɛya lɛ anú nōo wɛ Óndú nōo lɔfú fíyɛ́ dúú ā ɛ́ɛ́ gɛ ŋ́.

¹³Ó klla da uwá ka ɔdā ɔhá nēé yá ā, wɛ o le ɛyí ede kú Óndú ā mu mla agīje. Ó ka é klla bá ī jikwū, ī tɛ̄gíkwū, ohígbū ka Óndú ā í mīyɛ ɔdā ɛ̄gbā, nēé bī wā ā, ŋmá abɔ̄ kú ūwā ɛ́ɛ́ gɛ ŋ́.

¹⁴Aá gē dɔɔ̄kā ɔdā nōo yá ɛ́ɛ́ nɛ̄ Óndú ā í mīyɛ ɛya nɛ̄ aá gwó ā ŋ́ má ā? Ó wɛ ohígbū ka Óndú ā jé ka okónu nɛ̄ aá ce lɛ ɔnyā ɔ̄cī kú aá ā, aá lɛ ɔ́ nyílá ɛɛ́. Ɔnyā aá ā wɛ obíyē kú aá á, amáŋ okónu nɛ̄ aá ce lɛ uwá ā, aá lɛ ɔ́ bīya, nááná nɛ̄ aá cokónu ipéyī Ɔwɔicō, ka aá géē lɛ iyī aá tū cíí lɛ ɔnyā aá ā.

¹⁵Ó da uwá ka Ɔwɔicō ɔ́ɔ yá uwɔ mɛ́mla ɔnyā uwɔ ɔkpíyē ékpónú mla alelékwū ékpónú ŋ́ nɛɛ? Ɔdí nɛ̄ ó bī ɔtū lɛyíkwu ɛ̄nyā āa? Ó ka ɔ́ɔ wɛ ohígbū kéē ma ɛdɔ ayí nēe í wɛ ācɛ ɔlɛ́ Ɔwɔicō ɔkwɔ̄ɔ̄kwɛ̄yi ā. Ó ka ohígbū ɔ́ɔmā, é híī cɛ̄ lɛ ācɛ dúúmā nyíla okónu nɛ̄ ó ce lɛ ɔnyā nū ā ŋ́.

¹⁶Óndú ā nōo wɛ Ɔwɔicō kú Ísrɛ̄lu ā kahíníī, ‘‘Ɔnyā mɛ́mla ɔbá oōtá gē wú um ɔtū. Ó gē wú um ɔtū eko nɛ̄ ɔ̄cɛ dúúmā kú aá lɛ ucē ɔ́bíipú ɛ́gɔ́ɔmā yá tá ɔnya nū. Aá lɔfú tīiyē kú aá híī nyíla okónu nɛ̄ aá ce le ɔnyā aá ka aá géē bá cíí ā ŋ́.”

¹⁷Umálakāyi da uwá ka ɛ́ɛ cɛ̄ lɛ ɛ̄jɛ̄ le jɛ̄ Óndú ā ohígbū ɛlā ō ka kú ūwā ā ɛɛ́. Amáŋ, ɛ́ɛ dɔɔ̄ka kahíníī, “Ɔwɛ nyá nɛ̄ alɔ cɛ̄ lɛ ɛ̄jɛ̄ jɛ̄ Óndú ā ā?” Ó da uwá ka o ŋmá lɛ ɛlā nɛ́ɛ ka ka Óndú nōo lɔfú fíyɛ́ dúú ā, ɔ́ɔ gbɛlá ka odúúdú ācɛ o yá ɔdōbɔ̄bí ā lɔhi. É klla ka ka ɔ́ɔ wɛ ɛlā ɔkwɔ̄ɔ̄kwɛ̄yi ka ācɛ o yá ɔdōbɔ̄bí ā he Óndú ā ɔtū. Ámāŋ ɔ̄kā nɛ̄ aá gē da kahíníī, “Iní nɛ̄ Ɔwɔicō nɔ́ɔ cíkā ō hɛ́pɔ okpaakpa ā yɔ̄ ā?”