Read idoma UMÁLAKĀYI 3 Bible Online

UMÁLAKĀYI 3 - idoma bible

UMÁLAKĀYI 3

¹Óndú ā nōo lɔfú fíyɛ́ dúú ā tóohi kahíníī, “N géē tū ɔ̄cocɛ̄hɔ̄ kú um wā gaá tá ɔwɛ tū gā um. Cɛ́ɛ́ Óndú ā nɛ̄ aá lɛ eyī táajɛ nū ā géē wā ipú Agblīihɔ-nɛ̄hi kú nū acígilí. Cɛ́ɛ́ ɔ̄cocɛ̄hɔ̄ nɛ̄ aá húmáyī lɛ eyī ce ā, géē wā í tɔ́ɔna kú okónu nɛ̄ n ce ā.”

²Amáŋ, ɔ̄nyɛ géē lɔfú lɔtū ɛ̄cī nɛ̄ ó í wā ɔ́ɔmā glá ā? Ɔ̄nyɛ lɔfú yēeyī ɛ̄cī nɛ̄ ó í wā ā glá āā? Ohígbū ka ó géē lɛbɛ̄ɛka ukwɔ olɔfú nōo ī na īlī yēēŋēē ā, ámāŋ ka ɔlá nōo gē na oje yɔ̄ŋɔ̄ɔ̄ ā.

³Ó géē wā í kɛpɔ̄ kú ācɛ ɛ́gɛ́nɛ̄ onɔwá, gē na oje nɛ̄hɛ́ amáŋ ka ugóolu (oje ɔdɔ) péee ā. Ɛ́gɔ́ɔmā nɛ̄ ó géē gwu ācogwɛ́ɛya ā iyē klla í na uwá mɛ́mla ayí kú Ulífāyi péee lɛ á. Jāā gbéeko nēé gbɔɔ́ ō gwɛ́ɛya okpaakpa lɛ Óndú ā.

⁴Cɛ́ɛ́ ɛya nɛ̄ ācɛ kú Ujúda mɛ́mla ācɛ kú Ujerúsālɛm ā géē wā í gwó ā í he Óndú ā ɔtū, bɛ̄ɛka ɛ́gɛ́nɛ̄ ó tɛtɛ he ɔ́ ɔtū íkée ā.

⁵Óndú ā nōo lɔfú fíyɛ́ dúú ā kahíníī, “N géē wā ipú aá, cɛ́ɛ́ kú n kɛpɔ̄ tū aá. N géē cɛ̄ ijáalí tū ācoyíimabɔ̄, ācɛ ogbaajā, ācɛ ocīijáalí ɛ̄kɛ̄mgbɛ̄ tū ācɛ ɔhá, ācɛ nēe gē hɛ́ ācɛ nēe gē yúklɔ́ lɛ uwá lé ā, mɛ́mla ācɛ nēe gē pīya anyōkwū mɛ́mla ayókwū tū ā. Mɛ́mla ācɛ o yá aúgbɔga ɔdōbɔ̄bí, mɛ́mla odúúdú ācɛ nēé lɛ ojīlīmā ce um ŋ́ mā.”

⁶Óndú ā kahíníī, “Ami wɛ Óndú á, ń gē pīyabɔ̄ ŋ́. Ohígbū ɔ́ɔmā ā, é kpó aá, nēe wɛ ipɔ́ɔma kú Ujékɔ̄pu ā, yíífi dúúdú ɛ́ɛ́ ŋ́.

⁷Aá lɛbɛ̄ɛka aádáádā aá, aá kwú pīyeyí ŋmá ɔwɛ kú um, klla i lɛ íne kú um tū ɛ́ɛ́ gɛ ŋ́. Aá le pīyeyī wā ɛgiyí um, cɛ́ɛ́ kú n̄ kē lɛ pīyeyī wā ɛgiyí aá. Amáŋ aá gē dɔɔ̄kā kahíníī, ‘Ɔdí nɛ̄ alɔ géē yá ɛ́ɛ́ kú ālɔ̄ pīyeyī wā ɛgiyí uwɔ ā?’

⁸N da aá ɔ̄kā ka, ó lɛ kpaakpa kú ɔcɛ kóō pīya Ɔwɔicō tū nɛɛ? Nááná aá bá ī pīya um tū. Aá gē dɔɔ̄kā ka, ɔwɛ nyá nɛ̄ alɔ gē pīya uwɔ tū ā? Aá ī pīya um tū ipú ɛ̄gbā kú éyi ŋmá ipú igwó kú aá, mɛ́mla ɛya nɛ̄ aá gē gwó ā.

⁹N le okónu tá lɛ odúúdú aá. Ohígbū ka odúúdú aéwo ā bá ī pīya um tū.

¹⁰Aá lɛ ɛ̄gbā kú éyi ŋmá ipú igwó kú aá kpó wā ipú inu o kpó iyó tū jōōjīla, cɛ́ɛ́ ká ɔdōlé kóō yɔ̄ ipú inu kú um. Cɛ́ɛ́ aá lɛ um jáamá kú aá má ɔ̄, n géē nwūla uwíndo kú ɔkpáncō, cɛ́ɛ́ ká n̄ cē ɛhi mɛ́mla ɔhā kú um klá aá Cabácabá

¹¹Ń gaá cɛ̄ lɛ ɔdā dúúmā je ɔdɛ̄hɔ̄ kú aá kpó yíífi ŋ́. Ɔcí kú ufáyin kú aá géē gwá nɛ̄hi.

¹²Cɛ́ɛ́ odúúdú ācɛ kú ɛcɛ géē hī aá ka ācɛ ogwéeyē nēé lɛ ɔhā hɛ́ ce uwá. Ohígbū ka ajɛ kú aá géē je pīya ɛga olɔhi nɛ̄ ācɛ í lā.”

¹³Óndú ā ka ɛ́ɛ húmáyī kɛlā obɔbí alɛwa tá anúɔ, amáŋ, ɛ́ɛ gē dɔɔ̄kā ka, ɛlā obɔbí nyā nɛ̄ aá ka tá ɔ̄ ā?

¹⁴Aá gé ka ka ɔtū nɛ̄ aá kpó ce Ɔwɔicō mɛ́mla ɛ̄gbā nɛ̄ aá gē gbā ɔ̄ ā, ɔɔ́ wɛ áncā. É ka ɔdí ɔ́ɔ wɛ itene kú íne kú nū nɛ̄ aá gē lɛ tū ā, ámāŋ ka, o mafú lɛ ɔ́ ka alɔ hīíjémā kú ɔdā nɛ̄ alɔ yá ā.

¹⁵Ācɛ ā klla kahíníī, “Alɔ le má ka ācɛ o yɔ́bɔ́ɔ́cɛ ā, nɛ̄ ɔtū gē he uwá á. Ɛjɛ̄ɛ̄jī ācɛ nēe gē yá ɔdōbɔ̄bí ā gē jɛ̄ gɔbū á. Eko dúúmā nēé le Ɔwɔicō jámá nɛɛ, ɔdā dúúmā í gē yá uwā ŋ́.”

¹⁶Cɛ́ɛ́ ācɛ nēe gē lɛ ojīlīmā ce Óndú ā gē kɛlā lɛ ɔ́mpa uwā, cɛ́ɛ́ Óndú ā le ahɔ̄ jē, klla le ɔdā nēé ka ā pó. Ɔkpá nēé tá iyē kú odúúdú ācɛ nēé gē lɛ ojīlīmā ce ɔ́ ā, ce iyɔ̄bū nū.

¹⁷Óndú ā ka é géē wɛ ācɛ ɔlɛ́ anúɔ. Ó ka ɛ̄cī nɛ̄ anúɔ géē kɛpɔ̄ tū ācɛ kú ɛcɛ klla í yá ūwā italā ā, anúɔ géē ményinyi ūwā ɛ́gɛ́nɛ̄ ádā gē ményinyi ɔyí nū nōo gē gbā ɔ̄ ɛ̄gbā ā.

¹⁸Cɛ́ɛ́ ɛjɛ̄ɛ̄jī ācɛ ɔlɛ́ anúɔ géē má ɛyɛ́ɛyɛ́yí kú ɔdā nōo gē yá ācɛ o le kpaakpa mɛ́mla ācobɔ̄bíipú ā, mɛ́mla ɔdā nōo í yá ācɛ o cɛ̄ anúɔ ɛhɔ̄ mɛ́mla ācɛ nēé gē cɛ̄ anúɔ ɛhɔ ŋ́ mā.