Read idoma UMÁTIYU 1 Bible Online

UMÁTIYU 1 - idoma bible

UMÁTIYU 1

¹Ɛ̄nyā wɛ ɔkpá kú iyē kú aádáádā kú Ujísɔ̄si Ohɔ́nyɛtá, nōo wɛ ɔyɔ́ɔ́yí nɔ̄nyīlɔ kú Udéfīdi, nōo kē wɛ ɔyɔ́ɔ́yí nɔ̄nyīlɔ kú Ébrahām ā.

²Ébrahām ma Áyísīki, Áyísīki ma Ujékɔ̄pu, Ujékɔ̄pu ma Ujúda mɛ́mla ayínɛ́ nū ɔhá āa.

³Ujúda ma Upéresi mɛ́mla Usára ŋmá iyē ɛ́nɛ́ uwā nōo lé ka Utáma ā. Upéresi ma Uhɛ́srɔn. Uhɛ́srɔn ma Áram.

⁴Áram ma Ammínādābu, Ammínādābu ma Unáhssɔn, Unáshɔn ma Usálmɔ̄n.

⁵Ubówās ma Óbɛ́d ŋmá iyē Urútu.

⁶Ujése ma Udéfīdi, nōo wɛ ɔcɛ́ āa. Udéfīdi ma Usólōmɔn ŋmá iyē kú ɔnyā nōo tɛtɛ wɛ ɔnyā kú Uríya ā.

⁷Usólōmɔn ma Uréhobōwam. Uréhobōwam ma Ábīja, Ábīja kē ma Ása.

⁸Ása ma Ujehósāfati, Ujehósāfati ma Ujóram, Ujóram kē ma Osíya.

⁹Osíya ma Ujɔ́tam, Ujɔ́tam ma Áhāsi, Áhāsi kē ma Uhesekíya.

¹⁰Uhesekíya ma Umanásɛ, Umanásɛ ma Émɔ̄si, Émɔ̄si kē ma Ujosíya.

¹¹Ujosíya ma Ujekoníya mɛ́mla ayínɛ́ nū nɔ̄nyīlɔ eko nēé kpó uwā aɔ́fiyɛ ŋmá ɔlɛ́ ga ajɛ kú Ubábīlɔn ā.

¹²Igbīhi nēé kpó ācɛ kú Ísrɛ̄lu ga Ubábīlɔn āa,

¹³Usɛrúbābɛlu ma Abíyudi, Abíyudi ma Ɛlíyākim, Ɛlíyākim ma Áso.

¹⁴Áso ma Usádɔ̄ku, Usádɔ̄ku ma Acím, Acím ma Ɛlíyūdi.

¹⁵Ɛlíyūdi ma Ɛlísa, Ɛlísa ma Umátan, Umátan ma Ujékɔ̄pu,

¹⁶Ujékɔ̄pu ma Ujósɛ̄fu ɔbá kú Umerí, ɛ́nɛ́ Ujísɔ̄si. Ujísɔ̄si ɔ́ɔmā nēé hī ka Ohɔ́nyɛtá á.

¹⁷Abɔ̄ ó lɛ ā, odúúdú ipɔ́ɔma ŋmá ɛgiyí Ébrahām jāā ga Udéfīdi ā wɛ ayááyí igbo igwɛ́nɛ. Ŋmá eko kú Udéfīdi ga eko nēé kpó ācɛ Ísrɛ̄lu ŋmá ɔlɛ́ ga Ubábīlɔn ā wɛ ayááyí igbo igwɛ́nɛ. Anɔ́ɔ o ŋmá eko nēé kpó ācɛ Ísrɛ̄lu ŋmá ɔlɛ́ ga Ubábīlɔn ga eko nēé ma Ohɔ́nyɛtá ā wɛ ayááyí igbo igwɛ́ɛnɛ á.

¹⁸É ma Ujísɔ̄si ɔwɛ ɛ́gɛ́nyā. Ujósɛ̄fu lɛ Umerí, ɛ́nɛ́ Ujísɔ̄si, kwelūbi. Amáŋ gbɔbū ɛ́ kéē lɛ īyī uwā ā, Umerí kwú ipú í yɔ̄ ŋmá lɛ ɔfú kú Alelékwū Ihɔ.

¹⁹Abɔ̄ ɔbá nū, Ujósɛ̄fu, wɛ ɔ̄cɛ o lɛ íne tū ā nááná ā, ó tíne ō juwēyi lɛ Umerí ŋ́. Anɔ́ɔ ó tíne ō tá ɔ̄ wɛɛlɛ á.

²⁰Abɔ̄ ó yɔ̄ ī gbɛlá nū ā, alelékwū-ōtɛ̄hɔ̄ kú Óndú gā ɛgiyí nū ipú ɔ̄na gaá da ɔ́ kahíníī, “Ujósɛ̄fu, ɔyɔ́ɔ́yí Udéfīdi, ā híīī yúúfi ō le Umerí lɛ kóō wɛ ɔnyā awɔ ŋ́. Ohígbū o ŋmá lɛ ɔfú kú Alelékwū Ihɔ nōó yīīpú nyā á.

²¹Ó géē ma ɔyínɔ̄nyīlɔ, a kē í hī iyē nū ka UJÍSƆ̄SI. Ohígbū ka anú géē nya ācɛ ɔlɛ́ nū tá ŋmá íne nēé bīya á.

²²Ɔdā nēe bá ā yá ká ɔdā nɛ̄ Óndú ā ka bū okónu kú ɔ̄comɛ́ɛbɛ ā kóō le yá jīla. Ɔ̄comɛ́ɛbɛ ā kahíníī,

²³“Mɔ́ɔ̄, ɔ́ncɛ́nyā éyi nōó jé ɔ̄cɛnyīlɔ ŋ́ géē yɔ̄ ipú í ma ɔyínɔ̄nyīlɔ. É géē hī iyē nū ka Imánūwɛ̄lu, (Ɛyí iyē ā wɛ ka Ɔwɔicō yɔ̄ pī alɔ).

²⁴Eko nɛ̄ Ujósɛ̄fu le héyī á, ó le yá ɛ́gɛ́nɛ̄ alelékwū-ōtɛ̄hɔ̄ kú Óndú ā da ɔ́ lɛ ā. Anɔ́ɔ ó le Umerí lɛ ɔnyā á.

²⁵Amáŋ ó kē gbo mla anú ŋ́ jāā gbéeko nōó lɛ ɔyí aflɛ́yí kú nū ā ma. Anɔ́ɔ ó kwú iyē ú ce ɔ́ ka UJÍSƆ̄SI á.