Read idoma UMÁTIYU 10 Bible Online

UMÁTIYU 10 - idoma bible

UMÁTIYU 10

¹Ujísɔ̄si le ayíkpó kú nū igwɛ́ɛpa ā hīgwú wā ɛgiyí nū. Anɔ́ɔ ó je ɔfú lɛ uwá kéē nū aálelékwū obɔ̄bí tɛ́ɛcɛ, kéē kē yá ká ācɛ o lɛ ōcē dóódu mɛ́mla unwalu kú ōcē dóódu kéē mɛ.

²Iyē kú ācotɛ̄hɔ̄ igwɛ́ɛpa ā wɛ, aflɛ́yí, Usáyímɔ̄ni, nēé hi ka Upíta ā mɛ́mla ɔyínɛ́ nū, Ándru, Ujémīsi, ɔyínɔ̄nyīlɔ kú Usébēdi mɛ́mla Ujɔ́ni, ɔyínɛ́ nū.

³Ufílīpu mɛ́mla Ubatɔlómi, Utɔ́mɔ̄si mɛ́mla Umátiyu, ɔ̄codɔ̄lɛ̄ ā, Ujémīsi, ɔyínɔ̄nyīlɔ kú Álfīyɔsi, mɛ́mla Utádīyɔsi,

⁴Usáyímɔ̄n, ɔ̄cɛ nōo ī je imélí kú ācɛ ɔlɛ́ nū nɛ̄hi ā, mɛ́mla Ujúdasi Iskáriyɔ̄tu, nōo je ɔ́ lá ā.

⁵Ujísɔ̄si le ayíkpó igwɛ́ɛpa nēe bá ā tɛ̄hɔ̄ gɛcɛ yɔ̄ ī pi uwá ahɔ̄ kahíníī, “Aá híīī ga ɛgiyí éwɔhá ŋ́, ɛ́ɛ́ nɛ̄ aá kē ī ga aígelī kú Usamérīya ŋ́.

⁶Amáŋ aá nyɔ̄ ɛgiyí aálá kú ɔlɛ́ kú Ísrɛ̄lu nēe bí āa.

⁷Abɔ̄ aá bá gē yɛ ā, aá tɔ́ɔna ka, ‘ajɔ̄ɔ̄cɛ́ kú ɔkpáncō le bá ajaajɛ ɛɛ́.’

⁸Aá hɛ́ ācɛ odoōcē tá, aá hɛ́ ācɛ nēe gekwú eyī ŋmá ɔlékwū. Aá yá ká ācɛ olagwú kéē le yá yēŋēē. Aá nū aálelékwū obɔ̄bí tɛ́ɛcɛ. Alahá nɛ̄ aá mīyɛ ŋmá ɛga Ɔwɔicō á, aá kē je lɛ ācɛ alahá.

⁹Aá híīī bī égō ámāŋ ɔkɔ́bɔ ámāŋ ije dóódu ipú alítā kú aá ŋ́.

¹⁰Aá híīī bī ɛkpa ámāŋ úwé ɛpa ámāŋ áblákpá ámāŋ ɔcí okwajɛ iyāwu kú aá ā ŋ́. Ohígbū ka ɔ̄coyúklɔ́ cíkā ō lɛ odée ŋmá úklɔ́ kú nū.

¹¹Igelī nɛ̄ŋ́cɛ́ mɛ́mla ipɔ́lɛ́ dúúmā nɛ̄ aá le yɛ, dɔɔ̄kā abɔ́ɔ ɔ́dāŋ ka ɛ́nɛ́nɛ̄ ɔ̄cɛ dúúmā yɔ̄ abɔ́ɔ cɛ́ɛ́ kú aá kē ba abɔ́ɔ jāā gbéeko nɛ̄ aá géē nyɛ̄ɛ̄.

¹²Eko dúúmā nɛ̄ aá le bēhé ga ipú inu dúúmā, aá da ɔ́ ka ɛbɔ́ kóō yɔ̄ lɛ ācɛ nēe bá abɔ́ɔ ā.

¹³Ɔ́dāŋ́ ka ācɛ nēe yɔ̄ ipú inu ā mīyɛ aá, ɛbɔ́ kú aá géē yɔ̄ lɛ uwá. Ɔ́dāŋ́ keé wɛ ɛ́nɛ́nɛ̄ ācɛ ŋ́, ɛbɔ́ kú aá géē kwúcē igbīhi gé lɛ aá.

¹⁴Ɔ́dāŋ́ ka ɔ̄cɛ dúúmā í mīyɛ aá ŋ́, ámāŋ koó pó ɛlā kú aá ŋ́, eko nɛ̄ aá gē nyɛ̄ɛ̄ ŋmá inu ámāŋ igelī ɔ́ɔmāa, aá lɛ úmlá nēe bá ikpó kú aá ā gwō bónū

¹⁵Ɔkwɔ̄ɔ̄kwɛ̄yi, n̄ da aá koó géē tētēyi lɛ ajɛ kú Usɔ́dɔm mɛ́mla Ugomóra fíyɛ́ igelī ɔ́ɔmā ɛ̄cī ɛ̄pɔ̄ ā.

¹⁶“Aá má ɔ̄, n tū aá ɛhɔ̄ bɛ̄ɛka aálá nēe bá ipú aɔ́gwú ā. Aá kóō jéeyī bɛ̄ɛka ɛgwā āa, klla gbonɛnɛ bɛ̄ɛka okóohō aā

¹⁷Aá klla lɛ iyē kwú ohígbū ācɛ. Ohígbū ka uwá géē kwú aá ga ójīla okɛpɔ̄, uwá géē gɔ́ aá ipú aágblīihɔ nɛ́ŋ́cɛ́ kú uwā.

¹⁸É klla géē bī aá ga iyɔ̄bū kú aígbómína mɛ́mla aɔ́cɛ́ ohígbū ka aá wɛ ayíkpó kú um. Aá géē bī ɛga ɔ́ɔmā le tɔ́ɔna kú Ɔkóolɔhi lɛyíkwu um lɛ uwá mɛ́mla ācɛ éwɔhá.

¹⁹Eko nēé le aá kwú ga ɔgbɔ́ ɛpɔ̄, aá híīī lɛlá wu ɔdā nɛ̄ aá géē ka ā ŋ́, amáŋ ka ɛ́gɛ́nɛ̄ aá géē ka ɔ́ ā ŋ́. Eko nɛ̄ eko ɔ́ɔmā gā, é géē je ɛlā nɛ̄ aá cíkā ō ka ā lɛ aá.

²⁰Ohígbū ka aá gáā kɛlā abɔ̄yī aá ŋ́, alelékwū kú Ádā ā gáā kɛlā bū okónu kú aá eko ɔ́ɔmā ā.

²¹Ɔyínɛ́ géē je ɔyínɛ́ nū lɛ ācɛ kéē je ɔ́ ŋmó. Ádā kē í je ɔyí nū lɛ ācɛ kéē je ɔ́ ŋmó. Ayí ke í cāŋ́jɛ lɛyíkwu ádā mɛ́mla ɛ́nɛ́ uwā, klla géē yá kéē lɛ uwá ŋmó.

²²Odúúdú ācɛ géē wɔ́tū aá ohígbū iyē kú um. Amáŋ é géē nya ɔ̄cɛ nōo lɛ ɔtūlé jāā ga onmɛ́yí ā tá.

²³Eko nēé gbɔɔ́ ō yá aá ōwē igelī éyi, aá le kwu nyɔ̄ igelī ɔhá. N̄ lɛlā ɔkwɛ̄yi da aá. Aá gáā yɛ odúúdú igelī kú Ísrɛ̄lu jíla gbɔbū ɛ́ɛ́ nɛ̄ Ɔyínɔ̄nyīlɔ kú Ɔ̄cɛ géē wā ā ŋ́.

²⁴“Ɔyíkpó í gē fíyɛ́ itíca kú nu ŋ́. Ɔfiyɛ í kē gē fíyɛ́ óndú nū ŋ́.

²⁵Ó cíkā ō jɛ̄ kú ɔyíkpó kóō lɛbɛ̄ɛka itíca kú nū āa. Ó kē cíkā ō jɛ̄ ká ɔfiyɛ kóō lɛbɛ̄ɛka óndú nū ā. Ɔ́dāŋ́ ka ācɛ lɛ ádā ɔlɛ́ hī ka Ubéélsēbul (Ebílíi), Ó lɛ ā é géē hī ācɛ ɔlɛ́ nū iyē obɔ̄bí nɛ̄hi fíyɛ́.

²⁶“Ohígbū ɔ́ɔmā, aá híīī yúúfi uwā ŋ́. Ohígbū koó tū ɔdā dúúmā nēé le ácí ŋmó klá anú, nēé gáā je ɔ́ tɛ́ɛcɛ ŋ́ nɛɛ ŋ́. Ó tū ɔdā dúúmā nēé le tayínū, nēé gáā jé ɔ̄ ŋ́ nɛɛ ŋ́.

²⁷Ɔdā nɛ̄ n da aá ipú ajoodobū ā, aá ka ɔ̄ tɛ́ɛcɛ̄ ɔlɛ́ɛnɔ. Ɔdā nēé kē ka tū aá ahɔ̄ ā, aá tɔ́ɔna nū ɛyí inu.

²⁸Aá híīī yúúfi ācɛ nēe gē ŋmó ɔkpíyē, amáŋ nēé lɔfú ŋmó odo glá ŋ́ mā ŋ́. Amáŋ aá yúúfi ɔ̄cɛ nōo lɔfú ī je odo mɛ́mla ɔkpíyē yíifi ipú ɔlíkɔtɔ glá ā.

²⁹É gē je iwélé ɛpa lá ɔkɔ́bɔ éyi, nááná odúú kú uwā í gáā míya wāajɛ glá ŋ́, ń táafú ŋ́ ayíka Ádā ā cɛ̄.

³⁰É lɛ odúúdú īnyīlɛ̄yí kú aá gbaáluka ɛɛ́.

³¹Ohígbū ɔ́ɔmā aá híīī yúúfi ŋ́, ohígbū ka aá gbɔɔ́lá fíyɛ́ iwélé alɛwa á.

³²Ācɛ nēe ka tɛ́ɛcɛ ipéyī ācɛ ka aá wɛ ācɛ ɔlɛ́ um ā, n kē géē ka tɛ́ɛcɛ iyɔ̄bū Ádā um nōo yɔ̄ ɔkpáncō ā keé wɛ ācɛ ɔlɛ́ um.

³³Amáŋ ɔ̄cɛ dúúmā nōo le híhó ka anúɔ í jé um ŋ́ ipééyī ācɛ, n géē híhó ka ń jé uwā ŋ́ iyɔ̄bū Ádā um nōo yɔ̄ ɔkpáncō ā.

³⁴“Aá híīī gbɛlá ka n wā gaá bī ɛbɔ́ wā ipú ɛcɛ ā ŋ́. Ehé! ń wā gaá bī ɛbɔ́ wā ŋ́, amáŋ n wā í hɛ́ ācɛ ŋmá ɛgiyí uwā nɛ̄ n.

³⁵N wā ká n yá kú ɔyínɔ̄nyīlɔ kóō bɛ́yíkwu ádā nū, ká ɔyínɔ̄nyā kóō bɛ́yíkwu ɛ́nɛ́ nū, ká anyā ayí kéē bɛ́yíkwu ɛ́nɛ́ ɔbá uwā.

³⁶Aólɛlā obɔ̄bí nɛ̄hi fíyɛ́ dúú kú ɔ̄cɛ géē wɛ ācɛ ɔlɛ́ nū piíí.

³⁷Ɔ̄cɛ nɛ̄ ádā nū ámāŋ ka ɛ́nɛ́ nū he ɔ́ ɔtū fíyɛ́ um, ó cíkā ō wɛ ákú um ŋ́. Ɔ̄cɛ nɛ̄ ɔyínɔ̄nyīlɔ kú nū ámāŋ ɔyí nū nɔ̄nyā kē he ɔ́ ɔtū fíyɛ́ um, ó cíkā ō wɛ ákú um ŋ́.

³⁸Ɔ̄cɛ dúúmā nōó kē je ɔcí onyɔ́kpá kú nū kóō yɛ tíikpó kú um ŋ́, ó cíkā ō wɛ ákú um ŋ́.

³⁹Ɔ̄cɛ dúúmā nōo gē dɔɔ̄kā oyēeyī kú nū géē je ɔ́ tónū. Amáŋ ɔ̄cɛ nōo kwú oyēeyī kú nū ú tónū ohígbū um, géē pīyɛ̄ ɔ̄.

⁴⁰“Ɔ̄cɛ nōo mīyɛ aá, ó kē mīyɛ um dúú. Ɔ̄cɛ nōo kē mīyɛ um, ó kē mīyɛ ɔ̄cɛ nōo tū um ɛhɔ̄ āa

⁴¹Ɔ̄cɛ nōo mīyɛ ɔ̄comɛ́ɛbɛ ohígbū koó wɛ ɔ̄comɛ́ɛbɛ, ó géē mīyɛ ɛdɔ ulé ékpó mɛ́mla ɔ̄comɛ́ɛbɛ ā. Ɔ̄cɛ nōo mīyɛ ɔ̄cɛ okpaakpa ohígbū ka ɔ̄cɛ ɔ́ɔmā wɛ ɔ̄cɛ okpaakpa, ó géē mīyɛ ɛdɔ ulé ékpó mɛ́mla ɔ̄cɛ okpaakpa.

⁴²Ɔ̄cɛ dúúmā nōo kwú íkókwū kú éŋkpɔ̄ ohīlaŋdɔ́ ékpó lɛ éyi kú ācɛ nɛ̄ŋcɛ́ fíyɛ́ dúú nēe bá āa kóō gwá ohígbū ka ɔ̄cɛ ɔ́ɔmā wɛ ɔyíkpó kú um, n da aá ka, ɔ̄cɛ ɔ́ɔmā géē mīyɛ ulé kú nū piíí.”