Read idoma UMÁTIYU 11 Bible Online

UMÁTIYU 11 - idoma bible

UMÁTIYU 11

¹Eko nɛ̄ Ujísɔ̄si le ukɔ́ tū ayíkpó kú nū igwɛ́ɛpa kwɛyí ā, ó nyɛ̄ɛ̄ ŋmá abɔ́ɔ gaá nwɛ̄lā klla gaá tɔ́ɔna kú ɔ̄kōolɔhi ā ipú aígelī nēe kwú abɔ́ɔ ajaajɛ āa.

²Eko nɛ̄ Ujɔ́ni lɛ ɔ̄kā kú úklɔ́ kú Ohɔ́nyɛtá pó ipú agbá ā, o lɛ ɛhɔ̄ tū ayíkpó kú nū fu ɔ́.

³É gaá da Ujísɔ̄si kahíníī, “Da alɔ, awɔ wɛ anú nōo cíkā ō wā á nɛɛ, kɛ̄ɛ̄ ká alɔ leyī táajɛ ɔ̄cɛ ɔhá?”

⁴Anɔ́ɔ Ujísɔ̄si tū uwā ohi kahíníī, “Aá nyɔ̄ kú aá gaá da Ujɔ́ni ɔdā nɛ̄ aá pó mɛ́mla ɛ̄nɛ̄ aá má ā.”

⁵Ācɛ opeyī ī mɛ́ɛbɛ ɛɛ́, ācɛ ocīkpó kē ī yāwu, aólagwú le yá yēŋēē,[1] ācɛ odahɔ̄ ī páhɔ̄, ācɛ nēe gekwú ā le héyī, é kē ī tɔ́ɔna kú ɔ̄kōolɔhi ā tɛ́ɛcɛ lɛ aólɛhɔ́ɔ̄cɛ.

⁶Ɔwɔicō gē hɔ́hā ce ācɛ néē lɛ ɔtū obɛ́ɛpa lɛyíkwu um ŋ́ mā ā.

⁷Eko nēé nyɛ̄ɛ̄ ā, Ujísɔ̄si gbɔɔ́ ō kɛlā lɛ ɛwa ā ohígbū Ujɔ́ni kahíníī, “Ɔdí nɛ̄ aá ga ígbíli gaá má āa? Ácí nɛ̄ owu gē jíliyē ā kɛ̄ɛ?

⁸Ɔdí nɛ̄ aá kē gɛcɛ gaá má āa? Ɔ̄cɛ nōo lɛ úwé omɛnɛ́mɛnɛ́ wiiyē ā nɛɛ? Ācɛ nēe ī le úwé omɛnɛ́mɛnɛ́ wiiyē ā kē ī bá ɔlɛ́ aɔ́cɛ́.

⁹Ɔdí nɛ̄ aá ga ɛcɛ gaá má ā mɛ́ɛ̄? Aá gaá má ɔ̄comɛ́ɛbɛ kɛ̄ɛ? Īī, ɔkwɛ̄yi, amáŋ n̄ da aá ka ɔ̄cɛ nɛ̄ aá nyɔ̄ í má fíyɛ́ ɔ̄comɛ́ɛbɛ.

¹⁰Ɛ̄nyā wɛ ɔ̄cɛ nɛ̄ Ɔwɔicō kɛlā lɛyíkwu ɔ́ ipú ɔkpíhɔ kahíníī, ‘N gē tū ɔ̄cotɛ̄hɔ̄ kú um ɛhɔ̄ gbɔbū gā uwɔ, nōo géē tá ɔwɛ kú uwɔ yá gbɔbū gā uwɔ.’

¹¹Ɔkwɛ̄yi, n̄ da aá ka, ipú ācɛ nɛ̄ ācɛnyā ma ā, o fíyɛ́ Ujɔ́ni oyúbatísim dúúmā í yɔ̄ ɛ́ɛ́ ŋ́. Nááná ɔ̄cɛ nōo nyɛ́ fíyɛ́ dúú ajɔ̄ɔ̄cɛ́ kú ɔkpáncō ā nwuné fíyɛ́ ɔ̄ á.

¹²Ŋmá eko nɛ̄ Ujɔ́ni oyúbatísim ā gbo úklɔ́ kú nū jāā kwu abālɔbányā ā, é hímáyī ī yá abɔ̄fú kú Ɔwɔicō kóō híī cɔcɛ́ ŋ́, ācɛ oyɔ́dābɔ̄fū kē bá ī yá kóō le lɛ ā abɔ̄fú.

¹³Ācomɛ́ɛbɛ ā mɛ́mla íne kú Umósīsi ā kɛlā lɛyíkwu eko nɛ̄ Ɔwɔīcō í gaá cɔcɛ́ ā, gbéeko nɛ̄ Ujɔ́ni gbo úklɔ́ kú nū.”

¹⁴Ɔ́dāŋ́ ka aá tínē ō cɛ̄, ɛ̄nyā wɛ Ɛláyíja, nōo cíkā ō wā á.

¹⁵Ɔ̄cɛ dúúmā nōo ī páhɔ̄ ayíkā ō pó ɛlā nyā.

¹⁶“Amáŋ ɔdí nɛ̄ n géē le gbla ipɔ́ɔma nyā āa? Ó gbla ayípɛ̄ nɛ̄ŋ́cɛ́ nēe báajɛ ɔ́ɔpu ā. É gē hī aɔ́mpa uwā igwú kahíníī,

¹⁷‘Alɔ tá ɔkpancílé tū aá, amáŋ aá kē jījē ŋ́. Alɔ kē gwíijē ɛyíkwū, aá kē jikwū ŋ́.’

¹⁸Eko nɛ̄ Ujɔ́ni wā ā, ó lé ɔdōlé ŋ́, ó kē gwá ɔdā dúúmā ŋ́. Ācɛ ka ɔ́ɔ lɛ alelékwū obɔ̄bí.

¹⁹Ɔyínɔ̄nyīlɔ kú Ɔ̄cɛ kē gāa ɛɛ́. Ó gē lé ɔdōlé klla gē gwá. É ka ɔ́ ɔ kē wɛ ɔ̄cɛ o le ɔdōlé nwuné mɛ́mla ɔ̄cɛ o gwéjé nwuné, mɛ́mla oklóbīya kú ācodɔlɛ́ mɛ́mla ācobīyíne. Amáŋ ācɛ géē má ka íjéeyī kú Ɔwɔicō ɔ́ɔ le kpaakpa o ŋmá lɛ úklɔ́ kú nū.”

²⁰Anɔ́ɔ Ujísɔ̄si gbɔɔ́ ō ŋmá aígelī ɛga nōó yá ɛyínɛ̄hi úklɔ́ idáagó kú nū ā ɛpɔ̄bí, ohígbū ka uwá í pīyabɔ̄ ŋ́.

²¹“Ācɛ Ukorásin, aá le jí ɛɛ́! Ācɛ Ubɛtsáyída, aá le jí ɛɛ́! Ohígbū ka ɔ́dāŋ ka aúklɔ́ idáagó nēé yá ipú aá ā, kéē lɛ uwā yá ajɛ Utáya mɛ́mla Usídɔn nɛɛ, é géē yɛ í le pīyabɔ̄ báajɛ ipú ewo le īlī ekwu wiiyē gbojī ɛɛ́

²²Amáŋ n̄ da aá ka, ó géē tētēyi lɛ Utáya mɛ́mla Usídɔn fíyɛ́ aá ɛ̄cī ɛpɔ̄ ā.

²³Ācɛ Ukapánɔm, aá ā gbɛlá ka aá géē jáglīmā lɛyí kwu ɔkpáncō nɛ. Amáŋ Ɔwɔicō géē bī aá wā ajɛ ga ɔlékwū. Ohígbū ka úklɔ́ idáagó nēé yá ɛgiyí uwɔ āa, kéē lɛ ɔ́ yá ajɛ Usɔ́dɔm nɛɛ, ó géē yɛ í yɔ̄ kwu ícɛ nyā

²⁴Amáŋ n̄ da aá ka, Usɔ́dɔm géē tētēyi fíyɛ́ uwɔ ɛ̄cī ɛpɔ̄ ā.”

²⁵Eko ɔ́ɔmā Ujísɔ̄si kɛlā kahíníī, “N tá uwɔ ahínyá, Ádā, Óndú kú ɔkpáncō mɛ́mla ɛcɛ. Ohígbū ka a lɛ ɔdā nēe bá āa tayínū ŋmá ɛgiyí aójéeyī mɛ́mla aójɔ́dā, klla lɛ uwá mafú lɛ ācɛ nēe jé odée ŋ́ lɛbɛ̄ɛka ayípɛ̄ ā.”

²⁶Ádā, ɛnyā wɛ ɔdā nōo he uwɔ ɔtū á.

²⁷Ádā um lɛ ɔdā dóódu kpó tū um abɔ̄. Ɔ̄cɛ dúúmā í jé Ɔyínɔ̄nyīlɔ ā ŋ́, ń táafú ŋ́ ayíka Ádā ā nɛ. Ɔ̄cɛ dúúmā í kē jé Ádā ā ŋ́, ń táafú ŋ́ ayíka Ɔyínɔ̄nyīlɔ ā nɛ. Ācɛ nɛ̄ Ɔ̄yínɔ̄nyīlɔ ā cɛ̄ ō mafú Ádā ā lɛ uwá ā géē jé ɔ́ dúú.

²⁸Aá wā ɛgiyí um, ɔdúúdú aá nēe gē yúklɔ́, nɛ̄ iyó le jɛ̄ aá, n géē je omlɛ́nyɔ̄́ lɛ aá.

²⁹Aá kwú ákpláka kú ɔdā o le hɛ́hɔ̄ kú um ú wu īyī aá ɔkɔ, kú aá klɔ́ɔcɛ́ ŋmá abɔ̄ um, ohígbū ka n gbonɛnɛ klla tū ɔtū wāajɛ, cɛ́ɛ́ ká aá kóō lɛ omlɛnyɔ̄ lɛ.

³⁰Ohígbū ka ákpláka kú ɔdā o le hɛ́hɔ̄ kú um tɔ̄ɔtɛ́ nɛ̄ ɔ̄cɛ gē bī, iyó kú um kē le fékéé ā.”