Read idoma UMÁTIYU 12 Bible Online

UMÁTIYU 12 - idoma bible

UMÁTIYU 12

¹Ɛ̄cī eyī Ujísɔ̄si yɔ̄ ī bū ipú ɛhɔ̄ īkpɔ̄dā éyi ɛ̄cī Usábāti. Ɛmiyɛ yɔ̄ ī ŋmó ayíkpó kú nū, anɔ́ɔ é gbɔɔ́ ō cē īkpɔ̄dā ā lé á.

²Eko nɛ̄ ācɛ Ufárisīi lɛ ɔ́ má ā, é da ɔ́ kahíníī, “Mɔ́ɔ̄, ayíkpó kú uwɔ gē yá ɔdā nōo gē bīya íne kú ɛ̄cī Usábāti.”

³Amáŋ ó da uwá kahíníī, “Aá jé ɔdā nɛ̄ Udéfīdi yá eko nɛ̄ ɛmiyɛ gē ŋmó anú mɛ́mla ācɛ nēe bá pī ɔ̄ ā ŋmá ɔkpá ɛlɔ̄ɔwɔicō ɛ́ɛ́ ŋ́ nɛ?”

⁴Ó le yɛ tá ipú inu kú Ɔwɔicō, anɔ́ɔ anú mɛ́mla ācɛ ɔlɛ́ nū gaá le igbō nēé ī le ce iyɔ̄bū Ɔwɔicō ā kpó lé. Ó kē wɛ íne ō bīya kú ɔ̄cɛ ɔhá dúú kóō lé, ń táafú ŋ́ ayíka ācogwɛ́ɛya ōfōōfū ūwa cíkā ō lé á.

⁵N jé kpɔ́cī ka aá jé ŋmá ipú íne kú Umósīsi ka ācogwɛ́ɛya ā ɛ́ɛ ī bīya íne ipú Agblīihɔ-nɛ̄hi ā ɛ̄cī Usábāti dóódu, amáŋ é kē lɛ́pɔ̄bí ŋ́?

⁶Amáŋ n̄ da aá ka ɔdā nōo nwuné fíyɛ́ Agblīihɔ-nɛ̄hi ā yɔ̄ amānyā

⁷Ɛlɔ̄ɔwɔicō kahíníī, ‘Ɔdā nɛ̄ n tíne ā wɛ ka aá ményinyi ācɛ ɔhá, amáŋ ó wɛ ɛbɛ́ ō je gwɛ́ɛya gā um ŋ́,’ Ɔ́dāŋ́ ka aá jɛ́yí ɔdā nōo ka nyā ā, aá géē yɛ í ŋmó ācɛ nēe lɛpɔ̄ɔhi ā ɛpɔ̄bí ŋ́.

⁸Ohígbū ka Ɔyínɔ̄nyīlɔ kú Ɔ̄cɛ ā wɛ Óndú kú Usábāti aā.

⁹Anɔ́ɔ ó nyɛ̄ɛ̄ ŋmá abɔ́ɔ le yɛ tá Agblīihɔ nɛ̄ŋ́cɛ́ kú uwā á.

¹⁰Ɔ̄cɛ éyi yɔ̄ abɔ́ɔ, nɛ̄ abɔ̄ kú nū éyi le ŋmó. Ācɛ ōhī bá abɔ́ɔ nēe dɔɔ̄kā ō kpɛ́lā ce Ujísɔ̄si koó yɔ ī yá ɔdōōbɔ̄bí. Anɔ́ɔ é da ɔ́ ɔ̄kā kahíníī, “Íne kú Umósīsi cɛ̄ kú ɔ̄cɛ kóō hɛ́ ɔ̄cɛ ɔhá tá ŋmá ōcē ɛ̄cī Usábāti?”

¹¹Amáŋ ó da uwá kahíníī, “Ɔ̄nyɛ yɔ̄ ipú aá, nɛ̄ ɔ́dāŋ koó lɛ álá éyi, nɛ̄ álá kú nū ā le tá ipú ɔ̄gɔ̄ ɛ̄cī Usábāti, nōó gáā lɛ abɔ̄ bī ɔ̄ klla kwú ɔ̄ ú wɛ̄ɛcɛ ŋ́ mā āa?

¹²Ācɛ tīile nwuné fíyɛ́ álá á! Abɔ̄ ó lɛ ā, íne ā cɛ̄ ka ācɛ kɛ́ɛ yá ɔdōolɔhi ɛ̄cī Usábāti.”

¹³Anɔ́ɔ ó da ɔ̄cɛ ɔ́ɔmā kahíníī, “Lɛ abɔ̄ kú uwɔ nāńdaa.” Ɔ̄cɛ ā lɛ abɔ̄ ā nāŋ́daa, anɔ́ɔ ó kwú yá lɔhi bɛ̄ɛka ɔhá ā á.

¹⁴Anɔ́ɔ ācɛ Ufárisīi ā le tá ɛcɛ gaá lɛ ujɔ̄ tū ɛ́gɛ́nɛ̄ é géē ŋmó Ujísɔ̄si ā á.

¹⁵Amáŋ eko nɛ̄ Ujísɔ̄si le ujɔ̄ nēé tū ā jé ā, ó nyɛ̄ɛ̄ ŋmá abɔ́ɔ. Anɔ́ɔ ācɛ alɛwa yɛce ɔ́, ó klla le odúúdú ācɛ nēe gē doōcē kpɛ́ɛ́m ā hɛ́tá.

¹⁶Ó tū uwā ukɔ́ kéē híīī yá ká ācɛ ɔhá kéē jé kwu anúɔ ŋ́.

¹⁷Ɛ̄nyā wɛ ō yá jīla kú ɔdā nɛ̄ Ayisáya, ɔ̄comɛ́ɛbɛ ā ka lɛyíkwu ɔ́ ā. Ó kahíníī,

¹⁸“Má ɔ̄cotɛ̄hɔ̄ kú um, nɛ̄ um fu ā, nōo he um ɔtū ā, nɛ̄ ɛlā nū gē he um ɔtū ā. N géē je Alelékwū kú um lɛ ɔ́. Ó kē í ka tɛ́ɛcɛ lɛ aéwo ka n géē nya uwá tá.

¹⁹Ó gáā túkanā ámāŋ o dɛ̄gba tɛ́ɛcɛ ŋ́. É gáā pó ɔkɔ kú nū úláyí ŋ́.

²⁰Ɛ́gɛ́nɛ̄ ó gáā cē ɔcí nēé lɛ ɔ́ cē ŋ́ mā, ɛ́gɔ́ɔmā nōó gáā yá ɔfɔ́ɔ́fú mɛ́mla ācɛ nēé gbɛnyigbɛnyi mɛ́mla ācɛ nēé lɔfú iyē ŋ́ mā dúú á. Ó géē yá lɛ ā jāā gbéeko nōó le yá ká ɛpɔ̄ ɔkwɛ̄yi kóō mīyajɛ tābɔ̄.

²¹Anú gáā cɛ̄ lɛ ācɛ aéwɔhá ā lɛ eyīyōce á.”

²²Anɔ́ɔ é lɛ ɔ̄cɛ éyi nōo wɛ opeyi, nōó klla kɛlā glá ŋ́ ohígbū kóō lɛ alelékwū obɔ̄bí, bī gé lɛ Ujísɔ̄si kóō lɛ ɔ́ hɛ́tá á. Ó lɛ ɔ́ hɛ́tá anɔ́ɔ odokónu ā gbɔɔ́ ō kɛlā klla gbɔɔ́ ō mɛ́ɛbɛ á.

²³Ācɛ dóódu le hídáagó klla bá ī ka kahíníī, “Ɛ̄nyā wɛ Ɔyínɔ̄nyīlɔ kú Udéfīdi á nɛɛ?”

²⁴Amáŋ eko nɛ̄ ācɛ Ufárisīi le pó ā, é kahíníī, “Ɔ̄cɛ ā lɔfú gē nū aálelékwū obɔ̄bí ā tɛ́ɛcɛ ohígbū ka Ubéélsēbul, otrɛ̄yí kú aálelékwū obɔ̄bí ā ī je ɔfú lɛ ɔ́ á.

²⁵Amáŋ abɔ̄ Ujísɔ̄si lɛ ɛlá nēé gbo ā jé ā, ó da uwá kahíníī, “Ajɔ̄ɔ̄cɛ́ dúúmā nōo le iyī nū kɔ̄ ígwíígwu bá gē nuunu tá īyī uwā í je catāajɛ. Igelī ámāŋ ɔlɛ́ dúúmā nōo lɛ īyī nū kɔ̄ ígwíígwu bá gē nuunu tá īyī uwā géē je fíyákátā.

²⁶Ɔ́dāŋ́ ka ebílíi kē ī nū ebilíi tɛ́ɛcɛ, ó lɛ ā ayíka ó yɔ̄ ī nuunu tá īyī nū ɛɛ́. Ohígbū ɔ́ɔmā, ajɔ̄ɔ̄cɛ́ kú nū í gáā háyi glá ŋ́.

²⁷Ɔ́dāŋ́ ka n bī Ubéélsēbul gē nū alelékwū obɔ̄bi tɛ́ɛcɛ, ɔdí nɛ̄ ācɛ o yɛce aá gē bī le nū aálelékwū obɔ̄bí tɛ́ɛcɛ ā gɛ? Ohígbū ɔ́ɔmā uwá géē kɛpɔ̄ tū aá kú ɔdā nɛ̄ aá ka ā.

²⁸Amáŋ ɔfú kú Alelékwū kú Ɔwɔicō nɛ̄ n gē le nū aálelékwū obɔ̄bí tɛ́ɛcɛ á. Ó lɛ ā, ɔ́ɔmā kē cābɔ̄ ka Ɔwɔicō gaá cɔ́cɛ́ ipú aá ɛɛ́.

²⁹Ámāŋ ɛ́gɛ́nyá nɛ̄ ɔ̄cɛ dúúmā géē lɔfú ga inu kú ɔ̄cɛ olɔfú gaá je odée kú nū abɔ̄fú glá ā? Ń táafú ŋ́ ayíka ó lɛ ɔ̄cɛ olɔfú ɔ́ɔmā gbō gbɔbū ń nɛɛ? Eko ɔ́ɔmā nōó géē kpó iyó kú nū glá á.

³⁰Ɔ̄cɛ nōó yɔ̄ mɛ́mla um ŋ́, wɛ ɔ̄cɛ obɛ́yíkwu um. Ɔ̄cɛ nōó kē tú ɔ̄ bá mɛ́mla um ŋ́, gē fíyɛ́ ɔ̄ ákátā

³¹Ohígbū ɔ́ɔmā, n̄ da aá keé géē je íne nɛ̄ ācɛ bīya mɛ́mla ɛlā ɛbí[2] dóódu nēé ka ā yá uwá ɛhi. Amáŋ Ɔwɔicō í gáā je ɛlā obɔ̄bí nēé ka lɛyíkwu Alelékwū Ihɔ ā yá uwā ɛhi ŋ́.

³²Ɔ̄cɛ dúúmā nōo lɛ obɔ̄bí ka lɛyíkwu Ɔyínɔ̄nyīlɔ kú Ɔ̄cɛ, é géē je yá ɔ̄ ɛhi. Amáŋ ɔ̄cɛ nōo lɛ obɔ̄bí ka lɛyíkwu Alelékwū Ihɔ, é gáā je yá ɔ̄ ɛhi ipú ɛcɛ nyā ámāŋ ipú ɛcɛ ɔhá nōo gē wā ā glá ŋ́.

³³Ó yá ɛ́ɛ́ ká ā lɛ īkpɔ̄cí olɔhi āa, a géē lɛ ɔcí olɔhi. A géē lɛ īkpɔ̄cí obɔ̄bí ɔ́dāŋ ka lɛ ɔcí obɔ̄bí. É gē jé ɛ́nɛ́ ɔcí ŋmá ɛdɔ īkpō nōó gē gwá ā.

³⁴Aá nēe wɛ ugbɛ kú ogwiji ā, ɛ́gɛ́nyā nɛ̄ aá géē kɛlā olɔhi glá āa, nɛ̄ aá wɛ ācɛ obɔ̄bí āa? Ohígbū ka ɔdā nōo yɔ̄ ipú ɔtū kú ɔ̄cɛ ā nɛ̄ okónu gē ka wɛ̄ɛcɛ á.

³⁵Ɔ̄cɛ olɔhi gē je ɔdā olɔhi ŋmá agbénú olɔhi kú nū. Ɔ̄cɛ obɔ̄bí gē je ɔdōōbɔ̄bí ŋmá agbénú obɔ̄bí kú nū.

³⁶“Amáŋ n̄ da aá ka, ɛlā icííci dóódu nɛ̄ ācɛ ka, é géē ka ɛyí nū ɛ̄cī ɛpɔ̄ ā piíí.

³⁷Ohígbū ka ŋmá ɛlā nɛ̄ a ka ā nēé géē bī le hɛ́ ɛpɔ̄hi ga uwɔ á. O ŋmá ɛlā nɛ̄ a ka ā nēé kē géē ŋmó uwɔ ɛpɔ̄bí á.”

³⁸Anɔ́ɔ aítíca kú íne kú Umósīsi mɛ́mla ācɛ Ufárisīi ōhī da ɔ́ kahíníī, “Itíca, alɔ tíne ō má ɔdōcābɔ̄ eyī ŋmá ɛgiyí uwɔ.”

³⁹Anɔ́ɔ Ujísɔ̄si tá uwā ohi kahíníī, “Ācɛ obɔ̄bí mɛ́mla ɛ̄nɛ̄ ó jé Ɔwɔicō ŋ́ bɛ̄ɛka aá nēe wɛ ācɛ kú eko nyā ā, gē dɔɔ̄kā ɔdōcābɔ̄ á. É gáā je ɔdōcābɔ̄ dúúmā lɛ aá ŋ́, ń táafú ŋ́ ayíka ɛdɔ ɔdōcābɔ̄ nɛ̄ Ɔwɔicō mafú lɛ Ujóna, ɔ̄comɛ́ɛbɛ ā.

⁴⁰Ohígbū ka ɛ́gɛ́nɛ̄ Ujóna yɔ̄ ipú ɛbéenyi nɛ̄hi ɛ̄cī ɛtá, kwu otú kwu ɛnɔ ā, ɛ́gɔ́ɔmā nɛ̄ Ɔyínɔ̄nyīlɔ kú Ɔ̄cɛ géē yɔ̄ ipú ajɛ ɛ̄cī ɛtá mɛ́mla otú ɛtá á.

⁴¹Ācɛ igelī nēé hī ka Unínēye ā géē cāŋjɛ ɛ̄cī ɛpɔ̄ í cījáalí tū ācɛ kú eko nyā. É kē géē ŋmó aá ɛpɔ̄bí, ohígbū ka uwá le pīyabɔ̄ ŋmá lɛ ɛlā kú Ujóna nēé pó āa. Amáŋ n da aá ka ɔdā nōo fíyɛ́ Ujóna kē yɔ̄ amānyā abālɔbányā

⁴²Ɔcányā kú éwo nōo yɔ̄ ɛháajɛ ā géē cāŋjɛ ɛ̄cī ɛpɔ̄ géē cījáalí tū ācɛ kú eko nyā. Ó kē géē ŋmó ɔ̄ ɛpɔ̄bí. Ohígbū koó ŋmá ɛga oligbó nɛ̄hi kóō gaá pó ɛlā kú íjééyī kú Usólōmɔn. Amáŋ n da aá ka ɔdā nōo fíyɛ́ Usólōmɔn kē yɔ̄ amānyā abālɔbányā.”

⁴³“Eko nɛ̄ alelékwū oblínyī le bɛ̄cɛ ŋmá ipú iyē kú ɔ̄cɛ éyi wɛ̄ɛcɛ, ó ī yɛ ɛga nɛ̄ éŋkpɔ̄ í yɔ̄ ŋ́ gē tíne ɛga omlɛ́nyɔ́. Eko nōó kē má odúúmā ŋ́.

⁴⁴Cɛ́ɛ́ ó kahíníī, ‘N géē kwúcē ga ɔlɛ́ um ɛga nɛ̄ um ŋmá wɛ̄ɛcɛ ā.’ Eko nōó kwúcē nyɔ̄ ā, ó má bā ó táncā, é kē lɛ ɔ́ gwu klla le ɔ́ tútū.

⁴⁵Anɔ́ɔ ó nyɔ̄ gaá lɛ aálelékwū ahāapa ɔhá nēe bɔ̄bí fíyɛ́ ɔ̄ kpó wā á. Cɛ́ɛ́ uwá le bēhé ga ipú ɔ̄cɛ ā gaá lā tɔ̄há abɔ́ɔ á. Āhɔ̄ kú ɔ̄cɛ ɔ́ɔmā le bɔ̄bí fíyɛ́ ɛ́gɛ́nɛ̄ ó tɛtɛ lɛ āa. Ɛ́gɔ́ɔmā nōó géē lɛ lɛ ācɛ obɔ̄bí kú eko nyā dúú á.”

⁴⁶Abɔ̄ ó yɔ̄ gē kɛlā lɛ ācɛ ā, ɛ́nɛ́ nū mɛ́mla ayínɛ́ nū nɔ̄nyīlɔ bá ɛcɛ gē dɔɔ̄kā kéē kɛlā lɛ ɔ́.

⁴⁷Ɔ̄cɛ éyi da Ujísɔ̄si kahíníī, “Mɔ́ɔ̄, ɛ́nɛ́ uwɔ mla ayínɛ́ uwɔ nɔ̄nyīlɔ bá ɛcɛ gē dɔɔ̄kā kéē kɛlā gā uwɔ.”[3]

⁴⁸Amáŋ ó tá ɔ̄cɛ nōo da ɔ́ ā ohi kahíníī, “Ɔ̄nyɛ wɛ ɛ́nɛ́ um ā? Ānyɛ kē wɛ ayínɛ́ um nɔ̄nyīlɔ ā?”

⁴⁹Anɔ́ɔ ó lɛ abɔ̄ kú nū miya lɛyíkwu ayíkpó kú nū kahíníī, “Aá má uwā, aɛ́nyā wɛ ɛ́nɛ́ um mɛ́mla ayínɛ́ um nɔ̄nyīlɔ á.

⁵⁰Ohígbū ka ɔ̄cɛ dúúmā nōo ī yá ɔdā nēe he Ádā um nōo yɔ̄ ɔkpáncō ā ɔtu ā, anú wɛ ɔyínɛ́ um nɔ̄nyīlɔ mɛ́mla ɔyínɛ́ um nɔ̄nyā mɛ́mla ɛ́nɛ́ um á.”