Read idoma UMÁTIYU 13 Bible Online

UMÁTIYU 13 - idoma bible

UMÁTIYU 13

¹Icíícɔ́mā piíí ā Ujísɔ̄si nyɛ̄ɛ̄ ŋmá ɔlɛ́ ā gaá yāajɛ okónu ísu.

²Ɛwa nɛ̄hi kú ācɛ le ɔ́ yɛjīla tá, anɔ́ɔ ó le tá ipú ɔ́kɔ gaá yāajɛ á. Odúúdú ācɛ ā báajɛ ɔ́kɔngɔ ɔkpá ā.

³Ó da uwá ɛlā alɛwa ipú ācīije. Ó kahíníī, “Ɔ̄cɛ éyi le tá ɛhɔ̄ nyɔ̄ gaá nyi īkpɔ̄dā.

⁴Abɔ̄ ó yɔ̄ gē nyi īkpō ā, aóhī hábɔ̄ tá ɔwɛ. Anɔ́ɔ aígbáanɔ wā gaá kwú uwā ú kpó tá le á.

⁵Aóhī hábɔ̄ bá ɛyí ɛcɔ̄ nɛ ajɛ kú nū ā í lipú ŋ́ mā. É le bū abɔ̄ ajɛ ā í lipú ŋ́ klla lɛ ɛcɔ̄ ā.

⁶Eko nɛ̄ ɛnɔ le bɛ̄cɛ ā, ó kwú ŋmɔ́lá abɔ̄ é tá ɛgba gajɛ ŋ́ má ā.

⁷Aóhī hábɔ̄ tá ɛplá aújē. Anɔ́ɔ aújē ā le jɛ tɔ̄há mla uwá klla le uwá nyaŋmó á.

⁸Aɔ́há hábɔ̄ tá ɛyí ajɛ olɔhi. Anɔ́ɔ é gwá īkpō, aóhī ofɛhɔ̄, aóhī ofɛtá, ɔhá kē wɛ ofucigwó.

⁹Anɔ́ɔ ó kahíníī, “Ɔ̄cɛ nōo ī páhɔ̄ kóō pó.”

¹⁰Anɔ́ɔ ayíkpó kú nū wā ɛgiyí nū í da ɔ́ kahíníī, “Ɔdíyá nɛ̄ a gē kɛlā lɛ ācɛ ā ipú ācīije ā mɛ́ɛ̄?”

¹¹Anɔ́ɔ ó tá uwā ohi kahíníī, “Ɔwɔicō le ɔ́ yá tɔ́ɔtɛ́ le aá kú aá le ɔdā otayínū kú ajɔ̄ɔ̄cɛ́ kú ɔkpáncō jé, amáŋ ó lɛ ā lɛ ācɛ ɔhá ŋ́.

¹²Ohígbū ka ɔ̄cɛ nōo gē jɛ́yí kú ɔdā otayínū kú ajɔ̄ɔ̄cɛ́ kú Ɔwɔicō ā, ó géē je lɛ ɔ́ fíyɛ́. Amáŋ ɔ̄cɛ nōó lɛ ŋ́, ɛ̄nɛ̄ ó lɛ nááná ā, é géē mīyɛ ŋmá abɔ̄ nū

¹³Ɔdā nōo yá nɛ̄ n gē kɛlā lɛ uwá ipú ācīije ā yɔ̄ á, ohígbū keé bá ī pléyī, amáŋ é kē mɛ́ɛbɛ ŋ́. É bá ī jāhɔ̄, amáŋ é kē gáā pó ŋ́, ɛ́ɛ́ nēé kē i jɛ́yí nū ŋ́.

¹⁴Ɛlā nɛ̄ Ayisáya ka ā le cɛ̄ ɛyí uwā. Ó kahíníī, ‘Aá géē pó, amáŋ aá gáā jɛ́yí ɔdā nɛ aá pó ā ŋ́. Á kú ɛbɛ ā, aá géē má, amáŋ aá kē gáā jɛ́yí nū ŋ́.

¹⁵Ohígbū ka ɔtū kú ācɛ nēe bá ā í lɛ kplákplá ŋ́. É lɛ ahɔ̄ kú uwā gwū, nōo yá kéē pó ɛlā ŋ́, é kē lɛ eyī kú uwá kpó klá. Ɔ́ɔmā yá kéē híīī bī uwā mɛ́ɛbɛ ŋ́, kéē kē bī ahɔ̄ kú uwā pó ɛlā ŋ́, kéē bī ɔtū kú uwā jé odée ŋ́. Cɛ́ɛ́ kéē kwúcē wā ká n̄ lɛ uwá hɛ́tá ŋ́.’

¹⁶Amáŋ ákú aá lɔhi, ohígbū ka eyī kú aá ī mɛ́ɛbɛ. Ahɔ̄ kú aá kē páhɔ̄.

¹⁷Ɔkwɔ̄ɔ̄kwɛ̄yi, n̄ da aá ka ācomɛ́ɛbɛ mɛ́mla ācɛ okpaakpa alɛwa tíne kéē lɛ ɔdā nēe bá ā má, ámāŋ é kē má uwā ŋ́. É kē tíne ō lɛ ɔdā nēe bá ā pó, amáŋ é kē pó glá ŋ́.

¹⁸“Ɛyí kú ācīije kú ɔ̄conyiīkpɔ̄dā ā yɔ̄ á.

¹⁹Ācɛ nēe le ɛlā kú ajɔ̄ɔ̄cɛ́ kú ɔkpáncō pó nēé jɛ́ɛ́yī nū ŋ́, lɛbɛ̄ɛka aíkpō nōo hábɔ̄ í tá ɔtāhɛ̄ ɔwɛ ā. Ɔ̄cɛ obɔ̄bí ā gaá lɛ ɔ́ nū ŋmá ɔtū kú uwā.

²⁰Aíkpō nēé nyi ajɛ ɛcɔ̄ ā, kwɛyí ācɛ nēe pó ɛlā āa, nōo kē mīyɛ ɛlā ā ɔkwɔɔkwu ɔ́ɔmā mla éeyē.

²¹Amáŋ ó tɛ́ɛgba ga ipú ɔtū kú uwā lipú ŋ́. É kē lɔtū eko kpií. Amáŋ eko nɛ̄ unwalu gā ámāŋ nēé gbɔ́ɔ́ ō yá uwā ōwē ohígbū ɛlā ɔ́ɔmā a, ɔkwɔɔkwu ɔ́ɔmā é kwúcē igbīhi.

²²Amáŋ īkpō nēé nyi ipú ujē āa, kwɛyí ācɛ nōo pó ɛlā ā, amáŋ unwalu kú ɛcɛ nyā mla ɛ́gɛ́nɛ̄ agbénú kú ɛcɛ nyā ī plá ɔ̄cɛ lɛ āa, lɛ ɛlā ā nyaŋmó, ó gwá īkpō ŋ́.

²³Amáŋ īkpō nēé nyī ɛyí ajɛ olɔhi āa, kwɛyí ācɛ nōo pó ɛlā āa klla jɛ́yí nū ā. Oyēeyī kú ācɛ ɔ́ɔmā géē bī ɔdā olɔhi alɛwa wɛ̄ɛcɛ bɛ̄ɛka aíkpō ɔ́ɔmā nēe gwá īkpō olɔhi aóhī ɛga ofɛhɔ̄, aóhī ɛga ofɛtá, aóhī kē wɛ ɛga ofucigwó ā.”

²⁴Ó klla lɛ ācīije ɔhá tá lɛ uwá kahíníī, “Ajɔ̄ɔ̄cɛ́ kú ɔkpáncō lɛbɛ̄ɛka ɔ̄cɛ nōo nyi īkpɔ̄dā olɔhi tū ipú ɛhɔ̄ kú nū ā.

²⁵Amáŋ eko nɛ̄ ācɛ gē gbiyɔ̄lā ā, olɛlā kú nū gā gaá lɛ ɛdɔ ácí éyi nyī tū ipú īkpɔ̄dā kú nū ā, anɔ́ɔ ó nyɛ̄ɛ̄ á.

²⁶Eko nɛ̄ īkpɔ̄dā ā le bū, gbɔɔ́ ō jɛ̄ ā, ácí ā le jɛ̄ dúú.

²⁷Ācotɛ̄hɔ̄ kú ádɔ̄lɛ́ ā wā ɛgiyí nū gaá da ɔ́ kahíníī, ‘Ɔkpani, ó wɛ īkpɔ̄dā olɔhi nɛ̄ a nyi ipú ɛhɔ̄ kú uwɔ ā ŋ́ nɛɛ? Iní nɛ̄ ácí kē ŋmá wā āa?’

²⁸Amáŋ ó da uwá kahíníī, ‘Olɛlā éyi yá ɔdā nyā á.’ Anɔ́ɔ ācotɛ̄hɔ̄ ā da ɔ́ ɔ̄kā kahíníī, ‘A tíne ká ālɔ̄ nyɔ̄ gaá lɛ ácí ā fu ŋmá ipú ikpɔ̄dā ā nɛɛ?’

²⁹Amáŋ ó da uwá kahíníī, ‘Ehée, ohígbū ka eko nɛ̄ aá gē fu ácí ā, aá lɔfú fu ikpɔ̄dā ā ōhī dúú.

³⁰“Aá habɔ̄ uwā tá kéē jɛ tɔ̄há jāā gbéeko nɛ̄ n géē ce ɔdɛ̄hɔ̄. Eko o cē ɔdɛ̄hɔ̄ ā n géē da ācɛ ocɔ̄dɛ̄hɔ̄ ā kéē lɛ ácí ā ŋmó gbɔbū kéē lɛ uwá gbō ɛ̄wɛ̄ cɛ́ɛ́ kéē lɛ uwá tɔ̄lá kéē le yi ɔlá. Amáŋ kéē lɛ ikpɔ̄dā ā cē tū ɔbā kú ɔlɛ́ um.”

³¹Ó tá ācīije ɔhá lɛ uwá kahíníī, “Ajɔ̄ɔ̄cɛ́ kú ɔkpáncō lɛbɛ̄ɛka īkpō kú kú ɔcí nɛ̄ é hī ‘Umɔ́stāādi’, nɛ̄ ɔ̄cɛ éyi kwú ɔ̄ ú lɛ ɔ́ nyi ipú ɛhɔ̄ kú nū.

³²Anú nyɛ́ fíyɛ́ īkpō ɔcí dóódu á, amáŋ eko nōó le jɛ̄ kwɛyí, anú nwuné fíyɛ́ ɔcí nɛ̄hi dóódu nɛ̄ ācɛ tū á. Anɔ́ɔ ó le pīya ɔcí nɛ̄hi cɛ́ɛ́ aígbáanɔ kú ɔkpáncō gē wā gaá gwó ɔlɛ́ kú uwā ce ābɔ̄ nū.”

³³Ó tá ācīije ɔhá lɛ uwá kahíníī, “Ajɔ̄ɔ̄cɛ́ kú ɔkpáncō lɛbɛ̄ɛka ɔdōōnīgbō, nɛ̄ ɔnyā éyi je wīya tɔhā mɛ́mla ámú igbō ɛtá gbéeko nōó lɛ odúúdú igbō ā nū ā.”

³⁴Ujísɔ̄si da ācɛ ā odúúdú ɔdā nēe bá ā ipú ācīije. Ó tū ɔdā dúúmā nōó da uwá ŋmá ipú ācīije ŋ́ nɛɛ ŋ́.

³⁵Ó yá lɛ ā cɛ́ɛ́ ká ɔdā nɛ̄ ɔ̄comɛ́ɛbɛ ka ā kóō le yá jīla. Ɔ̄comɛ́ɛbɛ ā ka kahíníī, “N géē bī ācīije le kɛlā lɛ uwá. N géē ka ɔdā nēe le tayínū ŋmá ohútu kú ɛcɛ.”

³⁶Eko nōó nyɛ̄ɛ̄ ŋmá ɛgiyí ācɛ ā, ó gā inu. Anɔ́ɔ ayíkpó kú nū wā ɛgiyí nū gaá da ɔ́ kahíníī, “Lɛ ɛyí ācīije kú ácí kú ipú ɛhɔ̄ ā ka lɛ alɔ.”

³⁷Anɔ́ɔ ó da uwá kahíníī, “Ɔ̄cɛ nōo nyi īkpō olɔhi ā wɛ Ɔyínɔ̄nyīlɔ kú Ɔ̄cɛ ā.

³⁸Ɛhɔ̄ ā wɛ ɛcɛ ā á. Īkpō olɔhi ā ke wɛ ācɛ kú ajɔ̄ɔ̄cɛ́ ā. Amáŋ ácí ā wɛ ācɛ kú ɔ̄cɛ obɔ̄bí ā.

³⁹Olɛlā nōo nyi uwá ā wɛ ebilíi. Eko nēé í ce ɔdɛ̄hɔ̄ ā wɛ eko nɛ̄ ɛcɛ í mɛ ā. Ācocɔ̄dɛ̄hɔ̄ ā wɛ aálelékwū-ōtɛ̄hɔ̄ ā.

⁴⁰Ɛ́gɛ́nɛ̄ é tū ácí ā bá klla lɛ uwá tɔ̄lá ā, ɛ́gɔ́ɔmā nōó géē lɛ eko nɛ̄ ɛcɛ í mɛ á.

⁴¹Ɔyínɔ̄nyīlɔ kú Ɔ̄cɛ géē tū aálelékwū-ōtɛ̄hɔ̄ kú nū ɛhɔ̄. É géē tū odúúdú ācɛ nēe yá ká ācɛ kéē bīya íne ā mɛ́mla ācɛ nēe ī yá ɔdōōbɔ̄bí ā bá ŋmá ipú ajɔ̄ɔ̄cɛ́ kú nū.

⁴²É géē kpó ūwā tá tū ipú útuló nōo ī cɛ̄ nɛ̄hi. Ācɛ géē jikwū klla géē hīla ayīnu abɔ́ɔ.

⁴³Eko ɔ́ɔmā ācɛ nōo ī yá ɔdā nɛ̄ Ɔwɔicō tíne ā géē ceyī bɛ̄ɛka ɛnɔ ā ipú ajɔ̄ɔ̄cɛ́ kú Ádā uwā. Ɔ̄cɛ nōo ī páhɔ̄, kóō pó ɛlā nyā.”

⁴⁴Ujísɔ̄si klla ka kahíníī, “Ajɔ̄ɔ̄cɛ́ kú ɔkpáncō lɛbɛ̄ɛka agbénú nēé le tayínū ipácí ā. Ɔ̄cɛ éyi lɛ ɔ́ pīyɛ̄, anɔ́ɔ ó lɛ ajɛ tá klá anú á. Ɛ́gɛ́nɛ̄ ɔtū he ɔ́ lɛ ā ó nyɛ̄ɛ̄ gaá kwú ɔdā dóódu nōó lɛ ā ú kpó lá. Anɔ́ɔ ó lɛ ajɛ nɛ̄ agbénú ɔ́ɔmā yɔ̄ ā lá á.

⁴⁵“Ajɔ̄ɔ̄cɛ́ kú ɔkpáncō klla lɛbɛ̄ɛka ɔ̄cotɔ́sū nōo gē tínɛ aɛ́cɔ̄ ogbɔɔ́lá nēe héyīfuú nɛ̄hi ā.

⁴⁶Eko nōó lɛ ɛcɔ̄ ogbɔɔ́lá nɛ̄hi éyi pīyɛ̄, ó nyɛ̄ɛ̄ gaá kwú ɔdā dóódu nōó lɛ ā ú kpó lá. Anɔ́ɔ ó lɛ ɛcɔ̄ ogbɔɔ́lá ɔ́ɔmā lá á.

⁴⁷“Ajɔ̄ɔ̄cɛ́ kú ɔkpáncō klla lɛbɛ̄ɛka ɛ́yá nēé tá ga ipú ísu ā. Ó lɛ ɛdɔ ɛbéenyi ɛyɛ́ɛyɛ́yí kwú.

⁴⁸Eko nōó le mu ā, ācɛ lɛ ɔ́ pi wā ɔ́kɔngɔ ɔkpá ā. Anɔ́ɔ é yāajɛ lɛ aɛ́béenyi olɔhi ā yā tū ipú úkpám á. Amáŋ é lɛ obɔ̄bí ā kpó tá bónū.

⁴⁹Abɔ̄ ó géē lɛ eko ámōōmɛ á. Aálelékwū-ōtɛ̄hɔ̄ ā géē wɛ̄ɛcɛ, é kē í yā ācɛ obɔ̄bí ā ŋmá ācɛ okpaakpa ā.

⁵⁰Cɛ́ɛ́ é lɛ uwá kpó tū ipú útuló nōo ī cɛ̄ nɛ̄hi. Ācɛ géē jikwū klla géē hīla ayīnu abɔ́ɔ.”

⁵¹Ujísɔ̄sī da ayíkpó kú nū ā kahíníī, “Aá jɛ́yí odúúdú aɔ́dā nēe bá nyā ā?” Anɔ́ɔ é tá ɔ́ ohi kahíníī, ‘Īī.’

⁵²Anɔ́ɔ ó da uwá kahíníī, ‘Ɔ́ɔmā lé ka itíca kú íne dúúmā nōo le nwū jé lɛyíkwu ajɔ̄ɔ̄cɛ́ kú ɔkpáncō ā lɛbɛ̄ɛka ádɔ̄lɛ́ nōo ī kpó ɔdā ɛ̄yīpɛ̄ mɛ́mla ɛnɛ̄ncɛ̄ wɛ̄ɛcɛ ŋmá ɛga nōo ī kpó odée kú nū tū ā.”

⁵³Anɔ́ɔ eko nɛ̄ Ujísɔ̄si lɛ ācīije nēe bá nyā tá kwɛyí ā, ó nyɛ̄ɛ̄ ŋmá abɔ́ɔ.

⁵⁴Abɔ́ɔ ó gā ajɛ ɔlɛ́ nū, ó nwū ācɛ ā ɛ̄lā ipú ɛgogbɔ̄ɔkɔ kú uwā. Ó le hɛ́ uwā idáagó, anɔ́ɔ é kahíníī, “Iní nɛ̄ ɔ̄cɛ ā lɛ íjééyī mɛ́mla úklɔ́ idáagó nyā ŋmá ā?

⁵⁵Ó wɛ ɔyínɔ̄nyīlɔ kú ɔ̄cogbɔ̄cí ā yɔ̄ ā ŋ́ nɛɛ? Ó wɛ Umerí wɛ ɛ́nɛ́ nū ā ŋ́ nɛɛ? Ujémīsi mɛ́mla Ujósɛ̄fu mɛ́mla Usáyímɔ̄ni mɛ́mla Ujúdasi í wɛ ayínɛ́ nū nɔ̄nyīlɔ ŋ́ nɛɛ?

⁵⁶Odúúdú ayínɛ́ nū nɔ̄nyā kē bá pī alɔ amānyā. Iní nɛ̄ ɔ̄cɛ ā lɛ ɔdā dóódu nēe bá ā ŋmá ā?”

⁵⁷Anɔ́ɔ ɔtū í he uwá mɛ́mla anú gɛ ŋ́ má. Amáŋ Ujísɔ̄si da uwá kahíníī, “Ɔ̄comɛ́ɛbɛ lɛ ojīlīmā ɛga ɔhá, amáŋ ācɛ kú ajɛ ɔlɛ́ nū mɛ́mla ācɛ ɔlɛ́ nū í jé ojīlīmā nū ŋ́.”

⁵⁸Ó yúklɔ́ idáagó nwuné abɔ́ɔ glá ŋ́, ohígbū ka ācɛ í kpɔ́tūce ɔ́ ŋ́.