Read idoma UMÁTIYU 14 Bible Online

UMÁTIYU 14 - idoma bible

UMÁTIYU 14

¹Ɛpléeko ɔ́ɔmā Uhérɔ̄du, nōo wɛ ɔcɛ́ kú ajɛ kú Ugálīli ā, le ofu kú Ujísɔ̄si pó.

²Anɔ́ɔ ó da ācocɛ̄hɔ̄ kú nū kahíníī, “Ujɔ́ni oyúbatísim yɔ̄ ā nɛ. É kwú ɔ̄ ú héyī ŋmá ɔlékwu ɛɛ́. Ɔ́ɔmā yá nōo lɔfú nɛ̄hi nyā gē yúklɔ́ ō hídáagó á.”

³Ohígbū ka Uhérɔ̄du lɛ Ujɔ́ni kwú, lɛ ɔ́ gbō klla kwú ɔ́ ú tá agbá. Ó yá lɛ ā ohígbū Uhɛrodíyas, ɔnyā ɔyínɛ́ nū, Ufílīipu

⁴Ohígbū ka Ujɔ́ni da ɔ́ kahíníī, “Ó wɛ íne ōbīya ká ā lɛ Uhɛrodíyas ɔnyā.”

⁵Abɔ̄ ó tíne kóō ŋmó Ujɔ́ni nááná ā, ó gē yúúfi ācɛ Ujíyu ā. Ohígbū ka uwá je Ujɔ́ni ɔ́ɔ wɛ ɔ̄comɛ́ɛbɛ.

⁶Amáŋ eko nēé gē blakwu ɛ̄cī nēé ma Uhérɔ̄du gā ā, adá kú Uherodíyas le ijē jē iyɔ̄bū aúgbɔga ā, nɛ̄ ɔtū kē le he Uhérɔ̄du nɛ̄hi.

⁷Anɔ́ɔ ó le okónu ce klla le ɔkpá gbo ka anúɔ géē je ɔdā dúúmā nɛ̄ ɔ́ɔ dɔɔ̄kā lɛ ɔ́ á.

⁸Abɔ̄ ɛ́nɛ́ nū lɛ ɔ́ tokónu ā, ɔyípɔ̄ncɛ́nyā ā da ɔ́ kahíníī, “Kwú ikpɛ̄yí kú Ujɔ́ni oyúbatísim ú tá ɔkplá ká ā kwú gā um amānyā ā.”

⁹Ɔtū le bīya lɛ Uhérɔ̄du, ɔ̄cɛ́ ā, amáŋ ohígbū ɔkpá nōó gbo ā, mɛ́mla aúgbɔga kú nū ā, ó le ɔ́da je kéē kwú ɔdā nɛ̄ ɔyínɔ̄nyā dɔɔ̄kā ā ú lɛ ɔ́.

¹⁰Ó lɛ ɛhɔ̄ tū, anɔ́ɔ é lɛ Ujɔ́ni ɛyí hɛ́ ipú agbá ā á.

¹¹É kwú īkpɛ̄yí kú nū ú tá ɔkplá le bī gé lɛ ɔyípɔ̄nɔ̄nyā ā, anɔ́ɔ ó kwú ɔ̄ ú gé lɛ ɛ́nɛ́ nū á.

¹²Ayíkpó kú Ujɔ́ni le yɛ gaá kwú okwū ā ú lɛ ɔ́ nyi. Anɔ́ɔ é nyɛ̄ɛ̄ gaá le da Ujísɔ̄si á.

¹³Eko nɛ̄ Ujísɔ̄si lɛ ɔ̄kā ā pó á, ó le tá ipú ɔkɔ nyɛ̄ɛ̄ ŋmá abɔ́ɔ le tá ɛga céé éyi nōó í yɔ̄ ōfūnū. Anɔ́ɔ eko nɛ̄ ācɛ le pó ā, é le yɛ ɔwɛ ajɛ yɛce ɔ́ ŋmá aígelī kú uwā.

¹⁴Eko nɛ̄ Ujísɔ̄si gā ɛcɛ ŋmá ipú ɔkɔ, ó le ɛwa nɛ̄hi ā má. É le tū ɔ̄ eyīnyinyi, anɔ́ɔ ó lɛ ācɛ odoōcē kú uwā hɛ́tá á.

¹⁵Eko nɛ̄ ɔ̄nɔ̄ɔ̄nɛ̄ le gbo ā, ayíkpó kú nū wā ɛgiyí nū gaá da ɔ́ kahíníī, “Amānyā le hɛ́fu ŋmá ɔlɛ́, ɛnɔ kē le yɛ táajɛ ɛɛ́, da ācɛ ā kéē nyɛ̄ɛ̄ ga aípɔ́lɛ́ ā gaá lá ɔdōlé lé abɔ̄yī uwā.”

¹⁶Amáŋ Ujísɔ̄si da uwá kahíníī, “Ó cɛgbá kéē nyɛ̄ɛ̄ ŋ́. Aá je odée lɛ uwá kéē lé.”

¹⁷Amáŋ é tá ɔ́ ohi kahíníī, “Alɔ í lɛ ɔdā dúú amānyā ŋ́, ń táafú ŋ́ ayíka igbō ɛhɔ̄ mɛ́mla ɛbéenyi ɛpa.”

¹⁸Anɔ́ɔ Ujísɔ̄si kahíníī, “Áá lɛ uwá kpó gē um amānyā.”

¹⁹Ó da ɛwa ā kéē yāajɛ ɛyí ácí, anɔ́ɔ ó kwú igbō ɛhɔ̄ mɛ́mla ɛbéenyi ɛpa ā ú á, Ó je eyī gicō, anɔ́ɔ ó lɛ ɔhā hɛ́ ce ɔ́ klla lɛ ɔ́ cē á. Ó kwú kpó lɛ ayíkpó kú nū, anɔ́ɔ ayíkpó ā kē kwú kpó lɛ ācɛ ā kéē lé á.

²⁰Odúúdú uwā le lé, é kē lɛ ipú nū. É lɛ iwili nēe hile ā túbá, ó kē le mu ómblí igwɛ́ɛpa.

²¹Ācɛnyīlɔ nēe lé ā lɛbɛ̄ɛka úlā igwɛ́ɛpa ce ofigwó ā. É gba ācɛnyā mɛ́mla ayípɛ̄ nɛ̄ŋ́cɛ́ áluka tū uwā ŋ́.

²²Ɔkwɔɔkwu ɔ́ɔmā, ó da ayíkpó kú nū kéē ga ipú ɔ́kɔ kéē bēē nyɔ̄ gbɔbū lɛ anúɔ ga ogbeé kú ísu ā, abɔ̄ anúɔ yɔ̄ gē da ɛwa kéē ga ɔlɛ́ ā.

²³Eko nōó lɛ ɛwa ā nū nyɔ̄ ɔlɛ́ ā, ó le tá ɛyí ɛfu ōfūnū kóō nyɔ̄ í gbɔ̄ɔkɔ. Eko nɛ̄ ɔ̄nɔ̄nɛ̄ le gbo ā, ó yɔ̄ abɔ́ɔ ōfūnū.

²⁴Amáŋ ɔ́kɔ kú ayíkpó kú nū ā yɔ̄ ɔtāhɛ̄ kú ísu ā kpɔ́ ɛ́ɛ́. Úgbagwú yɔ̄ i junwalu lɛ ɔ́, ohígbū ka owu yɔ̄ gē tá lɛyíkwu ɛga nēé ŋmá ā.

²⁵Amáŋ gbɔbū kú eyī kóō nyā ɛplá ofúlɔ̄cī āa, ó gā ɛgiyí uwā, yɔ̄ gē yāwu eyī ísu.

²⁶Anɔ́ɔ eko nɛ̄ ayíkpó kú nū lɛ ɔ́ má gē yāwu eyī ísu ā, ufi gbɔɔ́ ō yá uwā. Anɔ́ɔ é dɛ̄gba kahíníī, “Alelékwū nɛ.”

²⁷Amáŋ ɔkwɔɔkwu ɔ́ɔmā Ujísɔ̄si da uwá kahíníī, “Ami nɛ, aá lɛ ɔtūlé, aá híīī yúúfi ŋ́.”

²⁸Anɔ́ɔ Upíta da ɔ́ kahíníī, “Óndú, ɔ́dāŋ ka ó wɛ awɔ, da um ká n̄ yɛ eyī éŋkpɔ̄ wā ɛgiyí uwɔ.”

²⁹Anɔ́ɔ Ujísɔ̄si da ɔ́ kahíníī, “Gāa.” Anɔ́ɔ Upíta le bɛ̄cɛ ŋmá ipú ɔ́kɔ ā klla gbɔɔ́ ō yāwu eyī éŋkpɔ̄ wā lɛyíkwu ɛgiyí Ujísɔ̄si.

³⁰Amáŋ eko nōó lɛ owu ā má ā, ufi gbɔɔ́ ō yá ɔ̄, anɔ́ɔ ó gbɔɔ́ ō bī á. Ó dɛ̄gba kahíníī, “Óndú, lɛ um nyatá!”

³¹Ɔkwɔɔkwu ɔ́ɔmā Ujísɔ̄si lɛ abɔ̄ kú nū nāndaa lɛ ɔ́ pi wɛ̄ɛcɛ. Anɔ́ɔ ó da ɔ́ kahíníī, “Ɔtū ō kpóce Ɔwɔicō kú uwɔ nyɛ́ íbí. Ɔdí yá nɛ̄ a lɛ ɔtū bɛ́ɛpa āa?”

³²Eko nɛ̄ uwá le yɛ tá ipú ɔ́kɔ ā, owu ā mɛ.

³³Anɔ́ɔ ācɛ nēe bá ipú ɔ́kɔ ā tá Ujísɔ̄si ɔ́gbá kahíníī, “Ɔkwɛ̄yi, awɔ ā wɛ Ɔyínɔ̄nyīlɔ kú Ɔwɔicō á.”

³⁴Eko nēé le hí ísu ā igbó gā ogbeé ɔhá ā, uwá gāājɛ kú Ugɛnɛ́sārɛ̄ti.

³⁵Eko nɛ̄ ācɛ kú abɔ́ɔ lɛ ɔ́ jé ā, é lɛ ācɛ tɛ̄hɔ̄ ga ɛjɛ̄ɛ̄jī ajɛ nēe yɛ abɔ́ɔ jílatá ā, anɔ́ɔ é lɛ ācɛ odoōcē kú ɔlɛ́ uwā kpó gé lɛ ɔ́ á.

³⁶Anɔ́ɔ é gbɔ̄ɔkɔ lɛ ɔ́ ká ācɛ o doōcē ā kéē lɛ abɔ̄ kwu okónōgwu kú úwé kú nū á. Odúúdú uwā nēe lɛ abɔ̄ kwu ɔ́ ā, le hɛ́tá.