Read idoma UMÁTIYU 15 Bible Online

UMÁTIYU 15 - idoma bible

UMÁTIYU 15

¹Igbīhāajɛ ācɛ Ufárisīi mɛ́mla aítíca kú íne kú Umósīsi ā ŋmá Ujerúsālɛm wā ɛgiyí Ujísɔ̄si. Anɔ́ɔ é kahíníī,

²“Ɔdí i yá nɛ̄ ayíkpó kú uwɔ gē bīya uculo nɛ̄ aádáádā alɔ habɔ̄tá lɛ alɔ ā mɛ́ɛ̄? Ohígbū keé gē na abɔ̄ ɛ́gɛ́nɛ̄ é cíkā ō yá ā ɛ́ɛ́ kéē lé ɔdōlé ŋ́.”

³Amáŋ ó tá uwā ohi kahínīī, “Ɔdíyá nɛ̄ aá abɔ̄yī aá gē bīya íne kú Ɔwɔicō ohígbū uculo kú aá ā mɛ́ɛ̄?”

⁴Ohígbū ka Ɔwɔicō kahíníī, “Lɛ ojīlīmā ce ádā uwɔ mɛ́mla ɛ́nɛ́ uwɔ.” Ɔ̄cɛ nōo lɛ obɔ̄bí ka lɛyíkwu ádā nū ámāŋ ɛ́nɛ́ nū géē kwú piíí

⁵Amáŋ aá gē nwū kahíníī, “Ɔ́dāŋ́ nɛ̄ ɔ̄cɛ lɛ ɔdā dóódu nōó cíkā ō je lɛ ádā nū ámāŋ ka ɛ́nɛ́, amáŋ nōó kwú lɛ Ɔwɔicō nɛ,

⁶ayíka ó cíkā ō bī le je ojīlīmā lɛ ádā[4] nū gɛ ŋ́. Aá bī ɔwɛ ɛ́gɛ́nyā ā le eyī gwū íne kú Ɔwɔicō bónū, ó yá ɛ́ɛ́ kú aá yɛce ɔdā nɛ̄ aá ī nwū abɔ̄yī aá ā.” Ohígbū ɔ́ɔmā, ohígbū uculo kú aá, aá lɛ ɛlā kú Ɔwɔicō yɛ́ɛflɛ́ɛfu.

⁷Aá, ācoleyī ɛpa, Ayisáya kɛlā ɔkwɛ̄yi lɛyíkwu aá nōó ka kahíníī,

⁸“Ācɛ nēe bá ā gē lɛ ojīlīmā akpókónu cē um, amáŋ ɔtū kú uwā le ligbó ŋmá ɛgiyí um.

⁹Ɛ̄gbā okónu nēé gē gbā um á. É gē nwū íjééyī kú ācɛ bɛ̄ɛka ɔdā nōó wɛ íne kú um āa!”

¹⁰Ó hī ācɛ ā igwú wā ɛgiyí nū, anɔ́ɔ ó da uwá kahíníī, “Aá pó, kú aá kē jé ɛyí nū.

¹¹Ó wɛ ɔdā nōo gē ga ipú okónu ā gē bīya ɔ̄cɛ ā ŋ́, amáŋ ɔdā nōo gē ŋmá okónu ā gē bīya ɔ̄cɛ á.”

¹²Anɔ́ɔ ayíkpó kú nū wā gaá da ɔ́ kahíníī, “A jé ka ɔtū wú ācɛ Ufárisīi eko nēé pó ɛlā nɛ̄ a ka āa?”

¹³Amáŋ ó tóhi kahíníī, “Ɔcí dóódu nɛ̄ Ádā um, nōo yɔ̄ ɔkpáncō ā, í tū ŋ́, é géē fu ɔ́ tɛgbatɛgba ŋmá ajɛ.

¹⁴Aá habɔ̄ uwā tá cīī. É wɛ aópeyī nēe ī bī aópeyī jé ɔwɛ nɛ. Ɔ́dāŋ́ ka opeyī gē bī opeyī jé ɔwɛ, uwá ɛplɛ́ɛpa géē gwōnū tá ipú ɔ̄gɔ̄.”

¹⁵Anɔ́ɔ Upíta da ɔ́ kahíníī, “Lɛyí ācīije nyā ka lɛ alɔ.”

¹⁶Amáŋ ó kahiníīī, “Aá abɔ̄yī aá í jɛ́yí ɛlā ā ŋ́ dúú nɛɛ?

¹⁷Aá jé ka ɔdā dúúmā nōo ga okónu ā ī yɛ ga ipú cɛ́ɛ́ ó klla i bɛ̄cɛ ŋ́ nɛɛ?

¹⁸Amáŋ ɔdā nōo ŋmá okónu ā ŋmá ipɔ́tū. Ɛ̄nyā kē ī bīya ɔ̄cɛ á.

¹⁹Ohígbū ka ŋmá ipɔ́tū nɛ̄ ɛlá obɔ̄bí, ɔ̄cɛ ōŋmó, ajā ōgbo, uwī ōwī, ibéenú ɛ̄kɛ̄mgbɛ̄ ō cɛ̄, mɛ́mla iyē ō bīya ācɛ anú gē bɛ̄cɛ á.

²⁰Ɛ̄nyā gē bīya ɔ̄cɛ á. Amáŋ o lé ɔdōlé mla abɔ̄ nēé na ŋ́ mā í gē bīya ɔ̄cɛ ŋ́.”

²¹Anɔ́ɔ Ujísɔ̄si nyɛ̄ɛ̄ ŋmá abɔ́ɔ le táajɛ kú Utáya mɛ́mla Usídɔn á.

²²Ɔkwɔɔkwu ɔ́ɔmā ɔnyā kú Ukénan éyi nōo ŋmá ipɔ́lɛ́ ɔ́ɔmā dɛ̄gba kahíníī, “Ményinyi um, Óndú, Ɔyínɔ̄nyīlɔ kú Udéfīdi. Alelékwū obɔ̄bí le mu ɔyí um nɔ̄nyā iyē.”

²³Amáŋ Ujísɔ̄si í tóohi dúúmā ŋ́. Anɔ́ɔ ayíkpó kú nū wā gaá gbɔ̄ɔkɔ lɛ ɔ́ kahíníī, “Lɛ ɔ́ nū, ohígbū koó gē dɛ̄gba tá alɔ ɔkwu.”

²⁴Amáŋ Ujísɔ̄si tóohi kahíníī, “É tū um ɛhɔ̄ ga ɛgiyí aálá kú Ísrɛ̄lu, nēe bī ā nɛ n.”

²⁵Amáŋ ɔnyā ā wā gaá lɛ okwúukwu kwajɛ iyɔ̄bū Ujísɔ̄si, anɔ́ɔ ó gbɔ̄ɔkɔ lɛ ɔ́ kahíníī, “Óndú, tá um abɔ̄.”

²⁶Anɔ́ɔ Ujísɔ̄si tá ɔ́ ohi kahíníī, “Ó lɔhi ká ɔ̄cɛ kóō je ɔdōlé kú ayípɛ̄ nɛ̄ŋ́cɛ́ tá lɛ ayí ewō ŋ́.”

²⁷Anɔ́ɔ ɔnyā ā kahíníī, “Ɔkwɛ̄yi nɛ, Óndú. Nááná aéwō ā kē ī lé iwili kú ɔdōlé nēe gē ŋmá ɛyí utéblu kú ɔkpani uwā ā dúú.”

²⁸Anɔ́ɔ Ujísɔ̄si da ɔ́ kahíníī, “Ɔnyā, ɔtū nɛ̄ a kpóce úm a nwuné íbí. Kóō le yá gā uwɔ ɛ́gɛ́nɛ̄ ā tíne ā.” Anɔ́ɔ ɔyí nū nɔ̄nyā ā le hɛ́tá ŋmá eko ɔ́ɔmā á.

²⁹Ujísɔ̄si nyɛ̄ɛ̄ ŋmá abɔ́ɔ, le yɛ pī ísu kú Ugálīli. Ó le icō ɛfu éyi tū anɔ́ɔ ó má cīīce á.

³⁰Ɛwa nɛ̄hi le pɛ́ wā ɛgiyí nū. É bī ācɛ ocīkpó, ācɛ opeyī, ācɛ odokónu, mɛ́mla ācɛ o doōcē alɛwa ɔhá wā dúú. Anɔ́ɔ é lɛ uwá kpó bá ɛgiyí ikpó kú nū. Ó kē lɛ uwá hɛ́tá.

³¹Anɔ́ɔ ācɛ āa le hídáagó ohígbū keé má ācɛ odokónu gē kɛlā, mɛ́mla ācɛ onyɔ́nyí le hɛ́tá, ācɛ ocīkpó gē yāwu, ācɛ opeyī kē ī mɛ́ɛbɛ. Anɔ́ɔ é cɛ̄tra Ɔwɔicō kú Ísrɛ̄lu á.

³²Anɔ́ɔ Ujísɔ̄si lɛ ayíkpó kú nū hīgwú wā ɛgiyí nū anɔ́ɔ ó kahíníī, “Ɛwa nēe bá nyā gē tū um eyīnyinyi ohígbū ka uwá húmáyī bá pī um ɛ̄cī ɔ́mɛtá yɔ mɛ́ɛ̄ á, é kē lé ɔdōlé dúúmā ŋ́. Ń tíne ō da uwá kéē nyɔ̄ ipú áncā ŋ́, ohígbū kē lɔfú gbayibó ɔwɛ.”

³³Anɔ́ɔ ayíkpó kú nū da ɔ́ kahíníī, “Iní nɛ̄ alɔ géē lá igbō nwuné ŋmá ígbíli nyā, nɛ̄ ɛwa mbá ā géē lé kéē lɛ ipú nū ā?”

³⁴Anɔ́ɔ Ujísɔ̄si da uwá kahíníī, “Igbō ɛmulá nɛ̄ aá lɛ?” Anɔ́ɔ é tóohi kahíníī, “Ahāapa mɛ́mla aɛ́béenyi nɛ̄ŋ́cɛ́ nēe lɛwa ŋ́.”

³⁵Ujísɔ̄si le ɔ́da je lɛ ācɛ ā kéē yāajɛ ajɛ.

³⁶Ó kwú igbō ahāapa mɛ́mla aɛ́béenyi ā ú, ó lɛ ahínyá tá Ɔwɔicō, anɔ́ɔ ó le igbō mɛ́mla aɛ́béenyi kpó lɛ ayíkpó kú nū á. Ayíkpó ā kē le kpó kɔ̄ lɛ ācɛ āa.

³⁷É le lé klla lɛ ipú nū. Anɔ́ɔ ayíkpó ā le iwili ā túbá á. É kē le mu ómblí ahāapa.

³⁸Ācɛnyīlɔ nēe lé ā wɛ úlá igwó. É gbo ācɛnyā mɛ́mla ayípɛ̄ nɛ̄ŋ́cɛ́ áluka tū uwā ŋ́.

³⁹Eko nōó le da ācɛ ā kéē gā ɔlɛ́ ā. Ó le yɛ tá ipú ɔ̄kɔ klla le yɛ tá ɔlɛ́ nēé hī ka Umagádan ā.