Read idoma UMÁTIYU 16 Bible Online

UMÁTIYU 16 - idoma bible

UMÁTIYU 16

¹Ācɛ Ufárisīi mɛ́mla ācɛ Usádusīis ōhī le pɛ́ gā ɛgiyí Ujísɔ̄si kéē jé ɔ̄ má. Anɔ́ɔ é da ɔ́ ɔ̄kā kóō le ɔdōcābɔ̄ nōo ŋmá ɔkpáncō mafú lɛ uwā á.

²Ó tá uwā ohi kahíníī, “Eko nɛ̄ ɔ̄nɔ̄ɔ̄nɛ̄ gbɔ́ɔ ō yá, aá ī ka ka, ‘Ó géē wɛ ɛ̄cī olɔhi, ohígbū ka ɔkpáncō wɛ ɔnɔ̄wá.’

³Ɔ̄cɔ̄ɔcī ā, aá kē ī ka ka, ‘Ɔwɔ o tówu nɛ̄hi géē yā ícɛ, ohígbū ka ɔkpáncō wɛ ɔnɔ̄wá, ojuja klla gē túbá.’ Aá jɛ́yí ɛ́gɛ́ dóódu nɛ̄ oōmá kú ɔkpáncō lɛ ā, amáŋ aá jɛ́yí ocābɔ̄ kú eko nēe bá ā ŋ́. [5]

⁴“Ācɛ obɔ̄bí mɛ́mla ɛ̄nɛ̄ ó jé Ɔwɔicō ŋ́ bɛ̄ɛka aá nēe wɛ ācɛ kú eko nyā ā, gē dɔɔ̄kā ɔdōcābɔ̄ á. É gáā je ɔdōcābɔ̄ dúúmā lɛ aá ŋ́, ń táafú ŋ́ ayíka ɛdɔ ɔdōcābɔ̄ nɛ̄ Ɔwɔicō mafú lɛ Ujóna ōfōōfūnū nɛ.” Anɔ́ɔ ó nyɛ̄ɛ̄, habɔ̄ uwā tá á.

⁵Eko nɛ̄ ayíkpó ā le yɛ tá ogbeé ɔhá ā, é kwú mlanyī ō je igbō.

⁶Anɔ́ɔ Ujísɔ̄si da uwá kahíníī, “Aá leyī kwɛcɛ, kú aá leyīkwu ɔdōnīgbō kú ācɛ Ufárisīi mɛ́mla ācɛ Usádusīis.”

⁷Anɔ́ɔ é bá ī ka mɛ́mla īyī uwā kahíníī, “Ó ka ɛ̄nyā abɔ̄ alɔ í bī igbō ŋ́ mā nɛ̄ n.”

⁸Eko nɛ̄ Ujísɔ̄si lɛ ɔdā nēe ī gbɛlá ā jé ā, ó kahíníī, “Ɔtū ō kpóce Ɔwɔicō kú aá nyɛ́ íbí. Ɔdíyá nɛ̄ aá ī ka mɛ́mla īyī aá ka aá lɛ igbō ŋ́ mā?

⁹Aá jé ɛ́ɛ́ ŋ́ kpɔ́ ɔ̄ɔ̄, kɛ̄ɛ̄ ka aá blakwu igbō ɛhɔ̄ nɛ̄ ācɛ úlá igwɛ́ɛpa lé ā ŋ́, mɛ́mla áluka ómblí kú iwili nɛ̄ aá túbá ā ŋ́ nɛɛ?

¹⁰Aá blakwu igbō ahāapa nɛ̄ ācɛ úlā igwó lé ā ŋ́, mɛ́mla áluka ómblí kú iwili nɛ̄ aá túbá ā ŋ́ nɛɛ?

¹¹Ɔdíyá nɛ̄ aá kōō gbɛlá ka n ŋ́ yɔ̄ ī kɛlā lɛyíkwu ɔdōlé ŋ́ mā? Aá lɛ ɛlá kwu ɔdōnīgbō kú ācɛ Ufárisīi mɛ́mla ācɛ Usádusīis.”

¹²Anɔ́ɔ é le jé koó wɛ ɔdonigbo nōo yɔ̄ ī pi aá ahɔ̄ lɛyíkwu ɔ́ ā ŋ́. Amáŋ ɔdā nɛ̄ ācɛ Ufárisīi mɛ́mla ācɛ Usádusīis gē nwū ā nɛ.

¹³Eko nɛ̄ Ujísɔ̄si gā ajɛ kú Usísarīya Ufílipāyi ā, ó da ayíkpó kú nū ɔ̄kā kahíníī, “Ɔ̄nyɛ nɛ̄ ācɛ ka ka Ɔyínɔ̄nyīlɔ kú Ɔ̄cɛ ɔ́ɔ wɛ ā?”

¹⁴Anɔ́ɔ é ka kahíníī, “Ācɛ ōhī ka Ujɔ́ni oyúbatísim, amáŋ ācɛ ɔhá ka Ɛláyíja. Ācɛ ɔhá klla ka ka Ujeremíya, ámāŋ éyi kú ipú ācomɛ́ɛbɛ ā.”

¹⁵Anɔ́ɔ ó da uwá ɔ̄kā kahíníī, “Aá abɔ̄yī aá, ɔ̄nyɛ nɛ̄ aá ka ka n wɛ āa?”

¹⁶Usáyímɔ̄n Upíta tóohi kahíníī, “Awɔ wɛ Ohɔ́nyɛtá, Ɔyínɔ̄nyīlɔ kú Ɔwɔicō nōo yēeyī ā á.”

¹⁷Ujísɔ̄si tóohi kahíníī, “Ákú uwɔ lɔhi, Usáyímɔ̄ni, ɔyínɔ̄nyīlɔ kú Ujɔ́ni, ohígbū koó wɛ ɔ̄cɛ ɔlamu ma ɔ́ fú gā awɔ ā ŋ́, amáŋ Ádā um nōo yɔ̄ ɔkpáncō ā nɛ.

¹⁸N kē da uwɔ ka a wɛ Upíta. Ɛyí ápátɛ́cɔ̄ nyā nɛ̄ n kē í gwó icɔ́ɔci kú um ce á. Ɔfú kú ikwū í kē gáā yá ɔ̄ lé glá ŋ́.

¹⁹N géē je ayígodó kú ajɔ̄ɔ̄cɛ́ kú ɔkpáncō gā uwɔ. Ɔdā dúúmā nɛ̄ a le gbō ɛcɛ nyā, é géē gbō ɔ̄ ɔkpáncō. Ɔdā dúúmā nɛ̄ ā kē le wī ɛcɛ nyā, é géē wī ɔ̄ ɔkpáncō.”

²⁰Anɔ́ɔ ó pi ayíkpó kú nū ahɔ̄ kéē da ɔ̄cɛ dúúmā ka anúɔ ɔ́ wɛ Ohɔ́nyɛtá ā ŋ́ má.

²¹Ŋmá eko ɔ́ɔmā Ujísɔ̄si gbɔɔ́ ō da ayíkpó kú nū pée ka anúɔ géē nyɔ̄ Ujerúsālɛm piíí. Anúɔ klla géē móōwē nɛ̄hi abɔ̄ kú anyākwɔ́cɛ mɛ́mla aótrɛ̄yí kú ācogwɛ́ɛya ā mɛ́mla aítíca kú íne ā. É kē géē ŋmó anúɔ piíí, amáŋ anúɔ géē héyī ŋmá ɔlékwū ɛ̄cī ɔ́mɛtá.

²²Anɔ́ɔ Upíta le ɔ́ bī ga ɛkwūbá gbɔɔ́ ō ka ífulá tá ɔ̄ kahíníī, “Óndú, Ɔwɔicō tá, ká ɔdā ɛ́gɔ́ɔmā kóō yá uwɔ.”

²³Amáŋ Ujísɔ̄si pīyeyī kwu Upíta, anɔ́ɔ ó kahíníī, “Nyɛ̄ɛ̄ ga igbīhi um, Usétan! A wɛ ɔdā o ŋmɔ́ɔwɛ tū um, ohígbū ka ɛlá nɛ̄ gbo nyā í ŋmá ɛgiyí Ɔwɔicō ŋ́, amáŋ ɛgiyí ɔlɛɛcɛ nɛ.”

²⁴Anɔ́ɔ Ujísɔ̄si da ayíkpó kú nū kahíníī, “Ɔ́dāŋ ka ɔ̄cɛ dúúmā tíne kóō yɛce um, ayíka kóō leyī gwū iyī nū bónū kóō kē kwú ɔcóōnyɔ́kpá kú nū ú kóō yɛce um

²⁵Ɔ̄cɛ nōo tíne kóō lɛ oyēeyī kú nū tū céé, í je ɔ́ bí. Amáŋ ɔ̄cɛ nóō kwú oyēeyī kú í tónu ohígbū um géē pīyɛ̄ oyēeyī kú nū

²⁶Ohígbū ka ɔ̄cɛ í gáā lɛ itene dúúmā ŋ́, ɔ́dāŋ nōó lɛ odúúdú ɛcɛ lɛ nōó yēeyī ŋ́. Ó lɛ ɔdā dúúmā nɛ̄ ɔ̄cɛ géē le fūla oyēeyī kú nū glá ŋ́.

²⁷Ohígbū ka Ami, Ɔyínɔ̄nyīlɔ kú Ɔ̄cɛ géē wā mɛ́mla aálelékwū-ōtɛ̄hɔ̄ kú um ipú ɛgahi kú Ádā um. Eko ɔ́ɔmā, n géē cíla ɔ̄cɛ dóódu ulé ɛ́gɛ́nɛ̄ úklɔ́ kú nū lɛ ā.

²⁸Ɔkwɛ̄yi, n da aá ka, ācɛ ōhī kú aá nēe háyi amānyā abālɔbányā, í gáā kwú gbɔbū ŋ́ ɛ́ɛ́ nɛ̄ Ɔyínɔ̄nyīlɔ kú Ɔ̄cɛ géē cɔcɛ́ í wā ipú ɛcɛ ā ŋ́.”