Read idoma UMÁTIYU 17 Bible Online

UMÁTIYU 17 - idoma bible

UMÁTIYU 17

¹Eko nɛ̄ ɛ̄cī ɛhīlī le gla ā, Ujísɔ̄si kwú Upíta mɛ́mla Ujémīsi mɛ́mla Ujɔ́ni, ɔyínɛ́ Ujémisi ú, anɔ́ɔ ó le uwá bī nyɔ̄ icō ɛfu nɛ̄hi ōfōofū uwā á.

²Abɔ̄ é bá gē má ɔ̄ ā, Ujísɔ̄si kwú pīya ɛdɔ ɔhá ipeéyī uwā. Eyī kú nū gbɔɔ́ ō cɛ̄ nyaá nyaá bɛ̄ɛka ɛnɔ āa. Úwé kú nū yɔ̄ ī ceyī ŋaáŋaá bɛ̄ɛka ɔlá āa.

³Ikpííkpó ɔ́ɔmā, é má Umósīsi mɛ́mla Ɛláyíja bá ī kɛlā mɛ́mla anú.

⁴Anɔ́ɔ Upíta da Ujísɔ̄si kahíníī, “Óndú, ó lɔhi ɛ́gɛ́nɛ̄ alɔ bá amānyā. Ɔ́dāŋ́ ka a tíne, n géē ce áklɔ́kpɛ ɛtá amānyā. Éyi wɛ ákú uwɔ, éyi wɛ ákú Umósīsi, cɛ́ɛ́ ɔhá kē wɛ ákú Ɛláyíja.”

⁵Abɔ̄ ó yɔ̄ ī kɛlā ā, ojuja ɛnɛ̄hɛ́ nōo yɔ̄ ī ceyī wā gaá klá uwá. Anɔ́ɔ ɔkɔ éyi ŋmá ipú ojuja ā kahíníī, “Ɛ̄nyā wɛ Ɔyínɔ̄nyīlɔ kú um nōo he um ɔtū, nɛ̄ ɛlā nū kē he um ɔtū fíyábɔ̄ ā á. Aá jāhɔ̄ lɛ ɔ́.”

⁶Eko nɛ̄ ayíkpó ā lɛ ɔkɔ nyā pó ā, ufi kē yá uwā nɛ̄hi. Anɔ́ɔ é lɛ eyī pīya klá ajɛ á.

⁷Ujísɔ̄si wā gaá lɛ abɔ̄ kwu uwā, da uwá kahíníī, “Aá cāŋjɛ, aá yúúfi ŋ́.”

⁸Eko nēé je eyī gicō ā, é má ɔ̄cɛ ɔhá dúúmā gwū Ujísɔ̄si tá gɛ ŋ́.

⁹Eko nēé yɔ̄ gē wāajɛ ŋmá ɛyí ɛfu ā, Ujísɔ̄si lɛ abɔ̄ pi uwá ahɔ̄ kahíníī, “Aá híīī da ɔ̄cɛ dúúmā ɔdā dúú nɛ̄ aá má ā ŋ́, jāā gbéeko nēé lɛ Ami, Ɔyínɔ̄nyīlɔ kú Ɔ̄cɛ héyī ŋmá ɔlékwū.”

¹⁰Anɔ́ɔ ayíkpó kú nū da ɔ́ ɔ̄kā kahíníī, “Ɔdíyá nɛ̄ aítíca kú íne kú Umósīsi ā ka ka Ɛláyíja géē wā gbɔbū ā?”

¹¹Amáŋ ó tá uwā ohi kahínīī, “Ó wɛ ɔkwɛ̄yi ka Ɛláyíja géē wā gbɔbū kóō lɛ ɔdā dóódu gllayá ɛ́gɛ́nɛ̄ ó cíkā ō lɛ ā.

¹²Amáŋ ń da aá ka, Ɛláyíja gā ɔkwɛ̄yi ɛɛ́, amáŋ é jé ɔ̄ ŋ́. É kē yá ɔ̄ ɔdā dóódu nōo he uwá ɔtū ā. Ɛ́gɔ́ɔmā nēé gáā yá Ɔyínɔ̄nyīlɔ kú Ɔ̄cɛ ɔdā nōo he uwá ɔtū lɛ dúú á.”

¹³Anɔ́ɔ ayíkpó ā le jé koó yɔ̄ ī kɛlā lɛ uwá lɛyíkwu Ujɔ́ni oyúbatísim á.

¹⁴Eko nēé gā ɛgiyí ɛwa āa, ɔ̄cɛ éyi gā ɛgiyí Ujísɔ̄si. Anɔ́ɔ ó lɛ okwúukwu kwajɛ iyɔ̄bū nū kahíníī,

¹⁵“Óndú, ményinyi ɔyí um nɔ̄nyīlɔ, ohígbū ka ó gē jajikpáakpáa. Ó ī móōwē fíyábɔ̄. Ó ī míya tá ɔlá ojigógó, ó ke ī míya tá éŋkpɔ̄ ojigógó.

¹⁶N bī ɔ̄ wā gé lɛ ayíkpó kú uwɔ, amáŋ é kē hɛ́ ɔ̄ tá glá ŋ́.”

¹⁷Anɔ́ɔ Ujísɔ̄si tóohi kahíníī, “Aá wɛ ācɛ nēé kpɔ́tūce Ɔwɔicō ŋ́, klla bɔ̄bí nɛ̄hi. Eko nyá nɛ̄ n géē yɔ̄ mɛ́mla gaá kwu ā? Eko nyá nɛ̄ n kē í cīibū aá kwɛjī āa? Lɛ ɔyínɔ̄nyīlɔ ā bī wā gé um amānyā.”

¹⁸Ujísɔ̄si le ɛgba dɛ̄ tū alelékwū obɔ̄bí ā, anɔ́ɔ ó gā ɛcɛ ŋmá ipú iyē kú ɔyínɔ̄nyilɔ á. Ɔyí ā kē le hɛ́tá ŋmá eko ɔ́ɔmā.

¹⁹Eko nēé bá ōfūūfū uwā ā, ayíkpó ā wā ɛgiyí Ujísɔ̄si, anɔ́ɔ é da ɔ́ ɔ̄kā kahíníī, “Ɔdíyá nɛ̄ alɔ í nū ebílíi ā bɛ̄cɛ glá ŋ́ mā āa?”

²⁰Ujísɔ̄si da uwá kahíníī, “Ohígbū ka aá cɛ̄ kpɔ́cí ka Ɔwɔicō ɔ́ɔ géē yá ɔ̄ glá ŋ.” Ɔkwɔ̄ɔkwɛ̄yi, n̄ da aá ka ɔ́dāŋ ka aá lɛ ɔtū kpóce Ɔwɔicō ɔwɛ olígíí bɛ̄ɛka īkpō umɔ́stāād ā, aá géē da ɛfu nyā kahíníī, “Le fu ŋmá amānyā gā ánūmā ā.” Ó kē í fu. Ɔdā dúú í gáā lɔnɔ tū aá ŋ́.

²¹Amáŋ ɔdā dúú í gáā yá kú ɛdɔ alelékwū nyā kóō bɛ̄cɛ glá ŋ́, ń táafú ŋ́ ayíka ācɛ gwu okónu klla gbɔ̄ɔkɔ lɛ Ɔwɔicō nɛ̄ n.

²²Abɔ̄ é bá Ugálīli ā, Ujísɔ̄si da uwá kahíníī, “É géē je Ɔyínɔ̄nyīlɔ kú Ɔ̄cɛ tá ācɛ abɔ̄.

²³É géē ŋmó ɔ̄, amáŋ é géē je ɔ́ héyī ɛ̄cī ɔ́mɛtá.” Ɔtūnōbí yá ayíkpó kú nū ā nɛ̄hi.

²⁴Eko nēé gā Ukapánɔm ā, ācodɔlɛ́ kú Agblīihɔ-nɛ̄hi ā gā ɛgiyí Upíta. Anɔ́ɔ é da ɔ́ kahíníī, “Itíca kú aá í gē da ije ɔlɛ́ kú Agblīihɔ-nɛ̄hi ā ŋ́ nɛɛ?”

²⁵Upíta tóohi kahíníī, “Ó gē da gbóó.” Eko nēé gā inu ā, Ujísɔ̄si wɛ ɔ̄cɛ aflɛ́yí nōo kɛlā á. Ó kahíníī, “Ɔdī nɛ̄ a gbɛlá ā, Usáyímɔ̄n? O ŋmá abɔ̄ ānyɛ nɛ̄ aɔ́cɛ́ kú ɛcɛ nyā gē mīyɛ ulé, amáŋ ijɔ̄ɔ̄lɛ́ āa? O ŋmá abɔ̄ ācɛ ajɛ ɔlɛ́ uwā kɛ̄ɛ ka ācɛ ewɔhá?”

²⁶Upíta tóohi kahíníī, “O ŋmá abɔ̄ ācɛ ewɔhá ā.” Anɔ́ɔ Ujísɔ̄si da ɔ́ kahíníī, “Ó lɛ ā ayíka ācɛ ajɛ ɔlɛ́ uwā ā í cíkā ō da ijɔ̄ɔ̄lɛ́ gɛ ŋ́.

²⁷Amáŋ abɔ̄ alɔ í tíne ká ācɛ nēe bá ā kéē cɔ̄nū ŋ́ mā ā, ga okónu ísu ā. ká ā gaá lɛ uwɔ tá. Ɛbéenyi nɛ̄ a í kwú aflɛ́yí ā bī wɛ̄ɛcɛ. Eko nɛ̄ a lɛ okónu kú nū nwūla, a géē má īkpō ije nɛ̄hɛ́ éyi. Kwú ɔ́ɔmā ú kú ā lɛ ijɔɔlɛ́ kú alɔ gbā lɛ uwá.”