Read idoma UMÁTIYU 18 Bible Online

UMÁTIYU 18 - idoma bible

UMÁTIYU 18

¹Eko ɔ́ɔmā ayíkpó ā wā ɛgiyí Ujísɔ̄si, anɔ́ɔ é da ɔ́ ɔ̄kā kahíníī, “Ɔ̄nyɛ fíyɛ́ dúú ajɔ̄ɔ̄cɛ́ kú ɔkpáncō āa?”

²Anɔ́ɔ ó lɛ ɔyípɛ̄ nɛ̄ŋ́cɛ́ éyi hīgwú wā ɛgiyí nū á, kwú ɔ̄ ú háyi ɔtāhɛ̄ uwā á.

³Anɔ́ɔ ó kahíníī, “Ɔkwɛ̄yi, n̄ da aá ka ń táafú ŋ́, aá le pīyabɔ̄ klla kwú yá bɛ̄ɛka ayípɛ̄ nɛ̄ŋ́cɛ́ ā, aá gáā ga ajɔ̄ɔ̄cɛ́ kú ɔkpáncō glá ŋ́.

⁴Ohígbū ɔ́ɔmā ɔ̄cɛ dúúmā nōo lɛ īyī nū tū wāajɛ bɛ̄ɛka ɔyípɛ́ nɛ̄ŋ́cɛ́ ā, ayíka anú nwuné fíyɛ́ dúú ajɔ̄ɔ̄cɛ́ kú ɔkpáncō á.

⁵Ɔ̄cɛ dúúmā nōo mīyɛ éyi kú ayípɛ̄ nɛ̄ŋ́cɛ́ ɛ́gɛ́nyā ohígbū um, kē mīyɛ um dúú.”

⁶“Amáŋ ɔ̄cɛ dúúmā nōo yá kú éyi kú ayípɛ̄ nɛ̄ŋ́cɛ́ nēe kpɔ́tūce um nēe bá ā kéē klla cɛ̄lā kú um gɛ ŋ́, ó géē lɔhi lɛ ɔ́ fíyɛ́ kéē lɛ ɛgɔ̄ flá pla anú ɔkɔ kéē kwú ɔ̄ ú tá ga ipú ísu.

⁷Ó í bɔ̄bí nɛ̄hi lɛ ɔ̄cɛ dúúmā nōo í yá kú ācɛ ɔhá kéē bīya íne kú Ɔwɔicō ā. Ó wɛ opií ka aɔ́dā ōhī bá nēe géē yá kú ācɛ kéē yá ɔdōōbɔ̄bí. Amáŋ ó í bɔ̄bí nɛ̄hi lɛ ɔ̄cɛ nɛ̄ ojámá ā géē ŋmá ɛgiyí nū āa.

⁸Ɔ́dāŋ ka abɔ̄ kú uwɔ ámāŋ ikpó kú uwɔ yá kú ā bīya íne kú Ɔwɔicō á nɛɛ, lɛ ɔ́ hɛ́ ká ā kwú ɔ̄ ú tónū ŋmá ɛgiyí uwɔ. Ó lɔhi gā uwɔ fíyɛ́ ká ā lā oyēeyī opiyóó mɛ́mla ɔnyí, ámāŋ ikpó o ōcē, ikɔkɔ nɛ̄ a géē lɛ abɔ̄ ɛpa mɛ́mla ikpó ɛpa nēé kē géē kwú uwɔ ú tá ipú ɔlá nōó gē nyí ŋ́ piyóó ā.

⁹Ɔ́dāŋ ka eyī kú uwɔ yá ká ā bīya íne kú Ɔwɔicō á nɛɛ, lɛ ɔ́ wú ká ā kwú ɔ̄ ú tónū ŋmá ɛgiyí uwɔ. Ó géē lɔhi gā uwɔ fíyɛ́ ká ā lɛ eyī éyi ká ā lā oyēeyī opiyóó, ikɔkɔ nɛ̄ a géē lɛ eyī ɛpa nēé géē kwú uwɔ ú tá ipú ɔlíkɔtɔ.

¹⁰“Aá má ka aá híīī lɛ eyī gwū éyi kú ayí nɛ̄ŋ́cɛ́ nēe bá ā bónū ŋ́. Ohígbū ka n̄ da aá ka, aálelékwū-ōtɛ̄hɔ̄ kú uwā bá ɔkpáncō gē má Ádā um eyī eko dóódu.

¹¹Ohígbū ka Ɔyínɔ̄nyīlɔ kú Ɔ̄cɛ wā gáā nya ācɛ nēe bī ā tá.

¹²“Ɔdī nɛ̄ aá gbɛlá ka ɔ̄cɛ nōo lɛ álá ofɛhɔ̄ géē yá, ɔ́dāŋ ka éyi kú álá ā le héyībí āa? “Ó gáā habɔ̄ ofɛnɛ cigwáhāanɛ ā tá ɛyí ɛfu kóō nyɔ̄ í tíne ɛ̄nɛ̄ o bī ā ŋ́ nɛɛ?

¹³Ɔ́dāŋ koó lɛ ɔ́ pīyɛ̄, ɔkwɛ̄yi, n̄ da aá koó géē gwéeyē ohígbū nū fíyɛ́ ofɛnɛ cigwáhāanɛ nēé héyībī ŋ́ mā ā.

¹⁴Ɔwɛ ékpó ɔ́ɔmā ā, ó wɛ ɔdā nōo he Ádā um nōo yɔ̄ ɔkpáncō ā ɔtū kú éyi kú ayí nɛ̄ŋcɛ́ nēe bá ā kóō le yíífi ŋ́.

¹⁵“Ɔ́dāŋ ka ɔyínɛ́ uwɔ lɛ ɔdōōbɔ̄bí yá uwɔ, nyɔ̄ í le aɔ́dā nōó yá uwɔ ā kpó ka lɛ ɔ́ ɔtāhɛ̄ awɔ mɛ́mla anú ɛpa ofōōfū aá. Ɔ́dāŋ koó le ahɔ̄ jē gā uwɔ lɛ abɔ̄ kwajɛ, ayíka aá lɛ pīya ayínɛ́ kpɔ́ ɛɛ́.”

¹⁶Amáŋ ɔ́dāŋ koó pó ɛlā kú uwɔ ŋ́, a klla kwú ɔ̄cɛ éyi ú, ámāŋ ācɛ ɛpa ú tɔ́ɔkwu, kóō ‘ŋmá okónu kú ācɛ ocījáalí ɛpa ámāŋ ɛtá cɛ́ɛ́ kú ɛlā dóódu kóō lɛ ibéenú lɛ,’ ɛ́gɛ́nɛ̄ ɛlɔ̄ɔwɔicō ká ā.

¹⁷Amáŋ ɔ́dāŋ koó tá kóō pó ɛlā kú uwā ā, le da ācɛ icɔ́ɔci. Ɔ́dāŋ koó tá ɛlā kú ācɛ icɔ́ɔci kpɔ́, ayíka a je ɔ́ bɛ̄ɛka opɛ̄cí ā ámāŋ odɔlɛ́ obɔ̄bíipú ā.

¹⁸N da aá ɔkwɔɔkwɛ̄yi ka, ɔdā dóódu nɛ̄ aá tá ɛcɛ nyā, é géē tá ɔ̄ ɔkpáncō. Ɔdā dóódu nɛ̄ aá kē cɛ̄ ɛcɛ nyā, é kē í cɛ̄ ɔkpáncō.

¹⁹“N da aá ɛlā ɔhá kpɔ́, ɔ́dāŋ ka ācɛ ɛpa kú aá nēe bá ipú ɛcɛ amānyā cɛ̄ tɔ̄há lɛ ɔkɔ gbā lɛ Ɔwɔicō kóō lɛ odée yá lɛ aá, Ádā um nōo yɔ̄ ɔkpáncō ā géē yá ɔ̄ lɛ aá.

²⁰Ohígbū ka ɛga nɛ̄ ācɛ ɛpa ámāŋ ācɛ ɛtá le jīla ohígbū um, n géē yɔ̄ ɔtāhɛ̄ uwā abɔ́ɔ.”

²¹Anɔ́ɔ Upíta wā í da ɔ́ kahíníī, “Óndú, igbɛmulá nɛ̄ ɔyínɛ́ um nɔ̄nyīlɔ géē yá um obɔ̄bí kwu nɛ̄ um géē jé yá ɔ́ ɛhi ā? Igbo ahāapa kɛ̄ɛ?”

²²Ujísɔ̄si da ɔ́ kahíníī, “Ń da uwɔ ka igbo ahāapa ŋ́, amáŋ igbo ofɛtá cigwó ɛga ahāapa.

²³“Ohígbū ɔ́ɔmā, é lɔfú lɛ ajɔ̄ɔ̄cɛ́ kú ɔkpáncō gbla ɔcɛ́ éyi nōo tíne kóō gbo ije kú nū nōo bá abɔ̄ ācotɛ̄hɔ̄ kú nū ā áluka.

²⁴Eko nōó gbɔɔ́ ō ka ije ā, é hī ɔ̄cɛ éyi igwú gé lɛ ɔ́, nōo bī ɔ̄ ɛkpa ije úlūūlā.

²⁵Amáŋ abɔ̄ ó lɛ ɔdā dúú nōó géē le cíla anú ulé ŋ́ mā ā, óndú nū je ɔ́da kéē kwú anú mɛ́mla ɔnyā nū mɛ́mla ayí nū mɛ́mla ɔdā dóódu nōó lɛ ā ú kpó lá cɛ́ɛ́ kéē bī ije ā le cíla ulé nōó bī āa.

²⁶Ohígbū ɔ́ɔmā ɔ̄cotɛ̄hɔ̄ ā má kwōkwū ajɛ le ɔkɔ gbā lɛ ɔcɛ́ ā kahíníī, ‘Óndú, lɛ ɔtūlé gā um, n géē cíla uwɔ odúúdú nū.’

²⁷Anɔ́ɔ o le eyīnyinyi kú ɔ̄cotɛ̄hɔ̄ ɔ́ɔmā má, óndú nū ā lɛ ɔ́ hɛ́tá klla kwú ulé ā í yá ɔ̄ ɛhi á.

²⁸Eko nɛ̄ ɔ̄cotɛ̄hɔ̄ ɔ́ɔmā le tá ɛcɛ ā, ó má ɔfiyɛ ɔ́mpa nū ɔhá nōo bī ɔ̄ ijē bɛ̄ɛka úlā ɛhɔ̄ ā. Ó lɛ ɔ́ kwú ɔkɔ, gbɔɔ́ ō pi ɔ́ kahíníī, ‘Lɛ ulé nɛ̄ a bī um ā cílá.’

²⁹Anɔ́ɔ ɔ̄cotɛ̄hɔ̄ ɔ́mpa nū ā lɛ okwúukwu kwajɛ, anɔ́ɔ ó gbɔ̄ɔkɔ lɛ ɔ́ kahíníī, ‘Lɛ ɔtūlé gā um ka n géē cíla uwɔ ulé ā.’

³⁰Amáŋ ó cɛ̄ ŋ́, anɔ́ɔ ó kwú ɔ̄ ú tá agbá jāā gbéeko nōó géē cíla ulé ā á.

³¹Eko nɛ̄ ācotɛ̄hɔ̄ ɔ́mpā nū lɛ ɔdā nōo yá ā má ā, ó kwú uwā iyē nɛ̄hi. Anɔ́ɔ é nyɛ̄ɛ̄ gaá lɛ ɔdā dóódu nōo yá ā da óndú uwā á.

³²Anɔ́ɔ óndú nū le ɔ́ hīgwú wā ɛgiyí nū á. Ó da ɔ́ kahíníī, “A wɛ ɔ̄cotɛ̄hɔ̄ obɔ̄bíipú. N habɔ̄ odúúdú ulé ɔ́ɔmā tá gā uwɔ ohígbū ka a gbɔ̄ɔkɔ gā um.

³³Ó cíkā ká ā méyīnyinyi kú ɔ̄cotɛ̄hɔ̄ ɔ́mpa uwɔ ɛ́gɛ́nɛ̄ n ményinyi kú uwɔ ā ŋ́ nɛɛ?’

³⁴Óndú nū ā le cɔ̄nū, anɔ́ɔ ó kwú ɔ̄ ú tá agbá kéē yá ɔ̄ ōwē jāā gbéeko nōó lɛ odúúdú ulé ā cílá ā.

³⁵Ɛ́gɔ́ɔmā nɛ̄ Ádā um nōo yɔ̄ ɔkpáncō ā gáā yá aá dúú á, ɔ́dāŋ ka ɔnyɔ̄ɔnyɛ kú aá í je yá ɔyínɛ́ nū ɛhi ŋmá ɔtū kú nū ŋ́ má.”