Read idoma UMÁTIYU 2 Bible Online

UMÁTIYU 2 - idoma bible

UMÁTIYU 2

¹É ma Ujísɔ̄si Ubɛ́tlɛhɛ̄m kú Ujudíya, eko nɛ̄ Uhérɔ̄du ce ɔcɛ́ ā. Eko kpiíí ācɛ ojéeyī gā Ujerúsālɛm ŋmá ɛnɔ̄ɔ̄cī kéē wā í má ɔyí nēé ma ā.

²Anɔ́ɔ é da ɔ̄kā kahíníī, “Iní nēé ma ɔ̄cɛ nōo wɛ ɔcɛ́ kú ācɛ Ujíyu ā? Alɔ má ínyílɔ́wɔ ocābɔ̄ kú nū ɛnɔ̄ɔ̄cī. Alɔ kē wā gaá tá ɔ̄ ɔ́gbá.”

³Eko nɛ̄ Ɔcɛ́ Uhérɔdu lɛ ɛ̄nyā pó ā, ó junwalu lɛ ɔ́ nɛ̄hi. Ɛ́gɔ́ɔmā nōó lɛ lɛ odúúdú ācɛ kú Ujerúsālɛm dúú á.

⁴Eko nōó lɛ odúúdú aɔ́cɛ́ kú ācogwɛ́ɛya mɛ́mla Aítíca kú íne kú ācɛ ā túbá āa, ó da uwá ɔ̄kā kahíníī, “Iní nēé géē ma Ohɔ́nyɛtá āa?”

⁵É tá ɔ̄ ohi kahíníī, “Ipú Ubɛ́tlɛhɛ̄m kú Ujudíya. Ohígbū ka ācomɛ́ɛbɛ ā tá tāajɛ kahíníī,

⁶‘Aá nēe wɛ ācɛ kú Ubétlehɛ̄m, ipú ajɛ kú Ujudíya, Aɔ́cɛ́ kú Ujúda jé ka igelī kú aá cɛgbá fíyɛ́ dúú ipú ɔlɛ́ uwā ā ohígbū ka otrɛ̄yí éyi géē bɛ̄cɛ ŋmá igelī kú aá nōo géē gbō ācɛ ɔlɛ́ um, Ísrɛ̄lu!’”

⁷Anɔ́ɔ Uhérɔdu hī ācojéeyī ā igwú ga ɛkwūbá, yá ɛmɛɛma, le jé ŋmá ɛgiyí uwā eko nɛ̄ ínyílɔ́wɔ ā bɛ̄cɛ ā á.

⁸Anɔ́ɔ ó le uwā tɛ̄hɔ̄ ga Ubétlehɛ̄m da uwá kahíníī, “Aá nyɔ̄ kú aá dɔɔ̄kā ɔyínɛ̄ŋ́cɛ́ ā lɔɔlɔhi. Eko nɛ̄ aá lɛ ɔ́ má, aá wā gaá le da um, ká n̄ gaá lɛ ɛ̄gbá gbā ɔ̄ dúú.”

⁹Eko nēé lɛ ɛlā kú ɔcɛ́ ā pó ā, uwá gbo iyāwu kú uwā. Abɔ̄ é bá ī nyɔ̄ ɔwɛ ā, é le ínyílɔ́wɔ ékpó piíí nēé má ɛnɔ̄ɔ̄cī ā má kpɔ́. Ó gaá gbɔbū lɛ uwá jāā gbéeko nōó gaá māháyi ɛga nɛ ɔyí ā yɔ̄ āa.

¹⁰Eko nēé lɛ ínyílɔ́wɔ nōo ŋmá ɛnɔ̄ɔ̄cī ā má āa, é gwéeyē nɛ̄ɛ̄nɛ̄hi.

¹¹É le tá ipú inu ā, anɔ́ɔ é le ɔyí ā mɛ́mla ɛ́nɛ́ nū, Umerí, má á. É le okwúukwu kpó kwajɛ, lɛ ɛ̄gbā gbā ɔ̄. É kē lɛ ɛga nēé kpó agbénú kú uwā tū ā nwūla, anɔ́ɔ é le ɛhi kú ugóolu, mɛ́mla ufránkīnsɛns mɛ́mla umáar kpó lɛ ɔ́ á.

¹²Abɔ̄ é lɛ ukɔ́ tū uwā ipú ɔ̄na kéē híīī pīyɛyí bū ɛgiyí Uhérɔdu ŋ́ mā ā, é kwúcē le yɛ ɔwɛ ɔhá ga ajɛ ɔlɛ́ uwā.

¹³Eko nēé nyɛ̄ɛ̄ ā, éyi kú alelékwū-ōtɛ̄hɔ̄ kú Óndú ā wā ɛgiyí Ujósɛ̄fu ipú ɔ̄na gaá da ɔ́ kahíníī, “Cāŋjɛ kú ā kwú ɔyí ā mɛ́mla ɛ́nɛ́ nū ú ká ā le kwu ga ajɛ Íjīpiti. Cɛ́ɛ́ ká ā yɔ̄ abɔ́ɔ gbéeko nɛ̄ n da uwɔ ka a nyɛ̄ɛ̄. Ohígbū ka Uhérɔ̄du géē tíne ɔyí ā kóō lɛ ɔ́ ŋmó.”

¹⁴Ó cāŋjɛ, anɔ́ɔ ó kwú ɔyí ā mɛ́mla ɛ́nɛ́ nū ú otóótú ɔ́ɔmā, anɔ́ɔ ó nyɛ̄ɛ̄ le tá ajɛ Íjīpiti á.

¹⁵É bá ajɛ kú Íjīpiti jāā gbéeko nɛ̄ Uhérɔ̄du gekwú. Ɛ̄nyā yá lɛ ā cɛ́ɛ́ ká ɛlā kú Óndú ā, nōó ka bū okónu kú ɔ̄comɛ́ɛbɛ éyi ā kóō le yá jīla. Ó kahíníī, “N hī ɔyí um igwú ŋmá ajɛ kú Íjīpiti.”

¹⁶Abɔ̄ Uhérɔ̄du má ka ācɛ ojéeyī ā lɛ ɔ́ púla ā, ɔtū wú ɔ̄ nɛ̄ɛ̄nɛ̄hi. Anɔ́ɔ ó le aícɔ́ɔja tɛ̄hɔ̄ kéē gaá lɛ ayípɛ̄nɛ́ŋ́cɛ́ nɔ̄nyīlɔ dóódu nēe wɛ iháyí ɛpa wāajɛ nēe bá igelī nēé hī ka Ubétlehēm mɛ́mla ajɛ nēe bá kwu ɔ́ ā kpó ŋmó. Ó leyī bī eko nɛ̄ ācɛ ojéeyī da ɔ́ ka ínyílɔ́wɔ ɔ́ɔ bɛ̄cɛ ā wɛ iháyí ɛpa.

¹⁷O ŋmá ɛnyā ɛlā nɛ̄ Ujeremíya, ɔ̄comɛ́ɛbɛ ā, ka ā le yá jīla. Ó kahíníī,

¹⁸“Ācɛ pó ɔkɔ kú ikwū ō je ajɛ kú Uráma. Ɔkɔ kú ɔ̄cɛ éyi yɔ̄ ī jikwū klla yɔ̄ ī tɛ̄gíkwū. Urécɛ̄lu yɔ̄ gē jikwū ohígbū ayí nū á. Ɔ̄cɛ dúú í yɔ̄ nōo tá ɔ̄ ɔtūlé glá ŋ́, ohígbū ka ayí ā le pɛ́ gekwú.”

¹⁹Eko nɛ̄ Uhérɔ̄du gekwú ā, alelékwū-ōtɛ̄hɔ̄ kú Óndú ā éyi wā ɛgiyí Ujósɛ̄fu ipú ɔ̄na ajɛ Íjīpiti.

²⁰Anɔ́ɔ ó da ɔ́ kahíníī, “Cāŋjɛ ká ā kwú ɔyípɛ̄ āa mɛ́mla ɛ́nɛ́ nū ú, ká ā kwúcē ga ajɛ Ísrɛ̄lu. Ohígbū ka ācɛ nēe tíne ō ŋmó ɔyípɛ̄ ā le pɛ́ gekwú ɛɛ́.”

²¹Anɔ́ɔ Ujósɛ̄fu cāŋjɛ, kwú ɔyí ā mɛ́mla ɛ́nɛ́ nū ú anɔ́ɔ é le pɛ́ tá Ísrɛ̄lu á.

²²Amáŋ eko nōó pó ka Akélɔ̄si ce ɔcɛ́ kú Ujudíya ā kwɛyí ádā nū, Uhérɔ̄du ā, Ujósɛ̄fu yúúfi ō nyɔ̄ abɔ́ɔ. Anɔ́ɔ é lɛ ukɔ́ tū ɔ̄ ipú ɔ̄na ā kóō le tá ajɛ kú Ugálīli á.

²³Anɔ́ɔ ó gaá lā igelī nɛ̄hi nēé hī ka Unásārēti ā á. Ɛnyā le ɛlā nɛ̄ ācomɛ́ɛbɛ ā ka ā yá jīla. É kahíníī, “É géē hī ɔ̄ ka ɔ̄cɛ kú Unásārēti.”