Read idoma UMÁTIYU 20 Bible Online

UMÁTIYU 20 - idoma bible

UMÁTIYU 20

¹“Ajɔ̄ɔ̄cɛ́ kú ɔkpáncō lɛbɛ̄ɛka ádɔ̄lɛ́, nōo bɛ̄cɛ ɔ̄cɔ̄ɔ̄cī blibli gaá dɔɔ̄kā ācɛ nōó géē ce ɛhɔ̄ ufáyin kú nū lɛ uwá ā.

²Eko nōó le kagwó mɛ́mla ācoyúklɔ́ ā nɛ̄ ɔnyɔɔnyɛ kú uwā cɛ̄ ɔkɔ́bɔ igwɛ́ɛhɔ̄ ɛ̄cī éyi ā, ó lɛ uwá tū ga ɛhɔ̄ ufáyin kú nū ā.

³Ó le tá ɛcɛ ɛplá oje ahāanɛ kú ɔ̄cɔ̄ɔ̄cī, anɔ́ɔ ó má ācɛ ɔhá bá icííci ɔɔ́pu ā á.

⁴Anɔ́ɔ ó da uwá kahíníī, ‘Aá ga ipú ɛhɔ̄ ufáyin kú um dúú cɛ́ɛ́ ɔdā dúúmā nōo cíkā ā n géē cíla aá.’ Anɔ́ɔ é le yɛ á.

⁵Ó le tá ɛcɛ igbɔhá ɛplá ɛnɔ o yɛ̄ɛyí mɛ́mla ɛplá oje ɛtá kú ɔlɛ́ɛnɔ ā. Ó yá ɔdā ékpó ɔ́ɔmā kpɔ́.

⁶Ɛplá oje ɛhɔ̄ kú ɔ̄nɔ̄ɔnɛ̄ ā, ó le tá ɔɔ́pu, anɔ́ɔ ó má ācɛ ɔhá māháyi á. Ó da uwá kahíníī, ‘Ɔdíyá nɛ̄ aá húmáyī ú bá amānyā, nɛ̄ aá kē yá ɔdā dúúmā ícɛ ɛ́ɛ́ ŋ́ mā ā?’

⁷Anɔ́ɔ é da ɔ́ kahíníī, ‘Ohígbū ka ɔ̄cɛ dúúmā í pūla alɔ úklɔ́ ŋ́’. Ó da uwá kahíníī, ‘Aá ga ipú ɛhɔ̄ ufáyin kú um nyɔ̄ í yúklɔ́ dúú.’

⁸Anɔ́ɔ eko nɛ̄ ɔnɔ̄ɔ̄nɛ̄ le gbo ā, óndɛ̄hɔ̄ kú ufáyin ā da otrɛ̄yí kú ācoyúklɔ́ kú nū ā kahíníī, ‘Hī ācoyúklɔ́ ā igwú ká ā gbā ulé kú uwā lɛ uwá. Gbɔɔ́ ŋmá ācɛ igbīhāajɛ ga ācɛ ogbɔbū.’

⁹Eko nɛ̄ ācɛ nēé pūla ɛplá oje ɛhɔ̄ kú ɔ̄nɔ̄ɔnɛ̄ ā gā ā, é le ɔkɔ́bɔ igwɛ́ɛhɔ̄ gbā lɛ ɔnyɔɔnyɛ kú uwā.

¹⁰Anɔ́ɔ eko nɛ̄ ācɛ nēé pūla aflɛ́yí ā gā a, é leyīce ka aá géē mīyɛ fíyɛ́. Amáŋ é ɔkɔ́bɔ igwɛ́ɛhɔ̄ ā nēé gbā lɛ ɔnyɔɔnyɛ kú uwā dúú á.

¹¹Eko nēé mīyɛ ā, é gbɔɔ́ ō kiŋini lɛyíkwu ádɔ̄lɛ́ ā.

¹²É kahíníī, “Ācɛ igbīhāajɛ nēe bá ā yúklɔ́ áwa ékpó ōfūnū, amáŋ a kē lɛ ije gbā lɛ uwá jōnjīlɛ̄ mɛ́mla alɔ nēe hímáyī yúklɔ́ nɛ̄hi ɛ̄cī ā dúúdú ipú ɛnɔ okwɔ́lá ā.”

¹³“Amáŋ óndɛ̄hɔ̄ ā da éyi kú uwā kahíníī, ‘Oklóbīya um, ń yá uwɔ ɔdōōbɔ̄bí dúúmā ŋ́. Á cɛ̄ ɔkɔ́bɔ igwɛ́ɛhɔ̄ ɛ̄cī éyi mɛ́mla um ŋ́ nɛɛ?

¹⁴Kwú ɔdā nōo wɛ ákú uwɔ ā ú kú ā nyɔ̄. Ó he um ɔtū ā yá nɛ̄ n je lɛ ɔ̄cɛ igbīhāajɛ nyā ɛ́gɛ́nɛ̄ n je gā uwɔ ā dúú á.

¹⁵Ń yá ɔdā nɛ̄ n tíne mla ije nōo wɛ ákú um glá ŋ́ nɛɛ? Ɔdíyá nɛ̄ a gē mímálānyī ɔ́dāŋ ka n lɛ íjɛ́ɛ́lā jé āa?’

¹⁶“Ɛ́gɛ́nyā nɛ̄ ācɛ igbīhāajɛ géē pīya ācɛ ogbɔbū, ācɛ ogbɔbū kē í pīya ācɛ igbīhāajɛ á.”

¹⁷Abɔ̄ Ujísɔ̄si yɔ̄ gē tū ɛfu ga Ujerúsālɛm ā, ó le ayíkpó igwɛ́ɛpa ā ofūwā kpó, anɔ́ɔ ó da uwá kahíníī,

¹⁸“Aá mɔ́ɔ, alɔ gē ga Ujerúsālɛm ɛɛ́. É géē je Ɔyínɔ̄nyīlɔ kú Ɔ̄cɛ tā otrɛ̄yí kú ācogwɛ́ɛya mɛ́mla aítíca kú íne abɔ̄. É géē ŋmó ɔ̄ ɛpɔ̄bí kéē lɛ ɔ́ ŋmó.

¹⁹É kē í je ɔ́ tā ācɛ éwɔhá abɔ̄ kéē juwēeyī lɛ ɔ́, klla í gɔ́ ɔ̄, kē klla í hɛ́ ɔ̄ tū ɔcóōnyɔ́kpá. Amáŋ igbīhāajɛ é géē je ɔ́ héyī ɛ̄cī ɔ́mɛtá ā.”

²⁰Anɔ́ɔ ɛ́nɛ́ kú ayínɔ̄nyīlɔ kú Usébēdi lɛ ayí nū kpó wā ɛgiyí Ujísɔ̄si á. Ó le okwúukwu kwajɛ lɛ Ujísɔ̄si, le ɛ̄ba éyi ba ŋmá abɔ̄ nū.

²¹Ujísɔ̄si dɔɔ̄kā kahíníī, “Ɔdí nɛ̄ a dɔɔ̄kā āa?” Ɛ́nɛ́ ā da ɔ́ kahíníī, “Cɛ̄ ká ayí um nɔ̄nyīlɔ ɛpa nēe bá ā ka éyi kóō yɔ̄ abɔ̄lɔ́ná kú uwɔ, ka ɔhá kóo kē yɔ̄ abɔ̄lúfīyē kú uwɔ eko nɛ̄ a gaá cɔcɛ́ ā.”

²²Amáŋ Ujísɔ̄si tóohi kahíníī, “Aá jé ɔdā nɛ̄ aá ī dɔɔ̄kā ā ŋ́. Aá lɔfú gwá íkókwū nɛ̄ n géē gwá ā glá ā?” É tá ɔ̄ ohi kahíníī, “Alɔ lɔfú gwá glá.”

²³Anɔ́ɔ ó da uwá kahíníī, “Aá géē gwá íkókwū kú um ɔkwɛ̄yi, amáŋ ń lɔfú fu ɔ̄cɛ nōo géē yājɛ abɔ̄lɔ́ná mɛ́mla abɔ̄lúfīyē kú um glá ŋ́. Amáŋ aɛ́ga ɔ́ɔmā wɛ ákú ācɛ nɛ̄ Ádā um le abɔ́ɔ tútú lɛ uwá ā nɛ.”

²⁴Eko nɛ̄ ayíkpó igwó ohile ā le pó ā, ɔtū le wú uwā lɛyíkwu ayínɛ́ nɔ̄nyīlɔ ɛpa ā.

²⁵Amáŋ Ujísɔ̄si hī uwā igwú wā ɛgiyí nū, anɔ́ɔ ó da uwá kahíníī, “Aá jé ka aɔ́cɛ́ kú aéwɔhá gē gbō uwā mla abɔ̄ olɔfú. Ācɛ nɛ̄hi kú uwā kē ī bī íkwu nēé lɛ ā yúklɔ́ īkpɛ̄yí kú uwā.

²⁶Amáŋ ó gáā lɛ ā ɔtāhɛ̄ aá ŋ́. Ɔ̄cɛ nōo tíne kóō wɛ ɔ̄cɛ nɛ̄hi ɔtāhɛ̄ aá, géē wɛ ɔ̄cocɛ̄hɔ̄ kú aá ohile ā a

²⁷Ɔ̄cɛ nōo kē tíne kóō wɛ otrɛ̄yí kú aá, géē wɛ ɔfiyɛ kú aá.

²⁸Ó lɛbɛ̄ɛka ɛ́gɛ́nɛ̄ Ɔyínɔ̄nyīlɔ kú Ɔ̄cɛ í wā kéē cɛ̄ ɔ̄ ɛhɔ̄ ŋ́, amáŋ kóō cɛ̄ ācɛ ɛhɔ̄, kóō kē je oyēeyī kú nū bɛ̄ɛka ɔdā o le ōfūla ācɛ alɛwa ā.”

²⁹Eko nɛ̄ Ujísɔ̄si mɛ́mla ayíkpó kú nū bá ī bɛ̄cɛ ŋmá Ujérīko ā, ɛwa nɛ̄hi yɛce ɔ́.

³⁰Aópeyī ɛpa nēe báajɛ okónu ɔwɛ ā pó ka Ujísɔ̄si ɔ́ɔ gáā yɛ. Anɔ́ɔ é gbɔɔ́ ō dɛ̄gba kahíníī, “Óndú, Ɔyínɔ̄nyīlɔ kú Udéfīdi, ményinyi alɔ.”

³¹Amáŋ ɛwa ā dɛ̄gba tū uwā kéē bá cíí. Amáŋ é dɛ̄gba fíyɛ́ kahíníī, “Óndú, Ɔyínɔ̄nyīlɔ kú Udéfīdi, ményinyi alɔ.”

³²Ujísɔ̄si má háyi, le uwā hīgwú anɔ́ɔ ó da uwá ɔ̄kā kahíníī, “Ɔdí nɛ̄ aá tíne ká n̄ yá lɛ aá?”

³³É da ɔ́ kahíníī, “Óndú, alɔ tíne ō mɛ́ɛbɛ.”

³⁴Anɔ́ɔ ó ŋmá lɛ eyīnyinyi ā Ujísɔ̄si lɛ abɔ̄ kwu uwá eyī á. Ikpííkpó ɔ́ɔmā, é gbɔɔ́ ō mɛ́ɛbɛ, anɔ́ɔ é kē gbɔɔ́ ō yɛce ɔ́ á.