Read idoma UMÁTIYU 21 Bible Online

UMÁTIYU 21 - idoma bible

UMÁTIYU 21

¹Abɔ̄ Ujísɔ̄si mɛ́mla ayíkpó kú nū le bá lɛ Ujerúsālɛm ā, é gā Ubɛ́tfég ɛyí ɛfu kú Ólīfu ā. Ujísɔ̄si le ayíkpó kú nū ɛpa tɛ̄hɔ̄ gɔbū.

²Ó da uwá kahíníī, “Aá ga ipɔ́lɛ́ nōo yɔ̄ iyɔ̄bū aá. Aá géē má ijakī nēé lɛ wū ɔcí mɛ́mla ɔyí nū yɔ̄ pī ɔ̄. Aá lɛ ɔ́ wī kú aá lɛ uwá kpó gé um.”

³Ɔ́dāŋ́ ka ɔ̄cɛ dúúmā lɛ ɔ̄kā da aá, aá da ɔ́ kahíníī, ‘Ɔkpani ā[6] gē cɛgbá uwā.’ Ó géē habɔ̄ uwā tá ikpííkpó ɔ́ɔmā.

⁴Ɛ̄nyā yá ká ɛlā kú ɔ̄comɛ́ɛbɛ ā kóō le cɛ̄.

⁵“Da ācɛ kú Usáyɔn kahíníī, ‘Mɔ́ɔ̄, ɔcɛ́ kú aá gē wā ɛgiyí aá! Ó le iyīnū túwāajɛ klla cɛyí ijakī éyi mɛ́mla ɔyí ijakī.’”

⁶Ayíkpó ā le yɛ, é kē le yá ɛ́gɛ́nɛ̄ Ujísɔ̄si da uwá lɛ ā.

⁷É lɛ ijakī ā mɛ́mla ɔyí nū kpó wā. É lɛ úwé kú uwā kpó klá uwá, anɔ́ɔ ó má ce ɛyí nū á.

⁸Ɛyínɛ̄hi kú ɛwa ā lɛ úwé kú uwā nā bá ɔwɛ. Amáŋ aɔ́há lɛ ābɔ̄ ɔcí hɛ́, anɔ́ɔ é lɛ uwá kpó klá ɔwɛ á.

⁹Anɔ́ɔ ācɛ nēe gbɔbū mɛ́mla ācɛ nēe tīigbīhi ā bá ī dɛ̄ kahíníī, “Owóofu yɔ̄ lɛ Ɔyínɔ̄nyīlɔ kú Udéfīdi! Ɔwɔicō kóō hɔ́hā ce ɔ̄cɛ nōo Óndú ā tɛ̄hɔ̄ gē wā ā. Owóofu kóō yɔ̄ lɛ Ɔwɔicō nōo yɔ̄ ɛga olicō fíyɛ́ dúú ā ā!”

¹⁰Eko nōó le tá Ujerúsālɛm ā, ɛjɛ̄ɛ̄jī igelī ā le hútú. Ācɛ ā bá ī dɔ̄ɔkā kahíníī, “Ɔ̄nyɛ yɔ̄ āa?”

¹¹Anɔ́ɔ ɛwa ā kahíníī, “Ujísɔ̄si, ɔ̄comɛ́ɛbɛ nōo ŋmá Unásārēt kú Ugálīli ā yɔ̄ á.”

¹²Ujísɔ̄si le tá ipú Agblīihɔ-nɛ̄hi kú Ɔwɔicō, anɔ́ɔ ó lɛ odúúdú ācɛ nēe bá ī kpó ɔ́lá lá mɛ́mla ācɛ nēe ī lɔ́lá ipú Agblīihɔ-nɛ̄hi ā kpó nū bɛ̄cɛ á. Ó lɛ Utéblu kú ācɛ ohīla ije abɔ̄ ā mɛ́mla ɔcí oyājɛ kú ācɛ nēe ī je oklɛ́bɛ́tɛ lá ā cēgwōnū.

¹³Ó da uwá kahíníī, “É lɛ ɔ́ tá ipú ɛlɔ̄ɔwɔicō kahíníī, ‘É géē hī inu kú um ka ɛga ogbɔ̄ɔkɔ.’ Amáŋ aá lɛ ɔ́ yá ɛga otayínū kú ācohɛ́julúgwu.”

¹⁴Ācɛ opeyī mɛ́mla ācɛ ocīkpó wā ɛgiyí nū ipú Agblīihɔ-nɛ̄hi ā, anɔ́ɔ ó lɛ uwá hɛ́tá á.

¹⁵Aótrɛ̄yí kú ācogwɛ́ɛya mɛ́mla aítíca kú íne ā le kpó cɔ̄nū eko nēé le úklɔ́ ō hídáagó nōó yɔ̄ ī yá ā má ā, mɛ́mla ayípɛ̄ nɛ̄ŋ́cɛ́ ā nēe bá ī dɛ̄gba ipú Agblīihɔ-nɛ̄hi ā gē ka kahíníī, “Owóofu yɔ̄ lɛ Ɔyínɔ̄nyīlɔ kú Udéfīdi ā,”.

¹⁶Anɔ́ɔ é da ɔ́ ɔ̄kā kahíníī, “A pó ɔdā nɛ̄ ayípɛ̄ nēe bá ā gē ka āa?” Ujísɔ̄si tá uwá ohi kahíníī, “Īī. Aá jé ŋmá ɛlɔ̄ɔwɔicō ɛ́ɛ́ ŋ́ nɛɛ ka, ‘A le nwū ayípɛ̄ obene mɛ́mla ayípɛ̄ ogwámɛ̄ kéē cɛ̄tra awɔ lɔɔlɔhi.’”

¹⁷Ujísɔ̄si nyɛ̄ɛ̄ ŋmá ɛgiyí uwā le tá igelī nēé hī ka Ubɛ́tāni ā, gaá gbɔga abɔ́ɔ.

¹⁸Ɔ̄cɔ̄ɔcī, abɔ̄ ó yɔ̄ ī kwúcē ga Ujerúsālɛm āa, ɛmiyɛ gbɔɔ́ ō ŋmó ɔ̄.

¹⁹Ó le ɔcí Ufígi éyi má ɔwɛ, anɔ́ɔ ó le tá ɛgiyí nū á. Amáŋ ó má īkpō dúúmā ābɔ̄ nū ŋ́, amáŋ ēpū ōfōōfūnū. Anɔ́ɔ ó kahíníī, “Á gáā gwá īkpō gbóógbóō gɛ ŋ́.” Anɔ́ɔ ɔcí ā gekwú kwú wúla ēpū bōōbū á.

²⁰Eko nɛ̄ ayíkpó kú nū lɛ ɔ́ má ā, é le kpó hídáagó anɔ́ɔ é kahíníī, “Abɔ̄ ó yá lɛ nɛ̄ ɔcí ufígi ā ŋmó bōōbū ā?”

²¹Ujísɔ̄si tóohi da uwá kahíníī, “Ɔkwɛ̄yi, n̄ da aá ka, ɔ́dāŋ ka aá kpɔ́tūce ɛlā Ɔwɔicō, nɛ̄ aá táafú ŋ́, aá géē yá ɔdā nɛ̄ n yá ɔcí ufígi nyā ā. Ó wɛ ɔ́ɔmā fūnū ŋ́, amáŋ aá géē lɔfú da ɛfu nyā glá ka, ‘Kwú īyī uwɔ í fu ká ā kwú īyī uwɔ tá ga ipú ísu’, ó kē í yá lɛ ā.

²²Ɔ́dāŋ ka aá kpɔ́tūce ɛlɔ̄ɔwɔicō, ɔdā dúúmā nɛ̄ aá gbɔ̄ɔkɔ lɛ ɔ́ dɔɔ̄kā ŋmá abɔ̄ nū, ó géē je ɔ́ lɛ aá.”

²³Eko nōó gā Agblīihɔ-nɛ̄hi, nōó yɔ̄ gē nwɛ̄lā ā, aótrɛ̄yí kú ācogwɛ́ɛya mɛ́mla anyākwɔ́cɛ kú uwā ā gā ɛgiyí nū gaá da ɔ́ ɔ̄kā kahíníī, “Íkwu nyá nɛ̄ a bī gē yá ɔdā nēe bá ā? Ɔ̄nyɛ je íkwu nyā gā uwɔ āa?”

²⁴Anɔ́ɔ Ujísɔ̄si tá uwā ohi kahíníī, “Ami a klla géē da aá ɔ̄kā dúú, ɔ́dāŋ ka aá lɛ ohī nū cīla um n géē da aá ɛdɔ íkwu nɛ̄ n lɛ nɛ̄ n bī gē yá ɔdā nēe bá ā.

²⁵Iní nɛ̄ ubatísim nɛ̄ Ujɔ́ni yá ā ŋmá āa? Ó ŋmá ɔkpáncō kɛ̄ɛ koó ŋmá abɔ̄ alɛɛcɛ?” Anɔ́ɔ é gbɔɔ́ ō miya ɔ́ ɔtāhɛ̄ īyī uwā kahíníī, “Ɔ́dāŋ ka alɔ ka, ‘Ó ŋmá ɔkpáncō’, ó géē da alɔ ɔ̄kā ka, ‘Ɔdíyá nɛ̄ aá kē kpɔ́tūce ɔ́ ŋ́?’

²⁶Amáŋ ɔ́dāŋ ka alɔ ka, ‘Ó ŋmá abɔ̄ alɛɛcɛ’, alɔ gē yúúfi ācɛ ā ohígbū ka odúúdú uwā cɛ̄ ka Ujɔ́ni ɔ́ wɛ ɔ̄comɛ́ɛbɛ.”

²⁷Anɔ́ɔ é tá Ujísɔ̄si ohi kahíníī, “Alɔ í jé ŋ́.” Anɔ́ɔ ó da uwá kahíníī, “Ń kē gáā da aá íkwu nɛ̄ n bī gē yá ɔdā nēe bá āa ŋ́.

²⁸“Amáŋ ɔdí nɛ̄ aá gbɛlá lɛyíkwu ɛlā nyā ā? Ɔ̄cɛ éyi lɛ ayínɔ̄nyīlɔ ɛpa. Ó le yɛ tá ɛgiyí ákú aflɛ́yí ā da ɔ́ kahíníī, ‘Ɔyí um, nyɔ̄ gaá lɛ úklɔ́ yá ipú ɛhɔ̄ ufáyin kú um ícɛ.’

²⁹Anɔ́ɔ ɔyí ā tóohi kahíníī, ‘Ń gáā nyɔ̄ ŋ́.’ Amáŋ Igbīhāajɛ ó le ɔtū pīyabɔ̄ cɛ̄ le yɛ.

³⁰Ádā ā le yɛ tá ɛgiyí ɔ́mpa ā. Ó gaá da ɔ́ ɔdā ékpó ɔ́ɔmā. Anɔ́ɔ ɔ́ɔmā tóohi kahíníī, ‘N géē nyɔ̄, ɔkpani.’ Amáŋ ó nyɔ̄ ŋ́.

³¹Ɛ́nyá kú aɛ́pa nēe bá ā yá ɔdā nɛ̄ ádā nū tíne āa?” Anɔ́ɔ é kahíníī, “Ákú aflɛ́yí ā nɛ.” Ujísɔ̄si da uwá kahíníī, “Ɔkwɔ̄ɔ̄kwɛ̄yi, n̄ da aá ka, ācodɔlɛ́ mɛ́mla aákwuna géē nyɔ̄ ajɔ̄ɔ̄cɛ́ kú Ɔwɔicō gbɔbū lɛ aá.

³²Ohígbū ka Ujɔ́ni wā ɛgiyí aá í ma ɔwɛ nɛ̄ aá í yá ɔdā olɔhi fú lɛ aá, aá cɛ̄ɛlā nū ŋ́. Amáŋ ācɛ odɔlɛ́ mɛ́mla aákwuna cɛ̄ɛlā nū. Eko nɛ̄ aá kōō lɛ ɛ̄nyā má nááná ā, aá pīyabɔ̄ gaá cɛ̄ɛlā nū ŋ́ kpɔ́.

³³“Aá pó ācīije ɔhá. Ádɔ̄lɛ́ éyi yɔ̄, nōo hɛ́hɔ̄ ufáyin. Anɔ́ɔ ó lɛ igá hɛ́ tā ɔ̄, klla lɛ ɛga ō yá ejé bū ipú nū á. Ó lɛ ɔdā ce, kwú ɔ̄ ú tá olufa lɛ ācɛ, anɔ́ɔ ó le tá iyāwu á.

³⁴Eko nɛ̄ eko o wū īkpō gā ā, ó le ācocɛ̄hɔ̄ kú nū tɛ̄hɔ̄ ga ɛgiyí ācɛ olufa ā gáā mīyɛ ukpɛ́ kú īkpō ā nōo wɛ ákú nū ā.

³⁵Ācɛ olufa ā lɛ ācocɛ̄hɔ̄ ā kwú, lɛ éyi kú uwā gɔ́, lɛ ɔhá ŋmó, klla lɛ ɛcɔ̄ tá klá ɔhá ā.

³⁶Igbɔhá, ó lɛ ācocɛ̄hɔ̄ ɔhá tū ga ɛhɔ̄ ā, nɛ̄ áluka kú uwā fíyɛ́ ákú aflɛ́yí ā. É yá uwā ɔdā ékpó ɔ́ɔmā dúú.

³⁷Igbīhāajɛ ā, ó lɛ ɔyí nū nɔ̄nyīlɔ tɛ̄hɔ̄ fu uwā, kahíníī, ‘É géē lɛ ojīlīmā ce ɔyí um nɔ̄nyīlɔ ā.’

³⁸Amáŋ eko nɛ̄ ācɛ olufa ā lɛ ɔyínɔ̄nyīlɔ ā má ā, é ka lɛ īyī uwā kahíníī, ‘Ɛ̄nyā wɛ olúgwū á, aá wā ká ālɔ̄ lɛ ɔ́ ŋmó ká úgwū kú nū kóō le pīya ákú alɔ.’

³⁹Anɔ́ɔ é kwú ɔ̄ ú tá tū ɛcɛ ŋmá ɛhɔ̄ ufáyin āa, lɛ ɔ́ ŋmó á.

⁴⁰Ó lɛ ā eko nɛ̄ óndú kú ɛhɔ̄ ufáyin ā gā, ɔdí nōó géē yá ācɛ olufa nēe bá abɔ́ɔ āa?”

⁴¹É da ɔ́ kahíníī, “Ó géē kpó ācobɔ̄bíipú ɔ́ɔmā ŋmó cɛ́ɛ́ ó kwú ɛhɔ̄ ufáyin ā ú lɛ aólufa ɔhā nēe géē je īkpɔ̄dɛ̄hɔ̄ kú nū lɛ ɔ́ eko nōo cíkā.”

⁴²Ujísɔ̄si da uwá kahíníī, “Aá jé ɔdā nēé tá ipú ɛlɔ̄ɔwɔicō ā ŋ́ nɛɛ? ‘Ɛcɔ̄ nɛ̄ ācogwínu tá ā, le pīya ɛcɔ̄ o cɛgbá fíyɛ́ dúú kú áklō inu ɛɛ́. Óndú ā yúklɔ́ nyā á, Ó kē wɛ ɔdā ō hídáago nɛ̄hi kú ɔ̄cɛ kóō má?

⁴³Ohígbū ɛ̄nyā n̄ da aá ka, é géē mīyɛ ajɔ̄ɔ̄cɛ́ kú Ɔwɔicō ŋmá abɔ̄ aá, cɛ́ɛ́ é kwú ɔ̄ ú lɛ ācɛ éwɔhá nēe géē gwá īkpō ɔkwɛ̄yi kú nū ā.

⁴⁴Ɔ̄cɛ nōo má gwōnū klá ɛyí ɛcɔ̄ nyā, géē ca kɛ́tɛ̄kɛ́tɛ̄. Amáŋ ɔ̄cɛ nɛ̄ ɛcɔ̄ ā géē míya ce ɔ́ ā, ó géē je ɔ́ gbā munuu.

⁴⁵Eko nɛ̄ aótrɛ̄yí kú ācogwɛ́ɛya mɛ́mla ācɛ Ufárisīi lɛ ācīije kú nū nyā pó ā, é jé kóō tá ācīije lɛ aá.

⁴⁶É tíne kéē kwú ɔ̄ ā, amáŋ ufi ācɛ ā gē yá uwā, ohígbū ka ācɛ ā je ɔ́ ka ɔ́ɔ wɛ ɔ̄comɛ́ɛbɛ.