Read idoma UMÁTIYU 22 Bible Online

UMÁTIYU 22 - idoma bible

UMÁTIYU 22

¹Ujísɔ̄si klla tá ācīije alɛwa ɔhá lɛ uwá igbɔhá. Ó kahíníī,

²“Ajɔ̄ɔ̄cɛ́ kú ɔkpáncō lɛbɛ̄ɛka ɔcɛ́ éyi, nōo yá ucɛ kú ɔnyā ō lɛ lɛ ɔyí nū.

³Ó lɛ ācocɛ̄hɔ̄ kú nū tɛ̄hɔ̄ kéē gaá lɛ ācɛ nēé tɛtɛ da uwá táajɛ ā hīgwú wā ɔnū ucɛ kú ɔnyā ō lɛ ā. Amáŋ uwá í dɔɔ̄kā ō wā ŋ́.

⁴Igbɔhá, ó le ācocɛ̄hɔ̄ ɔhá tɛ̄hɔ̄ kahíníī, ‘Aá da ācɛ nēé tɛtɛ da uwá táajɛ ā ka ucɛ kú um ā le tútū ɛɛ́. É lɛ aɔ́bá ɛna mɛ́mla ayí ɛna ojɔ̄kwū kú um ā ŋmó ɛɛ́. Ɔdā dóódu le tútū ɛɛ́. Aá wā ɔnū ucɛ kú ɔnyā ō lɛ ā.’

⁵Amáŋ ācɛ nēé hīgwú ā í lɛlá wu ɔ́ ŋ́. Ɔnyɔɔnyɛ kú uwā le pɛ́ ga ɔnū odée kú abɔ̄yī ūwā. Aóhī le tá ɛhɔ̄ kú uwā, aóhī kē le pɛ́ tá ōlihī.

⁶Aɔ́há lɛ ācocɛ̄hɔ̄ kú nū kwú, le uwēyī je lɛ uwá, klla le uwá kpó ŋmó.

⁷Anɔ́ɔ ɔcɛ́ ā le cɔ̄nū, klla lɛ aícɔ́ɔja kú nū tɛ̄hɔ̄ kéē gaá lɛ ācoŋmácɛ ā kpó ŋmó, kéē klla lɛ igelī kú ɔlɛ́ uwā tɔ̄lá.

⁸Anɔ́ɔ ó da ācotɛ̄hɔ̄ kú nū ā kahíníī, ‘Ucɛ kú ɔnyā ō lɛ ā le tútū ɛɛ́, amáŋ ācɛ nēé hīgwú ā í cíkā ŋ́.

⁹Ohígbū ɔ́ɔmā aá nyɔ̄ ɔwɛ dóódu kú aá hī ācɛ dóódu nɛ̄ aá má ā igwú kéē wā ɛgiyí ucɛ kú ɔnyā ō lɛ ā.’

¹⁰Anɔ́ɔ ācotɛ̄hɔ̄ ā le yɛ tá ɔwɛ dóódu, lɛ ācɛ dóódu nēé má ā, kwu ācɛ o yá ɔdōōbɔ̄bí mɛ́mla ācɛ o yá ɔdā olɔhi hīgwú á. Inu ucɛ kú ɔnyā ō lɛ ɔ́ɔmā le mu mɛ́mla aúgbɔga ā.

¹¹“Amáŋ eko nɛ̄ ɔcɛ́ ā wā inu ā kóō má aúgbɔga nēe bá ā, ó má ɔ̄cɛ éyi, nōó le úwé kú ɔnyā ō lɛ ā wiiyē ŋ́.

¹²Anɔ́ɔ ó da ɔ̄cɛ ɔ́ɔmā ɔ̄kā kahíníī, ‘Oklóbīya um, abɔ̄ ó yá ɛ́ɛ́ nɛ̄ a wā amānyā nɛ̄ a kē lɛ úwé kú ɔnyā ō lɛ ā wiyē ŋ́ mā? Ɔ̄cɛ ɔ́ɔmā í ka ɔdā dúúmā ŋ́.

¹³Anɔ́ɔ ɔcɛ́ da ācocɛ̄hɔ̄ kú nū kahíníī, ‘Aá lɛ ɔ́ ikpó mɛ́mla abɔ̄ kpó gbō kú aá kwú ɔ̄ ú tá tɛ́ɛcɛ ipú obū. Abɔ́ɔ nɛ̄ ācɛ ā géē jikwū í hīla ayīnu á.’

¹⁴Ohígbū keé hī ācɛ alɛwa igwú amáŋ ācɛ lígíí nēé fu á.”

¹⁵Anɔ́ɔ ācɛ Ufárisīi nyɛ̄ɛ̄ gaá lɛ ujɔ̄ tū kú ɛ́gɛ́nɛ̄ é géē kwú ɔ̄ ipú ɛlā nōó í ka āa.

¹⁶Anɔ́ɔ é lɛ ayíkpó kú uwā mɛ́mla ācɛ kú Uhérɔ̄du tɛ̄hɔ̄ fu ɔ́ kahíníī, “Utíca, alɔ jé ka a wɛ ɔ̄cɛ ɔkwɛ̄yi. A kē ī nwɛ̄lā kú ɔwɛ kú Ɔwɔicō ɔkwɛ̄yi. Á kē lɛ ɛlá wu ɔdā nɛ̄ ɔ̄cɛ dúúmā ī gbɛlá ā ŋ́, ohígbū ka á kē ī méyīgo kú ācɛ ŋ́.

¹⁷Da alɔ ɔdā nɛ̄ a gbɛlá ā mɛ́ɛ́nɛ. Ó wɛ íne kú alɔ ō bīya kú ālɔ̄ da ije ɔlɛ́ lɛ Usísa, kɛ̄ɛ ka ó cíkā ŋ́?”

¹⁸Amáŋ Ujísɔ̄si le ɛlá obɔ̄bí nēé gbo ā jé, anɔ́ɔ ó kahíníī, “Aá ācɛ oleyīɛpa, ɔdíyá nɛ̄ aá gē já um má ā mɛ́ɛ̄?

¹⁹Aá le īkpīje nēé gē bī le da ije ɔlɛ́ ā mafú gā um!” Anɔ́ɔ é kwú ikpīje éyi ú gé lɛ ɔ́ á.

²⁰Anɔ́ɔ ó da uwá ɔ̄kā kahíníī, “Ofu mɛ́mla iyē kú ɔ̄nyɛ bá īkpīje nyā ā?”

²¹Anɔ́ɔ é kahíníī, “Ákú Usísa nɛ.” Anɔ́ɔ ó da uwá kahíníī, “Aá je ɔdā nēe wɛ ákú Usísa ā lɛ Usísa. Aá kē je aɛ́nɛ̄ e wɛ ákú Ɔwɔicō lɛ Ɔwɔciō.”

²²Eko nēé lɛ ɛ̄nyā pó ā, ó le hɛ́ uwā idáagó. Anɔ́ɔ é habɔ̄ ɔ̄ tá, anɔ́ɔ é le pɛ́ nyɛ̄ɛ̄ á.

²³Ɛ̄cī ɔ́ɔmā ācɛ Usádusīis, nēé ī cɛ̄ ka ohéyī ŋmá ɔlékwū ɔ́ɔ yɔ̄ ŋ́ mā ā, wā ɛgiyí nū

²⁴Anɔ́ɔ é kahíníī, “Itíca, Umósīsi ka ɔ́dāŋ ka ɔ̄cɛ gekwú, nōó lɛ ayí dúú bá ɛcɛ ŋ́, ó lɛ ā ayíka ɔyínɛ́ nū nɔ̄nyīlɔ géē lɛ ɔnyā nū lɛ, cɛ́ɛ́ kóō géē lɛ ayí ma lɛ ɔyínɛ̄ nū ā.

²⁵Ayínɛ́ ahāapa bá ipú alɔ. Ákú aflɛ́yí ā lɛ ɔnyā lɛ, ó gekwú. Anɔ́ɔ abɔ̄ ó ma ɔyí dúúmā ŋ́ mā ā, ó habɔ̄ ɔnyā nū tá lɛ ɔyínɛ̄ nū.

²⁶Ɔdā ékpónú ɔ́ɔmā yá ɔ́mpa á, mɛ́mla ɔ́mɛtá jāā kwu ɔ́mahāapa á.

²⁷Igbīhāajɛ ā, odúúdú uwā, kwu ɔnyā ā dúú le pɛ́ gekwú.

²⁸Ohígbū ɔ́ɔmā, eko nɛ̄ ācɛ géē héyī ŋmá ɔlékwū ā, ɔnyā ɔ̄nyɛ kú ipú ācɛ ahāapa nēe bá ā nōó géē wɛ ā, ohígbū ka odúúdú uwā lɛ ɔ́ lɛ ɔnyā?”

²⁹Anɔ́ɔ Ujísɔ̄si tá uwā ohi kahíníī, “Aá le nyíleyī ohígbū ka aá jé ɔkpá ɛlɔ̄ɔwɔicō ɛ́ɛ́ nɛ̄ aá ī jé ɔfú kú Ɔwɔicō ŋ́.

³⁰Ohígbū ka eko nɛ̄ ācɛ í héyī ŋmá ɔlékwū ā, é gáā lɛ ɔnyā, ɛ́ɛ́ nēé gē je ɔnyā lɛ ɔbá gɛ ŋ́. Amáŋ é géē lɛbɛ̄ɛka aálelékwū-ōtɛ̄hɔ̄ ipú ɔkpáncō ā.

³¹Aá jé ɔdā nɛ̄ Ɔwɔicō da aá ohígbū ācɛ o héyī ŋmá ɔlékwū ā ŋ́ nɛɛ? Ó kahíníī,

³²‘Ami wɛ Ɔwɔicō kú Ébrahām, mɛ́mla Ɔwɔicō kú Áyísīki, mɛ́mla Ɔwɔicō kú Ujékɔ̄pu á?’ Ó wɛ Ɔwɔicō kú ācɛ okwú ŋ́, amáŋ ákú ācɛ oyēeyī nɛ.”

³³Eko nɛ̄ ɛwa ā le pó ā, ɔdā nōó nwū ā le hɛ́ uwā idáagó.

³⁴Eko nɛ̄ ācɛ Ufárisīi le pó koó lɛ ācɛ Usádusīis okónu gwū ā, é le jīla tɔ̄há.

³⁵Anɔ́ɔ éyi kú ipú uwā nōo wɛ ulɔ́ya já Ujísɔ̄si má kahíníī,

³⁶“Itíca, íne nyá cɛ́gbá fíyɛ́ odúúdú aíne āa?”

³⁷Anɔ́ɔ ó da ɔ́ kahíníī, “A géē yíhɔtū tū Óndú ā nōo wɛ Ɔwɔicō kú uwɔ ā, mɛ́mla ɛjɛ̄ɛ̄jī īkpɔ̄tū kú uwɔ, mɛ́mla ɛjɛ̄ɛ̄jī odo kú uwɔ, mɛ́mla ɛjɛ̄ɛ̄jī ɛlá nɛ̄ a ī gbo.

³⁸Ɛ̄nyā wɛ íne nōo cɛgbá fíyɛ́ dúú mɛ́mla ákú aflɛ́yí á.

³⁹Ɔ́mpa ā lɛbɛ̄ɛka anú ā. Ó ka, ‘Yíhɔtū tū ɔ́mpa uwɔ ɛ́gɛ́nɛ̄ a he iyī uwɔ ɔtū ā.

⁴⁰Odúúdú íne kú Umósīsi mɛ́mla ɛlā nɛ̄ ācomɛ́ɛbɛ nwū ā ŋmá íne ɛpa nyā.”

⁴¹Eko nɛ̄ ācɛ Ufárisīi le jīla tɔ̄há ā, Ujísɔ̄si da uwá ɔ̄kā kahíníī,

⁴²“Ɔdí nɛ̄ aá gbɛlá ka Ohɔ́nyɛtá ɔ́ɔ wɛ āa? Ɔyínɔ̄nyīlɔ kú ɔ̄nyɛ nōó wɛ a?” É da ɔ́ kahíníī, “Ɔyínɔ̄nyīlɔ kú Udéfīdi.”

⁴³Anɔ́ɔ ó da uwá kahíníī, “Abɔ̄ ó yá lɛ nɛ̄ Alelékwū Ihɔ je Udéfīdi ka ɔ́ɔ hī ɔ̄ ka ‘Óndú’ āa? Ó kahíníī,

⁴⁴‘Óndú ā da Óndú um ka, Cīce abɔ̄lɔ́ná kú um jāā gbéeko nɛ̄ n lɛ aólɛlā kú uwɔ kpóbá ɛháajɛ ikpó kú uwɔ.’

⁴⁵Ɔ́dāŋ́ ka Udéfīdi hī ɔ̄ ka ‘Óndú’, abɔ̄ ó yá lɛ nōó wɛ ɔyínɔ̄nyīlɔ kú nū gɛ?”

⁴⁶Anɔ́ɔ ɔ̄cɛ dúúmā í tóohi dúú glá gɛ ŋ́ má. Ɔ̄cɛ dúú í kē lɔtū da ɔ́ ɔ̄kā dúúmā ŋmá eko ɔ́ɔmā gɔbū gɛ ŋ́.