Read idoma UMÁTIYU 24 Bible Online

UMÁTIYU 24 - idoma bible

UMÁTIYU 24

¹Abɔ̄ Ujísɔ̄si nyɛ̄ɛ̄ ŋmá ipú Agblīihɔ-nɛ̄hi ā gē nyɔ̄ ā, ayíkpó kú nū wā ɛgiyí nū, gē tá ɔ̄ ɛlā kwu ɛ́gɛ́nɛ̄ é gwó Agblīihɔ-nɛ̄hi ā lɛ ā.

²Amáŋ ó tá uwā ohi kahíníī, “Aá má odúúdú aɔ́dā nēe bá ā? Ɔkwɛ̄yi, n̄ da aá ka, ó lɛ ɛcɔ̄ dúú yɔ̄ amānyā nēé géē mabɔ̄tá ce iyī uwā icō ŋ́. É géē míya ɛjɛ̄ɛ̄jī uwā wāajɛ kpɛ́mm.”

³Eko nōó yājɛ ɛyí ɛfu kú olífu ā, ayíkpó kú nū wā ɛgiyí nū ɛkwūbá gaá kahíníī, “Da alɔ eko nɛ̄ ɔdā nēe bá ā géē yá ā. Ɔdí géē wɛ ɔdōcābɔ̄ kú eko nɛ̄ a géē wā ā mɛ́mla eko nɛ̄ ɛcɛ nyā géē mɛ ā?”

⁴Anɔ́ɔ Ujísɔ̄si tá uwā ohi kahíníī, “Aá lɛ eyī kwɛcɛ ká ɔ̄cɛ dúúmā kóō híīī plá aá ŋ́.

⁵Ohígbū ka ācɛ alɛwa géē wā í ka ka aá wā ŋmá iyē um géē ka kahíníī, ‘Ami wɛ Ohɔ́nyɛtá á’, cɛ́ɛ́ kéē plá ācɛ alɛwa.

⁶Aá géē pó ofu kú ɛfú ōkpó mɛ́mla ɔ̄kā kú ɛfú. Aá híīī yúúfi ŋ́, ohígbū ka ɔdā nēe bá ā géē yá piíí, amáŋ eko nɛ̄ ɛcɛ í mɛ ā í wā ɛ́ɛ́ ŋ́.

⁷Aéwo éyi géē cāŋjɛ héyī kwu éwɔhá, ajɔ̄ɔ̄cɛ́ éyi géē héyī kwu ajɔ̄ɔ̄cɛ́ ɔhá. Ɔkpɛtā mɛ́mla ajɛ o jíliyē klla hɛ́ wulu géē bá ɛga alɛwa.

⁸Amáŋ aɔ́dā nēe bá ā wɛ ohútu klɔɔ́dɔ́ɔ́ kú ōwē nɛ̄ ācɛ í má.

⁹“É í je aá tá ōwē, é géē ŋmó aá, odúúdú ācɛ í wɔ́tū aá ohígbū iyē um.

¹⁰É géē yá ka ācɛ alɛwa kéē nyɛ̄ɛ̄ ka aá cɛ̄ ɛlɔ̄ɔwɔicō gɛ ŋ́, ācɛ alɛwa géē yá ibīyājɛ tū ɔ́mpa uwā, ācɛ ōhī í wɔ́tū ācɛ ɔhá.

¹¹Ācomɛ́ɛbɛ ɛ̄kɛ̄mgbɛ̄ alɛwa géē wā, é kē géē bī ācɛ alɛwa nyíleyī.

¹²Ɔ́bíipú géē nyīla cɛ́ɛ́ ācɛ alɛwa í gáā yíhɔtū tá ācɛ ɔhá gɛ ŋ́.

¹³Amáŋ ɔ̄cɛ nōo lɛ ɔtūlé jāā ga ámōōmɛ ā nēé géē nyatá á.

¹⁴É géē tɔ́ɔna kú ɔ̄kōolɔhi kú ajɔ̄ɔ̄cɛ́ ā ga odúúdú kú ɛcɛ kóō wɛ ijáalí lɛ éwo dóódu. Cɛ́ɛ́ eko nɛ̄ ɛcɛ í mɛ ā le yá.

¹⁵“Aá géē má ojibó o tēelihɔ, nɛ̄ Udánīyɛ̄lu ɔ̄comɛ́ɛbɛ kɛlā nū ā háyi ɛga otīihɔ ā (ɔ̄cɛ nōo yɔ̄ ī jé ɔkpá nyā kóō yá kóō jɛ́yí ɔdā nyā).

¹⁶“Cɛ́ɛ́ ācɛ nēe bá Ujudíya ā kéē le kwu ga ɛyí ɛfu.

¹⁷Ɔ̄cɛ nōo ce ɛyí inu, kóō híīī wāajɛ gaá je iyó ŋmá inu kú nū ŋ́.

¹⁸Ɔ̄cɛ nōo yɔ̄ ipú ɛhɔ̄, kóō híīī wā ɔlɛ́ gaá je úwé kú nū ŋ́.

¹⁹Amáŋ ó géē bɔ̄bí nɛhí lɛ anyā nēe yīīpú mɛ́mla aɛ́nɛ̄ e gē je amɛ̄ lɛ ayí gwá eko ɔ́ɔmā ā.

²⁰Amáŋ aá gbɔ̄ɔkɔ ká eko nɛ̄ aá géē kwu ā kóō tá eko ɔgwā ámāŋ ɛ̄cī usábāti ŋ́.

²¹Ohígbū ka eko ɔ́ɔmā ā, ōwē nɛ̄hi géē yɔ̄ nɛ̄ ɛdɔ nū í yɔ̄ jéjéē ɛ́ɛ́ ŋ́, ŋmá eko nɛ̄ ɛcɛ gbɔɔ́ ā jāā kwu abālɔbányā, nōó kē gáā yɔ̄ gbóógbóō ɛ́ɛ́ gɛ ŋ́.

²²Ɔ́dāŋ ka eko ɔ́ɔmāa í le kpií ŋ́ nɛɛ, é gáā nya ɔ̄cɛ dúúmā tá glá ŋ́. Amáŋ ohígbū ācɛ nɛ̄ Ɔwɔicō fu ā, ó géē cē eko ā kpií.

²³“Ó lɛ ā, ɔ́dāŋ ka ɔ̄cɛ dúúmā da aá kahíníī, ‘Mɔ́ɔ̄, Ohɔ́nyɛtá ā yɔ̄ amānyā ámāŋ ánūmā a!’, aá híīī cɛ ŋ́.

²⁴Ohígbū ka oóhɔ́nyɛtá ɛ̄kɛ̄mgbɛ̄ mɛ́mla ācomɛ́ɛbɛ ɛ̄kɛ̄mgbɛ̄ géē wɛ̄ɛcɛ, é kē í ma ɔdōcābɔ̄ nɛ̄hi mɛ́mla ɔdā idáagó fú kéē plá ācɛ. Ɔ́dāŋ kóō tɔ́ɔtɛ́ nɛ, é géē plá ācɛ nɛ̄ Ɔwɔicō fu abɔ̄yī nū ā dúú.

²⁵Aá má ɔ̄, n tɛtɛ le da aá táajɛ ɛɛ́.

²⁶Ohígbū ɔ́ɔmā ā, ɔ́dāŋ kéē da aá ka, ‘Aá má ɔ̄, ó yɔ̄ ígbíli,’ aá híīī nyɔ̄ abɔ́ɔ ŋ́. Ɔ́dāŋ keé da ka, ‘Aá má ɔ̄, ó yɔ̄ inu eyīpú,’ aá híīī cɛ̄ ŋ́.

²⁷Ohígbū ka ɛ́gɛ́nɛ̄ ɔwɔ gē límanya ŋmá ɛnɔ̄ɔ̄cī ā, gē cɛ̄ gā ɛnɔ̄ɔ̄nɛ̄ ā, ɛ́gɔ́ɔmā nɛ̄ Ɔyínɔ̄nyīlɔ kú Ɔ̄cɛ géē wā lɛ dúú á.

²⁸“Ɛga dúú nɛ̄ okwu tá ā, abɔ́ɔ nɛ̄ aépū gē túbá á.”

²⁹“Ikpíkpó nɛ̄ eko nɛ̄ ācɛ géē móowē ā mɛ, ɛnɔ géē je dobū, ɔyā í kē gáā fíyajɛ glá ŋ́, aínyílɔ́wɔ í fō ŋmá ɔkpáncō, Ɔwɔicō í jíla ɔfú kú ɔkpáncō iyē

³⁰Eko ɔ́ɔmā ā, é géē ma ocābɔ̄ kú Ɔyínɔ̄nyīlɔ kú Ɔ̄cɛ fú ɔkpáncō. Eko ɔ́ɔmā odúúdú aípɔ́ɔma kú ɛcɛ géē bá ī jikwū, abɔ̄ é géē má Ɔyínɔ̄nyīlɔ kú Ɔ̄cɛ gē yɔ̄ ī wā ɛyí ojuja kú ɔkpáncō mla ɔfú, mɛ́mla ɛgahi kú nū ā.

³¹Ó géē tū aálelékwū-ōtɛ̄hɔ̄ kú nū ɛhɔ̄ mla opo okɛ̄la nɛ̄hi, é kē géē tū ācɛ nēé fu ā bá ŋmá ābɔ̄ ɛnɛ kú ɛcɛ, ŋmá ɛbɛɛbɛ.

³²“Ɔcí ufígi kóō lɛ odée nwū aá káá. Eko dúúmā nɛ̄ ābɔ̄ kú nū gbɔɔ́ ō lū nɛ̄ ēpū gbɔɔ́ ō wɛ̄ɛcɛ, aá jé ka ɔgwā le bá ɛɛ́.

³³Ɔwɛ ékpó ɔ́ɔmā, eko nɛ̄ aá lɛ ɔdā dóódu nēe bá ā má, aá jé ka eko ā le bá ajaajɛ kwu okónɔɔwɛ ɛɛ́. [8]

³⁴Ɔkwɛ̄yi, n̄ da aá ka, ācɛ kú ɛlpéeko nyā í gáā pɛ́ kwú kwɛyí ŋ́, jāā gbéeko nɛ̄ ɔdā dóódu nēe bá ā le yá jīla.

³⁵Ɔkpáncō mɛ́mla ɛcɛ géē mɛ, amáŋ ɛlā kú um í gáā mɛ glá ŋ́.

³⁶“Ɔ̄cɛ dúúmā í jé eko nɛ̄ ɛ̄cī ɔ́ɔmā ámāŋ eko ɔ́ɔmā í wā ā ŋ́, ó kōō wɛ aálelékwū-ōtɛ̄hɔ̄ kú ɔkpáncō ámāŋ Ɔyínɔ̄nyīlɔ ā, ń táafú ŋ́ ayíka Ádā ā ōfūnū nɛ.

³⁷Eko nɛ̄ Ɔyínɔnyilɔ kú Ɔ̄cɛ géē wā ā géē lɛbɛ̄ɛka ɔdā nōo yá eko kú Unówa ā.

³⁸Eko ɔ́ɔmā gbɔbū lɛ éŋkpɔ̄ nōo cēenyi kpɛ́ɛcɛ ā, ācɛ bá ī lé ɔdōlé klla bá ī gwá ā. É bá ī lɛ ɔnyā klla bá ī je ɔnyā lɛ ɔbá, jāā gbó ɛ̄cī nɛ̄ Unówa ga ipú Ɔ́wu ā.

³⁹É kē jé ŋ́, jāā gbéeko nɛ̄ éŋkpɔ̄ ā gaá lɛ uwá kpó nyɔ̄, ɛ́gɔ́ɔmā nōó gáā lɛ eko nɛ̄ Ɔyínɔ̄nyīlɔ kú Ɔ̄cɛ géē wā á.

⁴⁰Eko ɔ́ɔmā ācɛ ɛpa géē bá ɛhɔ̄, é géē kwú éyi ú, cɛ́ɛ́ é habɔ̄ ɔhá tá.

⁴¹Anyā ɛpa géē bá ī gbā ɔdā ɛgɔ̄, é géē je éyi, é kē í habɔ̄ ɔhá tá.

⁴²Aá lɛ eyī kwɛcɛ, ohígbū ka aá jé ɛ̄cī nɛ̄ Óndú aá ā gáā wā ā ŋ́.

⁴³Amáŋ aá jé ɛ̄nyā, ɔ́dāŋ ka ádɔ̄lɛ́ ā je ɛplá otú nɛ̄ uwī ā géē wā ā nɛɛ, ó géē yɛ í leyī kwɛcɛ ī gbāājɛ, ó gáā cɛ̄ ká uwī kóō ca ɔwɛ klá anú ŋ́.

⁴⁴Ohígbū ɔ́ɔmā, ó wɛ opií kú aá le tútū eko dóódu, ohígbū ka Ɔyí kú Ɔ̄cɛ géē wā eko nɛ̄ aá lɛ eyī ce ŋ́ mā ā.

⁴⁵“Ɔ̄nyɛ wɛ ɔ̄cocɛ̄hɔ̄ nēé cíkā ō lɛ ɔtū ce ɔ́, nōo jéeyī, nɛ̄ óndú nū géē fu kóō leyīkwu ācɛ ɔlɛ́ nū, kóō je ɔdōlé lɛ uwá eko ā?

⁴⁶Ákú ɔ̄cocɛ̄hɔ̄ ɔ́ɔmā géē lɔhi nɛ̄ eko nɛ̄ óndú nū gā ā, ó má ɔ̄ yɔ̄ ī yá ɔdā nōó da ɔ́ ā.

⁴⁷Ɔkwɛ̄yi, n̄ da aá ka, ó géē je ɔ́ yá ɔ̄cɛ nōo í leyīkwu odúúdú agbénú kú nū.

⁴⁸Amáŋ ɔ́dāŋ kóō wɛ ɔ̄cocɛ̄hɔ̄ obɔ̄bíipú, anɔ́ɔ ó ka ipɔ́tū kú nū kahíníī, ‘Óndú um le eko kpó bónū ɛɛ́’.

⁴⁹Anɔ́ɔ ó gbɔɔ́ ō ŋmó ācocɛ̄hɔ̄ aɔ́mpa nū ijē, klla gbɔɔ́ ō lé ɔdōlé klla gbɔɔ́ ō gwá ejé mɛ́mla ācɛ ogwéjé fíyɛ́ abɔ̄ ā.

⁵⁰Anɔ́ɔ óndú kú ɔ̄cocɛ̄hɔ̄ ā géē wā ɛ̄cī mɛ́mla eko nōó leyī ce ɔ́ ŋ́.

⁵¹Ó géē yá ɔ̄cocɛ̄hɔ̄ ā italā, klla í tá ɔ̄ tɛ́ɛcɛ kóō lɛ ɛdɔ ōwē nēé géē yá ācɛ o leyī ɛpa ā yá ɔ̄. Abɔ́ɔ ā, ó géē jikwū í hīla aīnu.”