Read idoma UMÁTIYU 25 Bible Online

UMÁTIYU 25 - idoma bible

UMÁTIYU 25

¹Eko ɔ́ɔmā nɛ̄ Ɔwɔicō géē wā í lɛ ajɔ̄ɔ̄cɛ́ kú ɔkpáncō kwajɛ ipú ɛcɛ nyā ā, í lɛbɛ̄ɛka ɔdā nōo yá ipú ɔ̄kā kú ayīpáncɛ́nyā igwó, nēe kpó aágege kú uwā nyɔ̄ gaá jīla ɔ̄cɛ olɔnyā ɔwɛ ā.

²Ācɛ ɛhɔ̄ kú uwā wɛ olíla, ācɛ ɛhɔ̄ ɔhá ā wɛ ācojéeyī.

³Aólíla ā kwú agege kú uwā í, amáŋ é bī anɔ̄ ohá dúúmā ipú íkpém mla iyī uwā ŋ́.

⁴Amáŋ aójéeyī ā bī anɔ̄ ɔhá ipú íkpém mɛ́mla agege kú uwa.

⁵Anɔ́ɔ abɔ̄ ɔ̄cɛ olɔnyā ā le gbojī ō wā ā, ɛ̄jɛ̄ le jɛ̄ odúúdú uwā, anɔ́ɔ uwá lɛ iyɔ̄lā kpó gbo á.

⁶Amáŋ ahāpōtú, ɔ̄cɛ éyi gbɔɔ́ ō dɛ̄gba kahíníī, ‘Aá mɔ́ɔ̄, ɔ̄cɛ olɔnyā ā gē wā ɛɛ́! Aá le bɛ̄cɛ kú aá gaá jīla anú ɔwɛ.’

⁷Eko ɔ́ɔmāa odúúdú áncɛ́nyā ā cānjɛ, anɔ́ɔ é lɛ agege kú uwā tútū á.

⁸Amáŋ aólíla ā da aójéeyī ā kahíníī, “Aá je anɔ̄ kú aá ōhī lɛ alɔ ohígbū ka agege kú alɔ gē nyí ɛɛ́.’

⁹Aójéeyī ā tóohi da uwá kahíníī, ‘Ó gáā jɛ alɔ mɛ́mla aá glá ŋ́. Ó í lɔhi lɛ aá fíyɛ́ kú aá nyɔ̄ ɛgiyí ācɛ nēe gē je lá ā, kú aá lɛ ōhī lá ŋmá abɔ̄ uwā.’

¹⁰Eko nēé nyɔ̄ gáā lá anɔ̄ ā, ɔ̄cɛ olɔnyā ā gā. Anɔ́ɔ ācɛ nēe tútū ā le yɛ tá ɛgiyí ucɛ kú ɔnyā ō lɛ ā mɛ́mla anú, anɔ́ɔ é lɛ ɔwɛ gwū á.

¹¹Anɔ́ɔ Igbīhāajɛ ā áncɛ́nyā ɔhá ā le pɛ́ wā yɔ̄ ī ka kahíníī, ‘Óndú, Óndú, lɛ ɔwɛ nwūla lɛ alɔ.’

¹²Amáŋ ɔ̄cɛ olɔnyā ā tóohi kahíníī, ‘Ń kōō jé aá ŋ́.’

¹³Anɔ́ɔ Ujísɔ̄si le ɛlā kú nū ŋmɛ́yí abɔ̄ nōó kahíníī, “Aá leyī kwɛɛcɛ kú aá le tútū, ohígbū kú aá jé ɛ̄cī ā ámāŋ eko nɛ̄ Ɔyínɔ̄nyīlɔ kú Ɔ̄cɛ géē kwúcē wā ā ŋ́.

¹⁴“Eko ɔ́ɔmā ajɔ̄ɔ̄cɛ́ kú Ɔwɔicō géē lɛbɛ̄ɛka ɛ́gɛ́nyā. Ɔ̄cɛ éyi yɔ̄, nɛ̄ eko nɛ̄ ó yɔ̄ ī ga iyāwu ā, ó lɛ ācocɛ̄hɔ̄ kú nū hīgwú, anɔ́ɔ ó kwú agbénú kú nū ú kpó tū uwa abɔ̄ á.

¹⁵Ó je ɛkpa ɛhɔ̄ kú īkpīje ɔdɔ (ugóolu) lɛ ɔ̄cɛ éyi. Ó je ɛkpa ɛpa kú īkpīije ɔdɔ (ugóolu) lɛ ɔ̄cɛ ɔ́mpa ā. Anɔ́ɔ ó kē je ɛkpa éyi kú ikpīije ɔdɔ (ugóolu) lɛ ɔ̄cɛ ɔ́mɛtá ā á. Ó je lɛ ɔnyɔ̄ɔnyɛ ɛ́gɛ́nɛ̄ ɔfú kú ɔnyɔɔnyɛ lɛ ā. Anɔ́ɔ ó le tá iyāwu á.

¹⁶Ɔkwɔɔkwu ɔ́ɔmā ɔ̄cɛ nōo mīyɛ ɛkpa ɛhɔ̄ ā gbɔɔ́ ō bī ɔ̄ tɔ́ɔ́hí, anɔ́ɔ ó klla lɛ ile kú ɛkpa ɛhɔ̄ ɔhá lɛ á.

¹⁷Ɔ̄cɛ nōo mīyɛ ɛkpa ɛpa ā yá ɔdā ékpónú ā dúú, anɔ́ɔ ó lɛ ɛkpa ɛpa ɔhá lɛ á.

¹⁸Amáŋ ɔ̄cɛ nōo mīyɛ ɛkpa éyi ā nyɛ̄ɛ̄ gaá lɛ ɔ̄gɔ̄ bū, kwú ije kú óndú nū ā ú otayínū ipú nū.

¹⁹Abɔ̄ eko yɔ̄ gbóógbó ā, óndú kú ācocɛ̄hɔ̄ ā pīyɛyí wā ɔlɛ́, gaá lɛ ije ā gbakwú mla uwá.

²⁰Anɔ́ɔ ɔ̄cɛ nōo mīyɛ ɛkpa ɛhɔ̄ kú īkpīije ā, bī ɛkpa ɛhɔ̄ kú īkpīije ɔhá wā anɔ́ɔ ó kahíníī, ‘Óndú, a je ɛkpa ɛhɔ̄ kú īkpīiije gā um, n lɛ ɛkpa ɛhɔ̄ ɔhá lɛ tū ɔ̄.’

²¹Anɔ́ɔ óndú nū da ɔ́ kahíníī, ‘A yá lɔhi íbí, ɔ̄cocɛ̄hɔ̄ olɔhi nēé cíkā ō lɔtūce ɔ́, a lɛyítáajɛ ipú ɔdā nɛ̄ŋ́cɛ́, n géē je uwɔ pīya ɔ̄cɛ nōo í leyīkwu ɔdā nɛ̄hi. Wā í gwéeyē mɛ́mla um.’

²²Ɔ̄cɛ nōo mīyɛ ɛkpa ɛpa kú īkpīije ɔdɔ ā wā í kahíníī, ‘Óndú, a je ɛkpa ɛpa kú īkpīije gā um, mɔ́ɔ̄, n klla lɛ ɛkpa ɛpa ɔhá lɛ tū ɔ̄.’

²³Anɔ́ɔ óndú nū da ɔ́ kahíníī, ‘A yá lɔhi íbí, ɔ̄cocɛ̄hɔ̄ olɔhi nɛ̄ ɔ̄cɛ cíkā ō lɔtūce. A lɛyítáajɛ ipú ɔdā nɛ̄ŋ́cɛ́, n géē je uwɔ ú pīya ɔ̄cɛ nōo í leyīkwu ɔdā nɛ̄hi. Wā í gwéeyē mɛ́mla um.’

²⁴Anɔ́ɔ ɔ̄cɛ nōo mīyɛ ɛkpa éyi kú īkpīije ɔdɔ ā gā, anɔ́ɔ ó kahíníī, ‘Óndú, n jé uwɔ ka a wɛ ɔ̄cɛ olɔnɔ nɛ̄hi. A ī cē ŋmá ɛga nɛ̄ á nyi ŋ́, klla ī gla ŋmá ɛga nɛ̄ á kpó bá ŋ́.

²⁵Ɛ́gɛ́nɛ̄ n gē yúúfi ā, n nyɛ̄ɛ̄ gaá kwú ɛkpa éyi kú īkpīije ɔdɔ kú uwɔ ā ú tayínū ipú ajɛ á. Mīyɛ ɔdā nōo wɛ ákú uwɔ ā.’

²⁶Anɔ́ɔ óndú nū tóohi da ɔ́ kahíníī, ‘Awɔ, ɔ̄cocɛ̄hɔ̄ obɔ̄bíipú mɛ́mla okwáahi, a jé ka n gē cē ŋmá ɛga nɛ̄ ń nyi ŋ́, n klla ī gla ŋmá ɛga nɛ ń kpó bá ŋ́.

²⁷A cíkā ō kwú ije kú um ā ú tū ɛga nēe ī kpó ije tū nēé hī ka ubánki ā, cɛ́ɛ́ eko nɛ̄ n kwúcē ká n̄ mīyɛ ije kú um mɛ́mla ije nōo ga ɔ́ ā.’

²⁸Anɔ́ɔ ɔkpani ā da ɔ̄cɛ éyi kahíníī, ‘Mīyɛ ɛkpa éyi kú īkpīije ɔdɔ ā ú ŋmá abɔ̄ nū, cɛ́ɛ́ ká aá kwú lɛ ɔ̄cɛ nōo lɛ ɛkpa ɛhɔ̄ kú īkpīije ɔdɔ ā.

²⁹Ohígbū ka ɔ̄cɛ nōo lɛ ā, é géē je lɛ ɔ́ fíyɛ́, cɛ́ɛ́ kóō géē lɛ nɛ̄hi. Amáŋ ɔ̄cɛ nōó lɛ odúúmā ŋ́, ɔdā nōó lɛ ā, é géē mīyɛ ŋmá abɔ̄ nū.

³⁰Aá kwú ɔ̄cocɛ̄hɔ̄ nōó tū ile ŋ́ mā ú tɛ́ɛcɛ ipú obū. Ó géē jikwū í hīla aīnu abɔ́ɔ.’

³¹“Eko nɛ̄ Ɔyínɔ̄nyīlɔ kú Ɔ̄cɛ í wā mɛ́mla aálelékwū-ōtɛ̄hɔ̄ kú nū ā gaá cɔcɛ́ ā, eko ɔ́ɔmā ó géē yājɛ ɛyí akpa kú ɔcɛ́ kú nū mɛ́mla ɔfú nɛ̄hi kú ɔcɛ́.

³²É géē tū odúúdú aéwo bá iyɔ̄bū nū, ó géē kɔ̄ uwā, éyi ŋmá ɛgiyí ɔhá, ɛ́gɛ́nɛ̄ ɔ̄cogbāálá gē kɔ̄ aálá ŋmá ɛgiyí aɛ́wū ā.

³³Ó géē kpó aálá ā bá abɔ̄lɔ́ná kú nū, ó klla géē kpó aɛ́wū ā bá abɔ̄lúfīyē kú nū.

³⁴Anɔ́ɔ ɔcɛ́ ā géē da aɛ́nɛ̄ e bá abɔ̄lɔ́ná kú nū ā kahíníī, ‘Aá gā, aá nɛ̄ Ádā um hɔ́hā ce aá kú aá lúgwū kú ajɔ̄ɔ̄cɛ́ nēé tútū lɛ aá ŋmá ohútu kú ɛcɛ ā.’

³⁵N hī aá igwú ohígbū ka eko nɛ̄ ɛmiyɛ yɔ̄ ī ŋmó um ā, anɔ́ɔ aá je ɔdōlé gā um á. Eko nɛ̄ ijēenyi yɔ̄ ī ŋmó um ā, aá je enyi gā um gwá. N wɛ ugbɔga, aá kē lɛ eyī kwū um.

³⁶N tóohɛ́wa, aá kē lɛ īlī tū um ohí. N yɔ̄ gē doōcē, aá wā gaá má um. N yɔ̄ agbá, anɔ́ɔ aá wā ɛgiyí um gaá jila um á.

³⁷Anɔ́ɔ ācɛ nēe yá ɔdā nōo he Ɔwɔicō ɔtū ā géē tóohi da ɔ́ kahíníī, ‘Óndú, eko nyá nɛ̄ alɔ má uwɔ nɛ̄ ɛmiyɛ yɔ̄ ī ŋmó uwɔ nɛ̄ alɔ je ɔdōlé gā uwɔ āa? Amáŋ nɛ̄ ijēēnyi yɔ̄ ī ŋmó uwɔ nɛ̄ alɔ je éŋkpɔ̄ gā uwɔ ā gwá āa?

³⁸Eko nyá nɛ̄ alɔ má uwɔ nɛ̄ a wɛ ugbɔga nɛ̄ alɔ leyīkwu uwɔ āa? Amáŋ ka a tóohɛ́wa nɛ̄ alɔ lɛ īlī tū uwɔ ohí āa?

³⁹Eko nyá nɛ̄ alɔ má uwɔ yɔ̄ ī doōcē ámāŋ ka a yɔ̄ agbá nɛ̄ alɔ wā ɛgiyí uwɔ gaá jila uwɔ āa?’

⁴⁰Anɔ́ɔ ɔcɛ́ ā géē tóohi da uwá kahíníī, ‘Ɔkwɛ̄yi, n̄ da aá ka, eko nɛ̄ aá yá ɔdā ɔ́ɔmā lɛ odúúmā kú ayínɛ́ um, ó kōō wɛ ɛ̄nɛ̄ o cɛgbá ŋ́ fíyɛ́ dúú ā, ami nɛ̄ aá yá gā um á.’

⁴¹Anɔ́ɔ ó géē da aɛ́nɛ̄ e bá abɔ̄lúfīyē kú nū ā kahíníī, ‘Aá nyɛ̄ɛ̄ ŋmá ɛgiyí um, aá nēé tokónu lɛ aá ā, kú aá nyɔ̄ ipú ɔlíkɔtɔ opiyóó nēé tútū lɛ ebilíi mɛ́mla aálelékwū, ōtɛ̄hɔ̄ kú nū ā.’

⁴²Ohígbū ka ɛmiyɛ yɔ̄ gē ŋmó um, amáŋ aá je ɔdōlé gā um ŋ́. Ijēēnyi yɔ̄ gē ŋmó um, amáŋ aá je ɔdōōgwá gā um gwá ŋ́.

⁴³N wɛ ugbɔga, aá leyīkwu um ŋ́. N tóohɛ́wa, amáŋ aá lɛ īlī tū um ohí ŋ́. N yɔ̄ gē doōcē klla yɔ̄ agbá, amáŋ aá wā gaá má um ŋ́.

⁴⁴Cɛ́ɛ́ uwá klla géē tóohi kahíníī, ‘Óndú, eko nyá nɛ̄ alɔ má uwɔ nɛ̄ ɛmiyɛ gē ŋmó uwɔ, ámāŋ ka ijēēnyi gē ŋmó uwɔ, ámāŋ ka a wɛ ugbɔga, ámāŋ ka a tóohɛ́wa, ámāŋ ka a yɔ̄ gē doōcē, ámāŋ ka a yɔ̄ agbá, nɛ̄ alɔ í leyīkwu uwɔ ŋ́ mā ā?”

⁴⁵Ó géē tóohi da uwá kahíníī, “Ɔkwɛ̄yi, n̄ da aá ka, ɛ́gɛ́nɛ̄ aá yá ɔ̄ lɛ éyi kú aɛ́nɛ̄ ó cɛgbá ŋ́ fíyɛ́ dúú nēe bá ā ŋ́ mā ā, ami nɛ̄ aá yá gā um ŋ́ má.”

⁴⁶“É kē géē nyɔ̄ gaá móōwē piyóó, amáŋ ācɛ nēe gē yá ɔdā nōo he Ɔwɔicō ɔtū ā géē nyɔ̄ í yēeyī piyóó.”