Read idoma UMÁTIYU 26 Bible Online

UMÁTIYU 26 - idoma bible

UMÁTIYU 26

¹Eko nɛ̄ Ujísɔ̄si lɛ ɛlā nēe bá ā ka kwɛyí ā, anɔ́ɔ ó da ayíkpó kú nū kahíníī,

²“Aá jé ka eko nɛ̄ ɛ̄cī ɛpa le gla ŋmá ícɛ, ucɛ kú onyatá ā géē wā, é kē í je Ɔyínɔ̄nyīlɔ kú Ɔ̄cɛ tū aólɛlā kú nū abɔ̄ kéē lɛ ɔ́ nyɔ́kpá.”

³Anɔ́ɔ aótrɛ̄yí kú ācogwɛ́ɛya mɛ́mla anyākwɔ́cɛ le jīla tɔ̄há ipú agbla kú otrɛ̄yí kú ācogwɛ́ɛya nēé hī ka Ukáyāfasi ā.

⁴Anɔ́ɔ é le ujɔ̄ tū tɔ̄há kú ɛ́gɛ́nɛ̄ ē géē lɛ kwú Ujísɔ̄si cɛ́ɛ́ kéē lɛ ɔ́ ŋmó tayínū lɛ ā

⁵Amáŋ é kahíníī, “Ó híīī wɛ eko ucɛ ā ŋ́ ohígbū nɛ̄ ācɛ géē cīlɛ̄fú.”

⁶Eko ɔ́ɔmā, eko nɛ̄ Ujísɔ̄si yɔ̄ Ubɛ́tāni ɔlɛ́ Usáyímɔ̄ni, ɔ̄cɛ nōo tɛtɛ lagwú ā,

⁷ɔnyā éyi wā ɛgiyí nū bī úkpe kú ɔtulalī nōo gbɔɔ́lá nɛ̄hi. Anɔ́ɔ ó lɛ ɔ́ tū ɔ̄ ɛyí abɔ̄ ó yɔ̄ ī lé ɔdōlé ā.

⁸Amáŋ eko nɛ̄ ayíkpó ā lɛ ɔ́ má ā, ɔtū le wú uwā, anɔ́ɔ é kahíníī, “Ohígbū ɔdí nōó gē kpó ɛ̄nyā bónū ā mɛ́ɛ̄?

⁹É lɔfú je ɔtulalī nyā lá ije nɛ̄hi glá, cɛ́ɛ́ kéē kwú ije ā ú lɛ aógbɛhá.”

¹⁰Abɔ̄ Ujísɔ̄si lɛ ɔdā nēé ka ā jé ā, ó da uwá kahíníī, “Ɔdíyá nɛ̄ aá ī junwalu lɛ ɔnyā ā mɛ́ɛ̄? Ɔdā olɔhi nōó yá gā um á.

¹¹Ohígbū ka aá géē lɛ ācogbɛhá ipú aá eko dóódu, amáŋ ami ā í gáā yɔ̄ pī aá eko dóódu ŋ́.

¹²Ó ŋmá lɛ anɔ̄ okpócu nyā nōó le nya um iyē, ó ke lɛ um tútū gbēyī eko nēé í nyi um ā ɛɛ́.

¹³Ɔkwɛ̄yi, n̄ da aá ka, ɛga dóódu nēé géē tɔ́ɔna kú ɔ̄kōōlɔhi nyā ipú ɛcɛ, é géē kɛlā lɛyíkwu ɔdā nɛ̄ ɔnyā nyā yá ā, kéē bī le blakwu ɔ́.”

¹⁴Anɔ́ɔ éyi kú ayíkpó igwɛ́ɛpa ā, nēé hī ka Ujúdasi Iskáriyɔ̄tu ā, nyɛ̄ɛ̄ le tá ɛgiyí aótrɛ̄yí kú ācogwɛ́ɛya ā, anɔ́ɔ ó kahíníī,

¹⁵“Ɔdí nɛ̄ aá géē je gā um ká n̄ lɛ ibīyājɛ yá tū Ujísɔ̄si lɛ aá ā?” Anɔ́ɔ é le ikpīje nɛ̄hɛ́ ofucigwó ka lɛ ɔ́ á.

¹⁶Oŋmá eko ɔ́ɔmā ā, ó gbɔɔ́ ō tíne eko olɔhi nōó géē yá ibīyājɛ tū Ujísɔ̄si.

¹⁷Ɛ̄cī aflɛ́yí kú ucɛ kú igbō nōó ī nū ŋ́ mā ā, ayíkpó ā wā ɛgiyí Ujísɔ̄si, anɔ́ɔ é kahíníī, “Iní nɛ̄ a tíne ká ālɔ̄ tútū gā uwɔ ká ā lé ucɛ kú onyatá āa”

¹⁸Ujísɔ̄si kahíníī, “Aá ga igelī ɛgiyí ɔ̄cɛ éyi ā ku aá da ɔ́ kahíníī, “Utíca ā ka, eko kú anúɔ le bá ajaajɛ ɛɛ́, ka anúɔ géē lé ucɛ kú onyatá ā tɔ̄há mla ayíkpó kú anúɔ ɔlɛ́ uwɔ.”

¹⁹Ayíkpó ā le yá ɛ́gɛ́nɛ̄ Ujísɔ̄si da uwá ā, anɔ́ɔ é lɛ ucɛ kú onyatá ā tútū á.

²⁰Eko nɛ̄ ɔnɛ̄ le gbo ā, Ujísɔ̄si yɔ̄ ī lé ɔdōlé mɛ́mla ayíkpó igwɛ́ɛpa ā.

²¹Abɔ̄ é yɔ̄ ī lé ɔdōlé ā, ó kahíníī, “Ɔkwɛ̄yi, n̄ da aá ka, ɔ̄cɛ éyi kú ipú aá géē yá ibīyājɛ tū um.”

²²Ó kwú uwā iyē nɛ̄ɛ̄nɛ̄hi, anɔ́ɔ é gbɔɔ́ ō da ɔ́ ɔ̄kā éyééye kahíníī, “Óndú, ami nɛɛ?”

²³Amáŋ ó tóohi kahíníī, “Ɔ̄cɛ nōo lɛ abɔ̄ wu ocíbú mla um ā gáā yá ibīyājɛ tū um á.

²⁴Ɔyínɔ̄nyīlɔ kú Ɔ̄cɛ géē kwú ɛ́gɛ́nɛ̄ é tá ipú ɔkpá kú ɛlɔ̄ɔwɔicō lɛ ā ā. Amáŋ ɔ̄cɛ nōo géē yá ibīyājɛ tū Ɔyínɔ̄nyīlɔ kú Ɔ̄cɛ ā le jī ɛɛ́. Ó géē lɔhi lɛ ɔ̄cɛ ɔ́ɔmā fíyɛ́ ɔ́dāŋ kéē ma ɔ́ ŋ́.”

²⁵Amáŋ Ujúdasi oyíbīyājɛ ā tóohi kahíníī, “Utíca, ami nɛɛ?” Anɔ́ɔ Ujísɔ̄si da ɔ́ kahíníī, “Awɔ ka lɛ ā n.”

²⁶Abɔ̄ é bá ī lé ɔdōlé ā, Ujísɔ̄si kwú igbō ú, ó lɛ ɔhā hɛ́ ce ɔ́, ó lɛ ɔ́ ce, anɔ́ɔ ó le je lɛ ayíkpó kú nū yɔ̄ ī kahíníī, “Aá mīyɛ kú aá lé. Ɛ̄nyā wɛ ɔkpíyē kú um á.”

²⁷Anɔ́ɔ ó kwú íkókwū ā ú, eko nōó lɛ ahínyá tá Ɔwɔicō kwɛyí ā, ó kwú ɔ̄ ú lɛ uwá anɔ́ɔ ó kahíníī, “Odúúdú aá, aá gwá.

²⁸Ohígbū ka ɛ̄nyā wɛ oyī kú um nēé pɛ́ bónū ohígbū odúúdú ācɛ cɛ́ɛ́ kú Ɔwɔicō kóō géē je íne nēé bīya ā yá uwā ɛhi á. Oyī nyā nɛ̄ Ɔwɔicō le gbɛka ɛ̄yīpɛ̄ mɛ́mla ācɛ ɔlɛ́ nū á.

²⁹“N̄ da aá ka, ŋmá abālɔbányā ń gáā gwá ejé kú īkpɔ̄cí ufáyin nyā gɛ ŋ́ jāā gbó ɛ̄cī ɔ́ɔmā nɛ̄ n géē gwá ɔ̄ ɛ̄yīpɛ̄ mɛ́mla aá ajɔ̄ɔ̄cɛ́ kú Ádā um ā.”

³⁰Anɔ́ɔ eko nēé le ijē gwó kwɛyí á, e le bɛ̄cɛ, le pɛ́ ga ɛfu kú Olífu.

³¹Ujísɔ̄si da uwá kahíníī, “Otú mā piíí ā odúúdú aá géē kwu ŋmá ɛgiyí um. Ohígbū kéē lɛ ɔ́ tá ipú ɔkpá ɛlɔ̄ɔwɔicō kahíníī, ‘N géē ŋmó ɔ̄cogbaálá ā, cɛ́ɛ́ ɔ́wá kú aálá kú nū ā kē í fíyákátā.’

³²Amáŋ eko nēé kwú um ú héyī, n géē ga Ugálīli gbɔbū lɛ aá.”

³³Amáŋ Upíta tóohi da ɔ́ kahíníī, “Ɔ́dāŋ ka odúúdú ācɛ le kwu ŋmá ɛgiyí uwɔ, ń gáā kwu gbóógbóō ŋ́.”

³⁴Ujísɔ̄si da ɔ́ kahíníī, “Ɔkwɛ̄yi, n̄ da uwɔ ka, otú mā, ofíílí ká ɔbúgwū kóō í tōgwú, a géē híhó ka anúɔ í jé um ŋ igbo ɛtá.”

³⁵Upíta da ɔ́ kahíníī, “Ɔ́dāŋ koó kōō wɛ ka n̄ gekwú mla uwɔ náana, ń gáā híhó ka n jé uwɔ ŋ́ nɛɛ ŋ́.” Odúúdú ayíkpó ohile ā ka ɛ́gɔ́ɔmā dúú.

³⁶Anɔ́ɔ Ujísɔ̄si mɛ́mla ayíkpó kú nū le tá ɛga éyi nēé hī ka Ugɛtsɛ́mēni ā, anɔ́ɔ ó da ayíkpó kú nū kahíníī, “Aá báajɛ amānyā ká n̄ gɔbu gaá gbɔ̄ɔkɔ.”

³⁷Anɔ́ɔ ó kwú Upíta mɛ́mla ayínɔ̄nyīlɔ ɛpa kú Usébēdi ā ú. Ɔtū le bīya lɛ ɔ́, ɔtūnōbí kē gbɔɔ́ ō yá ɔ̄.

³⁸Anɔ́ɔ ó da uwá kahíníī, “Ɔtūnōbí nɛ̄hi yɔ̄ ī yá um bɔ̄dā nɛ̄ géē kwú ā. Aá bá amānyā kú aá leyī kwɛɛcɛ mɛ́mla um.”

³⁹Abɔ̄ ó yɛ gɔbū lígíí ā, ó kwú okwúukwu ú kwajɛ lɛ eyī pīya klá ajɛ, anɔ́ɔ ó gbɔ̄ɔkɔ kahíníī, “Ádā um, ɔ́dāŋ́ koó tɔ́ɔtɛ́, yá kéē kwú íkókwū nyā ú ŋmá ɛgiyí um. Nááná ā, ó wɛ ɔdā nɛ̄ n tíne ā gáā yá ā ŋ́, amáŋ ɛ̄nɛ̄ a tíne ā kóō yá.”

⁴⁰Ó gā ɛgiyí ayíkpó ā, anɔ́ɔ ó má uwā bá ī gbɔlā, anɔ́ɔ ó da Upíta kahíníī, “Ayíka aá leyī kwɛɛcɛ mla um áwa ékpó glá ŋ́ kɛ̄ɛ?

⁴¹Aá leyī kwɛɛcɛ kú aá kē gbɔ̄ɔkɔ kú Ɔwɔicō kóō cɛ̄ lɛ uwá jé áá má ŋ́. Ɔkwɔ̄ɔ̄kwɛ̄yi, odo le tútū, amáŋ ɔkpíyē ā le gbagbafú.”

⁴²Igbɔhá, abɔ̄ ó nyɛ̄ɛ̄ igbo ɔ́mpa ā, ó gbɔ̄ɔkɔ kahíníī, “Ádā um, ɔ́dāŋ ka ɛ̄nyā í gla um glá ŋ́ ń táafú ŋ́ ayíka n lɛ ɔ́ gwá nɛ, ká ɔdā nɛ̄ a tíne ā kóō le yá.”

⁴³Ó kwúcē wā igbɔhá anɔ́ɔ ó má uwā bá ī gbɔlā, ohígbū ka eyī kú uwā wɛ iyɔ̄lā iyɔ̄lā.

⁴⁴Anɔ́ɔ ó habɔ̄ uwā tá nyɛ̄ɛ̄ gaá le ɔ̄kɔ gbā igbo ɔ́mɛtá, yɔ̄ ī kɛlā ékpó ā kpɔ́.

⁴⁵Anɔ́ɔ ó kwúcē wā ɛgiyí ayíkpó ā gaá da uwá kahíníī,”Aá ī gbɔlā klla ī mlɛ́nyɔ́ kpɔ́ ɛ́ɛ́ nɛɛ? Aá má ɔ̄, eko ā gā nēé géē je Ɔyínɔnlɔ kú Ɔ̄cɛ tū ācobīyíne abɔ̄ ɛɛ́.

⁴⁶Aá cāŋjɛ ká ālɔ̄ nyɔ̄. Aá mɔ́ɔ̄ oyíbīyājɛ tū um ā yɔ̄ ajaajɛ amānyā.”

⁴⁷Ujísɔ̄si bī ɛlā okónu yɔ̄ ī ka kpɔ́, ɛ́ɛ́ nɛ̄ Ujúdasi, éyi kú ayíkpó igwɛ́ɛpa ā wā á. Ɛwa kú ācɛ ŋmá ɛgiyí aótrɛ̄yí kú ācogwɛ́ɛya mɛ́mla anyākwɔ́cɛ kú uwā wā mla anú, bī ɔkpacaŋ́gelī mɛ́mla ogbló.

⁴⁸Oyíbīyājɛ ā tɛtɛ le ɔdōcābɔ̄ éyi je lɛ uwá kahíníī, “Ɔ̄cɛ nɛ̄ n géē lɛ ɔtū má ɔ̄ ɔtū ā wɛ Ujísɔ̄si á. Aá lɛ ɔ́ kwú.”

⁴⁹Ikpííkpó ɔ́ɔmā, ó gā ɛgiyí Ujísɔ̄si, anɔ́ɔ ó kahíníī, “N hokónu tū uwɔ, Utíca.” Anɔ́ɔ ó le ɔtū má ɔ̄ ɔtū á.

⁵⁰Amáŋ Ujísɔ̄si da ɔ́ kahíníī, “Oklóbīya um, yá ɔdā nɛ̄ a wā amānyā ohígbū nū ā.” Anɔ́ɔ é wā gaá lɛ Ujísɔ̄si kwú, bī ɔ́ á.

⁵¹Ikpííkpó ɔ́ɔmā éyi kú ipú ācɛ nēe bá mla Ujísɔ̄si ā lɛ ɔkpacaŋ́gelī kú nū pi, anɔ́ɔ ó lɛ ɔ́ gɔ́ ɔfiyɛ kú otrɛ̄yí kú ācogwɛ́ɛya ā, anɔ́ɔ ó lɛ ɔ́ ahɔ̄ éyi hɛ́ á.

⁵²Ujísɔ̄si da ɔ́ kahíníī, “Kwú ɔkpacaŋ́gelī kú uwɔ ú wu apɛ́. Ohígbū ka odúúdú ācɛ nēe bī ɔkpacaŋ́gelī le ŋmó ācɛ ā, ɔkpacaŋ́gelī nēé géē le ŋmó uwā á.

⁵³A gbɛlá ka n ŋ́ lɔfú tɛ̄hɔ̄ fu Ádā um kóō tū ɔ́wá kú aálelékwū-ōtɛ̄hɔ̄ fu um abālɔbányā glá ŋ́ nɛɛ?

⁵⁴Amáŋ ɔ́dāŋ ka ɛ̄nyā i yá lɛ ā, abɔ̄ ó ya lɛ nɛ̄ ɛlɔ̄ɔwɔicō ā géē yá jīla mɛ́ɛ̄ ā, ɛ̄nɛ̄ o ka kóō í yá piíí ā?”

⁵⁵Eko ɔ́ɔmā Ujísɔ̄si da ɛwa ā kahíníī, “Aá bī ɔkpacaŋ́gelī mɛ́mla ogbló wā gaá kwú um bɛ̄ɛka n wɛ ɔ̄cohɛ́julúgwu ā nɛɛ? Ɛ̄cī dóódu n yājɛ ipú Agblīihɔ-nɛ̄hi ā gē nwɛ̄lā, aá kē kwú um ŋ́.

⁵⁶Amáŋ odúúdú ɔdā nēe bá ā le yá ká ɔdā nɛ̄ ācomɛ́ɛbɛ tá ipú ɔkpá ɛlɔ̄ɔwɔicō ā kóō le yá jīla.” Anɔ́ɔ odúúdú ayíkpó ā habɔ̄ ɔ́ tá le pɛ́ kwu á.

⁵⁷Ācɛ nēe kwú Ujísɔ̄si ā lɛ ɔ́ bī ga ɔlɛ́ Ukayáfāsi, otrɛ̄yí kú ācogwɛ́ɛya ɛga nɛ̄ aítíca kú íne mɛ́mla anyākwɔ́cɛ jīla tɔhá ā.

⁵⁸Amáŋ Upíta yɛce ɔ́ igbīīgbīhi ɛga oligbó jāā gbéeko nōó gā agbla kú otrɛ̄yí kú ācogwɛ́ɛya ā. Ó le yɛ tá ipú inu, klla gaá yājɛ mla ācogbāājɛ kóō má ɔdā nōo gáā yá ā gaajaajɛ.

⁵⁹Aótrɛ̄yí kú ācogwɛ́ɛya ā mɛ́mla odúúdú ójīla okɛpɔ̄ ā bá gē tíne ijáalí ɛ̄kɛ̄mgbɛ̄ kéē cɛ̄ tū Ujísɔ̄si, cɛ́ɛ́ kéē lɛ ɔ́ ŋmó.

⁶⁰Amáŋ é má odúúmā ŋ́, nááná nɛ̄ ācɛ ocījáalí ɛ̄kɛ̄mgbɛ̄ alɛwa wā ā.

⁶¹Igbīhāajɛ ā, aɛ́pa kú uwā wā iyɔ̄bu gaá ka kahíní, “Ɔ̄cɛ ā kahíníī, ‘N lɔfú ca Agblīihɔ-nɛ̄hi kú Ɔwɔicō ā tāajɛ, kú n̄ klla gwó ɔ̄ ipú ɛ̄cī ɛtá glá.’”

⁶²Anɔ́ɔ otrɛ̄yí kú ācogwɛ́ɛya ā cāŋjɛ kla da ɔ́ ɔ̄kā kahíníī, “Abɔ̄ a tóohi kú ɔdā nēé cīije nū bá uwɔ ā lɛ ā ā?”

⁶³Amáŋ Ujísɔ̄si yɔ̄ cíí. Otrɛ̄yí kú ācogwɛ́ɛya ā da ɔ́ kahíníī, “N da uwɔ ɔ̄kā ŋmá iyē kú Ɔwɔicō nōo yēeyī ā, ká ā da alɔ ɔ́dāŋ ka awɔ wɛ Ohɔ́nyɛtá, Ɔyínɔ̄nyīlɔ kú Ɔwɔicō á.”

⁶⁴Ujísɔ̄si da ɔ́ kahíníī, “Awɔ ka lɛ ā á. Amáŋ n̄ da aá ka, oŋmá abālɔbányā aá géē má Ɔyínɔ̄nyīlɔ kú Ɔ̄cɛ abɔ̄ ó yājɛ abɔ̄lɔ́ná kú Ɔwɔicō nōo lɔfú fíyɛ́ dúú ā, klla géē kwúcē wā ɛyí ojuja kú ɔkpáncō.

⁶⁵Anɔ́ɔ otrɛ̄yí kú ācogwɛ́ɛya ā lɛ īlī kú nū híla, klla kahíníī, “Ó ī ka ɛbí ɛɛ́. Abɔ̄ ó yá ɛ́ɛ́ nɛ̄ alɔ gē dɔɔ̄kā ijáalí ɛ́ɛ́ mā ā? Aá lɛ ɛbí kú nū pó ɛɛ́.

⁶⁶Ɔdí nɛ̄ aá gbɛlá ā?” É tóohi kahíníī, “Ó cíkā kóō gekwú.”

⁶⁷Anɔ́ɔ é gbɔɔ́ ō táahɛ klá anú eyī, tū ɔ̄ akwū á. Ācɛ ōhī fíyɛ́ ɔ̄ abɔ̄ ahɔ̄ yɔ̄ ī ka kahíníī,

⁶⁸“Da alɔ, Ohɔ́nyɛtá, ɔ̄nyɛ fíyɛ́ uwɔ abɔ̄ ahɔ̄ āa?”

⁶⁹Upíta yājɛ ɛcɛ ódúdɔ̄lɛ́, anɔ́ɔ éyi kú ācocɛ̄hɔ̄ nɔ̄nyā ā wā ɛgiyí nū anɔ́ɔ ó kahíníī, “Awɔ, a yɔ̄ pī Ujísɔ̄si kú Ugálīli ā dúú.”

⁷⁰Anɔ́ɔ o híhó iyɔ̄bū ācɛ dóódu kahíníī, “Ń jé ɔdā nɛ̄ a ī ka ā ŋ́.”

⁷¹Anɔ́ɔ eko nōó nyɛ̄ɛ̄ le tá okómpīinu ɔwɛ kú ɔlɛ́ ā, ɔ̄cocɛ̄hɔ̄ nɔ̄nyā ɔhá le ɔ́ má, klla da ācɛ nēe bá abɔ́ɔ ā kahíníī, “Ɔ̄cɛ ā yɔ̄ pī Ujísɔ̄si kú Unásārēti dúú.”

⁷²Anɔ́ɔ ó híhó klla gbo ɔkpá kahíníī, “Ń jé ɔ̄cɛ ā ŋ́.”

⁷³Eko kpií le gla, ācɛ nēe háyi abɔ́ɔ ā wā gaá da Upíta kahíníī, “Kú ɔkwɛ̄yi ā, ā wɛ ɔ̄cɛ éyi kú ipú uwā dúú, ohígbū ɔkɛ̄lā ōka kú uwɔ, mafú cāā.”

⁷⁴Anɔ́ɔ ó gbɔɔ́ ō tokónu klla gbɔɔ́ ō gbo ɔkpá kahíníī, “Ń jé ɔ̄cɛ ā ŋ́.” Ɔkwɔkwu ɔ́mā ɔbúgwū lɛ ogwú tū.

⁷⁵Anɔ́ɔ Upíta le blakwu ɛlā nɛ̄ Ujísɔ̄si ka ā kahíníī, “Gbɔbū ɛ́ɛ́ ká ɔbúgwū kóō tōgwú ā, a géē híhó ka anúɔ í je um ŋ́ igbɛ ɛtá.” Anɔ́ɔ ó nyɛ̄ɛ̄ le tá ɛcɛ gaá gbɔɔ́ ō jikwū nɛ̄hi á.