Read idoma UMÁTIYU 28 Bible Online

UMÁTIYU 28 - idoma bible

UMÁTIYU 28

¹Ɛplá ɔ̄nɔ̄ɔnɛ̄ kú ɛ̄cī Usábāti, eko nɛ̄ ɛ̄cī aflɛ́yí kú aláadi le bá ā, Umerí Umagdalíni mɛ́mla Umerí ɔhá ā le pɛ́ i yɛ kéē gáā má únóji ā.

²Igbeékpónú ajɛ le jíliyē nɛ̄hi ohígbū ka alelékwū-ōtɛ̄hɔ̄ kú Óndú ā ŋmá ɔkpáncō wāajɛ gaá lɛ ɛcɔ̄ ā míya ŋmá okónu únóji ā, anɔ́ɔ ó má yājɛ ɛyí nū á.

³Alelékwū-ōtɛ̄hɔ̄ ā yɔ̄ ī fíyajɛ lɛbɛ̄ɛka ɔwolímanya ā, úwé kú nū kē tɛ́hɛ́ bɛ̄ɛka áfū á.

⁴Ufi nɛ̄hi nōo yá ācogbāājɛ ā yá kéē fīyégbúlú, anɔ́ɔ é gā ajɛ wɔɔlɔ bɛ̄ɛka é le pɛ́ gekwú ā.

⁵Alelékwū-ōtɛ̄hɔ̄ ā da anyā ā kahíníī, “Aá híīī yúúfi ŋ́, ohígbū ka n jé ka aá gē tíne Ujísɔ̄si nēé nyɔ́kpá ā.

⁶Ó yɔ̄ amānyā gɛ ŋ́, ohígbū koó le héyī ɛ́gɛ́nɛ̄ ó ka ā ɛɛ́. Aá wā gaá má ɛga nɛ̄ okwū nū tɛtɛ gwutá ā.

⁷Cɛ́ɛ́ kú aá nyɔ̄ fíyaa gaá da ayíkpó kú nū koó le héyī ŋmá ɔlékwu ɛɛ́. Abālɔbányā ó yɔ̄ ī ga Ugálīli gbɔbū lɛ aá ɛɛ́. Abɔ́ɔ nɛ̄ aá géē má ɔ̄ á! Aá blakwu ɔ́ ka n le da aá ɛɛ́.”

⁸Anɔ́ɔ é hápáápá nyɛ̄ɛ̄ ŋmá únóji ā ipú ufi mɛ́mla éeyē nɛ̄hi á. É le inya kwu nyɔ̄ gaá le da ayíkpó kú nū.

⁹Igbeékpónú Ujísɔ̄si gaá jīla uwá, anɔ́ɔ ó le okónu hɛ́ tū uwā kahíníī, “Aá ŋ́ŋmá ɔ̄cī!” Anɔ́ɔ anyā ā wā ɛgiyí nū gaá bī ɔ̄ ikpó, anɔ́ɔ é le ɛ̄gbá gbā ɔ̄ á.

¹⁰Ujísɔ̄si da uwá kahíníī, “Aá híīī yúúfi ŋ́. Aá nyɔ̄ kú aá gaá da ayínɛ́ um nɔ̄nyīlɔ kéē ga Ugálīli, abɔ́ɔ nēé géē má um á.”

¹¹Abɔ̄ ācɛnyā bá gē nyɔ̄ ɔwɛ ā, aóhī kú ācogbāajɛ ā kwúcē gā igelī ā. Anɔ́ɔ é le ɛjɛ̄ɛ̄jī ɔdā nēe yá kpɛ́mm ā kpó ka lɛ aótrɛ̄yí kú ācogwɛ́ɛya ā.

¹²Aótrɛ̄yí kú ācogwɛ́ɛya le jīla tɔ̄há mɛ́mla anyākwɔ́cɛ ā, anɔ́ɔ é lɛ ujɔ̄ tū á. É le ije nɛ̄hi je lɛ aícɔ́ɔja ā anɔ́ɔ é da uwá kahíníī,

¹³“Aá ka ka ayíkpó kú nū wā otú eko nɛ̄ aá bá gē gbɔlā ā gaá kwú ɔ̄ ú uwī.

¹⁴Ɔ́dāŋ ka igbómína lɛ ɛ̄nyā pó, alɔ géē ka ɔdā nōo géē nū ɔ̄ ipú, cɛ́ɛ́ kú aá híīī lɛ unwalu ŋ́.”

¹⁵Anɔ́ɔ eko nēé mīyɛ ije ā, é le yá ɛ́gɛ́nɛ̄ é da uwá lɛ ā ā. Anɔ́ɔ é lɛ ɔ̄kā nyā kā yɛ ajɛ ɛga dóódu kú Ujudíya jāā kwu ícɛ nyā á.

¹⁶Anɔ́ɔ ayíkpó igwóléyi ā le tá Ugálīli, ɛyí ɛfu nɛ̄ Ujísɔ̄si cābɔ̄ lɛ uwá kéē nyɔ̄ ā.

¹⁷Eko nēé lɛ ɔ́ má ā, é le ɔ́gbá tá ɔ̄. Amáŋ aóhī kú uwā yɔ̄ ī táafú ipú ɔtū kpɔ́.

¹⁸Anɔ́ɔ Ujísɔ̄si wā gaá da uwá kahíníī, “É kwú ɔfú dóódu nōo yɔ̄ ɔkpáncō mɛ́mla ɛcɛ ú kpó gā um ɛɛ́.

¹⁹Ohígbū ɔ́ɔmā, aá nyɔ̄ ga ɛgiyí ācɛ kú éwo dóódu, kú aá yá kéē le pīya ayíkpó kú um. Aá yá uwā ubatísim ŋmá lɛ iyē kú Ádā ā, mɛ́mla ɔyí ā, mɛ́mla Alelékwū Ihɔ ā.

²⁰Aá nwū uwā kéē yá ɔdā dóódu nɛ̄ n da aá ā. Aá mɔ́ɔ̄, n géē yɔ̄ mla aá eko dóódu jāā gbéeko nɛ̄ ɛcɛ í mɛ.”