Read idoma UMÁTIYU 3 Bible Online

UMÁTIYU 3 - idoma bible

UMÁTIYU 3

¹Eko ɔ́ɔmā, Ujɔ́ni oyúbatísim wā gē tɔ́ɔna ipú ígbíli kú Ujudíya kahíníī,

²“Aá lɛ odo kú aá pīyabɔ̄, ohígbū ka ajɔ̄ɔ̄cɛ́ kú ɔkpáncō le kwajaajɛ ɛɛ́.”

³Ohígbū ka ɛ̄nyā wɛ anú, nɛ̄ Ayisáya ɔ̄comɛ́ɛbɛ ā kɛlā kú nū kahíníī, “Ɔkɔ kú ɔ̄cɛ éyi yɔ̄ ī dɛ̄gba ipú ígbíli kahíníī, “Aá lɛ ɔwɛ kú Óndú ā gllagwó, aá lɛ ɔwɛ kú nū nā kpaakpa.’”

⁴Ujɔ́ni le úwé ɔnwū kú inyankwūlūmī wiiyē. Ó le ɔkpɛ́bɛ́ gbō ɛ́nyɔ́, ɔdōlé kú nū kē wɛ efūma mɛ́mla ɛnwú kú ipácí.

⁵Ācɛ wā ɛgiyí nū ŋmá Ujerúsālɛm mɛ́mla Ujudíya mɛ́mla aípɔ́lɛ́ dóódu nēe bá kwu Ujɔ́dan ā.

⁶Eko nēé le íne nēé bīya ā ka tɛ́ɛcɛ, cɛ́ɛ́ ó le ubatísim yá uwā.

⁷Eko nōó má ācɛ alɛwa kú aɔ́wá nēé hī ka Ufárisīi mɛ́mla Usádusīi bá ī wā kóō yá uwá Ubaptísim ā, ó da uwá kahíníī, “Aá, ugbɛ kú ogwijii, ɔ̄nyɛ da aá ka aá kwu hɛ̄ ícɔ̄nū nōo gē wā ā tá āa?

⁸Aá yá ucē nēe géē mafú ka aá le pīyabɔ̄ ŋmá íne nɛ̄ aá bīya ā ɛɛ́.

⁹Aá híīī gbɛlá ipɔ́tū kú aá ka, ‘Abɔ̄ Ébrahām kē wɛ ádáádā alɔ ā, ɔdā dúú í yá alɔ gla ŋ́’. Ohígbū ka n da aá ka Ɔwɔicō lɔfú lɛ ɛcɔ̄ nēe bá ā pīya ayí lɛ Ébrahām glá.

¹⁰Abālɔbányā Ɔwɔicō kōō lɛ āgā tútū kóō le hɛ́ aɔ́cí tɛgba tɛgba ɛɛ́. Ɔcí dúúmā nōó gwá īkpō ɔ̄kwɔ̄ɔ̄kwɛ̄yi ŋ́, ó géē hɛ́ ɔ̄ wāajɛ, cɛ́ɛ́ ó kwú ɔ̄ ú tá ipú ɔlá.

¹¹“Ami ā gē bī éŋkpɔ̄ yá aá Ubaptísim kóō cābɔ̄ ka aá le pīyabɔ̄ ɛɛ́. Amáŋ ɔ̄cɛ éyi gē wā igbīhi um, nōo fíyɛ́ um kɔ́ɔ́. Ń kōō yá ɔdā olɔhi dúú jɛ̄ nɛ̄ n kōō ī bī áblákpá kú nū ŋ́. Anú ā géē bī Alelékwū Ihɔ mɛ́mla ɔlá le yá aá Ubaptísim á.

¹²Ó bī ówɔ́da kú nū abɔ̄ kóō le tá īkpɔ̄dā kú nū owu, géē jíla nú ɛga o wíīkpɔ̄dā. Cɛ́ɛ́ ó lɛ īkpɔ̄dɛ̄hɔ̄ kú nū cē tū ɔbā, amáŋ ó géē tá igbómgbō ā tū ipú ɔlá nōó gē nyī ŋ́ piyóó.”

¹³Anɔ́ɔ Ujísɔ̄si ŋmá Ugálīli gā ísu kú Ujɔ́dan ɛgiyí Ujɔ́ni kóō lɛ Ubatísim yá ɔ̄ á.

¹⁴Amáŋ Ujɔ́ni yá kóō ci ɔ́ anú. Anɔ́ɔ Ujɔ́ni kahíníī, “Awɔ ā cíkā ō yá um Ubaptísim á, a klla ī wā ɛgiyí um?”

¹⁵Amáŋ Ujísɔ̄si tóohi da ɔ́ kahíníī, “Cɛ̄ kóō lɛ ā abālɔbányā ā, ohígbū koó cɛgbá ká ālɔ̄ lɛ ɔdā nɛ̄ Ɔwɔicō tíne ā yá jīla.” Anɔ́ɔ ó cɛ̄ á.

¹⁶Eko nēé le ubatísim yá Ujísɔ̄si kwɛyí ā, ó le bɛ̄cɛ ŋmá ipú éŋkpɔ̄. Anɔ́ɔ ɔkwɔɔkwu ɔ́ɔmā ɔkpáncō le nwūla, anɔ́ɔ ó má Alelékwū kú Ɔwɔicō yɔ̄ ī wāajɛ gaá ce ɔ́ ɛyí lɛbɛ̄ɛka okóohō ā.

¹⁷Ɔkɔ éyi ŋmá ɔkpáncō wāajɛ kahíníī, “Ɔyínɔ̄nyīlɔ kú um nōo he um ɔtū ā yɔ̄ á, ɛlā kú nū kē he um ɔtū nɛ̄hi.”