Read idoma UMÁTIYU 5 Bible Online

UMÁTIYU 5 - idoma bible

UMÁTIYU 5

¹Eko nōó lɛ ɛwa ā má ā, ó le tá ɛyí ɛfu. Eko nōó má yāajɛ ā, ayíkpó kú nū gā ɛgiyí nū.

³Ó kahíníī, “Ákú aá nēe jé ká aá cɛgbá Ɔwɔicō ā lɔhi nɛ̄hi, ohígbū ka Ɔwɔicō mīyɛ aá wā ajɔ̄ɔ̄cɛ́ kú nū ɛɛ́!

⁴Ákú aá nēe bá ī yá ɔtūnōbí abālɔbányā ā lɔhi nɛ̄hi, Ɔwɔicō géē tū aá ɔtūlé.

⁵Ákú aá nēé lɔtūce ɔfú kú abɔ̄yī aá ŋ́ mā ā lɔhi nɛ̄hi, ohígbū ka Ɔwɔicō géē kpó odúúdú aɔ́dā olɔhi nōó cokónu kú nū ā lɛ aá.

⁶Ákú aá lɔhi nɛ̄hi, aá nēe ɔdā nōo kwu aá ɔtū fíyɛ́ dúú ā wɛ ka ɔdā nɛ̄ Ɔwɔicō tíne ā kóō le yá ā. Ɔwɔicō géē je ɔdā nɛ̄ aá dɔɔ̄kā ā lɛ aá.

⁷Ákú aá nēe gē ményinyi ācɛ ā lɔhi nɛ̄hi, ohígbū ka Ɔwɔicō géē ményinyi aá.

⁸Ákú aá nɛ̄ ɔtū kú aá le yá ékpó klla le péee ō gbā Ɔwɔicō ā lɔhi nɛ̄hi, ohígbū ka aá géē bá ɛga nɛ̄ Ɔwɔicō yɔ̄ ā í má ɔ̄.

⁹Ákú aá nēe wɛ ācɛ o yɛ́ɛ́bɔ́ ɔtāhɛ̄ ācɛ ā lɔhi nɛ̄hi, ohígbū ka Ɔwɔicō géē hī aá ka ayí nū.

¹⁰Ákú aá nēé yá ōwē icíci ohígbū ɔdā olɔhi nɛ̄ aá yá āa lɔhi nɛ̄hi, ajɔ̄ɔ̄cɛ́ kú ɔkpáncō wɛ ákú aá.

¹¹Ákú aá nēé gē cá aá ɛcá, klla gē yá aá ōwē, klla gē kā ɛdɔ ɛ̄kɛ̄mgbɛ̄ obɔ̄bí dóódu ce aá ohígbū um ā lɔhi nɛ̄hi.

¹²Aá gwéeyē, ká ɔtū kóō kē he aá, ohígbū ka ulé kú aá nwuné ɔkpáncō. Aá kē jé ka ɛ́gɛ́nyā nēé kē yá ācomɛ́ɛbɛ nēe gbɔbū lɛ aá ā ōwē icíci dúú á.”

¹³Aá lɛbɛ̄ɛba ɔmā kú ɛcɛ á, amáŋ ɔ́dāŋ ka ɔmā í lɔnyɛ gɛ ŋ́, ɔdí nēé géē le tū ɔ̄ kóō klla lɔnyɛ āa? Ó tīile dúúmā glá gɛ ŋ́, ohígbū ɔ́ɔmā, é gē je ɔ́ pīya bónū, cɛ́ɛ́ ācɛ kē ī yɛ ɛyí nū.

¹⁴Aá lɛbɛ̄ɛba ɔlá ofíyajɛ kú odúúdú ɛcɛ á. Ɔlɛ́ nēé gwo ce ɛyí ɛfu í gáā tayínū glá ŋ́.

¹⁵Ɛ́ɛ́ nēé gē lɛ ɔlá kwu agege klla kwú ɔ̄ ú tayínū ɛháajɛ ɔgālā ŋ́, amáŋ é gē je ɔ́ ce ɛyí ɔdā ō lɛ agege ce ɔ́, kóō fíyáajɛ lɛ ācɛ dóódu nēe bá ipú inu ā.

¹⁶Ɔwɛ ékpó ɔ́ɔmā, aá cēyītīkwū kú ɔlá kú aá kóō fíyáajɛ iyɔ̄bū ācɛ, cɛ́ɛ́ kéē má úklɔ́ olɔhi kú aá, kéē cɛ̄tra Ádā aá, nōo yɔ̄ ɔkpáncō ā.

¹⁷“Aá híīī gbɛlá ka um wɛ̄ɛcɛ ā gaá ŋmó íne ā ámāŋ ka ɛlā kú ācomɛ́ɛbɛ ā nyí ŋ́. Ń wā gaá ŋmó íne ā nyí ŋ́, amáŋ ká n̄ lɛ uwá yá jīla.

¹⁸N̄ lɛ ɛlā ɔkwɛ̄yi da aá mɛ́ n̄. Jāā gbéeko nɛ̄ ɔkpáncō mɛ́mla ɛcɛ mɛ, īkpɛ̄lā ékpó kú íne ā í gáā mɛ glá ŋ́, jāā gbéeko nɛ̄ odúúdú ɔdā nōó nwū ā le yá jīla.

¹⁹Ɔ̄cɛ dúúmā nōo géē tá ō yá ɛ̄nɛ̄ o nyɛ́ fíyɛ́ dúú kú íne ā, nōo klla nwū ācɛ kéē yá ɛ́gɔ́ɔmā, Ɔwɔicō géē lɛ ɔ́ jiji tēyī ipú ajɔ̄cɛ́ kú ɔkpáncō. Amáŋ ɔ̄cɛ dúúmā nōo lɛ íne ā tū, klla nwū ācɛ ɔhá kéē yá ɛ́gɔ́ɔmā, Ɔwɔicō géē je ɔ́ ka ɔ̄cɛ nɛ̄hi ajɔ̄ɔ̄cɛ́ kú ɔkpáncō.

²⁰Ohígbū ka n da aá ka ayíka ucē okpaakpa nɛ̄ aá yá le fíyɛ́ ákú aítíca kú íne ā mɛ́mla ācɛ Ufárisīi ā, ámāŋ aá gáā ga ajɔ̄ɔ̄cɛ́ kú ɔkpáncō glá ŋ́.”

²¹“Aá le pó keé da ācɛ íkée kahíníī, ‘A híīī ŋmó ɔ̄cɛ ŋ́. Ɔ̄cɛ dúú nōo lɛ ɔ̄cɛ ŋmó, é géē kɛpɔ̄ tū ɔ̄.’

²²Amáŋ n da aá ka, ɔ̄cɛ dúúmā nōo le cɔ̄nū mla ɔyínɛ́ nū nōó lɛyí ŋ́, é géē kɛpɔ̄ tū ɔ̄ dúú. Ɔ̄cɛ dúúmā nōo da ɔyínɛ́ nū ka, ‘A wɛ olíla,’ é géē bī ɔ̄ wā ɔgbɔ́ ójīla kéē lɛ ɛpɔ̄ ka tū ɔ̄. Ɔ̄cɛ dúúmā nōo kē ka, ‘Ɔdāhá’, é géē je ɔ́ tá ɔlá kú ɔlíkɔtɔ.

²³Ɔ́dāŋ́ ka a gáā gwɛ́ɛya lɛ Ɔwɔicō ɛyí ede, anɔ́ɔ a le bla ka ɔyínɛ́ uwɔ bī odée lɛyíkwu uwɔ á.

²⁴Habɔ̄ iyɛ́ya kú uwɔ bá iyɔ̄bū ede abɔ́ɔ. Nyɔ̄ bōōbū í lɛ ɛbɔ́ yá mɛ́mla ɔyínɛ́ uwɔ, cɛ́ɛ́ a kwúcē wā í lɛ ɛya kú uwɔ gwó lɛ Ɔwɔicō.

²⁵Ɔ́dāŋ́ ka ɔ̄cɛ dúúmā lɛ ɔkpá tá gā awɔ ɛga okɛpɔ̄, lɛ ɛlā ā kagwó mɛ́mla anú eko nɛ̄ a lɛ eko kpɔ́ ɛ́ɛ́ mā, gbɔbū kú ā ga abɔ́ɔ. Ikpíkpó nɛ̄ aá lɛ tá abɔ́ɔ, ó géē je uwɔ tū ɔcɛ́ ohɛ́pɔ̄ abɔ̄. Ɔcɛ́ ohɛ́pɔ̄ ā géē jé uwɔ tū udásanda abɔ̄. Cɛ́ɛ́ udásanda ā kwú uwɔ ú tá agbá.

²⁶N da uwɔ ka a géē klá abɔ́ɔ jāā gbéeko nɛ̄ a lɛ ɔkɔ́bɔ ámōōmɛ kú olóofi ā gbā.

²⁷“Aá tɛtɛ pó bā é ka, ‘Ā híīī cikpó ɔnyā ɔhá nōó wɛ ɔnyā uwɔ ŋ́’.

²⁸Amáŋ n̄ da aá ka, ɔ̄cɛ dúúmā nōo lɛ ɔkɔnyɔ̄ má ɔnyā ɔhá dúúmā, nōó le ɔkɔ nū hɛ́, le ikpó nū ce ipɔ́tū kú nū dúúdú ɛɛ́.

²⁹Ɔ́dāŋ́ ka eyī kú abɔ̄lɔ́ná kú uwɔ yá ká ā yá ɔdōōbɔ̄bí, lɛ ɔ́ wú, ká ā kwú ɔ̄ ú tónū ŋmá ɛgiyí uwɔ. Ohígbū koó géē lɔhi gā uwɔ fíyɛ́ ká āyā éyi kú iyē kú uwɔ kóō le bīya, ikɔkɔ nɛ̄ odúúdú iyē kú uwɔ géē ga ipú ɔlá kú ɔlíkɔtɔ.

³⁰Ɔ́dāŋ́ ka abɔ̄lɔ́ná kú uwɔ yá ká ā yá ɔdōōbɔ̄bí á nɛ, lɛ ɔ́ hɛ́ ká ā kwú ɔ̄ ú tónū ŋmá ɛgiyí uwɔ. Ohígbū ka ó géē lɔhi gā uwɔ fíyɛ́ ká āyā éyi kú iyē kú uwɔ kóō le bīya, ikɔkɔ nɛ̄ odúúdú iyē kú uwɔ géē ga ipú ɔlá kú ɔlíkɔtɔ.

³¹É le ɔ́ ka dúú ka, ‘Ɔ̄cɛ dúúmā nōo tíne kóō tá ɔnyā nū, kóō le ɔkpá kú ɔnyā ō tá je lɛ ɔ́’.

³²Amáŋ n̄ da aá ka, ɔ̄cɛ dúúmā nōo tá ɔnyā nū, nōó wɛ ohígbū ajā nɛ̄ ɔnyā ā gbo ā ŋ́, yá ɔnyā ā kóō wɛ ogbajā. Ɔ̄cɛ dúúmā nōo lɛ ɔnyā nēé tá ā lɛ, ikpɔ́nyā ɔ̄cɛ nōó ce á.

³³Aá klla le pó keé da ācɛ kú íkée ā ka, ‘A híīī gbɛka ɛ̄kɛ̄mgbɛ̄ ŋ́, amáŋ a géē je ɔdā nɛ̄ a ce Óndú ā oji kú nū ā lɛ ɔ́.’

³⁴Amáŋ n̄ da aá ka, aá híīī gbɛka fúlufúlu ŋ́. Aá kōō híīī bī ɔkpáncō gbɛka ŋ́ ohígbū koó wɛ akpa kú ɔcɛ́ kú Ɔwɔicō.

³⁵Aá kōō ī bī ɛcɛ gbɛka ŋ́, ohígbū koó wɛ ɔdōlikpó ce ɔ́ kú Ɔwɔicō. Ā híīī bī Ujerúsālɛm gbɛka ŋ́, ohígbū koó wɛ igelī nɛ̄hi kú Ɔcɛ́ nɛ̄hi āa.

³⁶Ā híīī bī ɛyí kú aá le gbɛka ŋ́, ohígbū ka aá lɔfú yá īnyīlɛ̄yí éyi kú aá, kwu ɛnɛ̄hɛ́ ámāŋ onōbí, glá ŋ́.

³⁷Aá kóō yá ka, ‘Īī’ kú aá kóō wɛ ‘Īī’ ɔkwɛ̄yi. Ká ‘Ehée’ kú aá kóō kē wɛ ‘Ehée’ ɔkwɛ̄yi. Ɔdā dúúmā nōo le fíyɛ́ ɛ̄nyā wɛ ɔdōōbɔ̄bí.

³⁸Aá le pó keé ka, ‘Eyī éyi kóō kwɛ̄yí eyī éyi. Ayīnu éyi kóō kwɛ̄yí ayīnu éyi.’

³⁹Amáŋ n da aá ka, ā híīī gwō ɔ̄cɛ obɔ̄bí dúúmā ɔ́ci ŋ́. Amáŋ ɔ́dāŋ ka ɔ̄cɛ lɛ abɔ̄ fíyɛ́ uwɔ ábáa abɔ̄lɔ́ná, lɛ ɔhá pīya tá lɛ ɔ́ dúú.

⁴⁰Ɔ́dāŋ́ ka ɔ̄cɛ dúúmā lɛ ɔkpá tá ga uwɔ ɛga okɛpɔ̄ kóō mīyɛ úwé ɛhícō kú uwɔ, kwú úwé ɛháajɛ kú uwɔ lɛ ɔ́ dúú.

⁴¹Ɔ́dāŋ́ ka ɔ̄cɛ dúúmā da uwɔ kā tīkpó mɛ́mla anú abɔ̄fú ukilómīta éyi, yɛ mɛ́mla anú ukilómīta ɛpa.

⁴²Je lɛ ɔ̄cɛ nōo ba uwɔ odée āa. Á híīī nyí ɔ̄cɛ dúúmā nōo tíne kóō kplá ɔdā ŋmá abɔ̄ uwɔ ā ŋ́.

⁴³Aá le pó keé ka, ‘Yíhɔtū tū oladóogbe kú uwɔ, ká ā kē wɔ́tū aólɛlā kú uwɔ.’

⁴⁴Amáŋ n da aá ka, aá yíhɔtū tū aólɛlā kú aá, ká aá klla gbɔ̄ɔkɔ ohígbū ācɛ nēe ī yá aá ōwē ā.

⁴⁵O ŋmá ɛ́gɛ́nyā, aá géē wɛ ayí kú Ádā aá nōo yɔ̄ ɔkpáncō ā ɔkwɔ̄ɔ̄kwɛ̄yi. Ohígbū ka ɛnɔ kú nū gē cɛ̄ klá ɔ̄cɛ obɔ̄bí mɛ́mla ɔ̄cɛ olɔhi. Ɔwɔ kú nū gē yá klá ɔ̄cɛ nōo gē lɛ íne tū mɛ́mla ɔ̄cɛ nōo gē bīya íne.

⁴⁶Ohígbū ka ɔ́dāŋ ka aá gē yíhɔtū tū ācɛ nēe yíhɔtū tū aá ōfōōfū uwā, ɔdí wɛ ulé kú aá āa? Aódɔlɛ́ nááná gē yá lɛ ā dúú.

⁴⁷Ɔ́dāŋ́ ka aá ī hókónu tū ayínɛ́ ā ōfōōfū uwā, ɔdí wɛ ɛyɛ́ɛ́yí kú ɔdā nɛ̄ aá yá āa? Ācɛ nēe í pa ɛcí ā nááná gē yá ɛ́gɔ́ɔmā dúú.

⁴⁸Aá kóō yá ucē kpaakpa dúúdú ɛ́gɛ́nɛ̄ Ádā aá, nōo yɔ̄ ɔkpáncō ā gē yá ucē kpaakpa dúúdú ā.”