Read idoma UMÁTIYU 6 Bible Online

UMÁTIYU 6 - idoma bible

UMÁTIYU 6

¹“Aá leyī kwɛcɛ kú aá híīī yá ɔdā olɔhi kú aá iyɔ̄bū ācɛ o yá ká ācɛ kéē má ɔ̄ ŋ́. Ɔ́dāŋ́ ka aá ī yá lɛ āa, aá gáā mīyɛ ulé dúúmā ŋmá abɔ̄ Ádā aá, nōo yɔ̄ ɔkpáncō ā ŋ́.”

²“Eko nɛ̄ a gē yá ɛhi, ā híīī lɛ ɔ́ tɔ́ɔna ɛ́gɛ́nɛ̄ ācɛ oleyī ɛpa gē yá ipú aɛ́gogbɔ̄ɔkɔ mla ɔtāhɛ̄ ɔwɛ cɛ́ɛ́ ká ācɛ kéē cɛ̄tra uwá ā ŋ́. Ɔkwɛ̄yi, n̄ da aá ka, uwá mīyɛ ulé kú uwā ɛɛ́.

³Amáŋ eko nɛ̄ aá gē yá ɛhi kú aá, ā híīī yá ká abɔ̄lúfīyē kú aá kóō jé ɔdā nɛ̄ abɔ̄lɔ́ná kú aá gē yá ā ŋ́.

⁴Ká ɛhi kú aá kóō tayínū, cɛ́ɛ́ Ádā aá, nōo gē má ɔdā ōtayínū ā, géē cíla aá ulé.”

⁵Eko nɛ̄ aá gáā gbɔ̄ɔkɔ, aá híīī yá bɛ̄ɛka ācɛ oleyī ɛpa āa ŋ́. Ohígbū keé gē tíne kéē háyi ipú aɛ́gogbɔ̄ɔkɔ mɛ́mla áklō kú uláyi kéē gbɔ̄ɔkɔ ká ācɛ kéē má uwā. Ɔkwɔ̄ɔ̄kwɛ̄yi, n̄ da aá ka uwá mīyɛ ulé kú uwā ɛɛ́.

⁶Amáŋ aá ā, eko nɛ̄ aá gē gbɔ̄ɔkɔ, aá le tá inu eyīpú. Eko nɛ̄ aá lɛ ɔwɛ gwū, aá gbɔ̄ɔkɔ lɛ Ádā aá, nōo yɔ̄ ɛga otayínū ɔ́ɔmā ā. Ádā aá nōo ī má ɔdā otayínū ā, kē í cíla aá ulé.

⁷“Eko nɛ̄ a gē gbɔ̄ɔkɔ, ā híīī kɛlā cɔhá icō ɛ́gɛ́nɛ̄ ācɛ nēe ō pɛ̄cí ā gē yá ā ŋ́. Ohígbū ka uwá gbɛlá keé géē pó ɔkɔ kú uwā ohígbū ɛlā alɛwa nēé ī ka ā.

⁸Aá gbla uwá ŋ́, ohígbū ka Ádā ā jé ɛgbá kú aá gbɔbū ɛ́ɛ́ ka aá da ɔ́ ɔ̄kā nū.

⁹Ohígbū ɔ́ɔmā ā, ɔwɛ ɛ́gɛ́nyā nɛ̄ aá géē gbɔ̄ɔkɔ á. ‘Ádā alɔ, nōo yɔ̄ ɔkpáncō, Alɔ gbɔ̄ɔkɔ ká ā yá ká ācɛ kéē lɛ ojīlīmā ce iyē otīihɔ kú uwɔ.

¹⁰Wā gaá cɔcɛ́ ɛcɛ amānyā. Ká ɔdā nɛ̄ a tíne ā kóō yá ipú ɛcɛ nyā, ɛ́gɛ́nɛ̄ ó ī yá ɔkpáncō ā.

¹¹Je ɔdōlé nɛ̄ alɔ cɛgbá ɛ̄cī nyā ā lɛ alɔ.

¹²Kwú ucē obɔ̄bí nɛ̄ alɔ yá ā í yá alɔ ɛhi, ɛ́gɛ́nɛ̄ alɔ ī je yá ācɛ nēe yá alɔ ɔdōōbɔ̄bí ā ɛhi ā.

¹³Ā híīī bī alɔ ga ipú ojámá nɛ̄hi ŋ́, Amáŋ lɛ alɔ nyatá ŋmá ɔdōōbɔ̄bí.

¹⁴Ohígbū ka ɔ́dāŋ ka aá kwú ɔdōōbɔ̄bí nɛ̄ ācɛ yá aá ā í yá uwā ɛhi, Ádā aá nōo yɔ̄ ɔkpáncō ā, géē je ákú aá yá aá ɛhi dúú.

¹⁵Amáŋ ɔ́dāŋ ka aá tá ō je ɔdōōbɔ̄bí nɛ̄ ācɛ yá aá ā yá uwá ɛhi, Ádā aá nōo yɔ̄ ɔkpáncō ā, í gáā je ɔdōōbɔ̄bí nɛ̄ aá yá ā yá aá ɛhi ŋ́ dúú.

¹⁶“Eko nɛ̄ aá ī gwōkónu, aá híīī lɛ eyī hɔ́ɔnɔ bɛ̄ɛka ācɛ oleyīɛpa ā ŋ́. Ohígbū keé gē le eyī kú uwā kwúfúlá ká ācɛ kéē jé ka uwá yɔ̄ ī gwōkónu. Ɔkwɔ̄ɔ̄kwɛ̄yi, n̄ da aá ka, uwá mīyɛ ulé kú uwā ɛɛ́.

¹⁷Amáŋ aá ā, eko nɛ̄ aá gē gwōkónu, aá kóō lɛ anɔ̄ nya ɛyí kú aá, klla lɛ eyī kú aá na.

¹⁸Aá mafú lɛ ācɛ ka aá gē gwōkónu ŋ́, amáŋ Ádā aá nōo yɔ̄ ɛga otayínū ā. Cɛ́ɛ́ Ádā aá, nōo gē má ɔdā ōtayínū ā, géē cíla aá ulé.

¹⁹“Aá híīī kpó agbénú tū lɛ īyī aá ipú ɛcɛ nyā ŋ́. Ohígbū ka ipú ɛcɛ nyā, ɛha mɛ́mla ɛ́kla gē bīya agbénú. Ācɛ owūwī kē ī ca ɔwɛ gaá kpó uwī.

²⁰Amáŋ aá lɛ agbénú tū lɛ īyī aá ɔkpáncō. Ohígbū ka abɔ́ɔ ā, ɛha ámāŋ ɛ́kla í gē bīya ɔdā dúú ŋ́. Ācɛ owūwī ī kē gē ca ɔwɛ gaá kpó uwī ŋ́.

²¹Ohígbū ka ɛga nɛ̄ agbénú kú uwɔ yɔ̄ ā, abɔ́ɔ nɛ̄ ɔtū kú uwɔ gē tá á.

²²“Īkpēyī kú ɔ̄cɛ gē yá nɛ̄ iyē kú nū gē mɛ́ɛbɛ á, ó lɛbɛ̄ɛka agege nōo ī cɛ̄ lɛ ɔ̄cɛ mɛ́ɛbɛ ā. Ohígbū ɔ́ɔmā ɔ́dāŋ ka ikpēyī kú uwɔ lɛ gēdēē, ó lɛ āa ɔlá gē fíyáajɛ klá odúúdú iyē kú uwɔ nɛ̄ɛ̄nɛ̄hi.

²³Amáŋ ɔ́dāŋ ka ōcē lɛ eyī kú uwɔ pu, odúúdú iyē kú uwɔ géē yɔ̄ ipú obū. Ohígbū ɔ́ɔmā ā ɔ́dāŋ ka ɔlá nōo yɔ̄ ī fíyáajɛ ipú uwɔ ā le pīya obū, ó lɛ ā obū ā géē bɔ̄bí nɛ̄ɛ̄nɛ̄hi.

²⁴“Ɔ̄cɛ dúúmā í lɔfú cɛ̄ ɔkpani ɛpa ɛhɔ̄ mla ɔtū ékpónú igbo ékpónú glá ŋ́. Ohígbū koó géē wɔ́tū éyi, ɔhá ā kē í he ɔ́ ɔtū. Ámāŋ ó géē lɛ ɔtū tū éyi cɛ́ɛ́ ó kē leyī gwō ɔhá bónū. Aá gáā cɛ̄ Ɔwɔicō ɛhɔ̄, ká aá klla yɔ̄ ī lɛ ije ō dɔ̄ɔkā bla anú igbo ékpónú ɔ́ɔmā glá ŋ́.

²⁵“Ohígbū ɔ́ɔmā n da aá ka, aá híīī junwalu lɛ īyī aá nɛ̄hi lɛyíkwu oyēeyī kú aá, ohígbū ɔdā nɛ̄ aá géē lé mɛ́mla ɔdā nɛ̄ aá géē gwá ā ŋ́. Aá híīī junwalu lɛ īyī aá, ohígbū īlī nɛ̄ aá géē le wiyē ŋ́. Ó wɛ oyēeyī fíyɛ́ ɔdōlé ā ŋ́ nɛɛ? Iyē í kē fíyɛ́ īlī ā ŋ́ nɛɛ?

²⁶Aá má aígbáanɔ nēe ī wu icō. É gē nyi ŋ́, é gē cē ŋ́, é kē ī kpó tū ɔbá ŋ́. Nááná Ádā aá, nōo yɔ̄ ɔkpáncō ā, gē je ɔdōlé lɛ uwá. Ó wɛ aá tīle fíyɛ́ uwá ŋ́ nɛɛ?

²⁷Ɔ̄nyɛ kú ipú aá, nɛ̄ ɔ́dāŋ koó le kwú ɔ̄ iyē géē lɛ ɛ̄cī éyi tū oyēeyī kú nū glá āa?

²⁸Ɔdíyá nɛ̄ aá kē ī lɛlá wu ɔdā nɛ̄ aá í lɛ wiyē āa? Aá má ɛ́gɛ́nɛ̄ ácí ō yá ododó ī jɛ lɛ́ āa. É gē yúklɔ́ ŋ́ ɛ́ɛ́ nēé gē tá odōwiyē abɔ̄yī uwā ŋ́.

²⁹Amáŋ n da aá ka Usólōmɔn, ɔcɛ́ nōo lɛ agbénú nɛ̄hi ā, í lɛ ɔdōwiyē nōo lɔhi bɛ̄ɛka aódodó nēe bá nyā ŋ́.

³⁰Ɔwɔicō wɛ ɔ̄cɛ nōo ī lɛ ɔdōwiyē wu ácí nēe bá ícɛ, nɛ̄ óócí nēé bá gɛ ŋ́, nēé le uwá kpó tɔ̄lá ipú útuló ā iyē á. Ó lɛ āa, Ɔwɔicō í gáā lɛ ɔdōwiyē wu aá iyē fíyɛ́ ŋ́ nɛɛ? Ɔtū nɛ̄ aá kpóce Ɔwɔicō ā nyɛ́ íbí!

³¹“Ohígbū ɔ́ɔmā, aá híīī lɔtū plico yɔ̄ ī ka kahíníī, ‘Iní nɛ̄ ɔdōlé kú um géē ŋmá ā? Ámāŋ iní nɛ̄ ɔdā nɛ̄ n géē gwá ā í ŋmá ā? Ámāŋ iní nɛ̄ ɔdā nɛ̄ alɔ géē le wiiyē ā í ŋmá ā’ ŋ́.

³²Aɔ́dā nēe gē kwú ācɛ nēe kpɔ́tūce Ɔwɔicō ŋ́ iyē ojigógó ā bá abɔ́ɔ á. Ádā kú aá nōo yɔ̄ ɔkpáncō ā tɛtɛ jé ka aɔ́dā nēe bá abɔ́ɔ ā ce aá ɛgbá.

³³Ikoko ɔ́ɔmā, ɔtū kú aá kóō kwu ō jɛga lɛ Ɔwɔicō kóō le ɔcɛ́ lé oyēeyī kú aá, cɛ́ɛ́ kú aá bá ī yá ɔdā nōó tíne kú aá yá ā fíyɛ́ ɔdā ɔhá dúúmā. Ɔ́dāŋ́ ka aá le yá lɛ ā, Ɔwɔicō géē kpó aɔ́dā nēe bá nyā lɛ aá.

³⁴“Ohígbū ɛ́gɔ́ɔmā, aá híīī junwalu lɛ īyī aá ɔtū lɛyíkwu ɛ́gɛ́nɛ̄ óócí géē lɛ ā ŋ́, ohígbū ka óócí lɛ unwalu alɛwa ákú abɔ̄yīnū. Unwalu kú ɛ̄cī dóódu jɛ̄ ɛ̄cī ɔ́ɔmā. Ó cɛgbá nɛ̄ ɔ̄cɛ í je unwalu kú ɛ̄cī ɔhá kwu ɔ̄ ŋ́.”