Read idoma UMÁTIYU 8 Bible Online

UMÁTIYU 8 - idoma bible

UMÁTIYU 8

¹Eko nōó gā ajɛ ŋmá ɛyí ɛfu ā, ācɛ alɛwa yɛce ɔ́.

²Anɔ́ɔ olagwú éyi gā gaá lɛ okwúukwu kwajɛ lɛ ɔ́ klla da ɔ́ kahíníī, “Óndú, ɔ́dāŋ ka a cɛ̄, a lɔfú yá um yēŋēē glá.”

³Ujísɔ̄si le abɔ̄ nāndaa kwu ɔ́ iyē anɔ́ɔ ó kahíníī, “N cɛ̄, le yá yēŋēē.” Ɔkwɔɔkwu ɔ́ɔmā ó le hɛ́tá ŋmá ōcē kú nū.

⁴Anɔ́ɔ Ujísɔ̄si da ɔ́ kahíníī, “Á híīī da ɔ̄cɛ dúúmā nóó, amáŋ nyɔ̄ kpaakpa gaá lɛ iyē uwɔ mafú lɛ ɔ̄cogwɛ́ɛya cɛ́ɛ́ kóō lɛ uwɔ jila. Cɛ́ɛ́ ká ā le mafú lɛ ɛjɛ̄ɛ̄jī ācɛ keé le uwɔ hɛ́tá ɛ́ɛ́ mā, lɛ ɛya nɛ̄ Umósīsi je ɔ́da kú nū ā gwó.”

⁵Eko nōó le tá Ukapánɔm ā, otrɛ̄yí kú aícɔ́ɔja ofɛhɔ̄ éyi wā abɔ̄ nū, anɔ́ɔ ó gbɔ̄ɔkɔ lɛ ɔ́ kahíníī,

⁶“Óndú, ɔ̄cocɛ̄hɔ̄ kú um gwutá ɔlɛ́ ohígbū ka iyē kú nū le ŋmó, ó klá yɔ̄ ī jé ɔnɔ iyē nɛ̄hi.”

⁷Ujísɔ̄si kahíníī, “N géē wā gaá hɛ́ ɔ́ tá.”

⁸Anɔ́ɔ otrɛ̄yí kú aícɔ́ɔja ofɛhɔ̄ ā tá ɔ́ ohi kahíníī, “Óndú, ń cíkā ká ā wā inu ɔlɛ́ um ŋ́, amáŋ lɛ ɛlā okónu ka ōfūnū, cɛ́ɛ́ ká ɔ̄cocɛ̄hɔ̄ kú um ā kóō le hɛ́tá.

⁹Ohígbū ka ami abɔ̄yī um ā yɔ ɛháajɛ ācɛ oliíkwu fíyɛ́ um. N kē lɛ aícɔ́ɔja bá ɛháajɛ um. N gē da ɔ̄cɛ éyi kóō gā, ó gē wā. N kē ī da ɔ̄cɛ ɔhá kóō nyɔ̄, ó kē ī nyɔ̄. N kē ī da ɔ̄cocɛ̄hɔ̄ kú um kóō yá odée, ó kē ī yá ɔ̄.”

¹⁰Eko nɛ̄ Ujísɔ̄si lɛ ɛ̄nyā pó ā, ó le hɛ́ ɔ̄ idáagó. Anɔ́ɔ ó da ācɛ nēe yɛce ɔ́ ā kahíníī, “Ɔkwɔ̄ɔ̄kwɛ̄yi, n̄ da aá ka ń kōō má ɔ̄cɛ dúú ipú ācɛ kú Ísrɛ̄lu nōo kpɔ́tūce Ɔwɔicō lɛ ā ɛ́ɛ́ ŋ́.

¹¹N da aá ka ācɛ alɛwa géē wā ŋmá odúúdú ɛcɛ gaá cīce kéē lé ucɛ mɛ́mla Ébrahām mɛ́mla Áyísīki mɛ́mla Ujékɔ̄pu eko nɛ̄ Ɔwɔicō gē gaá cɔcɛ́ gbɔɔ́ ō gbō ācɛ ɔlɛ̄ nū ā.

¹²Amáŋ é géē nū ācɛ nēe cíkā ō wɛ ācɛ ajɔ̄ɔ̄cɛ́ kú Ɔwɔicō ā bɛ̄cɛ ga ipú ajoodobū eyīyɛ̄ɛcɛ. Abɔ́ɔ ācɛ ā géē jikwū klla í hīla ayīnu ipú ɔnɔ nēé í jé ā.”

¹³Anɔ́ɔ Ujísɔ̄si da otrɛ̄yí kú aícɔ́ɔja ofɛhɔ̄ ā kahíníī, “Nyɔ̄, kóō le yá gā uwɔ ɛ́gɛ́nɛ̄ a kpɔ́tūce ā.” Anɔ́ɔ ōcē kú ɔ̄cocɛ̄hɔ̄ ā kú otrɛ̄yí aícɔ́ɔja mɛ ɛplá eko nɛ̄ Ujísɔ̄si kɛlā ɔ́ɔmā á.

¹⁴Ujísɔ̄si le tá ɔlɛ́ Upíta, anɔ́ɔ ó má ɛ́nɛ́ ɔnyā kú Upíta gwutá agōdō. Áganá yɔ̄ gē yá ɔ̄.

¹⁵Ujísɔ̄si lɛ abɔ̄ kwu ɔ́ abɔ̄, áganá ā habɔ̄ ɔ̄ tá. Anɔ́ɔ ó cāŋjɛ, gbɔɔ́ ō kpó ɔdōlé gé lɛ ɔ́ á.

¹⁶Ɛplá ɔ̄nɔ̄ɔ̄nɛ̄, é bī ācɛ alɛwa nɛ̄ aálelékwū obɔ̄bí lā ipú uwā ā wā ɛgiyí nū. Anɔ́ɔ ó lɛ aálelékwū ā nū ŋmá lɛ ɔfú kú ɛlā kú nū. Ó kē lɛ ācɛ dóódu nēe gē doōcē ā hɛ́tá.

¹⁷O ŋmá ɛ̄nyā ā nɛ̄ ɛlā nɛ̄ Ayisáya, ɔ̄comɛ́ɛbɛ ā, ka ā le yá jīla á. Ó kahíníī, “Ó lɛ alɔ hɛ́tá ŋmá ōcē kú alɔ. Ó lɛ ōcē kú alɔ kpó nyɔ̄.”

¹⁸Eko nɛ̄ Ujísɔ̄si le ma ka ɛwa kú ācɛ lɛ ɔ́ yɛjīla tá ā, ó da ayíkpó kú nū kéē nyɔ̄ ogbeé ɔhá kú ísu ā.

¹⁹Anɔ́ɔ ɔmálɛ éyi da ɔ́ kahíníī, “Itíca, n géē yɛce uwɔ ga ɛga dóódu nɛ̄ a gē nyɔ̄ ā.”

²⁰Ujísɔ̄si da ɔ́ kahíníī, “Ɛpā lɛ ɔ̄gɔ̄, ígbáanɔ kú ɔkpáncō kē lɛ ɔlɛ́. Amáŋ Ɔyínɔ̄nyīlɔ kú Ɔ̄cɛ í lɛ ɛga dúúmā nōó gē lɛ ɛyí wu ŋ́.”

²¹Ɔyíkpó kú nū ɔhá da ɔ́ kahíníī, “Óndú, jɛga gā um ká n̄ gaá lɛ ádā um nyi gbɔbū ɛ́ɛ́.”

²²Amáŋ Ujísɔ̄si da ɔ́ kahíníī, “Yɛce um, ká ā habɔ̄ aókwū tá kéē nyi aókwū ɔ́mpa uwā.”

²³Igbīhāajɛ Ujísɔ̄si le tá ipú ɔ́kɔ mɛ́mla ayíkpó kú nū gbɔɔ́ ō nyɔ̄.

²⁴Igbeékpónú owu nɛ̄hi gbɔɔ́ ō tá eyī ísu, anɔ́ɔ ɔ́kɔ ā gáā pīya tū ipú enyi á. Ujísɔ̄si abɔ̄yī nū yɔ̄ gē gbiyɔ̄lā.

²⁵Ayíkpó ā wā gaá lɛ ɔ́ héyī. Anɔ́ɔ é da ɔ́ kahíníī, “Óndú, nya alɔ tá, alɔ gáā yíífi ɛɛ́.”

²⁶Anɔ́ɔ ó da uwá kahíníī, “Ɔdí yá nɛ̄ aá gē yúúfi āa? Aá wɛ ācɛ nēe kpɔ́tūce Ɔwɔicō nwuné ŋ́.” Anɔ́ɔ ó cāŋjɛ, lɛ ɛgba dɛ̄ tū ɔwu mɛ́mla úgbagwú kú ísu āa. Anɔ́ɔ igbeékpónú ɛga dóódu gaá yɔ̄ hímm á.

²⁷Anɔ́ɔ ācɛ ā le hídáagó á. É klla kahíníī, “Ɛdɔ ɔ̄cɛ nyá yɔ̄ ā, nɛ̄ owu mɛ́mla úgbagwú kú ísu gē jāhɔ̄ lɛ ɔ́ āa?”

²⁸Eko nōó gā ogbeé ɔhá kú ísu ā, nōo wɛ ajɛ kú Ugadára ā, ācɛ nēe lɛ aálelékwū obɔ̄bí ɛpa jīla anú ɔwɛ. Uwá ŋmá ɛyí únóji. É tūufi nɛ̄hi, nɛ̄ ācɛ dúúmā í lɔtū yɛ ɔwɛ ɔ́ɔmā glá ŋ́.

²⁹É dɛ̄gba kahíníī, “Ɔyínɔ̄nyīlɔ kú Ɔwɔicō, ɔdíyá nɛ̄ a wā í junwalu lɛ alɔ ā? A wā gaá yá alɔ italā gbɔbū lɛ eko ā nɛɛ?”

³⁰Ɔ́wá kú aókóome éyi bá gē lúlé kwu ɛga nēé bá ā ajaajɛ.

³¹Alelékwū obɔ̄bí ā gbɔ̄ɔkɔ lɛ ɔ́ kahíníī, “Ɔ́dāŋ́ ka a lɛ alɔ nū ŋmá ipú uwā, ayíka lɛ alɔ nū ga ipú ɔ́wá kú aókóome ā.”

³²Anɔ́ɔ ó da uwá kahíníī, “Aá nyɔ̄ mɛ́ɛnɛ!” Anɔ́ɔ é nyɛ̄ɛ̄ le tá ipú ɔ́wá kú aókóome ā á. Odúúdú aókóome ā le kwu ga ukɔngɔ̄ kú ísu ā le pɛ́ tá ipú ísu, anɔ́ɔ é gebí ipú éŋkpɔ̄ ā á.

³³Ācɛ nēe bá gē gbō aókóome ā le kwu nyɔ̄ ga ipú igelī gaá lɛ ɔ̄kā kú ɔdā dóódu nōo yá ā mɛ́mla ɛ́gɛ́nɛ̄ é hɛ́ ācɛ nēe lɛ aálelékwū obɔ̄bí ā tá ā kā.

³⁴Anɔ́ɔ odúúdú ācɛ kú igelī ā le pɛ́ wā ɛgiyí Ujísɔ̄si. Eko nēé lɛ ɔ́ má ā, é gbɔ̄ɔkɔ lɛ ɔ̄ kóō nyɛ̄ɛ̄ ŋmá ajɛ ɔlɛ́ uwā.