Read idoma UMÁTIYU 9 Bible Online

UMÁTIYU 9 - idoma bible

UMÁTIYU 9

¹Ujísɔ̄si le yɛ tá ipú ɔ́kɔ ga ogbeé ɔhá. Anɔ́ɔ ó gā ajɛ igelī nōo lā á.

²Ācɛ éyi le ɔ̄coŋmíyē éyi tá agōdō gé lɛ ɔ́. Eko nɛ̄ Ujísɔ̄si le ɛ́gɛ́nɛ̄ é kpɔ́tūce lɛ ā má ā, ó da ɔ̄coŋmíyē ā kahíníī, “Lɛ ɔtūlé, é kwú íne nɛ̄ a bīya ā í yá uwɔ ɛhi ɛɛ́.”

³Anɔ́ɔ aítíca kú íne ōhī da ɔ́mpa ūwā kahíníī, “Ɔ̄cɛ ā le ɛbí ka ɛɛ́.”

⁴Abɔ̄ nɛ̄ Ujísɔ̄si le ɛlá nēé gbo ā jé ā, ó kahíníī, “Ɔdíyá nɛ̄ aá ī gbɛlá obɔ̄bí ipɔ́tū kú aá āa?

⁵Ɛ̄nyá tɔ́ɔtɛ ō ka āa, ‘É kwú íne nɛ̄ a bīya í yá uwɔ ɛhi ɛɛ́’, kɛ́ɛ koō ka ka, ‘Cāŋjɛ ká ā yāwu.’

⁶N géē mafú lɛ aá ka Ɔyínɔ̄nyīlɔ kú Ɔ̄cɛ lɛ íkwu ipú ɛcɛ nyā ō je íne nɛ̄ ācɛ bīya ā uwā yá ūwā ɛhi.” Anɔ́ɔ ó da ɔ̄coŋmíyē ā kahíníī, “Cāŋjɛ, ka ā kwú agōdō kú uwɔ ú ká ā ga ɔlɛ́ uwɔ!”

⁷Anɔ́ɔ ɔ̄cɛ ā cāŋjɛ le tá ɔlɛ́ nū á.

⁸Eko nɛ̄ ɛwa ā le ɔ́ má ā ufi yá uwā nɛ̄hi, anɔ́ɔ é cɛ̄tra Ɔwɔicō nōo je íkwu ɛ́gɛ́nyā lɛ ācɛ ā.

⁹Abɔ̄ Ujísɔ̄si ŋmá abɔ́ɔ ā, ó má ɔ̄cɛ éyi yɔ̄ ɛga odɔ̄lɛ́ nɛ̄ iyē nū lé ka Umátīyu. Ó da ɔ́ kahíníī, “Yɛce um.” Anɔ́ɔ ó cāŋ́jɛ le yɛce ɔ́ á.

¹⁰Anɔ́ɔ abɔ̄ ó yɔ̄ gē lé ɔdōlé ipú inu ɔlɛ́ Umátīyu ā, ācodɔlɛ́ mɛ́mla ācobīyíne alɛwa yāajɛ mɛ́mla Ujísɔ̄si mɛ́mla ayíkpó kú nū.

¹¹Ācɛ ɔ́wá kú Ufárisīs ōhī le ɔdā nōo yá ā má, anɔ́ɔ é da ayíkpó kú nū ɔ̄kā kahíníī, “Ɔdíyá nɛ̄ itíca kú aá gē lé ɔdōlé mɛ́mla ācɛ odɔlɛ́ mɛ́mla ācobīyíne āa?”

¹²Eko nɛ̄ Ujísɔ̄si le ɛlā nēé ka ā pó ā, ó tá uwā ohi kahíníī, “Ācɛ nēe lɔfú iyē ā í cɛgbá obócí ŋ́, amáŋ ācɛ o doōcē ā cɛgbá obócí á.

¹³Aá nyɔ̄ ká aá gaá dɔɔ̄kā ɛyí kú ɛlā nɛ̄ ɔkpá kú ɛlɔ̄ɔwɔicō ka ka, ‘Eyīnyinyi nɛ̄ n tíne á, ó wɛ ɛbɛ́ ō le gwɛ́ɛya ŋ́.’ Ń wā gaá hī ācɛ olɔhi igwú ŋ́, amáŋ ācobīyíne kéē pīyabɔ̄.”

¹⁴Anɔ́ɔ ayíkpó kú Ujɔ́ni wā ɛgiyí Ujísɔ̄si gaá dɔɔ̄kā kahíníī, “Ɔdíya nɛ̄ alɔ mɛ́mla ācɛ Ufárisīi gē gwōkónu ojigógó, amáŋ ayíkpó kú uwɔ̄ í gē gwōkónu ŋ́ mā āa?”

¹⁵Anɔ́ɔ Ujísɔ̄si da uwá kahíníī, “Aóklóbīya kú ɔ̄colɔnyā ɛ̄yīpɛ̄ lɔfú yɔ́tūnōbí eko nɛ̄ ɔ̄colɔnyā ā yɔ̄ mɛ́mla uwá glá āa? Amáŋ eko gē wā, nēé géē je ɔ̄colɔnyā ā ŋmá abɔ̄ uwā. Eko ɔ́ɔmā é géē gwōkónu.

¹⁶Ɔ̄cɛ dúúmā í gē gɔ́ īlī ɛ̄yīpɛ̄ ce ɛyí ɛnɛ̄ncɛ̄ ŋ́. Ohígbū ka ɛ̄yīpɛ̄ ā géē híla ŋmá ɛnɛ̄ncɛ̄ ā cɛ́ɛ́ ó klla le híla fíyɛ́.

¹⁷Ɔ̄cɛ dúúmā í gáā lɛ ejé ɛ̄yīpɛ̄ tū ipú ɔjá ɔkpɛ́bɛ́ nɛ̄ncɛ̄ ŋ́. Ɔ́dāŋ koó le yá lɛ ā, ɔjá ɔkpɛ́bɛ́ ā géē yíla cɛ́ɛ́ ejé ā kwú pɛ́ bónū, cɛ́ɛ́ ɔjá ɔkpɛ́bɛ́ ā kē í bīya. Amáŋ é gē lɛ ejé ɛ̄yīpɛ̄ tū ipú ɔjá ɔkpɛ́bɛ́ ɛ̄yīpɛ̄, cɛ́ɛ́ uwá ɛplɛ́ɛpa í gáā bīya ŋ́.”

¹⁸Eko nōó yɔ̄ gē kɛlā lɛ uwá āa, otrɛ̄yí kú ajɛ abɔ́ɔ éyi gaá gbɔ̄ɔkɔ lɛ ɔ́ kahíníī, “Ɔyínɔ̄nyā kú um gekwú ɛɛ́. Wā ká ā gaá lɛ abɔ̄ kú uwɔ ce ɔ́, ó kē ī je hēyī.”

¹⁹Ujísɔ̄si mɛ́mla ayíkpó kú nū cāŋ́jɛ̄, anɔ́ɔ é yɛce ɔnyīlɔ aā.

²⁰Ɔnyā éyi nōo yɔ̄ gē hóóyī iháyí igwɛ́ɛpa, yɛ igbīhi nū gaá lɛ abɔ̄ kwu ogwu kú úwé kú nū.

²¹Ó le ka ipú odo kú nū kahíníī, “Ɔ́dāŋ́ ka n lɛ abɔ̄ kwu úwé kú nū ōfūnū, n géē je hɛ́tá ŋmá ōcē kú um.”

²²Ujísɔ̄si leyipīya lɛ ɔ̄ má, anɔ́ɔ ó kahíníī, “Adá um, lɔtūlé, ɔtōkpóce kú uwɔ lɛ uwɔ hɛ́tá ɛɛ́.” Anɔ́ɔ ɔnyā ā le hɛ́tá ŋmá ōcē kú nū ɔkwɔɔkwu ɔ́ɔmā á.

²³Eko nɛ̄ Ujísɔ̄si gā ɔlɛ́ otrɛ̄yí ɔ́ɔmā ā, ó má ācɛ otá ɔkpancílé mɛ́mla ācɛ nēe bá gē yúuya nɛ̄hi.

²⁴Ó da uwá kahíníī, “Aá gɛcɛ, ohígbū ka ɔyínɔ̄nyā ā í kwú ŋ́, amáŋ ó yɔ̄ gē gbiyɔ̄lā.” Amáŋ é le ɛhɛ yɛ tū ɔ̄.

²⁵Anɔ́ɔ eko nōó lɛ uwá kpó nū gɛcɛ ā, ó le tá ipú inu anɔ́ɔ ó lɛ abɔ̄ je ɔyínɔ̄nyā gicō, anɔ́ɔ ɔyínɔ̄nyā ā cāŋ́jɛ á.

²⁶Ɔ̄kā kú úklɔ́ ō hídáagó nyā le yɛ ɛga dóódu kú ajɛ abɔ́ɔ jīla.

²⁷Abɔ̄ Ujísɔ̄si ŋmá abɔ́ɔ āa, ācɛ opeyī ɛpa yɛce ɔ́, gē dɛ̄gba hī ɔ̄ kahíníī, “Ményinyi alɔ, ɔyínɔ̄nyīlɔ kú Udéfīdi.”

²⁸Eko nōó le bēhé tá inu ā, ācɛ opeyī ɛpa ā gā ɛgiyí nū. Anɔ́ɔ Ujísɔ̄si da uwá ɔ̄kā kahíníī, “Aá cɛ̄ ka n lɔfú yá ɔdā nɛ̄ aá ba ā glá āa?” Anɔ́ɔ é da ɔ́ kahíníī, “Īī, Óndú.”

²⁹Anɔ́ɔ Ujísɔ̄si lɛ abɔ̄ kwu īkpeyī kú uwā, anɔ́ɔ ó kahíníī, “Ó le yá lɛ aá ɛ́gɛ́nɛ̄ aá kpɔ́tūce Ɔwɔicō lɛ āa.”

³⁰Anɔ́ɔ ó lɛ uwā eyī nwūla kéē mɛ́ɛbɛ́ á. Ujísɔ̄si pi uwá ahɔ̄ lɔfúlɔfú kahíníī, “Aá híīī yá ká ɔ̄cɛ dúúmā kóō jé ŋ́.”

³¹Amáŋ é nyɛ̄ɛ̄ gaá lɛ ofu kú nū ca klɛ́ɛcɛ ɛga dóódu kú ajɛ abɔ́ɔ.

³²Abɔ̄ é bá gē nyɔ̄ ā, é le ɔ̄cɛ o lɛ alelékwū obɔ̄bí nōó gē kɛlā gla ŋ́ bī gé lɛ Ujísɔ̄si.

³³Eko nōó lɛ alelékwū obɔ̄bí ā nū tɛ́ɛcɛ ā, ɔ̄cɛ nōo dokónu ā gbɔɔ́ ō kɛlā. Anɔ́ɔ ɛwa ā le kpó hídáagó, klla kahíníī, “Ɛ́gɛ́nyā í yá ajɛ Ísrɛ̄lu jéjéē ɛ́ɛ́ ŋ́.”

³⁴Anɔ́ɔ ācɛ Ufárisīi kahíníī, “O ŋmá ɔfú kú otrɛ̄yí kú alelékwū obɔ̄bí nōó gē nū alelékwū obɔ̄bí tɛ́ɛcɛ á.”

³⁵Ujísɔ̄si yɔ̄ gē yɛ aígelī nɛ̄hi mɛ́mla aípɔ́lɛ́ dóódu, yɔ̄ gē nwɛ̄lā ipú aɛ́gogbɔ̄ɔkɔ kú uwā. Ó kla gē tɔ́ɔna kú ɔ̄kōolɔhi kú ajɔ̄ɔ̄cɛ́ ā. Ó kē yɔ̄ gē hɛ́ ācɛ nēe gē du ɛdɔ ōcē dóódu mla ɔ́fú dóódu tá.

³⁶Eko nōó má ɛwa āa, é le tū ɔ̄ eyīnyinyi ohígbū keé bá ī móōwē, í klla má otábɔ̄ dúúmā ŋ́. É lɛbɛ̄ɛka aálá nēé lɛ ɔ̄cɛ ogbō uwā ŋ́ mā ā.

³⁷Anɔ́ɔ ó da ayíkpó kú nū kahíníī, “Ɔdɛ̄hɔ̄ ā nwuné nɛ̄hi, amáŋ ācoyúklɔ́ ā í lɛ ɛwa ŋ́.

³⁸Ohígbū ɔ́ɔmā ā aá gbɔ̄ɔkɔ lɛ Óndú kú ɔdɛ̄hɔ̄ ā, cɛ́ɛ́ kóō lɛ ācoyúklɔ́ alɛwa tū ga ipú ɛhɔ̄ ā kéē cē ɔdɛ̄hɔ̄ kú nū.”