Read idoma UMÁKI 1 Bible Online

UMÁKI 1 - idoma bible

UMÁKI 1

¹Ɛ̄nyā wɛ ɔkōōlɔhi lɛyíkwu Ujísɔ̄si Ohɔ́nyɛtá, Ɔyinɔ̄nyīlɔ kú Ɔwɔicō.

²Ó hútu ɛ́gɛ́nɛ̄ ɔ̄comɛ́ɛbɛ Ayisáya tá tāajɛ ā Ɔwɔicō ka, “N géē tū ɔ̄cocɛ̄hɔ̄ kú um gbɔbū gā uwɔ̄ kóō lɛ ɔwɛ kú uwɔ tútū gā uwɔ.

³Ɔkɔ kú nū yɔ̄ ī dɛ̄gba ipú ígbíli á. ‘Aá lɛ ɔwɛ ā gllágwó lɛ Óndú ā. aá lɛ ɔgwu kú nū nā kpaakpa kóō yɛ.’”

⁴Anɔ́ɔ Ujɔ́ni le hɛ́bɛ̄cɛ ipú ígbíli yɔ̄ ī yá ācɛ ubatísim, ó klla yɔ̄ í tɔ́ɔna kú ɛlā Ɔwɔicō yɔ̄ gē ka tɛ́ɛcɛ ka ācɛ kéē lɛ ubatísim yá kóō mafú keé le pīyabɔ̄ ŋmá íne nēé bīya ā ɛɛ́.

⁵Ācɛ alɛwa ŋmá aɔ́lɛ́ okwúbɔ́há kú Ujudíya mla igelī nɛ̄hi kú Ujerúsālɛm pɛ́ nyɔ̄ ga ɛgiyí Ujɔ́ni kéē pó ɛlā kú nū. É lɛ íne nēé bīya ā ka tɛ́ɛcɛ, anɔ́ɔ ó lɛ ubatísim yá uwá ísu kú Ujɔ́dan á.

⁶Úwé kú ɔnwū inyankwūlūmī nɛ̄ Ujɔ́ni gē le wiyē á, ó gē lɛ ɔkpɛ́bɛ́ gbō ɛ́nyɔ́, ɔdōlé kú nū wɛ efūma mla ɛnwú kú ipácí.

⁷Ó tɔ́ɔna lɛ ācɛ ā kahíníī, “Ɔ̄cɛ nōo géē wā igbīhi um ā lɔfú fíyɛ́ um kɔ́ɔ́. Ɔ̄cɛ nɛ̄ n lɔhi jɛ̄ nɛ̄ n kōō ī tukpɛɛ́ í wī ɔ́ngbá kú áblákpá kú nū ŋ́.

⁸N gē bī éŋkpɔ̄ yá aá ubatísim, amáŋ anú ā géē bī alelékwū Ihɔ le yá aá ubatísim.”

⁹Eko kpíí le gla, Ujísɔ̄si gā ŋmá Unásārēti nōo yɔ̄ ipú ɔlɛ́ okwubɔ́ha kú Ugálīli ā, anɔ́ɔ Ujɔ́ni lɛ ɛka kú Ɔwɔicō kpó tū ɔ̄ ɛyí ipú ísu kú Ujɔ́dan á.

¹⁰Eko nɛ̄ Ujísɔ̄si le bɛ̄cɛ ŋmá ipú enyi ā, ó má ɔkpáncō le nwūla, anɔ́ɔ alelékwū Ihɔ nōo lɛbɛ̄ɛka okóohō ā yɔ̄ ī wāajɛ gaá ce ɔ́.

¹¹Anɔ́ɔ é pó ɔkɔ ŋmá ɔkpáncō yɔ̄ ī kahíníī, “Awɔ wɛ ɔyínɔ̄nyilɔ kú um nōo he um ɔtū nɛ̄hi á, ɛlā kú uwɔ he um ɔtu.”

¹²Ɔkwɔɔkwu ɔ́ɔmā Alelékwū Ihɔ ā lɛ ɔ́ bītá ga ipú ígbíli.

¹³Ó yɔ̄ ipú ígbíli ɛ̄cī ofɛpa, ebilíi yɔ̄ gē yá ɔ̄ ojámá. Aɛ́bɛ́ ipácí bá abɔ́ɔ dúú, amáŋ alelékwū-ōtɛ̄hɔ̄ wā gáā cɛ̄ ɔ̄ ɛhɔ̄.

¹⁴Igbīhi kú eko nēé lɛ Ujɔ́ni kwú tá ipú agbá ā, Ujísɔ̄si le tá Ugálīli yɔ̄ ī tɔ́ɔna kú ɔkōōlɔhi nōo ŋmá ɛgiyí Ɔwɔicō.

¹⁵Ó kahíníī, “Eko okpaakpa ā le yá ɛɛ́, eko nɛ̄ Ɔwɔicō géē cɔɔcɛ́ ipú ɛcɛ nyā dúúdú ā le yá ɛɛ́! Aá le pīyabɔ̄ ŋmá íne kú Ɔwɔicō nɛ̄ aá yɔ̄ ī bīya ā cɛ́ɛ́ kú aá cɛ̄ ɔkōōlɔhi ā!”

¹⁶Ɛcí éyi Ujísɔ̄si yɔ̄ í yɛ okónu ókpoó kú Ugálili ā, ó má ācokwɛ́bényi ɛpa, Usáyímɔ̄n mla Ándru ɔyínɛ́ nū bī ɛ́yá yɔ̄ ī le kwú ɛbéenyi.

¹⁷Anɔ́ɔ Ujísɔ̄si da uwá kahíníī, “Aá wā í yɛce um, n géē nwū aá kú aá le pīya ācɛ o kwú ācɛ bɛ̄ɛka ɛbéenyi ā.”

¹⁸Anɔ́ɔ ɔkwɔɔkwu ɔ́ɔmā é habɔ̄ ɛ́yá kú uwā tá ipú ɔ́kɔ, anɔ́ɔ é má tá ɔ̄ ɔkwu le yɛ á.

¹⁹Ó yɛ gɔbū ligíí ā, ó lɛ ayínɛ́ ɛpa ɔhá má, Ujɛ́mīsi mla Ujɔ́ni, ayínɔ̄nyīlɔ kú Usébēdi. É bá ipú ɔ́kɔ kú uwā gē glá ɛ́yá kú uwā yá.

²⁰Obōōbū nɛ̄ Ujísɔ̄si lɛ uwá má ā, ó lɛ uwá hīgwú, é habɔ̄ ádā uwá mɛ́mla aólufa tá ipú ɔ́kɔ, anɔ́ɔ é nyɛ̄ɛ̄ tá ɔ̄ ɔkwu á.

²¹Ujísɔ̄si mla ayíkpó kú nū gā igelī kú Ukapánɔm, anɔ́ɔ ɛ̄cī aláadi ó le bēhé ga ipú ɛgogbɔ̄ɔkɔ ā, gbɔɔ́ ō nwū ɛlā Ɔwɔicō.

²²Ācɛ nēe pó ɛlā nɛ̄ ó nwū ā le kpó hídáagó nɛ̄ɛ̄nɛ̄hi, ohígbū koó nwū ɛlā Ɔwɔicō bɛ̄ɛka ɔ̄cɛ nōo lɛ íkwu nɛ̄ɛ̄nɛ̄hi ā, ó lɛbɛ̄ɛka ācɛ onwū íne ā ŋ.

²³Ɔkwɔɔkwu nōó yɔ̄ abɔ́ɔ ā, ɔ̄cɛnyīlɔ o lɛ alelékwū obɔ̄bí éyi le bēhé wā ipú ɛgogbɔ̄ɔkɔ ā, anɔ́ɔ ó dɛ̄gba ka,

²⁴“Ɔdí nāa dɔɔ̄kā ŋmá ɛgiyí alɔ, Ujísɔ̄si kú Unásārēti? Á wā amānyā ká ā kpó alɔ yíífi nɛɛ? N jé ɔ̄cɛ nāa wɛ ā, a wɛ ɔ̄cotɛ̄hɔ otīihɔ kú Ɔwɔicō!”

²⁵Ujísɔ̄si lɛ ɛgba dɛ̄ tū alelékwū obɔ̄bí ā kahíníī, “Yɔ̄ cíí, cɛ́ɛ́ ká ā i bɛ̄cɛ ŋmá ipú iyē kú ɔ̄cɛ ā!”

²⁶Alelékwū obɔ̄bí ā lɛ ɔ̄cɛ ā jajikpáakpáa, lɛ ɛgba dɛ̄ nɛ̄hi anɔ́ɔ ó le bɛ̄cɛ ŋmá ɔ́ iyē á.

²⁷Ācɛ nēe bá abɔ́ɔ ā le kpó hídáagó anɔ́ɔ é yɔ̄ í ka lɛ ɔ́mpa uwā kahíníī, “Ɔdí i yɔ̄ āa? Ɛdɔ kú ɛlā ōnwu ɛ̄yīpɛ̄ yɔ̄ dúú! Ó bī íkwu le ɔ́da je lɛ alelékwū obɔ̄bí, anɔ́ɔ é kē lɛyítáajɛ lɛ ɔ́!”

²⁸Anɔ́ɔ ofu kú ɔdā nɛ̄ Ujísɔ̄si yá ā le yɛ fíya fíya í tá ɛga dóódu mɛ́mla ɛjɛ̄ɛ̄jī ɔlɛ́ nēe bá ajɛ kú Ugálīli ā á.

²⁹Ɔkwɔɔkwu nɛ̄ Ujísɔ̄si le bɛ̄cɛ ŋmá ɛgogbɔ̄ɔkɔ ā, anú mla Ujémīsi mɛ́mla Ujɔ́ni le pɛ́ ga ɔlɛ́ kú Usáyímɔ̄ni mla Ándru.

³⁰Ɛ́nɛ́ ɔnyā kú Usáyímɔ̄ni gwutá agōdō yɔ̄ ī doōcē kú áganá, ɔ̄cɛ éyi le da Ujísɔ̄si lɛyíkwu ɔ́ obōōbū nɛ̄ ó wā ā.

³¹Ó le tá ɛgiyí ɔnyā ā, lɛ abɔ̄ bī ɔ̄ abɔ̄, anɔ́ɔ ó kwú ɔ̄ ú nyāŋjɛ á. Áganá kú nū ā mɛ, anɔ́ɔ ó gbɔɔ́ ō je ɔdōlé lɛ uwá á.

³²Ɛpléeko nɛ̄ ɛnɔ gaajɛ nyɔ̄ nɛ̄ usábāti mɛ ā, ācɛ lɛ ācɛ o doōcē mɛ́mla ācɛ nēe lɛ alelékwū obɔ̄bi ā kpó gé lɛ Ujísɔ̄si.

³³Odúúdú ācɛ kú igelī nɛ̄ŋcɛ́ ā le jīla bá okómpīinu kú ɔlɛ́ ā.

³⁴Ujísɔ̄si hɛ́ ācɛ alɛwa odoōcē tá ŋmá ɛdɔ kú ōcē dóódu, ó je ɔ́da lɛ aálelékwū obɔ̄bí kéē le bɛ̄cɛ ŋmá ipú iyē kú ācɛ. Ó gē cɛ̄ lɛ aálelékwū ā ka ɔdā dóódu ŋ́ ohígbū ka é jé ɛdɔ ɔ̄cɛ nɛ̄ ó wɛ ā.

³⁵Ofúlɔ̄cī blibli kú oŋmɔ́cī nū, gbɔbū kú eyī kóō nyā, Ujísɔ̄si cāŋjɛ le bɛ̄cɛ ŋmá ɔlɛ́ ā. Ó nyɛ ŋmá ipú igelī nɛ̄ŋcɛ́ ā le tá ɛga nɛ̄ ó yɔ̄ ōfūnū, ɛga nɛ̄ ó gbɔ̄ɔkɔ ā.

³⁶Amáŋ Usáyímɔ̄ni mɛ́mla aɔ́mpānū le pɛ́ bɛ̄cɛ yɔ̄ gē dɔɔ̄kā nū.

³⁷Anɔ́ɔ eko nēé lɛ ɔ́ má ā, é kahíníī, “Ɛjɛ̄ɛ̄jī ācɛ bá gē dɔɔ̄kā awɔ.”

³⁸Amáŋ Ujísɔ̄si tá uwā ohi kahíníī, “Alɔ í ga aípɔ́lɛ́ ɔhá nēe bá amānyā biílí ā. N cíkā ō tɔ́ɔna lɛ uwá dúú, ohígbū ɔ́ɔmā nɛ̄ n wā á.”

³⁹Anɔ́ɔ ó le yɛ tá ɛjɛ̄ɛ̄jī aɔ́lɛ́ kú Ugálīli dúúdú yɔ̄ gē tɔ́ɔna kú ɛlā Ɔwɔicō ipú aɛ́gogbɔ̄ɔkɔ, yɔ̄ gē nū aálelékwū obɔ̄bí ŋmá iye kú ācɛ.

⁴⁰Ɔnyīlɔ éyi o lɛ agwú ga ɛgiyí Ujísɔ̄si lɛ okwúukwu kwajɛ iyɔ̄bū nū, anɔ́ɔ ó gbɔ̄ɔkɔ kóō tá ɔ̄ abɔ̄. Anɔ́ɔ ó kahíníī, “Ɔ́dāŋ́ ka a cɛ̄, a lɔfú yá um yēŋēē glá”

⁴¹Ɛyīnyinyi kú ɔnyīlɔ ā le mu Ujísɔ̄si ɔtū, anɔ́ɔ ó nā abɔ̄ daa lɛ abɔ̄ kwu ɔ́, anɔ́ɔ ó kahíníī, “N tíne, le yá yēŋēē!”

⁴²Anɔ́ɔ ikpíikpó ɔ́ɔmā agwú ā nyɛ̄ɛ̄ ŋmá ɔ̄ iyē anɔ́ɔ ó kwú yá yēŋēē kpɔ́ á.

⁴³Anɔ́ɔ Ujísɔ̄si lɛ ɔ́ ahɔ̄ pi lɔfú lɔfú klla da ɔ́ ka,

⁴⁴“Jāhɔ̄, a híī ka ɔdā dúúmā lɛ ɔ̄cɛ dúú lɛyíkwu ɛ̄nyā ŋ́. Amáŋ nyɔ̄ ga ɛgiyí ɔ̄cogwɛ́ɛya kóō lɛ uwɔ jila, cɛ́ɛ́ a nyɔ̄ gáā lɛ ɛya nɛ̄ Umósīsi ka ā gwó, o yá ɛ́ɛ́ kú ācɛ kéē le jé ka a le yá yēŋēē ɛɛ́.” Anɔ́ɔ Ujísɔ̄si lɛ ɔ́ nū nyɔ̄ á.

⁴⁵Amáŋ ɔ̄cɛnyīlɔ ā nyɛ̄ɛ̄ gáā gbɔɔ́ ō ka lɛ ācɛ ɛga dóódu ka Ujísɔ̄si ɔ́ɔ hɛ́ anúɔ tá á. Ɔ̄cɛnyīlɔ nyā kɛlā ā jāā gbéeko nɛ̄ Ujísɔ̄si í bēé ga ipú igelī nɛ̄ŋcɛ́ dúúmā pāālā glá gɛ ŋ́. Ikɔkɔ ɔ́ɔmā ó gē klá ɛga éyi ōfōōfūnū céé, anɔ́ɔ ācɛ gē wā ɛgiyí nu ŋmá ɛga dóódu á.