Read idoma UMÁKI 10 Bible Online

UMÁKI 10 - idoma bible

UMÁKI 10

¹Anɔ́ɔ Ujísɔ̄si nyɛ̄ɛ̄ ŋmá abɔ́ɔ le yɛ tá ajɛ kú Ujudíya, le hɛ́ ísu kú Ujɔ́dan igbó. Ɛwa kú ācɛ wā í klá anú kpɔ́ɔkpɔ, anɔ́ɔ ó nwū uwā ɛlā, ɛ́gɛ́nɛ̄ ó ī yá ojigógó ā.

²Ācɛ Ufárisīi ōhī wā ɛgiyí nū, bī ɛdɔ ɔ̄kā nyā wā í le jé ɔ̄ má. É da ɔ́ ɔ̄kā kahíníī, “Da alɔ, íne kú alɔ jɛɛga lɛ ɔ̄cɛ kóō tá ɔnyā nū ū?”

³Ujísɔ̄si bī ɔ̄kā nēé da ɔ́ ā le tá uwā ohi kahíníī, “Íne nyá nɛ̄ Umósisi je lɛ aá lɛyíkwu ɔ́ ā?”

⁴É tá ɔ̄ ohi ka, Umósīsi ɔ́ɔ jɛɛga lɛ ɔ̄cɛnyīlɔ kóō tɔ́kpá ɔnyā ō tá, ɛ́ɛ́ kóō tá ɔnyá nū.”

⁵Ujísɔ̄si da uwá ka, Umósisi ɔ́ɔ je íne ɔ́ɔmā lɛ uwá ohígbū ɔtū ō lɔfú kú uwā.

⁶Amáŋ ohútu ā, eko nɛ̄ Ɔwɔicō ɔ́ɔ yá ɛcɛ ā, ɔ́ɔ yá uwā ɔ̄cɛnyīlɔ mla ɔ̄cɛnyā, ɛ́gɛ́nɛ̄ ɛlɔ̄ɔwɔicō ka lɛ ā.

⁷Ujísɔ̄si yɔ̄ ī kɛlā gɔbū kpɔ́ ka, anɔ́ɔ ohígbū ɛ́gɔ́ɔmā, ɔ̄cɛnyīlɔ ɔ́ɔ géē habɔ̄ ádā nu mɛ́mla ɛ́nɛ́ nū tá, cɛ́ɛ́ ɔ́ɔ kwú pīyatɔ̄há mla ɔnyā nū,

⁸anɔ́ɔ ācɛ ɛpā kwú pīya ɔ̄cɛ ékpó. Cɛ́ɛ́ é wɛ ɛpā gɛ ŋ́, amáŋ ékpó.

⁹Ó ka ɔbá mɛ́mla ɔnyā nɛ̄ Ɔwɔicō le kpó bɔ́há ɛɛ́, ɔ̄cɛ dúúmā kóō híī fō uwā ŋmá iyī uwā ŋ́.

¹⁰Eko nēé le pɛ́ tá ɔlɛ́ ā, ayíkpó ā da Ujísɔ̄si ɔ̄kā lɛyíkwu ɛlā nyā.

¹¹Anɔ́ɔ ó da uwá kahíníī, “Ɔ̄cɛnyīlɔ nōo tá ɔnyā nū nyɔ̄ gaá lɛ ɔnyā ɔhá lɛ, ayíka ikpɔ́nyā ɔhá nɛ̄ ó gē ce á.

¹²Ɔwɛ ékpó ɔ́ɔmā, ɔ̄cɛnyā nōo tá ɔbá nū nyɔ̄ gaá lɛ ɔbá ɔhá lɛ, ajā nɛ̄ ó gē gbo á.”

¹³Ɛ̄cī éyi ācɛ le ayípɛ̄nɛ̄ŋcɛ́ kpó gé lɛ Ujísɔ̄si kóō lɛ abɔ̄ kwu uwá cɛ́ɛ́ ó lɛ ɔhā hɛ́ ce uwá, amáŋ ayíkpó kú nū da ācɛ ā kéē wā í junwalu lɛ ɔ́ ŋ́.

¹⁴Eko nɛ̄ Ujísɔ̄si lɛ ɔdā nōo yɔ̄ gē yá ā má ā, ó le cɔ̄nū mla ayíkpó kú nū anɔ́ɔ ó ka, aá jɛɛga lɛ ayípɛ̄nɛ̄ŋcɛ́ kéē wā ɛgiyí um, aá híī ci uwá anú ŋ́, ohígbū ka ajɔ̄ɔ̄cɛ́ kú Ɔwɔicō wɛ ákú aɛ́dɔ ācɛ nēe bá mbáa.

¹⁵N dɔɔ̄kā kú aá le jé kpɔ́cíí ka, ɔ̄cɛ dúúmā nɛ̄ ó mīyɛ ajɔ̄ɔ̄cɛ́ kú Ɔwɔicō ɛ́gɛ́nɛ̄ ayípɛ̄nɛ̄ŋcɛ́ mīya ɔ́ ā ŋ́, í gáā bēhé ga ipú nū gbóógbóō glá ŋ́.”

¹⁶Anɔ́ɔ ó kwú ayípɛ̄ ā ú ce abɔ̄, o lɛ abɔ̄ kpóce uwá ɛyí lɛ ɔhā hɛ́ ce uwá.

¹⁷Abɔ̄ Ujísɔ̄si mla ayíkpó kú nū yɔ̄ ī yɛ gɔbū kpɔ́ ā, ɔ̄cɛnyīlɔ éyi lɛ inya kwu wā í kwú okwúukwu í kwajɛ iyɔ̄bū nū, anɔ́ɔ ó da ɔ́ ɔ̄kā kahíníī, “Ɛ́nɛ́ɛ́nɛ̄ itíca, ɔdí piíí nɛ̄ n géē yá ká n̄ lɛ oyēeyī opiyóó ā?”

¹⁸Ujísɔ̄si da ɔ́ ɔ̄kā ka, ɔdíyá nɔ́ɔ hi anúɔ ka ɔ̄cɛ olɔhi ā? Ó ka ɔ̄cɛ dúúmā í lɔhi ŋ́, anúɔ í táafú ŋ́, ayíka Ɔwɔicō ōfōōfūnū.

¹⁹Ó klla le ɔ̄kā da ɔ̄cɛnyīlɔ ā kpɔ́ kahíníī, “A jé ɔdā nɛ̄ íne kú Umósīsi ka ā, ā híī ŋmó ɔ̄cɛ ŋ́, ā híī cikpó ɔnyā ɔhá ŋ́, ā híī wūwī ŋ́, ā híī ce ijáalí ɛ̄kɛ̄mgbɛ̄ tū ɔ̄cɛ dóódu ŋ́, ā híī pīya ɔ̄cɛ dúú tū ŋ́, lɛ ojīlīmā ce ádā uwɔ mla ɛ́nɛ́ uwɔ.”

²⁰Ɔ̄cɛ ā kahíníī, “Itíca, ŋmíífī nɛ̄ n wɛ ɔyípɛ ā, n lɛ odúúdú aíne nēe bá nyā tū.”

²¹Ujísɔ̄si leyīkwu ɔ́ cíí ó le he ɔ́ ɔtū, anɔ́ɔ ó da ɔ́ kahíníī, “Ɔdā ékpónú hile gā awɔ kpɔ́, nyɔ̄ gaá kwú odúúdú ɔdā nāa lɛ ā í kpó lá, cɛ́ɛ́ a kwú ije nū í kpó lɛ ācɛ ogbɛhá, cɛ́ɛ́ a lɛ agbénú lɛ ajɔ̄ɔ̄cɛ́, cɛ́ɛ́ a wā í tū um ɔkwu.”

²²Eko nɛ̄ ɔnyīlɔ ā lɛ ɛ̄nyā pó ā, ɔtū le bīya lɛ ɔ́ ohígbū koó lɛ agbénú nɛ̄hi.

²³Ujísɔ̄si pīyeyī biílí anɔ́ɔ ó da ayíkpó kú nū kahíníī, “Ó géē lɔnɔ lɛ ācɛ o lɛ agbénú kéē ga ajɔ̄ɔ̄cɛ́ kú Ɔwɔicō!”

²⁴Ayíkpó kú nū le kpó hídáagó kú ɛlā nɛ̄ ó ka nyā a, Amáŋ Ujísɔ̄si gbɔɔ́ ō ka kahíníī, “Ayípɛ̄ ɔlɛ́ um, ó lɔnɔ nɛ̄hi kú ɔ̄cɛ kóō ga ajɔ̄ɔ̄cɛ́ kú Ɔwɔicō!

²⁵Ó tɔ́ɔtɛ́ nɛ̄hi lɛ inyaklumi kóō bū ɔ̄gɔ̄ kú inyilá, fíyɛ́ ɔ̄cɛ o lɛ agbénú kóō ga ajɔ̄ɔ̄cɛ́ kú Ɔwɔicō.”

²⁶Ɛlā nyā nɛ̄ ó ka ā cɛ́ɛ́ lɛ ayíkpó kú nū le kpó hídáagó nɛ̄ɛ̄nɛ̄hi fíyɛ́, anɔ́ɔ é gbɔɔ́ ō da iyī uwā ɔ̄kā kahíníī, “Ɔ̄nyɛ kē í ga ajɔ̄ɔ̄cɛ́ kú Ɔwɔicō glá mɛ́ɛ́ ā gɛ?”

²⁷Ujísɔ̄si leyī kwu uwá cíí, anɔ́ɔ ó kahíníī, “Ɛ̄nyā í tōō yá lɛ ɔ̄cɛ ŋ́, amáŋ ó tōō yá lɛ Ɔwɔicō. Ɛjɛ̄ɛ̄jī ɔdā dóódu tɔ́ɔtɛ́ ō yá lɛ Ɔwɔicō.”

²⁸Anɔ́ɔ Upíta gbɔɔ́ ō ka lɛ ɔ́ kahíníī, “Má ɔ̄ ɛ́ɛ́, alɔ habɔ̄ ɔdā dóódu tá gbɔɔ́ ō yɛce uwɔ ɛɛ́.”

²⁹Ujísɔ̄si da uwá kahíníī, “Īī ɔkwɔ̄ɔ̄kwɛ̄yi, n̄ da aá ka, ɔ̄cɛ dúúmā nōó habɔ̄ ɔlɛ́ nū tá ámāŋ ka ɛ́nɛ́ nū ámāŋ ka ádā nū ámāŋ ka ɛhɔ̄ kú nū tá ohígbū um mɛ́mla ohígbū ɔna kú ɔkōōlɔhi oōtá ā,

³⁰géē mīyɛ ɔ́ nwuné cabá eko nōo yɔ̄ nyā. Ó géē mīyɛ ayínɛ́ nɔ̄nyīlɔ, ayínɛ́ nɔ̄nyā, aɛ́nɛ́, ayí mɛ́mla ajɛ nōó ī bī le hɛ́hɔ̄, ɛga ofɛhɔ̄ fíyɛ́. É géē yá ɔ̄ ŋmó dúú, amáŋ ó klla géē mīyɛ oyēeyī opiyóó. ipú ɛcɛ nōo géē wā ā.”

³¹Ujísɔ̄si yɔ̄ ī kɛlā gɔbū kpɔ́ kahíníī, “Amáŋ ācɛ nēe gbɔbū abālɔbányā géē wɛ ācɛ igbīhāajɛ, anɔ́ɔ ācɛ alɛwa nēe bá igbīhi abālɔbányā géē wɛ ācɛ aflɛ́yí.”

³²Ujísɔ̄si mɛ́mla ayíkpó kú nū bá ɔwɛ yɔ̄ gē yɛ gicō, ī ga Ujerúsālɛm. Ujísɔ̄si le hɛ́ gɔbū kú ayíkpó ā. Ó le hɛ́ uwā idáagó, ufi gbɔɔ́ ō yá ācɛ nēe tá ɔ̄ ɔkwu igbīhi ā. Ujísɔ̄si le ayíkpó ā kpó gā áklō ɛga éyi, anɔ́ɔ ó lɛ aɔ́dā nēe gáā yá ɔ̄ kpɛ́mm ā kpó ka lɛ uwá.

³³Ó da uwá kahíníī, “Aá jāhɔ̄, alɔ yɔ̄ ī gicō, ī ga Ujerúsālɛm ɛga nēé géē kwú Ɔyínɔ̄nyīlɔ kú Ɔcɛ, í je ɔ́ tū aótrɛ̄yí kú ācogwɛ́ɛya mla ācɛ ō nwū íne abɔ̄. É kē í ŋmó ɔ̄ ɛpɔ̄bí, kéē le ɔ́ ŋmó, cɛ́ɛ́ é kwú ɔ̄ ú tū aílɔ́wá abɔ̄.

³⁴Ācɛ ɔ́ɔmā géē yá ɔ̄ ɛbɛ́, í tá ahɛ klá anú. É klla géē gá ɔ̄ itali, cɛ́ɛ́ é lɛ ɔ́ ŋmó, amáŋ é géē je ɔ̄ héyī ŋmá ɔlékwū eko nɛ̄ ɛ̄cī ɛtá le gla.

³⁵Anɔ́ɔ Ujémīsi mla Ujɔ́ni, ayí nɔ̄nyīlɔ kú Usébēdi le pɛ́ wā ɛgiyí Ujísɔ̄si. Anɔ́ɔ é da ɔ́ kahíníī, “Itíca, ó lɛ ɔdā nɛ̄ alɔ tíne ká ā yá lɛ alɔ.”

³⁶Ujísɔ̄si dɔɔ̄kā kahíníī, “Ɔdí nɛ̄?”

³⁷É tá ɔ̄ ohi kahíníī, “Eko nāa le pīya ɔcɛ́ nɛ̄ɛ̄nɛ̄hi kú ɛcɛ nyā, alɔ tíne ká ā cɛ̄ lɛ alɔ cīce gboce akpa kú ɔcɛ́ kú uwɔ, ɔ̄cɛ éyi kú alɔ cīce abɔ̄lɔ́ná, cɛ́ɛ́ ɔ̄cɛ ɔhá ā cīce abɔ̄lúfīyē.”

³⁸ Ujísɔ̄si da uwá kahíníī, “Aá jé ɔdā nɛ̄ aá í tíne ā ŋ́. Aá lɔfú má ɛdɔ ōwē nɛ̄ n gáā má piíí ā glá āā? N géē kwú ohígbū o yáŋmó mɛ́mla ōwē. Aá le tútū kú aá kwú lɛ āā?”

³⁹É tá ohi ka, aá yá glá. Anɔ́ɔ Ujísɔ̄si da uwá kahíníī, “Aá géē má ōwē nɛ̄ n géē má piíí ā ɔkwɛ̄yi, aá kē í kwú ɛdɔ ikwū nɛ̄ n géē kwú piíí ā.

⁴⁰Amáŋ ń lɛ íkwu ō fu ɔ̄cɛ nōo géē cīce abɔ̄lɔ́ná ámāŋ ka abɔ̄lúfīyē kú um ā ŋ́. Ɔwɔicō wɛ ɔ̄cɛ nōo géē je ɛga o cīce ā lɛ ācɛ nɛ̄ ó tū ɔ̄ tū gbēyī uwā ā á.”

⁴¹Eko nɛ̄ ayíkpó igwó ohile ā lɛ ɛlā ā pó ā, é le kpó cɔ̄nū mla Ujémīsi mla Ujɔ́ni.

⁴²Anɔ́ɔ Ujísɔ̄si lɛ odúúdú uwā kpó hīgwú tɔ̄há, anɔ́ɔ ó da uwá kahíníī, “Aá jé ka ācɛ nēé fu kéē gbō aílɔ́wá ā gē gbō uwā abɔ̄fú, aótrɛ̄yí ā, lɛ ācɛ ā kwú tābɔ̄ gē gbō uwā abɔ̄fú.

⁴³Ɛ̄nyā í lɛ ā ɔtāhɛ̄ aá ŋ́, ɔ́dāŋ́ ka ɔ̄cɛ dúúmā géē wɛ ɔ̄cɛ nɛ̄hi ɔtāhɛ̄ aá, ó géē cɛ̄ ācɛ ohile ɛhɔ̄ piíí.

⁴⁴Ɔ̄cɛ dúúmā nōo dɔɔ̄kā kóō wɛ otrɛ̄yí kú aá, ó géē wɛ ɔfíyɛ kú ācɛ ohile.

⁴⁵Ohígbū ka Ɔyínɔ̄nyīlɔ kú Ɔ̄cɛ í kōō wā cɛ́ɛ́ kéē cɛ̄ ɔ̄ ɛhɔ̄ ŋ́, amáŋ ó wā í cɛ̄ ācɛ ɛhɔ̄, cɛ́ɛ́ ó gekwú, o yá ɛ́ɛ́ kóō lɛ ācɛ alɛwa nyatá.

⁴⁶Ujísɔ̄si mɛ́mla ayíkpó kú nū gā Ujɛ́rīko, anɔ́ɔ abɔ̄ é yɔ̄ í nyɛ̄ɛ̄ ā mla ɛwa nɛ̄hi kú ācɛ ā, opeyī éyi nēé hī Ubatímīyɔ̄si ɔyínɔnyīlɔ kú Utímīyɔ̄si cīce okónu ɔwɛ.

⁴⁷Eko nɛ̄ ó le jé ka, Ujísɔ̄si kú Unásārēti ɔ́ɔ wā gáā yɛ áa, ó gbɔɔ́ ō dɛ̄gba kahíníī, “Ujísɔ̄si! Ɔyí Udéfīdi! Ményinyi um!”

⁴⁸Ācɛ alɛwa kú ipú ɛwa ā dɛ̄gba tū ɔ̄ kóō yɔ̄ cíí. Amáŋ ó lɛ ɔkɔ cɛyí dɛ̄gba tɛ́ɛcɛ fíyɛ́ kahíníī, “Ɔyí kú Udéfīdi, ményinyi um!”

⁴⁹Ujísɔ̄si māháyí anɔ́ɔ ó kahíníī, “Aá lɛ ɔ́ hīgwú wā.” Anɔ́ɔ é lɛ opeyī ā hīgwú á.

⁵⁰Anɔ́ɔ opeyī ā kwú úwé kú nū ú púla bónū, lɛ ómbili tá gicō, anɔ́ɔ ó gā ɛgiyí Ujísɔ̄si á.

⁵¹Ujísɔ̄si da ɔ́ ɔ̄kā kahíníī, “Ɔdí nāa tíne ká n̄ yá ga awɔ ā.” Opeyī ā tá ɔ̄ ohi kahíníī, “Itíca, n dɔɔ̄kā ká n̄ mɛ́ɛbɛ kpɔ́.”

⁵²Anɔ́ɔ Ujísɔ̄si da ɔ́ kahíníī, “Nyɔ̄, ɔtū nāa le ce um ā lɛ uwɔ hɛ́tá ɛɛ́.” Ɔkwɔɔkwu ɔ́ɔmā, ó gbɔɔ́ ō mɛ́ɛbɛ, anɔ́ɔ ó tá Ujísɔ̄si ɔkwu gbɔɔ́ ō nyɔ̄ á.