Read idoma UMÁKI 11 Bible Online

UMÁKI 11 - idoma bible

UMÁKI 11

¹Abɔ̄ é le bá lɛ Ujerúsālɛm, Ubɛ́tifáge mɛ́mla Ubɛ́tāni ā, é gā ɛfu nēé hī ka Ólīfu ā. Ujísɔ̄si lɛ ayíkpó kú nū ɛpa tɛ̄hɔ̄ ga iyɔ̄bū.

²Ó tū uwā ukɔ́ kahíníī, “Aá nyɔ̄ eyīpɔ́lɛ́ nōo yɔ̄ iyɔ̄bū kú aá ā. Ɔkwɔɔkwu nɛ̄ aá le tá abɔ́ɔ ā, aá géē má ijakī nēé lɛ ɔ́ŋgbá tū ɔ̄ wū ɔcí, ɛ̄nɛ̄ ɔ̄cɛ dúúmā í ce jejee ɛ́ɛ́ ŋ́. Aá lɛ ɔ́ wī wā amānyā.

³Ɔ́dāŋ́ ka ɔ̄cɛ dúúmā da aá ɔ̄kā ka, ɔdí nɛ̄ aá í yá abɔ́ɔ, aá da ɔ́ ka ɔkpani ā ī dɔɔ̄kā nū, ó kē í je ɔ́ lɛ aá wā bōōbū.”

⁴Anɔ́ɔ é le yɛ gaá lɛ ijakī éyi má, é lɛ ɔ́ŋgbá tū ɔ̄ wū ɔcí kú okómpīinu kú inu éyi kú úláyí ā. Abɔ̄ é gbɔɔ́ ō wī ijakī ā ŋmá ɔcí ā,

⁵ācɛ ōhī nēe háyi abɔ́ɔ ā da uwá ɔ̄kā kahíníī, “Ɔdí nɛ̄ aá ī yá yɔ̄, aá yɔ̄ í wī ijakī ā nɛɛ?”

⁶Ayíkpó ā lɛ ōhī nɛ̄ Ujísɔ̄si da uwá kéē tá ā tá uwā, anɔ́ɔ é habɔ̄ uwā tá kéē nyɔ̄ á.

⁷É lɛ ijakī ā bī gé lɛ Ujísɔ̄si. Anɔ́ɔ é lɛ úwé kú uwā kpó klá ijakī ā, anɔ́ɔ Ujísɔ̄si nyɔ̄ í ce ɛyí nū á.

⁸Ācɛ alɛwa le úwé kú uwā kpó klá ɔwɛ lɛ ɔ́ kóō yɛ ɛyí nū. Ācɛ ōhī lɛ abɔ̄ kú ɔcí hɛ́ anɔ́ɔ é lɛ ɔ́ kpɔ́ bá ɔwɛ lɛ ɔ́ kóō yɛ ɛyí nū dúú á.

⁹Ācɛ nēe bá iyɔ̄bū nū mla ācɛ nēe tū ɔ̄ ɔkwu igbīhi ā, gbɔɔ́ ō dɛ̄gba ka, “Aá wóófu Ɔwɔicō! Ɔwɔicō kóō hɔ́ɔhā ce ɔ̄cɛ nōo wā ŋmá iyē kú Óndú ā!

¹⁰Ɔwɔicō kóō hɔ́ɔhā cē ajɔ̄ɔ̄cɛ́ nɛ̄ ō yɔ̄ ī wā ā, ó géē lɛbɛ̄ɛka ajɔ̄ɔ̄cɛ́ kú ádā alɔ Udɛ́fīdi ā! Odúúdú ojīlīmā kóō ce Ɔwɔicō!”

¹¹Ujísɔ̄si le bēhé tū ipú Ujerúsālɛm, le yɛ ga ipú Agblīihɔ-nɛ̄hi, ó yɛ bilíbilí ipú nū lɛ ɛjɛ̄ɛ̄jī ɔdā dóódu kpó má. Amáŋ abɔ̄ otú gbɔɔ́ ō bī ā, ó kwúcē wā í tá ayíkpó igwɛ́ɛpa ā, anɔ́ɔ é le pɛ́ ga Ubɛ́tani á.

¹²Oŋmɔ́ɔ̄cī nū, abɔ̄ é yɔ̄ gē pīyɛyí ŋmá Ubɛ́tani ga Ujerúsālɛm ā, ɛmiyɛ gbɔɔ́ ō ŋmó Ujísɔ̄si.

¹³Ó má ɔcí ufígi éyi kwu ɛgaligbó le lu mla ēpū jugwuu, anɔ́ɔ ó gbɔɔ́ ō nyɔ̄ ɛgiyí ɔcí ā, ɔ́dāŋ koó géē má īkpō ufígi dúúmā lé glá. Amáŋ abɔ̄ ó ga ɔkwu ɔcí ā, ēpēēpū nōó má icō á, ohígbū ka eko nɛ̄ ufígi ī gwíīkpō ā í yá ɛ́ɛ́ ŋ́.

¹⁴Ujísɔ̄si da ɔcí ufígi ā ka, “Ɔ̄cɛ dúú í gáā lé īkpō kú uwɔ ɛ́ɛ́ gɛ ŋ́.”

¹⁵Eko nēé gāājɛ Ujerúsālɛm ā, Ujísɔ̄si le yɛ tá ipú Agblīihɔ-nɛ̄hi ā, anɔ́ɔ ó gbɔɔ́ ō nū odúúdú ācɛ nēe bá gē lá ɔlá mɛ́mla ācɛ okpó ɔlá lá ā bɛ̄cɛ á. Ó lɛ itéblu kú ācɛ ofla ije abɔ̄ mɛ́mla ɔcí oyājɛ kú ācɛ o je ɔklɛ́bɛ́tɛ lá ā kpó pīyeyī kláajɛ.

¹⁶Anɔ́ɔ ó cɛ̄ lɛ ɔ̄cɛ dúúmā bī iyó wā í bū ipú Agblīihɔ-nɛ̄hi ā gɛ ŋ́.

¹⁷ Anɔ́ɔ ó gbɔɔ́ ō nwū ācɛ ā ɛlā kahíníī, “É tá ɔ̄ ipú ɔkpá kú ɛlɔ̄ɔwɔicō ka Ɔwɔicō ɔ́ɔ ka, ‘É géē hī Agblīihɔ-nɛ̄hi kú um ka inu ɛga nɛ̄ ācɛ kú ewo dúúdú géē gbɔ̄ɔkɔ ga um.’ Amáŋ aá lɛ ɔ́ pīya ɛga nɛ̄ aúwī gē tayínū ā!”

¹⁸Aótrɛ̄yí kú ācogwɛ́ɛya ā mla aítíca kú íne lɛ ɔdā nōó yá ā pó. Anɔ́ɔ é gbɔɔ́ ō dɔɔ̄kā ɔwɛ nēé géē ŋmó ɔ̄ á.

¹⁹Eko nɛ̄ ɔ̄nɛ̄ le gbo ā Ujísɔ̄si mla ayíkpó kú nū nyɛ̄ɛ̄ ŋmá igelī nɛ̄hi ā.

²⁰Ɔcɔ̄ɔ̄ci blibli ɛ̄cī ɔhá, abɔ̄ é bá í yɛ ɔwɛ ā, é má abɔ̄ ɔcí ufígi ā le ŋmó ŋmá icō jāā kwu ɛgba.

²¹Upíta le blakwu ɔdā nōo yá ā, anɔ́ɔ ó da Ujísɔ̄si kahíníī, “Má ɔ̄ Itíca, ɔcí ufígi nāa tokónu lɛ ɔ́ ā gekwú ɛɛ́!”

²²Ujísɔ̄si tá uwā ohi kahíníī, “Aá lɔtūce Ɔwɔicō.

²³ N dɔɔ̄kā kú aá lɛ ɛ̄nyā jé lɔɔlɔhi ka ɔ̄cɛ dúúmā nōo da ɛfu nyā, kóō lɛ iyī nū fu ŋmá ajɛ, cɛ́ɛ́ kóō kwú iyī nū ú tɛ́ɛcɔ̄ í kwu ipú ísu, anɔ́ɔ ɔ̄cɛ ā í lɛ ɔtū kú nū bɛ́ɛpa ŋ́, amáŋ nōó cɛ̄ ka ɛlā nɛ̄ anúɔ ka ā í yá, ó kē í yá lɛ ā lɛ ɔ́.

²⁴Ohígbū ɔ́ɔmā, eko dúú nɛ̄ aá lɛ ɔkɔ gbā lɛ Ɔwɔicō, lɛ ɛ̄ba kú ɔdā dúú ba ɔ́, aá cɛ̄ ka aá mīyɛ odée ā ɛɛ́. Ɔ́dāŋ́ nɛ̄ aá cɛ̄ lɛ ā, Ɔwɔicō géē je ɔ́ lɛ aá.

²⁵Anɔ́ɔ eko nɛ̄ aá háyicō lɛ ɔkɔ gbā, kwú ɔdā dúú nɛ̄ ɔ̄cɛ dúúmā yá aá ā í yá ɔ̄ ɛhi, cɛ́ɛ́ Ɔwɔicō nōo wɛ Ádā aá nōo yɔ̄ ɔkpáncō ā, géē je ɔdōbɔ̄bí nɛ̄ aá yá ā yá aá ɛhi dúú.”

²⁶Ɔ́dāŋ́ nɛ̄ aá je ɔdā nɛ̄ ācɛ ɔhá yá aá ā yá uwa ɛhi ŋ́, Ɔwɔicō Ádā aá nōo yɔ̄ ɔkpáncō ā, í gáā je ɔdōbɔ̄bí nɛ̄ aá yá ā yá aá ɛhi ŋ́ dúú.

²⁷Ujísɔ̄si mla ayíkpó kú nū klla gā Ujerúsālɛm kpɔ́. Abɔ̄ Ujísɔ̄si yɔ̄ ī yɛ ipú Agblīihɔ-nɛ̄hi ā blibli ā, otrɛ̄yí kú ācogwɛ́ɛya, aítíca kú íne ā, mɛ́mla anyākwɔ́cɛ le pɛ́ wā ɛgiyí Ujísɔ̄si.

²⁸Anɔ́ɔ é da ɔ́ ɔ̄kā kahíníī, “Ikwu nyá nāa bī le yá ɔdā nāa yá ā?”

²⁹Ujísɔ̄si tá uwā ohi ka, “N géē da aá ɔ̄kā ékpónú, ɔ́dāŋ nɛ̄ aá lɛ ɔ̄kā ā cīla, n géē da aá ɛga nɛ̄ íkwu nɛ̄ n bī le yá ɔdā nēe bá ā ŋmá ā.

³⁰Aá da um ɛ́ɛ́, iní nɛ̄ Ujɔ́ni bī íkwu nōo gē bī le yá ācɛ ubatísim ā ŋmá ā? Ikwu ā ŋmá ɛgiyí Ɔwɔicō kɛ̄ɛ ka ɛgiyí ɔ̄cɛ ɔlamu?”

³¹É gbɔɔ́ ō táafú mla iyī uwā, bá gē ka, ɔdí nɛ̄ aá í ka āā? Ɔ́dāŋ́ nɛ̄ aá ká íkwu ā ŋmá ɛgiyí Ɔwɔicō, ó géē da aá ka ɔdíyá nɛ̄ aá cɛ̄lā kú Ujɔ́ni ŋ́ māā?

³²É ka aá í ka ka íkwu kú Ujɔ́ni ŋmá ɛgiyí ācɛ glá ŋ́. É ka ɛ̄nyā ohígbū ka é gē yúufi ācɛ ā. Ohígbū ka ɛjɛ̄ɛ̄jī ācɛ cɛ̄ ka Ujɔ́ni wɛ ɔ̄comɛ́ɛbɛ ɔkwɔ̄ɔ̄kwɛ̄yi.

³³Anɔ́ɔ é tá Ujísɔ̄si ohi ka, aá í jé ɔ̄cɛ nōo je íkwu lɛ Ujɔ́ni kóō yá ācɛ ubatísim ā ŋ́. Anɔ́ɔ Ujísɔ̄si tá uwā ohi kahíníī, “Ń kē gáā da aá ɔ̄cɛ nōo je íkwu gā um nɛ̄ n bī yá aɔ́dā nēe bá mbáa ŋ́.”