Read idoma UMÁKI 12 Bible Online

UMÁKI 12 - idoma bible

UMÁKI 12

¹ Ujísɔ̄si tá ācīije nyā lɛ uwá kahíníī, “Ɔ̄cɛ éyi lɛ ɛhɔ̄ kú ɔcí ufáyin hi, ó lɛ igá cē tū ɔ̄ okokolo, ó lɛ ɔ̄gɔ̄ ɛga nɛ̄ ācɛ géē pí ejé ā bū ipú ɛhɔ̄ ā. Ó lɛ ɔda ce ipú nū lɛ adá gwó ce ɔ́. Ó kwú ɛhɔ̄ ā ú tá olufa lɛ ācɛ, anɔ́ɔ ó le yɛ tá iyāwu á.

²Eko nēé gē tá ikpō kú ɔcí ufáyin bá ā le yá ā, ó lɛ ɔ̄cocɛ̄hɔ̄ kú nū éyi tɛ̄hɔ̄ ga ɛgiyí ācɛ olufa ā, cɛ́ɛ́ kóō géē mīyɛ ukpɛ̄ kú ikpō kú ɔcí ufáyin kú nū gē lɛ ɔ́.

³Ācɛ olufa ā lɛ ɔ̄cocɛ̄hɔ̄ ā kwú lɛ ɔ́ ŋmíjē, klla le ɔ́ nū nyɔ̄ abɔ̄ áncā.

⁴Anɔ́ɔ óndú ɛhɔ̄ ā, klla lɛ ɔ̄cocɛ̄hɔ̄ ɔhá tū nyɔ̄ ga ɛgiyí ācɛ olufa ā kpɔ́. É lɛ ɔ́ ŋmíjé lɛ ágbe yá ɔ̄ ɛyí, klla lɛ uwēyī je lɛ ɔ́.

⁵Ádā ɛhɔ̄ ā klla le ɔ̄cocɛ̄hɔ̄ ɔhá tɛ̄hɔ̄ nyɔ̄ kpɔ́, anɔ́ɔ é lɛ ɔ́ ŋmó á. É yá ɔ̄cocɛ̄hɔ̄ alɛwa ɔwɛ ékpó ɛ́gɔ́ɔmā dúú, é ŋmó ācɛ ōhī kú uwā ijē, é kē ŋmó aóhī kú uwā.

⁶Ɔ̄cɛ nōo hile nōó tɛ̄hɔ̄ ɛ́ɛ́ ŋ́ mā wɛ ɔyí nū ékpónú nōo he ɔ́ ɔtū nɛ̄hi ā. Igbīhāajɛ mɛ́ɛ̄ ā, ó lɛ ɔyínɔ̄nyīlɔ kú abɔ̄yīnū tɛ̄hɔ̄ ga ɛgiyí aólufa ā. Anɔ́ɔ ó ka, anúɔ jé ka ɛ́ɛ géē lɛ ojīlīmā cē ɔyínɔnyīlɔ kú anúɔ.

⁷Amáŋ aólufa ā le ɛlā ka lɛ iyī uwā kahíníī, “Ɔyí ádɛ̄hɔ̄ ā yɔ̄ á. Aá wā, kú ālɔ̄ lɛ ɔ́ ŋmó, cɛ́ɛ́ agbénú kú nū le pīya ákú alɔ!”

⁸Anɔ́ɔ é lɛ ɔyínɔ̄nyīlɔ ā kwú, lɛ ɔ́ ŋmó, anɔ́ɔ é kwú okwū kú nū ú tá tɛ́ɛcɛ ŋmá ɛhɔ̄ kú ɔcí ufáyin ā.

⁹Ujísɔ̄si dɔɔ̄kā kahíníī, “Ɔdí nɛ̄ ádɛ̄hɔ̄ ɔcí ufáyin ā géē yá mɛ́ɛ̄ ā? Ó géē wā í lɛ ācɛ nēe bá abɔ́ɔ ā kpó ŋmó, cɛ́ɛ́ ó kwú ɛhɔ̄ ɔcí ufáyin ā ú tū aólufa ɔhá abɔ̄.

¹⁰Īī, aá lɛ ɛlɔ̄ɔwɔicō nyā jé dúú ɛ́ɛ́ ŋ́ nɛɛ? ‘Ɛcɔ̄ nɛ̄ ācɛ o gwo inu tá tónū ā, le pīya ɛcɔ̄ nōo cɛgbá fíyɛ́ dúú kú inu ā.

¹¹Óndú yúklɔ́ nyā á, ó wɛ ɔdā o hídáagó o má.”’

¹²É dɔɔ̄kā ō lɛ ɔ́ kwú, ohígbū keé le jé ka, aá nɔ́ɔ tá ācīije lɛ aá á. Amáŋ abɔ̄ ufi ɛwa ā gē yá uwā ā, anɔ́ɔ é mā ɔ̄ tá le yɛ á.

¹³É lɛ ācɛ ōhī kú Ufárisīi mɛ́mla aɔ́wá kú Uhérɔ̄du ōhī fu ga ɛgiyí nū kéē gbō ɔ̄ gɛɛ, cɛ́ɛ́ kéē lɛ ɔ́ kwú o ŋmá lɛ ɛlā nōo í ŋmá okónu kú nū ā.

¹⁴Anɔ́ɔ é da ɔ́ kahíníī, “Itíca,alɔ jé ka, a gē kɛlā ɔkwɛyi, í gē lɛ ɛlá wu ɔdā dúú nɛ̄ ɔ̄cɛ í gbɛlá ā ŋ́. Á gē méyīgoo kú ɔ̄cɛ dúúmā ŋ́, amáŋ ā gē nwū ācɛ ɔdā nɛ̄ Ɔwɔicō miya táajɛ lɛ ācɛ ā. Le ka lɛ alɔ, ó le kpaakpa kú alɔ da ije ɔlɛ́ lɛ ɔcɛ́ nɛ̄hi Usísa ā, kɛ̄ɛ̄ koó cíkā ŋ́?

¹⁵Ālɔ̄ le da kɛ̄ɛ̄ ka alɔ da ŋ́?” Amáŋ abɔ̄ Ujísɔ̄si lɛ ula kú uwā ā jé ā, ó da uwá kahíníī, “Ɔdíyá nɛ̄ aá dɔɔ̄kā kú aá já um má ā mɛ́ɛ? Aá lɛ īkpīije éyi bī gé um kú um má ɔ̄.”

¹⁶Anɔ́ɔ é lɛ īkpīije éyi bī gé lɛ ɔ́ á. Anɔ́ɔ ó da uwá ɔ̄kā kahíníī, “Ifotó mla iyē kú ɔ̄nyɛ bá ɔ̄ ā?” É tá ɔ̄ ohi kahíníī, “Ákú Usísa nɛ̄.”

¹⁷Anɔ́ɔ Ujísɔ̄si da uwá kahíníī, “Aá je lɛ Usísa ɔdā nōo wɛ ákú Usísa, aá je lɛ Ɔwɔicō ɔdā nōo wɛ ákú Ɔwɔicō.” Ohi nōo tá nyā le hɛ uwā idáagó.

¹⁸Anɔ́ɔ ācɛ Usdusīi nēe ka ka ācɛ í gáā héyī ŋmá ɔlékwū ŋ́ mā, le pɛ́ wā ɛgiyí Ujísɔ̄si gaá da ɔ́ ɔ̄kā ka,

¹⁹“Itíca Umósīsi le tá tū ɔkpá lɛ alɔ kahíníī, “Ɔ́dāŋ ka ɔyínɛ́ ɔ̄cɛ gekwú hī ɔnyā nū tá, nɛ̄ ó ma ɔyí dúú ŋ́, ɔyínɛ́ nū nɔ̄nyīlɔ cíkā kóō kwú ɔnyā ā ú ɔnyōkwū, cɛ́ɛ́ kóō ma ayí lɛ ɔyínɛ́ nū nōo kwú ā.

²⁰Ayínɛ́ ahāapa éyi bá, anɔ́ɔ ɔnyākwú kú uwā ā lɛ ɔnyā lɛ, anɔ́ɔ ó gekwú í ma ɔyí dúúmā ŋ́.

²¹Anɔ́ɔ ɔyínɛ́ nū nōo gboce ɔ́ ā kwú ɔnyā nū ú ɔnyōkwū á, ó klla gekwú í ma ɔyí dúúmā ŋ́. Ɔdā ékpéékpó ā yá ɔyínɛ́ ɔ́mɛtá ā dúú á.

²²Anɔ́ɔ odúúdú ayínɛ́ nɔ̄nyīlɔ ahāhílahāapa ā kwú ɔnyā ā ú ɔnyōkwú kpɛ́mm á. Ó kē ma ɔyí lɛ ɔ̄cɛ dóódu kú uwā ŋ́ má. Igbīhāajɛ mɛ́ɛ̄ ā, ɔnyā ā klla gekwú.

²³Eko nɛ̄ ācɛ géē héyī ŋmá ɔlékwū ā, ɔnyā kú ɛnyā kú uwā nōó í wɛ ā gɛ? Ohígbū ka uwā ahāhílahāapa ā lɛ ɔ́ ɔnyā kpɛ́mm.”

²⁴Ujísɔ̄si tá uwā ohi kahíníī, “Aá le nyíleyī abɔ̄ aá ka ka ācɛ nēe kwú ā í gáā héyī ŋmá ɔlékwū ŋ́ mā. Ɔdā nōo yá nɛ̄ aá nyíleyī ā wɛ ka, aá jɛyí ɛlɔ̄ɔwɔicō ŋ́ māa, aá klla jé ɔdā dúúmā lɛyíkwu ɔfú kú Ɔwɔicō ŋ́.

²⁵Ohígbū ka eko nēé le héyī ŋmá ɔlékwū ā, é gáā lɛ ɔnyā ŋ́ māa, ɛ́ɛ́ nēé gē lɛ ɔbá ŋ́. Amáŋ é géē lɛbɛ̄ɛka aálelékwū otɛ̄hɔ̄ kú ɔkpáncō ā.

²⁶Ó kɛlā lɛyíkwu o je ācɛ nēe kwú ā héyī ŋmá ɔlékwū. Aá jé ŋmá ɔkpá kú Umósīsi ɛ́ɛ́ ŋ́ nɛɛ, ɛga nēé kɛlā lɛyíkwu ɔlá nōo yɔ̄ gē yi ipácí nɛ̄ ácí ā í je yi tāajɛ ŋ́ mā. Ɛ́gɛ́nɛ̄ Ɔwɔicō da ɔ́ kahíníī, ‘Ami wɛ Ɔwɔicō kú Ébrahām, mla Ɔwɔicō kú Áyísīki, mla Ɔwɔicō kú Ujékɔ̄pu á’ ŋ́ nɛɛ?

²⁷Ó wɛ Ɔwɔicō kú ācɛ nēe gekwú ŋ́. Amáŋ Ɔwɔicō kú ācɛ nēe yēeyī. Aá nyíleyī íbí.”

²⁸Éyi kú ācɛ onwū íne ā yɔ̄ ɛga nɛ̄ ó pó ɔdā nēé ka ā. Ó le jé ka ohi nɛ̄ Ujísɔ̄si tá ācɛ Usádusīi ā ɔ́ɔ wɛ ohi okpaakpa. Anɔ́ɔ ó wā í lɛ ɔ̄kā éyi da ɔ́ kahíníī, “Íne nyá wɛ íne nōo cɛgbá fíyɛ́ dúú ā?”

²⁹Ujísɔ̄si tá ɔ̄ ohi ka, íne nōo cɛgbá fíyɛ́ dúú ā, wɛ ɛ̄nyā ā, “Ísrɛ̄lu aá jāhɔ̄, Óndú ā Ɔwɔicō kú alɔ, anú ōfōōfūnū wɛ Óndú á.

³⁰Aá í yíihɔtū tá Óndú, Ɔwɔicō kú aá ŋmá ɛjɛ̄ɛ̄jī ɔtū kú aá, ŋmá ɛjɛ̄ɛ̄jī odo kú aá, ŋmá ɛjɛ̄ɛ̄jī ɛlá nɛ̄ gē gbo ā, mɛ́mla ɛjɛ̄ɛ̄jī ɔfú kú aá!

³¹Íne ɔ́mpa nōo fíyɛ́ dúú ā wɛ ɛ̄nyā ā, ‘ɔ́mpa kú aá kóō he aá ɔtū ɛ́gɛ́nɛ̄ aá he iyī aá ɔtū ā. ‘Ó lɛ íne dúú nōo fíyɛ́ íne ɛpa nēe bá nyā gɛ ŋ́.”

³²Ɔ̄cɛ nōo gē nwū íne ā da Ujísɔ̄si kahíníī, “A cíla ɔ̄kā ā lɔhi íbí Itíca! Ó wɛ ɔkwɛ̄yi, ɛ́gɛ́nɛ̄ a ka ka Óndú ā ōfōōfūnū wɛ Ɔwɔicō á, ɔwɔ ɔhá dúúmā í yɔ̄ gwū ɔ̄ tá ŋ́ mā.

³³Alɔ í yíihɔtū tá Ɔwɔicō ŋmá ɛjɛ̄ɛ̄jī ɔtū kú alɔ, ŋmá ɛjɛ̄ɛ̄jī ɛlá nɛ̄ alɔ gē gbō ā, mɛ́mla ɛjɛ̄ɛ̄jī ɔfú kú alɔ. Ɔ́mpa kú alɔ í he alɔ ɔtū ɛ́gɛ́nɛ̄ alɔ he iyī alɔ ɔtū ā. Ó cɛgbá nɛ̄hi kú ālɔ̄ lɛyítáajɛ lɛ aíne ɛpa nēe bá nyā fíyɛ́ ō bī aɛ́bɛ́ wā í le gwɛ́ɛya ɛyí ede lɛ Ɔwɔicō.”

³⁴Ujísɔ̄si le jé ka ohi nɛ̄ ɔnyīlɔ ā tá ā le kpaakpa, anɔ́ɔ ó da ɔ́ kahíníī, “Á ligbó lɛ ō bēhé ga ajɔ̄ɔ̄cɛ́ kú Ɔwɔicō gɛ ŋ́.” Igbīhi ɛnyā mɛ́ɛ̄ ā, ɔ̄cɛ dúúmā í lɔtū da ɔ́ ɔ̄kā dúú gɛ ŋ́.

³⁵Abɔ̄ Ujísɔ̄si yɔ̄ gē nwū ɛlā ipú Agblīihɔ-nɛ̄hi ā, ó da ɔ̄kā éyi kahíníī, “Ɔdíyá nɛ̄ ācɛ onwū íne ā gē ka ka ohɔ́nyɛtá ā géē ŋmá ipɔ́ɔnū kú Udéfīdi ā?

³⁶Alelékwū Ihɔ lɛ ɔfú tū Udéfīdi iye kóō ka, kahíníī ‘Óndú ā ka lɛ óndú um ka, cīce abɔ̄lɔ́ná kú um amānyā jāā gbéeko nɛ̄ n lɛ aólɛlā kú uwɔ kpóbá ɛháajɛ ikpó kú uwɔ.”

³⁷Udéfīdi abɔ̄yī nū hī ohɔ́nyɛtá ā ka ‘Óndú,’ ó i lɛ ā ɛ́gɛ́nyā nɛ̄ ohɔ́nyɛtá ā í ŋmá ipɔ́ɔnū kú Udéfīdi kpɔ glá āā?

³⁸Ipú ɔdā nɛ̄ ó nwū ā, ó kahíníī, “Aá lɛlá kwu ācɛ onwū íne nɛ̄ awulú nɛ̄hi gē he uwá ɔtū ō tá klá iyē kéē yɛ, cɛ́ɛ́ kú ācɛ kéē túkpɛɛ́ ī hokónu ojīlīmā tū uwā ipú olíhi ā,

³⁹mla ɛ́gɛ́nɛ̄ ɛga ocíce kú ojīlīmā ī he uwá ɔtū kéē cīce ipú ɛgogbɔ̄ɔkɔ nɛ̄ŋcɛ́ mɛ́mla ɛga ojīlīmā ō cīce eko kú ucɛ ā.

⁴⁰Ācɛ nēe gē mīyɛ odúúdú ɔdā nɛ̄ anyōkwū lɛ ā tɔ̄ɔ̄kwu, é gē gbɔ̄ɔkɔ o likpo ajɛ, o yá ɛ́ɛ́ kú ācɛ kéē jé uwā abɔ̄ ŋ́ mā. Ɔwɔicō í yá uwa italā olɔnɔ fíyɛ́ ɛ́gɛ́nɛ̄ o cíkā ā!”

⁴¹Ujísɔ̄si cīce ɛgiyí ikpati okpije tū ɔ̄ kú Agblīihɔ-nɛ̄hi ā. Ó yɔ̄ ī má abɔ̄ ācɛ yɔ̄ ī wā lɛ ije tá ɔ̄ lɛ ā. Ācɛ o lɛ ije nɛ̄hi wā í lɛ ije nɛ̄hi tá ipú ikpati ā.

⁴²Anɔ́ɔ ɔnyōkwū ogbɛhá éyi wā í lɛ andelī ɛpa nēe gē yá ɔkɔ́bɔ éyi ā kpó tū ipú ikpati ā.

⁴³Anɔ́ɔ Ujísɔ̄si le ayíkpó kú nū hīgwú tɔ̄há, anɔ́ɔ ó da uwá ka, “N da aá ka ije nɛ̄ ɔnyōkwū ogbɛhá nyā le tá ipú ikpati ā nwuné fíyɛ́ ákú odúúdú ācɛ o hile á.

⁴⁴Ohígbū ka ācɛ o hile ā, je ŋmá ipú agbénú o lɛ cabá kú uwā. Amáŋ anú ā ɛ́gɛ́nɛ̄ o kwɛ́há lɛ ā, ó kwú ɛjɛ̄ɛ̄jī ɔdā nɛ̄ ó lɛ ɔlɛ́ kwɛcɛ ā ú tá ɔ̄. Ije kú oyēeyī kú nū nɛ̄ ó je tá ɔ̄ á.”