Read idoma UMÁKI 13 Bible Online

UMÁKI 13 - idoma bible

UMÁKI 13

¹Eko nɛ̄ Ujísɔ̄si yɔ̄ ī bɛ̄cɛ ŋmá ipú Agblīihɔ-nɛ̄hi ā, ɔyíkpó kú nū éyi da ɔ́ ka itíca, má ɛ́gɛ́nɛ̄ ɛcɔ̄ mla inu nyā ɔ́ɔ lɔhi lɛ ā oo!

²Ujísɔ̄si tá ɔ̄ ohi kahíníī, “Aá má inu nɛ̄hi nyā a? É gáā habɔ̄ ɛcɔ̄ ékpó tá cɛyí iyī uwā nēé gáā ce ɔ́ wāajɛ ŋ́ nɛ̄ ŋ́.

³Ujísɔ̄si cīce ɛyí ɛfu nēé hī ka Olīifu ā, lɛ eyī pīya kwu Agblīihɔ-nɛ̄hi ā, anɔ́ɔ Upíta mla Ujémīsi, mla Ujɔ́ni mla Ándru le pɛ́ nyɔ̄ í tá ɔ̄ ɛkwūbá. É da ɔ́ ɔ̄kā kú ɔ̄

⁴da uwá eko nɛ̄ ɔdā nēe ɔ́ɔ ka ā géē yá ā? É ka ɔ́ɔ da aá ɔdā nōo géē yá nōo géē cābɔ̄ ka eko nɛ̄ aɔ́dā nɔ́ɔ ka kpɛ́mm ā géē yá ɔkwɛ̄yi ā.

⁵Ujísɔ̄si tá uwā ohi kahíníī, “Aá cɛ̄ lɛ ɔ̄cɛ dúúmā plla aá ŋ́.

⁶Ācɛ alɛwa géē wā iyē kú um, géē yɔ̄ ī ka, ‘Ami wɛ anú á,’ cɛ́ɛ́ é lɛ ācɛ alɛwa bī nyíleyī.

⁷Ɔtū kú aá kóō wuklíicō eko nɛ̄ aá le pó keé yɔ̄ ī kpɛ́fú ámāŋ eko nɛ̄ aá le ofu kú ɛfú pó ŋ́. Aɔ́dā nēe bá nyā géē yá piíí, amáŋ eko ámōōmɛ ā í wā ɛ́ɛ́ ŋ́.

⁸Éwo éyi géē nyáŋjɛ í bɛ́yíkwu éwɔhá, ajɔ̄ɔ̄cɛ́ géē cāŋjɛ í bɛ́yíkwu ajɔ̄ɔ̄cɛ́ ɔhá. Ajɛ géē jíliyē ɛga dóódu, ɔkpɛtā géē ŋmó ācɛ. Amáŋ aɔ́dā nēe bá nyā wɛ ohútu kllɔ́dɔ́ɔ́ kú ōwē nɛ̄ ācɛ géē má.

⁹ Amáŋ aá abɔ̄yī aá, aá leyí kwɛcɛ ohígbū keé géē kpó aá wā iyɔ̄bū ójīla o kɛpɔ̄ tū ācɛ, é géē ŋmó aá ijē ipú ɛgogbɔ̄ɔkɔ. Ohígbū ka aá wɛ ayíkpó kú um, é géē kpó aá wā iyɔ̄bū aígbómína mla aɔ́cɛ́ kéē kɛpɔ̄ tū aá. Cɛ́ɛ́ aá géē má ɛga í tɔ́ɔna kú Ɔ̄kōōlɔhi ā tɛ́ɛcɛ lɛ uwá.”

¹⁰Ujísɔ̄i klla yɔ̄ ī ka lɛ uwá kpɔ́, “É géē tɔ́ɔna kú Ɔkōolɔhi ā lɛ odúúdu éwo dóódu kú ipú ɛcɛ nyā, cɛ́ɛ́ oŋmɛyí kú ɛcɛ gā.

¹¹Eko nēé lɛ aá kwú, anɔ́ɔ é lɛ aá bī ga únɛ́pɔ̄, ɔtū kú aá kóō plicō ohígbū ɔdā nɛ̄ aá géē ka gbɔbū lɛ eko ā ŋ́. Eko nɛ̄ eko le yá kú aá kɛlā, aá kɛlā dúú nōo wā okónu kú aá ā, ohígbū ka ɛlā nɛ̄ aá gáā ka ā í ŋmá ɛgiyí aá, amáŋ ɛgiyí Alelékwū Ihɔ géē je ɛlā ā lɛ aá.

¹²Ayínɛ́ ōhī géē kpó ayínɛ́ uwā lɛ̄ ācɛ kéē lɛ uwá kpó ŋmó, aádā ōhī kē í kpó ayí uwā lɛ ācɛ kéē lɛ uwá kpó ŋmó. Ayí ōhī géē bɛ́yíkwú ācɛ nēe ma uwá aá, kē í ŋmó uwā.

¹³ Ācɛ dóódu géē wɔ́tū aá ohígbū um. Amáŋ ɔ̄cɛ dúúmā nōo lɛ ɔtū lé jāā ga oŋmɛ́yí, é géē nya ɔ́ tá.”

¹⁴ Aá géē má Ɔdōtuufi ā nōo géē háyi ɛga nɛ̄ ó cíkā ō yɔ̄ ŋ́ mā ā (ācɛ nēe jɔ́kpá ā, ké ē jɛ́yí ɛlā nyā). Ó lɛ ā, ācɛ nēe lā Ujudíya ā, kéē le pɛ́ kwu ga ɛyí ɛfu.

¹⁵Ɔ̄cɛ dúúmā nōo ce ɛyí inu ɔlɛ́ nū, kóō kpó eko bónū wāajɛ nyɔ̄ í je ɔdā dúú ŋmá ipú inu ŋ́.

¹⁶Ɔ̄cɛ dúúmā nōo yɔ̄ ɛhɔ̄ kóō kwúcē ga ɔlɛ́ gáā je úwé kú nū ŋ́.

¹⁷Ó géē wɛ eko kú ɔkpɔkplɔ nɛ̄hi lɛ anyā nēe yīīpú mɛ́mla anyā nēe bá ī je amɛ̄ lɛ ayípɛ̄nɛ̄ŋcɛ́ ɛ̄cī ɔ́ɔmā ā.

¹⁸Aá gbɔ̄ɔkɔ lɛ Ɔwɔicō cɛ́ɛ́ kú aɔ́dā nēe bá nyā kéē híī yá eko nɛ̄ owu gē bū afɔ́nɔ̄ ŋ́.

¹⁹Ohígbū ka eko ɔ́ɔmā, ācɛ géē móōwē nɛ̄hi nōo géē bɔ̄bí fíyɛ́ odúúmā nɛ̄ ɛcɛ tɛtɛ má ŋmífī nɛ̄ Ɔwɔicō yá ɛcɛ ā, jāā gaá kwu abālɔbányā ā. Ɛɛ́ nɛ̄ ɔdā ɔhá dúúmā í kē gaá lɛbɛ̄ɛka anú ā ɛ́ɛ́ gɛ ŋ́ má.

²⁰Ɔ́dāŋ́ ka Ɔwɔicō í cē ɛ̄cī ā kpií ŋ́ nɛɛ, ɔ̄cɛ dúúmā í gáā yēeyī ŋ́. Amáŋ ohígbū ācɛ nɛ̄ ó fu ā, ó lɛ ɛ̄cī ā cē kpií.”

²¹Ujísɔ̄si yɔ̄ ī ka gɔbū kpɔ́ kahíníī, “Eko ɔ́ɔmā, ɔ́dāŋ ka ɔ̄cɛ dúúmā da aá ka, ‘Má ɔ̄, Ohɔ́nyɛtá yɔ̄ amānyā, ámāŋ má ɔ̄, ó yɔ̄ abɔ́ɔ, aá híī cɛ̄ ŋ́.

²²Ohígbū ka Ohɔ́nyɛtá ɛ̄kɛ̄mgbɛ̄ mla ācomɛ́ɛbɛ ɛ̄kɛ̄mgbɛ̄ géē pɛ́ wɛ̄ɛcɛ, é géē yá ɔdōcābɔ̄, é kē í yá ɔdōhídáagó, o yá kéē plla ācɛ nēé fu ā, ɔ́dāŋ ka ó tɔ́ɔtɛ́ lɛ uwá.

²³Aá leyī kwɛcɛ! N lɛ ɛjɛ̄ɛ̄jī ɔdā dóódu kpó ka lɛ aá gbɔbū ɛ́ɛ́ kéē yá ɛɛ́.”

²⁴ Ɛplá ɛ̄cī ɔ́ɔmā, bōōbū igbīhāajɛ kú eko kú ōwē nɛ̄ ācɛ géē má nɛ̄hi ɔ́ɔmā, ɛnɔ géē je dobū, ɔyā í gáā fíyajɛ gɛ ŋ́.

²⁵Aínyílɔ́wɔ géē kpó míya wāajɛ ŋmá ɔkpáncō, é géē jíla ɔfú kú ɔkpáncō iyē.

²⁶Anɔ́ɔ é géē má Ɔyínɔ̄nyīlɔ kú Ɔ̄cɛ yɔ̄ gē wā ŋmá ipú ojuja mla ɛgahi mla ɔfú nɛ̄hi.

²⁷Anɔ́ɔ ó géē tū aálelékwū otɛ̄hɔ̄ wā gaá tū ācɛ nɛ̄ Ɔwɔicō fu ā bá ŋmá ɔ́kīka ɛnɛ kú ɛcɛ. Ŋmá oŋmɛ́yí kú ɛcɛ éyi ga oŋmɛ́yí kú ɛcɛ ɔhá.”

²⁸Ujísɔ̄si klla yɔ̄ ī ka lɛ ayíkpó kú nū ā gɔbú kpɔ́ kahíníī, “Ɔcí ufíg kóō nwū aá ɛlā. Eko nɛ̄ ābɔ̄ kú nū kwú pīya ɛ̄mɛ̄ɛ̄mɛ̄, nɛ̄ ēpū kú nū gbɔɔ́ ō lū, aá jé ka ɔnɔ̄ í ligbó ō fa gɛ ŋ́.

²⁹Ɔwɛ ékpó ɔ́ɔmā, eko nɛ̄ aá má ɔdā nēe bá ā gē yá, aá le jé ka eko ā má kwajaajɛ ɛɛ́, ó má kwu okómpīinu ajaajɛ ɛɛ́.

³⁰Aá le jé lɔɔlɔhi ka, ɛjɛ̄ɛ̄jī aɔ́dā nēe bá nyā géē yá gbɔbū nɛ̄ ācɛ kú eko nyā nēe yēeyī abālɔbányā géē pɛ́ kwú ŋmá ɛcɛ.

³¹Ɔkpáncō mla ɛcɛ í mɛ, amáŋ ɛlā kú um géē yɔ̄ piyóó.”

³²Ujísɔ̄si klla kahíníī, “Ɔ̄cɛ dúúmā í kōō jé ɛ̄cī ámāŋ ka eko nɛ̄ Ɔyínɔnyīlɔ kú Ɔ̄cɛ ā í wā ā ŋ́. Aálelékwū otɛ̄hɔ̄ kú ɔkpáncō ámāŋ kú Ɔyínɔnyīlɔ kú Ɔwɔicō ā í kōō jé ɔ̄ ŋ́ dúú. Ɔwɔicō Ádā ā ōfōōfūnū jé ɔ̄ á.

³³Aá leyī kwɛcɛ! Cɛ́ɛ́ kú aá le tútū, ohígbū ka aá í jé eko nɛ̄ aɔ́dā nēe bá nyā géē yá ā ŋ́.

³⁴Ó géē lɛbɛ̄ɛka ɔ̄cɛ nōo gáā ga iyāwu ā. Amáŋ gbɔbū kóō ŋmá ɔlɛ́ ā, ó kwú ɔlɛ́ nū í tū ɔ̄cocɛ̄hɔ̄ kú nū abɔ̄. Ó da ɔnyɔɔnyɛ kú ɔ̄cocɛ̄hɔ̄ ā, ɔdā nɛ̄ ó cíkā ō yá ā, anɔ́ɔ ó da ɛ̄nɛ̄ o í gbō ɔwɛ ā kóō leyī kwɛcɛ.

³⁵Ohígbū ɔ́ɔmā, aá leyī kwɛcɛ, ohígbū ka aá jé eko nɛ̄ ádɔ̄lɛ́ ā í wā ā ŋ́, ó lɔfú wā ɔ̄nɔ̄ɔ̄nɛ̄, ámāŋ ahāpotú ámāŋ ka ɔbúgwu aflɛ́yí, ámāŋ ka ɔ̄cɔ̄ɔ̄cī.

³⁶Aá híī gbɔlā nóó, ohígbū koó lɔfú wā eko nɛ̄ aá leyī ce ŋ́ mā.

³⁷Ɔdā nɛ̄ n da aá nyā nɛ̄ n da ācɛ dóódu á, aá leyí kwɛcɛ.”