Read idoma UMÁKI 14 Bible Online

UMÁKI 14 - idoma bible

UMÁKI 14

¹ Ó hile ɛ̄cī ɛpa kú ɛ̄cī ucɛ kú onyatá mla ucɛ kú Igbō Ánūŋ kóō yá ā. Anɔ́ɔ aótrɛ̄yí kú ācogwɛ́ɛya mla ācɛ o nwū íne bá yɔ̄ í dɔɔ̄kā ɔwɛ nēé géē lɛ Ujísɔ̄si kwú wɛɛlɛ, cɛ́ɛ́ kéē lɛ ɔ́ ŋmó tayínū, kú ācɛ kéē jé ŋ́.

²É ka, ó gáā wɛ eko ɔ́ɔmā ŋ́, ohígbū nɛ̄ ācɛ ā géē cīlɛ̄fú.

³ Eko nɛ̄ Ujísɔ̄si yɔ̄ Ubɛ́tani ɔlɛ́ Usáyímōni olagwú ā. Abɔ̄ ó yɔ̄ gē lé ɔdōlé ā, ɔ̄cɛnyā éyi bī oli kú ɛcɔ̄ olabásta nɛ̄ anɔ̄ ogbɔɔ́la nɛ̄hi kú unáadi yɔ̄ anú ā. Ó lɛ ɔkɔ kú oli ā ca, lɛ ɔ́ nwūla, anɔ́ɔ ó le anɔ̄ ā pīya klí Ujísɔ̄si ɛyí á.

⁴Ācɛ ōhī nēe bá abɔ́ɔ ā le cɔ̄nū, anɔ́ɔ é da iyī uwā ka ɔdíyá nɔ́ɔ yɔ̄ í kpó anɔ̄ ā bónū icííci ā mɛ́ɛ̄?

⁵É ka ɔ́ɔ lɔfú je anɔ̄ ā lá fíyɛ́ égō nɛ̄hɛ́ ofigwɛ́ɛhɔ̄ glá, cɛ́ɛ́ kéē kwú ije ā ú kpó lɛ aógbɛhá. É ka ífulá tū ɔ̄ nɛ̄hi.

⁶Amáŋ Ujísɔ̄si da uwá kahíníī, “Aá ma ɔ̄ tá céé. Ɔdíyá nɛ̄ aá gē je unwalu lɛ ɔ́ ā? Ɔdā olɔhi nɛ̄hi nōó yá ga um á.

⁷Aógbɛhá ā gē bá mla aá piyóó, eko nōo he aá ɔtū, aá yá ɔdā olɔhi lɛ uwá, amáŋ ń gáā yɔ̄ mla aá piyóó ŋ́.

⁸Ɔdā nōó lɔfú yá glá ā, nōó yá yɔ̄ á. Anɔ̄ nēé géē le nya um iyē eko nēé géē nyi um ā, nōó hɔ́bū tá le nyi um iyē yɔ̄ á.

⁹N̄ da aá kú aá le jé lɔhi ka, é géē ka ɔdā nōó yá nyā tɛ́ɛcɛ ɛga dóódu nēé géē tɔ́ɔna kú Ɔ̄kōōlɔhi nyā tɛ́ɛcɛ ā, cɛ́ɛ́ kú ācɛ kéē blakwu ɔdā nōó yá nyā.

¹⁰Anɔ́ɔ Ujúdasi Iskáriyɔ̄tu, ɔ̄cɛ éyi kú ayíkpó igwɛ́ɛpa ā, le yɛ tá ɛgiyí aótrɛ̄yí kú ācogwɛ́ɛya, kóō lɛ ibīyājɛ yá tū Ujísɔ̄si.

¹¹Ɔtū he uwá nɛ̄hi abɔ̄ é le pó ā. Anɔ́ɔ é lɛ okónu ce lɛ ɔ́ ka aá géē je ije lɛ ɔ́. Anɔ́ɔ Ujúda gbɔɔ́ ō dɔɔ̄kā eko nōó í lɔhi nɛ̄ ó í yá ibīyājɛ tū Ujísɔ̄si ā.

¹²Anɔ́ɔ ɛ̄cī aflɛ́yí kú ucɛ kú Igbō Ánūŋ mā ā, ɛplá nēé gē ŋmó omlede kú onyatá, ā, ayíkpó kú nū da ɔ́ ɔ̄kā ka iní nɔ́ɔ tíne ká aá tútu lɛ ɔ́ kú ucɛ kú onyatá ā?

¹³Anɔ́ɔ Ujísɔ̄si le ayíkpó ɛpa tɛ̄hɔ̄. Ó da uwá ka, “Aá nyɔ̄ igelī nɛ̄hi a, ɔ̄cɛnyīlɔ éyi nōo bī ɛtɛ́ éŋkpɔ̄ géē jīla aá ɔwɛ, aá yɛce ɔ́.

¹⁴Inu dúúmā nōó bēé nyɔ̄ ā, aá da ádɔ̄lɛ́ ā ka ‘Itíca kú alɔ ka, iní nɛ̄ anúɔ mɛ́mla ayíkpó kú anúɔ géē lé ɔdōlé kú ucɛ kú Onyatá āā?’

¹⁵Cɛ́ɛ́ ó géē mafú inīcō nɛ̄hi éyi, nēé lɛ ɔ́ yíifa lɛ ɔ́ tútū táajɛ ā lɛ aá. Aá lɛ abɔ́ɔ tútū gbēyī alɔ.”

¹⁶Anɔ́ɔ ayíkpó ā nyɛ̄ɛ̄ ŋmá abɔ̄, le yɛ ga igelī nɛ̄hi ā, gáā lɛ ɔdā dóódu má ɛ́gɛ́nɛ̄ ó da uwá lɛ ā. Anɔ́ɔ é lɛ ucē kú Onyatá ā tútū á.

¹⁷Eko nɛ̄ ɔ̄nɛ̄ le gbo ā, Ujísɔ̄si mla ayíkpó igwɛ́ɛpa ā le pɛ́ wā.

¹⁸Ɛpláko nēé bá gē lé ɔdōlé ā, Ujísɔ̄si kahíníī, “N da aá ɛlā ɔkwɛ̄yi éyi, ɔ̄cɛ éyi kú aá nōo yɔ̄ ī lé ɔdōlé mla um ā géē yá ibīyājɛ tū um.”

¹⁹Ɔtū le bīya lɛ ayíkpó ā, anɔ́ɔ é gbɔɔ́ ō da ɔ́ ɔ̄kā éyééye kahíníī, “Ami nɛɛ?”

²⁰Ujísɔ̄si da uwá kahíníī, “Ó géē wɛ éyi kú aá igwɛ́ɛpa ā, ɔ̄cɛ nōo lɛ abɔ̄ wu ócíbú mla um ā.

²¹Ɔyínɔ̄nyilɔ kú Ɔ̄cɛ géē kwú ɛ́gɛ́nɛ̄ é tá ɔ̄ tāajɛ ipú ɛlɔ̄ɔwɔicō ā, amáŋ ɔ̄cɛ nōo géē yíbīyājɛ tū um ā, ī tū um eyīnyinyi. Ó géē lɔhi lɛ ɔ̄cɛ ɔ́ɔmā fíyɛ́ ɔ́dāŋ ka é ma ɔ́ ŋ́.”

²²Abɔ̄ é bā yɔ̄ ī lé ɔdōlé ā, Ujísɔ̄si kwú igbō ú lɛ ahínyá tá Ɔwɔicō, lɛ ɔ́ cē kwú lɛ uwá, anɔ́ɔ ó ka, “Ɛ̄nyā wɛ ɔkpíyē kú um.”

²³Anɔ́ɔ ó kwú íkókwū ú, lɛ ahínyá tá Ɔwɔicō, kwú ɔ̄ ú lɛ uwá, anɔ́ɔ odúúdú uwā le gwá ŋmá ipu nū á.

²⁴Anɔ́ɔ ó da uwá kahíníī, “Ɛ̄nyā wɛ oyī kú um nēé pīya bónū ohígbū ācɛ alɛwa, ōyī kú um nōo hɔ́ɔhā klá ɛka ɛ̄yīpɛ̄ kú Ɔwɔicō.

²⁵N̄ da aá ɛla ɔkwɛ̄yi, ń gáā gwá enyi kú īkpō kú ɔcí ufáyin nya ɔhá ɛ́ɛ́ gɛ ŋ́, jāā gbéeko nɛ̄ n géē gwá ɔ̄ ɛ̄yīpɛ̄ ajɔ̄ɔ̄cɛ́ kú Ɔwɔicō.”

²⁶Eko nēé lɛ ijē gwó kwɛyí ā, é le pɛ́ tá ɛyí ɛfu nēé hi ka Ólīfu.

²⁷Ujísɔ̄si da uwá kahíníī, “Odúúdú aá géē pɛ́kwu hī um tá, ohígbū kéē tɛtɛ lɛ ɔ́ tá táajɛ ipú ɛlɔ̄ɔwɔicō ka, Ɔwɔicō géē je ogbāalá ŋmó, cɛ́ɛ́ aálá kú nū kē í fíyákátā.

²⁸ Amáŋ eko nēé kwú um ú héyī ŋmá ɔlékwū, n géē ga Ugálīli gbɔbū lɛ aá.

²⁹Upíta da ɔ́ kahíníī, “Ɔ́dāŋ́ ka odúúdú uwā kōō le kwu hī uwɔ tá nááná, ń gáā kwu ŋ́.”

³⁰Anɔ́ɔ Ujísɔ̄si tá ɔ̄ ohi kahíníī, “Ɔkwɛ̄yi, n da uwɔ ka, ɔtú mā, gbɔbū ka ɔbúgwū kóō tōgwú igbɛ ɛpa ā, a géē ka igbɛ ɛtá ka anúɔ í jé um.”

³¹Anɔ́ɔ Upíta ka abɔ̄ ɔ̄cɛnyīlɔ kahíníī, “Ɔ́dāŋ́ koó kōō wɛ keé géē ŋmó um mla awɔ piíí, ń gáā híhó ka ń wɛ ɔyíkpó kú uwɔ ŋ́ nɛɛ ŋ́.” Odúúdú ayíkpó ohile ā kē lɛ ɔdā ékpó ɔ́ɔmā ka dúú.

³²Anɔ́ɔ é gā ɛga éyi nēé hi ka Ugɛtsɛ́māni ā. Ujísɔ̄si da ayíkpó kú nū kahíníī, “Aá yɔ̄ amānyā, kú n̄ gbɔ̄ɔkɔ.”

³³Ó kwú Upíta mla Ujémīsi mla Ujɔ́ni ú kpó nyɔ̄. Unwalu mla ɔtunōbí nɛ̄hi gbɔɔ́ ō yá ɔ̄.

³⁴Anɔ́ɔ ó da uwá kahíníī, “Ɔtū kú um le bīya nɛ̄hi ohígbū ka ɔtunōbí nōo lɔfú ŋmó um glá ā ī yá um. Aá bá amānyā, cɛ́ɛ́ kú aá yɔ̄ ī gbɔ̄ɔkɔ, aá gbɔlā nóó.”

³⁵Ó le yɛ tá iyɔ̄bū hī uwā tá lígíí, anɔ́ɔ ó kwú okwúukwu ú kpó tāajɛ gbɔɔ́ ō gbɔ̄ɔkɔ lɛ Ɔwɔicō ka ɔ́dāŋ nōó tɔ́ɔtɛ́ nɛ, ɔ́ɔ lɛ anúɔ nyatá ŋmá eko kú ōwē ā.

³⁶Ó gbɔ̄ɔkɔ kahíníī, “Ádā, Ádā um! A lɔfú yá ɔdā dóódu glá, kwú ikókwū kú ōwē nyā ú ŋmá ɛgiyí um. Náána ā híī yá ɔdā nōo he um ɔtū ā ŋ́, amáŋ yá ɔdā nōo he uwɔ ɔtū ā.”

³⁷Anɔ́ɔ ó gā gáā má ayíkpó ɛtɛ́trɛ́ɛtá ā bá í gbiyɔ̄lā. Ó ka lɛ Upíta ka, “Usáyímɔ̄ni, aá bá ī gbiyɔ̄lā nɛɛ? Aá lɔfú yēeyī gbɔ̄ɔkɔ ó kōō áwa ékpónú glá ŋ́ nɛɛ?”

³⁸Anɔ́ɔ ó da uwá kahíníī, “Aá leyī kwɛcɛ, cɛ́ɛ́ kú aá yɔ̄ ī gbɔ̄ɔkɔ, ohígbū ojámá nōo géē yá, nōo í yá kú aá bīya íne kú Ɔwɔicō. Odo le tútū amáŋ ɔkpíyē ā le gbagbafú.”

³⁹Anɔ́ɔ ó nyɛ̄ɛ̄ kpɔ́ gáā lɛ ɛdɔ ɔkɔ nōó tɛtɛ gbā gbɔbū ā gbā kpɔ́ á.

⁴⁰Ó klla gā ɛgiyí ayíkpó ā, anɔ́ɔ ó má kéē lɛ iyɔ̄lā kpó gbo. É kōō lɛ eyī kú uwā kwɛcɛ glá ŋ́. É jé ohi nēé í tá ɔ̄ ā ŋ́.

⁴¹Ó klla gā igbo ɔ́mɛtá, ó da uwá kahíníī, “Aá bá gē mlɛ́nyɔ́ ī gbiyɔ̄lā kpɔ́ nɛɛ? Ó jɛ́ ɛ́ɛ́! Eko ā le yá ɛɛ́. Ācɛ obɔ̄bí ā gáā kwú Ɔyínɔ̄nyīlɔ kú Ɔ̄cɛ ɛɛ́.

⁴²Aá cāŋjɛ, kú alɔ nyɔ̄. Ɔ̄cɛ nōo gáā yá ibīyājɛ tū um ā gā ajaajɛ ɛɛ́.”

⁴³Ujísɔ̄si bī ɛlā okónu yɔ̄ ī ka, ɛ́ɛ́ nɛ̄ Ujúdasi, éyi kú ayíkpó igwɛ́ɛpa ā wā á. Ó wā mla ɛwa kú ācɛ nɛ̄ ācogwɛ́ɛya mla aítíca kú íne mɛ́mla anyākwɔ́cɛ fu tá ɔ̄ ɔkwu ā. É bī ɔkpacaŋ́gelī mla ogbló abɔ̄.

⁴⁴Ɔ̄coyíbiyājɛ ā tɛtɛ lɛ ɔdācabɔ̄ éyi je lɛ uwá ka, ɔ̄cɛ nɛ̄ anúɔ géē lɛ okónu kwu ɔ́ okónu ā, wɛ ɔ̄cɛ ā á. Ó ka ɛ́ɛ̄ lɛ ɔ́ kwú kéē kwú ɔ̄ ú nyɔ̄, kéē leyīkwu ɔ́ lɔɔlɔhi.

⁴⁵Abɔ̄ nɛ̄ Ujúdasi gā ā, ó le yɛ tá ɛgiyí Ujísɔ̄si bōōbū, anɔ́ɔ ó da ɔ́ kahíníī, “Itíca,” anɔ́ɔ ó lɛ okónu kwu ɔ́ okónu á.

⁴⁶Anɔ́ɔ é lɛ Ujísɔ̄si kwú, kwú abɔ̄ í bī ɔ̄ lɔfú lɔfú á.

⁴⁷Amáŋ ɔ̄cɛ éyi kú ipú ācɛ nēe háyi abɔ́ɔ ā le ɔkpacaŋ́gelī kú nū pi, lɛ ɔ́ gɔ̄ ɔfiyɛ kú otrɛ̄yí ācogwɛ́ɛya éyi ahɔ̄, lɛ ɔ́ ahɔ̄ hɛ́ táajɛ.

⁴⁸Anɔ́ɔ Ujísɔ̄si da ɛwa ā kahíníī, “Aá wā, bī ɔkpacaŋ́gelī mla ogbló gaá kwú um bɛ̄ɛka n wɛ ɔ̄cɛ ohéjulúgwu ā nɛɛ?

⁴⁹Ɛ̄cī dóódu n gē yɔ̄ ɛgogbɔ̄ɔkɔ mla aá gē nwū ɛlā, aá kē kwú um ŋ́. Amáŋ ɔdā nēé tá ipú ɛlɔ̄ɔwɔicō ā géē yá jīla.

⁵⁰Anɔ́ɔ odúúdú ayíkpó ā lé pɛ nyɛ̄ɛ̄ hɛ̄ ɔ̄ tá, le pɛ́ kwu.

⁵¹Ó lɛ ɔyípōklóbīya éyi nōo lɛ ahilíki ōfōōfūnū klá iyē yɔ̄ ī tá Ujísɔ̄si ɔkwu. É tíne ō lɛ ɔ́ kwú,

⁵²amáŋ ó lɛ ahilíki ā kpóbónu tóohɛ́ɛwa le kwu.

⁵³É lɛ Ujísɔ̄si bī ga ɔlɛ́ otrɛ̄yí kú ācogwɛ́ɛya ā. Odúúdú aɔ́cɛ́ kú ācogwɛ́ɛya mla anyākwɔ́cɛ mɛ́mla aítíca kú íne ā le jila bá abɔ́ɔ.

⁵⁴Upíta tá uwā ɔkwu ɛcɛɛcɛ anɔ́ɔ ó le tá ódúdɔ̄lɛ́ kú otrɛ̄yí kú ācogwɛ́ɛya ā. Ó gaá cīce mla ācogbāājɛ abɔ́ɔ, yɔ̄ gē jɛ̄ ɔlá.

⁵⁵Aótrɛ̄yí kú ācogwɛ́ɛya mla aúkánsulu ā, tíne ācɛ nēe géē cē ijáalí tū ɔ̄, cɛ́ɛ́ kéē lɛ ɔ́ ŋmó, amáŋ é lɛ ijáalí dóódu ŋ́.

⁵⁶Aíjáalí ɛ̄kɛ̄mgbɛ̄ alɛwa wā ī cīije bá ɔ̄, amáŋ ijáalí kú uwā í wɛ ékpó ŋ́.

⁵⁷Anɔ́ɔ ācɛ ōhī cāŋjɛ, anɔ́ɔ é cīije bá Ujísɔ̄si ka,

⁵⁸ “Alɔ pó abɔ̄ ó ka, ‘N géē lɛ Agblīihɔ-nɛ̄hi nɛ̄ ācɛ bī abɔ̄ gwó ā ca tāajɛ, cɛ́ɛ́ n lɛ ɛ̄nɛ̄ ɔlɛɛcɛ í bī abɔ̄ kú nū gwó ŋ́ mā, gwó ɛ̄cī ɛtá.’”

⁵⁹Ó kōō uwá, abɔ̄yī uwā ā, ijáalí kú uwa í wɛ ékpó ŋ́.

⁶⁰Otrɛ̄yí kú ācogwɛ́ɛya ā, cāŋjɛ háyi icō iyɔ̄bu odúúdú uwā, anɔ́ɔ ó da Ujísɔ̄si kahíníī, “A lɛ ijáalí nēé cɛ̄ tū uwɔ ā pó ɛɛ́. A lɛ ɔdā dúú nāa í ka a?”

⁶¹Amáŋ Ujísɔ̄si í kōō kɛlā dóódu ŋ́. igbɔhá kpɔ́, otrɛ̄yí kú ācogwɛ́ɛya ā da ɔ́ ɔ̄kā kahíníī, “Awɔ wɛ Ohɔ́nyɛtá, Ɔyínɔ̄nyīlɔ kú Ɔwɔicō nɛ̄ ācɛ ī wóófu nū áā?

⁶²Ujísɔ̄si tá ohi kahíníī, “Ami nɛ̄, aá géē má ɔyínɔ̄nyīlɔ kú Ɔ̄cɛ cīce abɔ̄lɔ́ná kú Ɔwɔicō nōo lɔfú fíyɛ́ dúú ā abɔ̄ ó géē wā ɛyí ojuja kú ɔkpancō ā!

⁶³Otrɛ̄yí kú ācogwɛ́ɛya ā lɛ awulú kú nū híla, anɔ́ɔ ó kahíníī, “Alɔ í cɛgbá ijáalí dóódu gɛ ŋ́!

⁶⁴Aá le ɛlā obɔ̄bí nɛ̄ ó ka lɛyíkwu Ɔwɔicō ā pó ɛɛ́. Ɔdí wɛ ɛpɔ̄ nɛ̄ aá ī hɛ́ kpɔ́ ɛɛ́ ā?” Odúúdú uwā cɛ̄ tɔ̄há lɛ ɔ́ ŋmɛ́pɔ̄bí anɔ́ɔ é kéē lɛ ɔ́ ŋmó á.

⁶⁵Ācɛ ōhī gbɔɔ́ ō tá ahɛ klá anú. É le ɔ́ eyī gbō, anɔ́ɔ é le abɔ̄ gɛ́ ɔ̄, anɔ́ɔ gē da ɔ́ ka, ɔ́ɔ jé ɔ̄cɛ nɔ́ɔ lɛ abɔ̄ gɛ́ ɔ̄ āā? Ācogbāājɛ mīyɛ ɔ́, lɛ abɔ̄ fīyɛ̄ ahɔ̄.

⁶⁶Upíta yāajɛ Ódúdɔ̄lɛ́ ā kpɔ́, eko nɛ̄ ɔ̄cɔcɛ̄hɔ̄ nɔ̄nyā kú ɔlɛ́ otrɛ̄yí kú ācogwɛ́ɛya ā gā abɔ́ɔ.

⁶⁷Eko nōó lɛ Upíta má abɔ̄ ó yɔ̄ ī jɛ̄ ɔlá ā, ɔyípɔ̄nɔ̄nyā ā leyīkwu ɔ́ eyī kpaakpa anɔ́ɔ ó kahíníī, “A tɛtɛ yɔ̄ mla Ujísɔ̄si kú Unásārēti dúú.”

⁶⁸Amáŋ ó le híhó kahíníī, “Ń jé ŋ́, ń jé ɔdā nāa yɔ̄ ī kɛlā lɛyíkwu ɔ́ ā ŋ́.” Anɔ́ɔ ó nyɛ̄ɛ̄ ga ɛgiyí ɔwɛ nōo yɛ bū okómpīinu ga ɛcɛ ā. Anɔ́ɔ ɔbáagwu le ogwú tū á.

⁶⁹Ɔ̄cocɛ̄hɔ̄ nɔ̄nyā, klla le ɔ́ má abɔ́ɔ, anɔ́ɔ ó le ɛlā ékpékpó ā ka lɛ ācɛ nēe māhayi abɔ́ɔ ā kpɔ́. Anɔ́ɔ ó kahíníī, “Ó wɛ éyi kú uwā!”

⁷⁰Amáŋ Upíta lɛ íhó hɛ́ kpɔ́. Eko lígíí le gla, ācɛ nēe māháyi abɔ́ɔ ā klla lɛ ɛlā kpóce Upíta kpɔ́ kahíníī, “Á híhó ka anúɔ í wɛ éyi kú uwā glá ŋ́, ohígbū ka a ŋmá Ugálili dúú.”

⁷¹Anɔ́ɔ Upíta ka le ɛka gbo ka anúɔ yɔ̄ ī kɛlā ɔkwɛ̄yi! Ɔwɔicō ká ɔ̄ lɛ italā yá anúɔ ɔ́dāŋ koó lɛ ā ŋ́. Ó ka anúɔ í jé ɔ̄cɛ nɛ́ɛ yɔ̄ ī kɛlā lɛyíkwu ɔ́ ā ŋ́!”

⁷²Anɔ́ɔ ɔbúgwū le ogwú tū eko ɔ́ɔmā á, anɔ́ɔ Upíta le blakwu ɛlā nɛ̄ Ujísɔ̄si tɛtɛ da ɔ́ kahíníī, “Gbɔbū kú ɔbúgwū kóō tōgwú igbo ɛpa ā, a géē híhó igbo ɛtá ka anúɔ í jé um ŋ́.” Ó fōtíikwū kpóo, ó jikwū ā nɛ̄ɛ̄nɛ̄hi.