Read idoma UMÁKI 15 Bible Online

UMÁKI 15 - idoma bible

UMÁKI 15

¹Ɔ̄cɔ̄ɔcī blibli ā, aótrɛ̄yí kú ācogwɛ́ɛya mla anyākwɔ́cɛ mla aítíca kú íne mɛ́mla odúúdú Ukánsulu ā lɛ ojuju kú uwa yá. É kwú agbá ú kwu Ujísɔ̄si abɔ̄, anɔ́ɔ é lɛ ɔ́ bī nyɔ̄ í tū Upáyílēti abɔ̄ á.

²Upáyílēti da ɔ́ ɔ̄kā kahíníī, “Awɔ wɛ ɔcɛ́ kú ācɛ Ujíyu áā?” Ujísɔ̄si tá ɔ̄ ohi ka, “Awɔ ka lɛ a á n.”

³Aótrɛ̄yí kú ācogwɛ́ɛya ā bá gē kpó ɔdā alɛwa ce ɔ́.

⁴Anɔ́ɔ Upáyílēti klla lɛ ɔ̄kā da ɔ́ kpɔ́ kahíníī, “Ɔdíyá nɛ̄ á gáā cīla ɔ̄kā dóódu ŋ́ mā? Jāhɔ̄ tá odúúdú ɔdā nēé kpó ce uwɔ ā!

⁵Ujísɔ̄si tá kóō kɛlā kpɔ́ɔ́kpɔ́, anɔ́ɔ Upáyílēti le hídáagó á.

⁶Ɛpláko kú ucɛ kú Onyatá ā, ó gē wɛ ucē kú Upáyílēti kóō hɛ́ olagbá éyi tá lɛ ācɛ Ujíyu.

⁷Ó lɛ eko éyi nɛ̄ ācɛ cīlɛ̄fú le unu egidi nu lɛ ɔ̄cɛ éyi ŋmó. É lɛ uwá kpó tāagbā. Ɔ̄cɛ éyi kú uwā wɛ (Ubárābasi).

⁸Eko nɛ̄ ɛwa le jīla gbɔɔ́ ō da Upáyílēti kóō lɛ ɔdā olɔhi nōó ge yá lɛ uwá ojígógó ā yá ā.

⁹Ó lɛ ɔ̄kā da uwá kahíníī, “Aá dɔɔ̄kā kú um lɛ ɔcɛ́ kú ācɛ Ujíyu ā hɛ́tá lɛ aá nɛɛ?”

¹⁰Ó le jé lɔɔlɔhi ka ohígbū ímálanyi Ujísɔ̄si nɛ̄ otrɛ̄yí kú ācogwɛ́ɛya gē má ā yá, ɛ́ɛ́ nēé kwú ɔ̄ gé le anúɔ á.

¹¹Amáŋ otrɛ̄yí kú ācogwɛ́ɛya ā lɛ nwū tū ɛwa ā ipú kéē cɛ̄ Upáyílēti kóō lɛ Ubárābasi hɛ́tá lɛ uwá ikɔkɔ Ujísɔ̄si.

¹²Upáyílēti lɛ ɛlā ka lɛ ɛwa ā kpɔ́ kahíníī, “Ɔdí nɛ̄ aá dɔɔ̄kā kú um yá mla ɔ̄cɛ ɛ̄nɛ̄ aá hī ka ɔcɛ́ kú ācɛ Ujíyu āā?”

¹³É lɛ ɔkɔ cɛyí dɛ̄gba kahíníī, “Lɛ ɔ́ nyɔ́kpá!”

¹⁴Upáyílēti da uwá ɔ̄kā kā, “Ɔdōbɔ̄bí nyá nɛ̄ ó yā?” É klla lɛ ɔkɔ cɛyí dɛ̄gba gbōmgbōm fíyɛ́ kahíníī, “Lɛ ɔ́ nyɔ́kpá!”

¹⁵Anɔ́ɔ abɔ̄ Upáyílēti gē yɔ́tūkpoókpoó kóō yá ɔdā nɛ̄ ɔtū géē he uwá ā, anɔ́ɔ ó lɛ Ubárābasi hɛ́tá lɛ uwá á. Ó cɛ̄ lɛ ācɛ lɛ Ujísɔ̄si gɔ́, anɔ́ɔ ó kwú ɔ̄ ú tū uwā abɔ̄ kéē lɛ ɔ́ nyɔ́kpá.

¹⁶Aícɔ́ɔja ā kwú Ujísɔ̄si ú bī ga ipú odúdɔlɛ̄ kú ogbla kú ɔlɛ́ Igbómína ā, anɔ́ɔ é lɛ aícɔ́ɔja ohile nēe bá abɔ́ɔ ā hīgwú á.

¹⁷É kwú awulú kú otómbíyē ú tá klá Ujísɔ̄si iyē, anɔ́ɔ é bī ujē lɛ ɔfla kú ɔcɛ́ yá, anɔ́ɔ é kwú ɔ̄ ú wu ɔ́ ɛyí.

¹⁸Anɔ́ɔ é gbɔɔ́ ō tá ɔ̄ icɔ́gbá ɔcɛ́ ka, “Ágábáidu ɔcɛ́ kú ācɛ Ujíyu!”

¹⁹É lɛ ogbló fīyɛ̄ ɔ̄ ɛyí, é tá ahɛ klá anú, é lɛ okwúukwu kwajɛ túkpɛɛ́ iyɔ̄bū nū.

²⁰Eko nēé lɛ ɛbɛ yá ɔ̄ kwɛyí ā, é lɛ awulú kú otombíyē ā kpó ŋmá ɔ́ iyē, anɔ́ɔ é kwú úwé kú nū í kpó wu ɔ́ iyē á. Anɔ́ɔ é lɛ ɔ́ bītá ga ɛga nēé gáā je ɔ́ nyɔ́kpá ā.

²¹ Eko nēé yɔ̄ ī nyɔ̄ ā, é lɛ ɔ̄cɛ éyi nēé hi ka Usáyímɔni má, ó ŋmá eyīpɔ́lɛ́ yɔ̄ ī wā ipú igelī nɛ̄hi ā, anɔ́ɔ aícɔ́ɔja ā lɛ ɔ́ pi abɔ̄fú kóō bī ɔcóōnyɔ́kpá kú Ujísɔ̄si. (Usáyímɔni ŋmá Usirín, anú kē wɛ ádā kú Alesáŋda mla Urúfɔ̄si á).

²²É lé Ujísɔ̄si bī ga ɛga éyi nēé hī ka Ugɔ́ɔ́gɔ̄ta ā, nɛ̄ ɛyí kú iyē ā lé kahíníī, “ɛga kú ákōklō ɔ̄cɛ.”

²³É tíne kéē je ejé nēé lɛ ɛcí nēé hi ka Umɛ́ɛ ā tū ɔ̄ lɛ ɔ́ kóō gwá abɔ́ɔ, amáŋ Ujísɔ̄si tá ō gwá ejé ā.

²⁴ Anɔ́ɔ é kwú ɔ̄ ú nyɔ́kpá á. É le úwé kú nū kɔ̄ lɛ iyī uwā. É le ūlī tá cɛ́ɛ́ kéē jé ɔ̄cɛ nōo géē je āyā kú úwé kú nū ā.

²⁵Ó wɛ ɛplá oje ahāanɛ kú ɔ̄cɔ̄ɔ̄cī nēé je Ujísɔ̄si nyɔ́kpá á.

²⁶É lɛ ije nēé cē bá ɔ̄ kahíníī, “Ɔcɛ́ kú ācɛ Ujíyu” ā tá playi icō ikpɛ̄yí ɔcóōnyɔ́kpá kú nū ā.

²⁷É lɛ ācohéjulúgwu ɛpa nyɔ́kpá mla Ujísɔ̄si, éyi yɔ̄ abɔ̄lɔ́ná anɔ́ɔ ɔhá ā kē yɔ̄ abɔ̄lúfīyē kú nū.

²⁸Ó ŋmá ɛ̄nyā ā, ɛga kú ipú ɛlā Ɔwɔicō nēé kahíníī, “Ɔdā nēé yá ācɛ obɔ̄bí nēé yá ɔ̄ dúú ā,” le cɛ̄ ɔkwɛ̄yi.

²⁹Ācɛ nēe bá ī yɛ ɔwɛ ā jílɛyí jigijigi tū ɔ̄. É klla cá ɔ̄ ɛcá, yá ɔ̄ ɛbɛ́ gē kahíníī, “Aháa! awɔ nōo géē lɔfú ca Agblīihɔ-nɛ̄hi ā tāajɛ, klla í lɔfú gwó ɛ̄nɛ̄ ɔlɛɛcɛ í bī abɔ̄ gwó glá ŋ́ ɛ̄cī ɛtá glá.

³⁰Abālɔbányā le hīlatá ŋmá ɛyí ɔcóōnyɔ́kpá cɛ́ɛ́ ká ā lɛ iyī wɔ nyatá mɛ́ɛ́nɛ.”

³¹Ɛ́gɔ́ɔmā nɛ̄ aótrɛ̄yí kú ācogwɛ́ɛya ā mla aítíca kú íne ā yá Ujísɔ̄si ɛbɛ́ dúú á. É bá yɔ̄ ī ka lɛ aɔ́mpa uwā ka “Ó nya ācɛ ɔhá tá, amáŋ ó nya iyīnū tá glá ŋ́!

³²Ohɔ́nyɛtá, ɔcɛ́ kú Ísrɛ̄lu ā kóō le hīlatá ŋmá ɛyí ɔcóōnyɔ́kpá abālɔbányā kú ālɔ̄ má ɔ̄ mɛ́ɛ́nɛ, cɛ́ɛ́ alɔ géē cɛ̄ɛ̄lā kú nū!” Ācɛ ɛpa nēé nyɔ́kpá mla anú ā kōō cá ɔ̄ ɛcá dúú.

³³Eko nɛ̄ oje igwɛ́ɛpa kú ɔlɛ́ɛnɔ le yá ā, obū le du ajɛ ɛga dóódu jāā gbó ɛplá oje ɛtá kú ɔlɛ́ɛnɔ.

³⁴ Ɛplá oje ɛtá kú ɔlɛ́ɛnɔ Ujísɔ̄si dɛ̄gba gbōmgbōm kahíníī, “Ɛlɔ̄yi, Ɛlɔ̄yi, lamá sabaktáni?” Nɛ̄ ɛyí nū wɛ, “Ɔwɔicō kú um, Ɔwɔicō kú um, ɔdíyá nāa je mlanyi um ā?”

³⁵Ācɛ ōhī nēe háyi abɔ́ɔ ā lɛ ɛlā nōó ka ā pó, é kahíníī, “Aá má ɔ̄ ɛ́ɛ̄, ó yɔ̄ ī hī Ɛláyíja igwú.”

³⁶Anɔ́ɔ ɔ̄cɛ éyi le kwu gaá lɛ ejé ōmákáká cē tū isoso kwú ɔ̄ ú kwu ɔcí lɛ ɔ́ kóō gwá, anɔ́ɔ ó da uwá kéē háyi kú aá má ɔ̄, ɔ́dāŋ ka Ɛláyíja ɔ́ɔ géē wā gaá je ɔ́ wā ajɛ nɛ.

³⁷Ujísɔ̄si le ɛgba dɛ̄ nɛ̄ɛ̄nɛhi, anɔ́ɔ ó mā owu á.

³⁸Īlī ō hɛ́ inu ɛpa kú Agblīihɔ-nɛ̄hi ā le hɛ́ɛpa ŋmá icō wāajɛ.

³⁹Anɔ́ɔ eko nɛ̄ otrɛ̄yí kú aícɔ́ɔja ofɛhɔ̄ nōo háyi iyɔ̄bū nū ā, nōo má ɔ̄ abɔ̄ ó dɛ̄gba klla mā owu ā kahíníī, “Ɔkwɔ̄ɔ̄kwɛ̄yi, ɔ̄cɛ ā wɛ ɔyí kú Ɔwɔicō!”

⁴⁰Ācɛnyā ōhī bá yɔ̄ ī cokē nū ŋmá ɛga oligbó. Aóhī kú uwā wɛ Umerí Umagadalíni, Umerí ɛ́nɛ́ kú Ujémīsi nɛ̄ŋ́cɛ́ mla Ujósɛ̄fu, mla Usalómi.

⁴¹É yɛce ɔ́ eko nōó yɔ̄ Ugálīli ā. É gē cɛ̄ ɔ̄ ɛhɔ̄ dúú. Ācɛnyā alɛwa ɔhá nēe wā Ujerúsālɛm mla anú ā, bá abɔ́ɔ dúú.

⁴²Ɛplá nɛ̄ ɔ̄nɛ̄ le gbo ā, ɛ́gɛ́nɛ̄ ó wɛ ɛ̄cī Otútū ā, nōó klla wɛ ɛ̄cī nōo gbɔbū lɛ ɛ̄cī Usábāti ā,

⁴³Ujósɛ̄fu ɔ̄cɛ Arimatéya gā. Ó wɛ ɛ́nɛ́nɛ̄ ɔ̄cɛ ipú ācohɛ́pɔ̄, ɔ̄cɛ nɛ̄ anú abɔ̄yīnū gē leyīce oōwā kú ajɔ̄ɔ̄cɛ́ kú Ɔwɔicō. Ó leyī hɔ́lá le yɛ tá ɛgiyí Upáyílēti gaá da ɔ́ kóō kwú okwū kú Ujísɔ̄si ú lɛ anúɔ.

⁴⁴Ó le yá Upáyílēti eyījii, abɔ̄ ó pó ka Ujísɔ̄si ɔ́ɔ gekwú ɛɛ́ mā. Ó le otrɛ̄yí kú aícɔ́ɔja ofɛhɔ̄ ā hīgwú, anɔ́ɔ ó da ɔ́ ɔ̄kā ɔ́dāŋ́ ka ɔ́ɔ gekwú ɔkwɛ̄yi ɛɛ́.

⁴⁵Anɔ́ɔ abɔ̄ ó le pó ŋmá ɛgiyí otrɛ̄yí kú aícɔ́ɔja ofɛhɔ̄ ā, ka ɔ́ gekwú ɛɛ́ mā, anɔ́ɔ Upáyílēti cɛ̄ ka Ujósɛ̄fu kóō kwú okwū ā ú mɛ́ɛnɛ.

⁴⁶Ujósɛ̄fu le ɔpá nɛ̄hɛ́ lā, kwú okwū ā ú wā ajɛ, anɔ́ɔ ó kwú ɔpá nɛ̄hɛ́ ā ú hā tū ɔ̄ á. Anɔ́ɔ ó kwú ɔ̄ ú nyɔ̄ í gwutá ipú únóji nēé yíla tá ipú ápátɛ́cɔ̄ ā. Anɔ́ɔ ó le ɛcɔ̄ míya gaá gwū okónu únóji ā á.

⁴⁷Umerí Umagadalíni mla Umerí ɛ́nɛ́ kú Ujémīsi má ɛga nēé je ɔ́ gwutá ā.