Read idoma UMÁKI 16 Bible Online

UMÁKI 16 - idoma bible

UMÁKI 16

¹Eko nɛ̄ Usábāti le gla ā, Umerí kú Umágāda mla Umerí ɛ́nɛ́ Ujɛ́mīsi mla Usalómi lɛ anɔ̄ okpócu lá kéē géē nyɔ̄ í le nya okwū kú Ujísɔ̄si iyē.

²Ɔ̄cɔ̄ɔ̄cī bli kú ɛ̄cī aflɛ́yí kú aláadi, é le tá únóji ā ɛplá nɛ̄ ɛnɔ le bɛ̄cɛ ā.

³Abɔ̄ nēé bá yɔ̄ í nyɔ̄ ā é da iyī uwā ɔ̄kā ka, ɔ̄nyɛ ɔ́ɔ géē míya ɛcɔ̄ ā ŋmá okónu únóji ā lɛ uwá ā.

⁴Amáŋ eko nēe je eyī gicō ā, é le má ka, é lɛ ɛcɔ̄ ā míya ŋmá okónu únóji ā.

⁵Anɔ́ɔ é le bēé ga ipú únóji ā, é má ɔyípɛ̄ oklobīya nɔ̄nyīlɔ éyi yāajɛ abɔ̄lɔ́ná kú ipú unóji ā, lɛ awulú nɛhɛ̄ pélúú wu iyē. É le hɛ́gilígilí.

⁶Amáŋ ó da uwá kahíníī, “Aá hɛ́gilígilí ŋ́. Aá gē tine Ujísɔ̄si ɔ̄cɛ Unásārēt, nēé nyɔ́kpá ā. Ó le héyī ɛɛ́. Ó yɔ̄ amānyā gɛ ŋ́. Aá má ɛga nēé le okwū nū gwutá tɛtɛ ā.

⁷Aá nyɔ̄ abālɔbányā gaá le da ayíkpó kú nū mla Upíta ka, ó yɔ̄ í nyɔ̄ Ugálili gbēyī uwā. Aá géē má ɔ́ abɔ́ɔ ɛ́gɛ́nɛ̄ ó tɛtɛ da aá gbɔbū, ɛ́ɛ nēé ŋmó ɔ̄ ā.” Anɔ́ɔ é le pɛ́ wɛ̄ɛcɛ, le inya kwu ŋmá ɛgiyí únóji ā, bá í fīyégbúlú nɛ̄hi, ɔtū kú uwā le kpó wogodo. É kōō ka ɔdā dúúmā lɛ ɔ̄cɛ dúú glá ŋ́, ohígbū ka ufi yá uwā nɛ̄hi.

⁸Anɔ́ɔ é lɛ ukɔ́ nɛ̄ alelékwū-ōtɛ̄hɔ̄ ā tū uwā ā kpó ka lɛ Upíta mla aɔ́mpa nū á. Anɔ́ɔ Ujísɔ̄si abɔ̄yī nū le uwá tɛ̄hɔ̄ gɛcɛ ŋmá ɛnɔ̄ɔ̄cī ga ɛnɔ̄ɔ̄nɛ̄ kéē bī olɛhɔ̄ otīihɔ nōo ī nya ācɛ tá nōo gē je oyēeyī opiyoo lɛ ācɛ ā gaá ka lɛ alɛɛcɛ.

⁹Ɛplá nɛ̄ Ujísɔ̄si le héyī ŋmá ɔlekwu ɛ̄cī aflɛ́yí kú aláadi ā, ó lɛ iyīnu mafú aflɛ́yí lɛ Umerí kú Umágāda, ɔ̄cɛnyā nōó nū aálelékwū obɔ̄bí ahāapa ŋmá ipú kú nū ā.

¹⁰Ó le yɛ gaá le da ācɛ nēe tɛtɛ bá mla anú ā. É bá yɔ̄ ī yɔ́tūnōbí klla bá yɔ̄ ī jikwū.

¹¹Anɔ́ɔ eko nɛ̄ ó le da uwá ka Ujísɔ̄si ɔ́ɔ le héyī ā, é cɛ̄ ɛlā nōó ka ā ŋ́.

¹²Igbīhi ɛ̄nyā Ujísɔ̄si klla le hɛ́bɛ̄cɛ ɔwɛ ɛyɛ́ɛ́yí ɔtāhɛ̄ ācɛ ɔlɛ́ uwā nēe yɔ̄ ī ga ipɔ́lɛ́ ɔhá ā.

¹³Anɔ́ɔ é kwúcē nyɔ̄ gaá le ka lɛ ācɛ ohile ā, amáŋ é cɛ̄ ŋ́.

¹⁴Ámōōmɛ ā, o le hɛ́bɛ̄cɛ ɔtāhɛ̄ ayíkpó igwóléyi eko nēé bá gē lé ɔdōlé ā. Ó le ífulá ka tū uwā, ohígbū kéē cɛ̄ɛ̄lā ā ŋ́, é klla lɛ ɔtū olɔfú nɛ̄hi nōó cɛ̄ lɛ uwá, cɛɛlā kú ācɛ nēé má ɔ̄ eko nɛ̄ ó le héyī ŋmá ɔlekwu ā ŋ́.

¹⁵Ó da uwá kahíníī, “Aá nyɔ̄ ga ɛga dóódu kú ɛcɛ ā gaá tɔ́ɔna kú Ɔ̄kōōlɔhi ā lɛ alɛɛcɛ dóódu.

¹⁶Ɔ̄cɛ dúú nōo cɛ̄ nēé lɛ ubatísim yá ɔ̄, é géē nyā ɔ́ tá. Amáŋ ɔ̄cɛ dúú nɛ̄ ó cɛ̄ ŋ́, é géē ŋmó ɔ̄ ɛpɔ̄bí ɛ̄cī nēé géē kɛpɔ̄ tū ācɛ ā.

¹⁷É géē je ɔfú lɛ ācɛ nēe cɛ̄ɛ̄lā ā kéē yúklɔ́ o hídáagó nēe bá nyā, o ŋmá lɛ iye kú um é géē nū aálelékwū obɔ̄bí ŋmá ipú iyē kú ācɛ, é géē kɛlā okónu ucē ɛ̄yīpɛ̄.

¹⁸Ɔ́dāŋ́ nēé kōō kwú ɛgwā ú ŋmáajɛ, ámāŋ kéē kōō lɛ ɔdā ō ŋmó ɔ̄cɛ glá gwá nááná, ó gáā yá uwā ɔdā dúúmā ŋ́. É géē lɛ abɔ̄ ce ācɛ o doōcē ɛyí, ōcē kú uwā kē í mɛ.”

¹⁹Eko nɛ̄ Óndú Ujísɔ̄si le ɛlā ka lɛ uwá kwɛyí ā, é kwú ɔ̄ ú ga ɔkpáncō gaá cīce abɔ̄lɔ́ná kú Ɔwɔicō.

²⁰Anɔ́ɔ ayíkpó ā nyɛ̄ɛ̄ ŋmá abɔ́ɔ gaá gbɔɔ́ ō tɔ́ɔna kú Ɔ̄kōōlɔhi ā ɛga dóódu á. Óndú ā kē yɔ̄ ī yúklɔ́ mla uwá klla cɛ̄ uwā ijáalí ku ɛlā ā, ɔ́ɔ wɛ ɔkwɛ̄yi, ŋmá lɛ ɔdā ō hídáagó nēe yá ā. Aamí.