Read idoma UMÁKI 2 Bible Online

UMÁKI 2 - idoma bible

UMÁKI 2

¹Eko nɛ̄ ɛ̄cī le gla yɛɛ ā, Ujísɔ̄si kwúcē ga Ukapánɔm kpɔ́, anɔ́ɔ ācɛ le pó ka ó yɔ̄ ɔlɛ́.

²Eko kpií ācɛ alɛwa wā í le pɛ́ bá ipú inu ā nɛ̄hi nōo yá kú ɛga dúú kóō jɛ̄ ācɛ gɛ ŋ́, jāā klá iyɔ̄bū ɔwɛ kú inu ā. Ujísɔ̄si kē yɔ̄ ī tɔ́ɔna kú olɛhɔ̄ ā lɛ uwá.

³Anɔ́ɔ ācɛ ɛnɛ gā abɔ́ɔ, lɛ ɔ̄cɛ éyi nɛ̄ iyē kú nū le ŋmó ā tá ipú ákplata gé lɛ Ujísɔ̄si.

⁴É bī ɔ̄cɛnyīlɔ ā ga ɛgiyí Ujísɔ̄si glá ŋ́ ohígbū ɛwa kú ācɛ. Anɔ́ɔ é lɛ ɛyí inu ɛga nɛ̄ Ujísɔ̄si klá piíí ā hɛ́ bū. Eko nēé lɛ ɔ̄gɔ̄ hɛ́ jɛ̄ nɛ̄ ákplata nōo bī ɔ̄cɛ ā í bū ɔ̄ glá ā, é kwu ɔ̄cɛ ā ú bū ɔ̄gɔ̄ ā wāajɛ mla ákplata nɛ̄ ó gwutá anú ā.

⁵Ujísɔ̄si lɛ ɛ́gɛ́nɛ̄ ācɛ nēe bá nyā lɔtūce ɔ́ lɛ ā má ā, anɔ́ɔ ó da ɔ̄cɛ o ŋmííyē ā kahíníī, “Ɔyínɔ̄nyīlɔ kú um, é kwú íne nāa bīya ā í yá uwɔ ɛhi ɛɛ́.”

⁶Aítíca ōhī nēe bá abɔ́ɔ ā, gbɛlá ipú odo kú iyī uwā ka.

⁷“Ɔdíyá nɛ̄ ó bɔ́tū kɛlā ɛ́gɛ́nyā ā? Ɛ̄nyā wɛ atufú ō yá Ɔwɔicō. Anú ōfōōfūnū je íne nɛ̄ ācɛ bīya ā yá ɛhi glá á!”

⁸Ikpíikpó ɔ́ɔmā Ujísɔ̄si lɛ ɔdā nēé yɔ̄ ī gbɛlá ā jé, anɔ́ɔ ó da uwá kahíníī, “Ɔdíyá nɛ̄ aá í gbɛlá ɛdɔ kú ɔdā ɛ́gɛ́nyā ā.

⁹Ó tɔ́ɔtɛ kú n̄ ka lɛ ɔ̄cɛ o ŋmííyē nyā ka, ‘É kwú íne nāa bīya ā í yá uwɔ ɛhi ɛɛ́, fíyɛ́ o ka ka, kwu ipoto kú uwɔ ú, ká ā yāwu!

¹⁰N géē cābɔ̄ lɛ aá ka, ami, ɔyínɔ̄nyīl kú Ɔ̄cɛ lɛ íkwu ipú ɛcɛ ká n̄ je íne nɛ̄ ācɛ bīya ā yá uwa ɛhi.” Anɔ́ɔ ó ka lɛ ɔ̄cɛ o ŋmííyē ā ka,

¹¹“N da uwɔ ka, nyāŋjɛ, kwú ipoto kú uwɔ ú, cɛ́ɛ́ ká ā ga ɔlɛ́!”

¹²Ipéeyi ɛjɛ̄ɛ̄jī uwā, ɔ̄cɛnyīlɔ ā cāŋjɛ háyicō, kwú ipoto kú nū ú, anɔ́ɔ ó nwúleyīkwū nyɛ̄ɛ̄ á. Ɛjɛ̄ɛ̄jī uwā le kpó hídáagó dúúdu, anɔ́ɔ é cɛ̄tra Ɔwɔicō yɔ̄ ī kahíníī, “Alɔ ī má ɔdā dúú bɛ̄ɛka ɛ̄nyā jééjéē ɛ́ɛ́ ŋ́!”

¹³Ujísɔ̄si klla kwúcē ga okónu óókpoó kú Ugálīli ā kpɔ́. Ācɛ alɛwa nɛ̄hi le pɛ́ wā í tá ɔ̄ abɔ́ɔ, anɔ́ɔ ó gbɔɔ́ ō nwū uwā ɛlā Ɔwɔicō á.

¹⁴Abɔ̄ ó yɔ̄ gē yɛ nyɔ̄ ā, ó lɛ ɔ̄cɛ o dɔlɛ́ éyi má, Ulífāyi ɔyí kú Álfīyɔsi cicee inúklɔ́ kú nū. Ujísɔ̄si da ɔ́ kahíníī, “Yɛce um.” Anɔ́ɔ Ulífāyi nyāŋjɛ gbɔɔ́ ō yɛce ɔ́ á.

¹⁵Eko kpiíí le gla, Ujísɔ̄si yɔ̄ í lé ɔdōlé ɔlɛ́ kú Ulífāyi. Ācodɔlɛ́ mɛ́mla ācɛ nēé leyī gwu uwā bónū dúú ā bá gē tū Ujísɔ̄si ɔkwu, anɔ́ɔ ācɛ alɛwa kú uwā wā í lé ɔdōlé tɔhā mla anú mɛ́mla ayíkpó kú nū.

¹⁶Amáŋ eko nɛ̄ aítíca kú íne nēe wɛ Ufárīsisi ā, le má ka Ujísɔ̄si yɔ̄ gē lé ɔdōlé mla ācodɔlɛ́ mɛ́mla ācɛ nēé leyi gwū uwā bónū ā, anɔ́ɔ é da ayíkpó kú nū kahíníī, “Ɔdíyá nɛ̄ ó ī lé ɔdōlé mla ɛdɔ ācɛ nēe bá abɔ́ɔ ā?”

¹⁷Ujísɔ̄si lɛ ɛlā nēé ka ā pó anɔ́ɔ ó tū uwa ohi kahíníī, “Ācɛ nēe lɛ ɔbɔ́lā í cɛgbá olobócí ŋ́, amáŋ odoōcē ā ī cɛgbá olobócí á. Ń wā gaá hī ācɛ olɔhi igwú ŋ́, amáŋ ācɛ nēé leyī gwu uwā bónū ā nɛ̄ n.”

¹⁸Ɛ̄cī éyi ayíkpó kú Ujɔ́ni Oyúbatísīm mɛ́mla ācɛ Ufárisīsi bá gē gwōkónu. Anɔ́ɔ ācɛ ōhī wā i da Ujísɔ̄si kahíníī, “Ɔ́díyá nɛ̄ ayíkpó kú Ujɔ́ni mɛ́mla ayíkpó kú ācɛ Ufárisīsi ge gwōkónu ā. Amáŋ ayíkpó kú uwɔ í gē gwū ŋ́ mā ā?

¹⁹Ujísɔ̄si tóohi kahíníī, “Aá cíkā ō leyīce ka aúgbɔga kú ɔ̄cɛ olɔnyā ɛ̄yīpɛ̄ í gwōkónu eko nɛ̄ ɔ̄cɛ olɔnyā ɛ̄yīpɛ̄ ā yɔ̄ mla uwá ŋ́.”

²⁰Eko géē wā nēé géē je ɔ̄cɛ olɔnyā ɛ̄yīpɛ̄ ā ŋmá ɛgiyí uwā, cɛ́ɛ́ é géē gwōkónu.

²¹Ɔ̄cɛ dúúmā í gē bī īlī ɛ̄yīpɛ̄ le gɔ́ bá ɛga o híla kú īlī nɛ̄ncɛ̄ ā ŋ́, ohígbū ka īlī ɛ̄yīpɛ̄ ā í wutū í je īlī nɛ̄ncɛ̄ ā híla cɛ́ɛ́ ó le ɔ̄gɔ̄ o lɔwá fíyɛ́ hɛ́ tá ipú nū.

²²Ɔ̄cɛ dúúmā í gē pīya ejé ɛ̄yīpɛ̄ tū ipú óhi kú ɛbɛ́ nɛ̄ncɛ̄ ŋ́, ohígbū ka ejé ā géē je óhi kú ɛbɛ́ ā ca, anɔ́ɔ ejé ā mɛ́mla óhi kú ɛbɛ́ ā í kpó yíífi. Ikɔkɔ ɔ́ɔmā, óhi kú ɛbɛ́ ɛ̄yīpɛ̄ nēé gē pīya ejé ɛ̄yīpɛ̄ tū ɔ̄ á.

²³ Ɛ̄cī Usábāti éyi, Ujísɔ̄si yɔ̄ ī yɛ ɔwɛ nōo bū ipú ɛhɔ̄ kú īkpɔ̄dā. Abɔ̄ ayíkpó kú nū bá gē yɛ mla anú ā, é gbɔɔ́ ō cē īkpɔ̄dā ā lé.

²⁴Anɔ́ɔ ācɛ Ufárisīsi da Ujísɔ̄si kahíníī, “Má ɔ̄, ɔdíyá nɛ̄ ayíkpó kú uwɔ bá yɔ̄ ī bīya íne kú ɛ̄cī Usábāti kú alɔ, o ŋmá lɛ ɔdā nēé bá yɔ̄ ī yá nyā ā?”

²⁵Ujísɔ̄si tá uwa ohi kahíníī, “Aá jé ŋmá ɔkpá ɔdā nɛ̄ Udéfīdi yá eko nɛ̄ ó cɛgbá ɔdōlé ā ŋ́ nɛɛ? Ɛmiyɛ yɔ̄ í ŋmó anú mla ācɛ ɔlɛ́ nū,

²⁶anɔ́ɔ ó le bēhé tá ipú inu ɔlɛ́ Ɔwɔicō. Eko nɛ̄ Abíyāta wɛ otrɛ̄yí kú ācogwɛ́ɛya ā, anɔ́ɔ ó kwú igbō nēé je lɛ Ɔwɔicō ā ú lé klla lɛ ōhī kú nū je lɛ aɔ́mpānū á. Ɛ́gɛ́nɛ̄ íne kú alɔ lɛ ā, ɔ̄cogwɛ́ɛya ā ōfōōfūnū lɔfú lé igbō ā glá á.

²⁷Anɔ́ɔ Ujísɔ̄si kahíníī, “É yá Usábāti kóō tīile lɛ ɔ̄cɛ. É yá ɔ̄cɛ kóō tīile lɛ Usábāti ŋ́.

²⁸Ohígbū ɔ́ɔmā, Ɔyínɔ̄nyīlɔ kú Ɔ̄cɛ wɛ Óndú kú Usábāti á.”