Read idoma UMÁKI 3 Bible Online

UMÁKI 3 - idoma bible

UMÁKI 3

¹Anɔ́ɔ Ujísɔ̄si kwúcē wā ipú ɛgogbɔ̄ɔkɔ ā, ɔ̄cɛ éyi yɔ̄ abɔ́ɔ nɛ̄ abɔ̄ kú nū le ŋmó.

²Ācɛ ōhī bá abɔ́ɔ cɛ́ɛ́ kéē kpɛ́lā ce Ujísɔ̄si koó lɛ íne kú Umósīsi bīya. Anɔ́ɔ é leyī tá ɔ̄ gɛɛ ɔ́dāŋ koó géē hɛ́ ɔ̄cɛ ā tá ɛ̄cī Usábāti.

³Ujísɔ̄si da ɔ̄cɛ ā kahíníī, “Wā icō iyɔ̄bū amānyā.”

⁴Anɔ́ɔ ó lɛ ɔ̄kā da ācɛ ā kahíníī, “Ɔdí nɛ̄ íne kú alɔ jɛɛga lɛ alɔ kú ālɔ̄ yá ɛ̄cī Usábāti ā? Ká ɔ̄cɛ kóō yá ɔdōlɔhi kɛ̄ɛ kóō yá odōbɔ̄bí, ká ɔ̄cɛ kóō nya oyēeyī tá kɛ̄ɛ kóō lɛ ɔ́ yíífi?” Amáŋ é ka ɔdā dúúmā ŋ́.

⁵Ujísɔ̄si le cɔ̄nū abɔ̄ nɛ̄ ó leyī yɛ uwá jīla biílí ā, amáŋ nááná ā ɔtū kú nū le bīya ohígbū ɔtū olɔfú mla ɔdōbɔ̄bí kú uwā. Anɔ́ɔ ó da ɔ̄cɛnyīlɔ ā kahíníī, “Lɛ abɔ̄ kú uwɔ naŋ́daa.” Ó lɛ ɔ́ naŋ́daa anɔ́ɔ ó le yá lɔhi iyínū á.

⁶Anɔ́ɔ ācɛ Ufárisīsi le pɛ́ wɛ̄ɛcɛ ŋmá ɛgogbɔ̄ɔkɔ gáā le jila ikpííkpó ɔ́ɔmā mla igwú kú imélí kú Uhérɔdu, anɔ́ɔ é le ojuju kú ɛ́gɛ́nɛ̄ é géē ŋmó ɔ̄ ā yá á.

⁷Ujísɔ̄si mla ayíkpó kú nū le pɛ́ nyɛ̄ ga óókpoó kú Ugálīli, ɛwa nɛ̄hi kú ācɛ nēe ŋmá ɛga dóódu ā tá ɔ̄ ɔkwu. É ŋmá Ugálīli, é ŋmá Ujudíya,

⁸ŋmá Ujerúsālɛm, ŋmá ajɛ nɛ̄hi kú Idúmēya, ŋmá ajɛ nɛ̄ɛ̄nɛ̄hi nōo yɔ̄ áklō kú ɛnɔ̄ɔ̄cī kú Ujɔ́dan ā, é klla ŋmá ajɛ kú aígelī nɛ̄hi kú Utáyi mɛ́mla Usidɔn. Odúúdú ācɛ nēé bá nyā pɛ̄ wā ɛgiyí Ujísɔ̄si ohígbū ɔdā nēé pó ka ó yɔ̄ í yá ā.

⁹Ɛ́gɛ́nɛ̄ ɛwa ā nwuné nɛ̄ɛ̄nɛ̄hi lɛ ā cɛ̄ lɛ Ujísɔ̄si le ka lɛ ayíkpó kú nū kéē lɛ ɔ́kɔ éyi tútū lɛ anúɔ, cɛ́ɛ́ kú ācɛ kéē lɔfú mɛ́ɛga wā ɛgiyí nū ajaajɛ ŋ́ ɛ́ɛ́ nēé kōō ī lɛ ikpó da ɔ́ tāajɛ ŋ́.

¹⁰Ó lɛ ācɛ alɛwa hɛ́tá ŋmá ōcē, anɔ́ɔ odúúdú ācɛ odoōcē yɔ̄ gē kwɛga ga ɛgiyí nū, o yá ɛ́ɛ́ kéē lɛ abɔ̄ kwu ɔ́.

¹¹Anɔ́ɔ eko dúú nɛ̄ ācɛ nēe lɛ alelékwū obɔ̄bí ipú iyē kú uwā ā lɛ ɔ́ má nɛɛ, é gē gwōnū iyɔ̄bū nū ī dɛ̄gba kahíníī, “Awɔ ā wɛ Ɔyínɔ̄nyīlɔ kú Ɔwɔicō á!”

¹²Ujísɔ̄si gē pi alelékwū obɔ̄bí ā ahɔ̄ lɔɔlɔhi kéē ka lɛ ɔ̄cɛ dúúmā ɛdɔ ɔ̄cɛ nɛ̄ ó wɛ ā ŋ́.

¹³Anɔ́ɔ Ujísɔ̄si le tá icō ɛfu éyi anɔ́ɔ ó lɛ ācɛ nɛ̄ ó dɔɔ̄kā ā hīgwú gé lɛ iyīnū. É le pɛ́ wā ɛgiyí nu,

¹⁴anɔ́ɔ ó lɛ ācɛ igwɛ́ɛpa nɛ̄ ó hī ayíkpó ā fu á. Ó da uwá kahíníī, “N lɛ aá fu kú aá yɔ̄ mla um. N géē tū aá ɛhɔ̄ gɛcɛ kú aá nyɔ̄ í tɔ́ɔna kú ɔkōōlɔhi,

¹⁵aá géē lɛ íkwu kú aá nú ebilíi tɛ́ɛcɛ.”

¹⁶Ɔ̄cɛ nēe bá nyā wɛ ācɛ igwɛ́ɛpa nɛ̄ ó fu á, Usáyímɔ̄ni (Ujísɔ̄si hī ɔ̄ ka Upíta);

¹⁷Ujémīsi mla ɔyínɛ́ nu Ujɔ́ni, ayínɔ̄nyīlɔ kú Usébēdi (Ujísɔ̄si hī uwa ka Ubowanájīsi nɛ̄ ɛyí nū wɛ ācɛnyīlɔ kú akpáabana).

¹⁸Ándru, Ufílīpu, Ubatolómiyu, Umátiyu, Utɔ́mɔ̄si, Ujémīsi ɔyínɔ̄nyīlɔ kú Álfīyɔsi, mla Utádiyɔ̄si Usáyímɔ̄n ɔ̄cɛ Ukénan,

¹⁹mɛ́mla Ujúdasi Isikárīyɔtu, nōo yá ibīyājɛ tū Ujísɔ̄si ā.

²⁰Anɔ́ɔ Ujísɔ̄si le tá ɔlɛ́ á. Kpɔ́ɔ́kpɔ́ ɛwa nɛ̄hi le pɛ́ wā í jila, nɛ̄ ó jɛga lɛ Ujísɔ̄si mla ayíkpó kú nū kéē kōō le ɔdōlé lé ŋ́.

²¹Eko nɛ̄ ācɛ ɔlɛ́ nū lɛ ɔdā nōo yɔ̄ ī yá ā pó ā, é le pɛ́ nyɔ̄ kéē lɛ ɔ́ kwú, ohígbū ka é yɔ̄ í ka kahíníī, “Ikpɛ̄yí kú nū le pīyeyī.”

²²Aítíca ōhī nēe pɛ́ wā ŋmá Ujerúsālɛm ā bá gē kahíníī, “Ubéésībulu yɔ̄ ipú nū! Anú ā wɛ ɔcɛ́ kú aébilíi nōo je ɔfú lɛ ɔ́ kóō nū uwā wɛ̄ɛcɛ á.”

²³Anɔ́ɔ Ujísɔ̄si lɛ uwá hīgwú ga ɛgiyí nū, anɔ́ɔ ó tá ācīije lɛ uwá kahíníī, “Abɔ̄ ó yá nɛ̄ Usétan lɔfú nū Usétan tɛ́ɛcɛ glá ā?

²⁴Ɔ́dāŋ́ nɛ̄ ɔlɛ́ dúúmā le kɔ̄ ígwíígwu nēé bá ī nunu tū iyī uwā, ɔlɛ́ ɔ́ɔmā í mɛ tāajɛ.

²⁵Ɔ́dāŋ́ nɛ̄ ipɔ́ɔnū dúúmā le kɔ̄ ígwíígwu nēe bá gē nunu tū iyī uwā ipɔ́ɔnū ɔ́ɔmā í mɛ tāajɛ.

²⁶Ɔ́dāŋ́ ka ɔlɛ́ usétan le kɔ̄ ígwíígwu, o gáā lɛ́ɛcɛ glá ŋ́, amáŋ ó géē kɔ̄ klla í mɛ tāajɛ.

²⁷Ɔ̄cɛ dúú í gwō tū ɔlɛ́ ɔ̄cɛ olɔfú gaá kpó iyó kú nū glá ŋ́, ń táafú ŋ́ ó lɛ ɔ́ gbō tāajɛ gbɔbū, ɛ́ɛ́ nɛ̄ ó í má ɛga kpó iyō kú nū glá á.

²⁸N yá kú aá le jé kpócíi ka Ɔwɔicō lɔfú je odúúdú íne nɛ̄ ɔ̄cɛ bīya ā mɛ́mla odúúdú ɛlā obɔ̄bí nēé ka ā yá uwā ɛhi glá.

²⁹Amáŋ ɔ̄cɛ dúúmā nōo lɛ ɛcá cá alelékwū ihɔ, é gáā je íne nɛ̄ ó bīya ɔ́ɔmā yá ɔ̄ ɛhi ŋ́, ohígbū ka ínoōbīya nɛ̄ Ɔwɔicō í gē je yɛ́ɛhi ŋ́ mā nɛ̄ ó bīya á.”

³⁰Ujísɔ̄si ka ɛ̄nyā ohígbū ka ācɛ ōhī yɔ̄ ī ka, “Alelékwū obɔ̄bí yɔ̄ ipú nu.”

³¹Anɔ́ɔ ɛ́nɛ́ mɛ́mla ayínɛ́ nɔ̄nyīlɔ kú Ujísɔ̄si le pɛ́ wā abɔ́ɔ á. É háyi iyɛ̄ɛcɛ kú ɔlɛ́ ā, anɔ́ɔ é lɛ ɔ̄cɛ éyi tɛ̄hɔ̄ kóō da ɔ́ ka aá tíne ō má ɔ̄.

³²Ɛwa kú ācɛ cīce lɛ Ujísɔ̄si yɛjīlatá biílí, anɔ́ɔ é da ɔ́ ka ɛ́nɛ́ nū mɛ́mla ayínɛ́ nū nɔ̄nyīlɔ, mɛ́mla ayínɛ́ nū nɔ̄nyā bá ɛcɛ, ī tíne ō má ɔ̄.

³³Ujísɔ̄si tóohi kahíníī, “Ɔ̄nyɛ wɛ ɛ́nɛ́ um ā? Ānyɛ wɛ ayínɛ́ um nɔ̄nyīlɔ ā?”

³⁴Ó pīyeyī má ācɛ nēe cīce pīyī ɔ̄ biílí ā anɔ́ɔ ó kahíníī, “Aá má ɔ̄, ɛ́nɛ́ um mɛ́mla ayínɛ́ nɔ̄nyīlɔ bá amānyā yɔ̄ ā!

³⁵Ɔ̄cɛ dúúmā nōo ī yá ɔdā nɛ̄ Ɔwɔicō dɔɔ̄kā kóō yá ā wɛ ayínɛ́ um nɔ̄nyīlɔ mla ayínɛ́ um nɔ̄nyā mɛ́mla ɛ́nɛ́ um á.”