Read idoma UMÁKI 4 Bible Online

UMÁKI 4 - idoma bible

UMÁKI 4

¹Igbɔhá kpɔ́ Ujísɔ̄si gbɔɔ́ ō nwū ɛlā Ɔwɔicō okónu óókpoó kú Ugálīli. Ɛwa kú ācɛ nēe jīla tū ɔ̄ le nwuné nɛ̄hi anɔ́ɔ ó le yɛ tá ipú ɔ́kɔ gaá cīce á. Ɔ́kɔ ā yɔ̄ ipú éŋkpɔ̄ anɔ́ɔ ɛwa kú ācɛ ā bá okónu éŋkpɔ̄ ā á.

²Ó bī ita le nwū uwā ɔdā alɛwa. Ó da ācɛ ā ka,

³“Aá jāhɔ̄ lɛ ɛlā nɛ̄ n yɔ̄ ī ka ā! Ɛ̄cī éyi, ɔglɛ́ji éyi le tɛ́ɛcɛ gáā nyi īkpɔ̄dā.

⁴Abɔ̄ ó yɔ̄ gē mi īkpɔ̄dā klá ɛhɔ̄ ā, ōhī kú īkpɔ̄dā ā le pɛ́ bá ɔwɛ, anɔ́ɔ aígbáanɔ le pɛ́ wā í lɛ uwá kpó tá lé ŋmá ajɛ á.

⁵Īkpɔ̄dā ōhī le pɛ́ tū ɛplá ápátɛ́cɔ̄, ɛga nɛ̄ ajɛ ɔlamu í nwuné ŋ́ mā ā. Īkpɔ̄dā le bū wɛ̄ɛcɛ fíyaa, abɔ̄ ajɛ ɔlamu í cɔkpɛ́nú ɛyí ápátɛ́cɔ̄ ŋ́ mā ā.

⁶Anɔ́ɔ eko nɛ̄ ɛnɔ lɛ ɔkɔ nwūla ā, ó lɛ ɔdɛ̄hɔ̄ nɛ̄ŋcɛ́ nyā kwú boolo anɔ́ɔ abɔ̄ ɛgba kú nū í lipú ga ipú ajɛ ŋ́ mā, ɔdɛ̄hɔ̄ nēe bá ā le kpó yɔlá tāajɛ.

⁷Ōhī kú īkpɔ̄dā ā le pɛ́ bá ɛplá ɔcí ujē. Ujē ā le jɛ̄ anɔ́ɔ e lɛ ɔdɛ̄hɔ̄ ā kpó ŋmó á. É gwá īkpō dúú ŋ́.

⁸Amáŋ īkpɔ̄dā ōhī le pɛ́ bá ajɛ olɔhi, īkpō ā le bū wɛ̄ɛcɛ, le jɛ̄, le cɛyí mla īkpɔ̄dā alɛwa. Ɛga ōhī lɛ īkpɔ̄dā ofucigwó, ɔhá ofɛtá, anɔ́ɔ aóhile ā lɛ īkpɔ̄dā ofɛhɔ̄.

⁹Anɔ́ɔ Ujísɔ̄si kahíníī, “Ɔ̄cɛ nōo lɛ ahɔ̄ ōpɛ́ɛ́lā, kóō pó ɛlā nyā!”

¹⁰Eko nɛ̄ Ujísɔ̄si yɔ̄ ōfōōfūnū ā, ācɛ ōhī nēe pó ɛlā nɛ̄ ó ka ā le cīgbīhi wā ɛgiyí nū mla ayíkpó igwɛ́ɛpa ā, anɔ́ɔ e da ɔ́ kóō lɛyí kú aíta ā ka lɛ uwá.

¹¹Ujísɔ̄si tá uwa ohi kahíníī, “E lɛ yá kú aá lɛyí ɔdā otayínū kú ajɔ̄ɔ̄cɛ́ kú Ɔwɔicō ā jé. Amáŋ ācɛ o hile nēe bá iyɛ̄ɛcɛ ā, Ita nēé gē bī le jé ɛyí nū á.”

¹² “Cɛ́ɛ́, É pla eyī klla pla eyī nááná, é má ɔdā dúú ŋ́, é lɔfú jāhɔ̄ klla jāhɔ̄ nááná, é pó ŋ́, é kē jɛ́ɛ́yí ɛlā ā ŋ́. Ohígbū ka ɔ́dāŋ ka é lɛyí nū jé, é géē pīya ga ɛgiyí Ɔwɔicō, cɛ́ɛ́ ó géē je íne nēé bīya ā yá uwa ɛhi!”

¹³Anɔ́ɔ Ujísɔ̄si le ɔ̄kā da uwá kahíníī, “Aá jɛyí ita nya ŋ́ nɛɛ? Ɔwɛ nyá, nɛ̄ aá géē jɛ́ɛyí ita dóódu gílá ā gɛ?”

¹⁴Ɛlā Ɔwɔicō ā lɛbɛ̄ɛka īkpɔ̄dɛ̄hɔ̄ nɛ̄ ɔgílɛjí gē nyi ā.

¹⁵Ācɛ ōhī, ɛ́gɛ́nɛ̄ ɔ̄cɛ ī kɛlā ā lɛbɛ̄ɛka īkpɔ̄dā nēe pɛ́ bá ɔtāhɛ̄ ɔwɛ ā, ɔkwɔɔkwu nēé lɛ ɛlɔ̄ɔwɔicō pó ā, usétan gaá le ɛlā ā kpó ŋmá ipú kú uwā.

¹⁶Ācɛ ɔhá lɛbɛ̄ɛka īkpɔ̄dā nēe pɛ́ bá ɛplá ápátɛ́cɔ̄ ā. Ɔkwɔɔkwu nēé lɛ ɛlɔ̄ɔwɔicō pó ā, é mīyɛ ɛlā ā mla ɔtū ékpó.

¹⁷Amáŋ ɛlā ā í ga ipú odo kú uwā lipú ŋ́, ɛlā ā í klla yɔ̄ ipú odo kú uwa gbojī ŋ́. Anɔ́ɔ eko nɛ̄ unwalu mla oyáŋmó gā ohígbū ɛlā ā, é kwúcē igbīhi bōōbū.

¹⁸Ācɛ ɔhá ā lɛbɛ̄ɛka īkpɔ̄dā nēe pɛ́ bá ɛplá ácí ujē ā. Ācɛ nēe bá nyā wɛ ācɛ nēe lɛ ɛlɔ̄ɔwɔicō ā pó,

¹⁹amáŋ ohígbū ɔtunwulanwula kú oyēeyī, é gē piyɔtū kú agbénú kú ɛcɛ, mla ɛdɔ kú únwū ɛyɛ́ɛyɛ́yí le mu ipú ɔtū kú uwā, anɔ́ɔ é cɛ̄ lɛ ɛlɔ̄ɔwɔicō ā jɛ̄ ipú odo kú uwā ŋ́ má. Anɔ́ɔ é gwá īkpō ŋ́ má.

²⁰Amáŋ ācɛ ɔhá ā lɛbɛ̄ɛka īkpɔ̄dā nēé nyi tū ipú ajɛ olɔhi ā. É lɛ ɛlɔ̄ɔwɔicō ā pó, é mīyɛ ɛlā ā, anɔ́ɔ é le īkpō gwá, ōhī gwá īkpō ofucigwó, aɔ́há gwá ofɛtá, ōhī klla gwá īkpō ofɛhɔ̄.

²¹Ujísɔ̄si yɔ̄ gē kɛlā kpɔ́ kahíníī, “Ó lɛ ɔ̄cɛ dúú nōo le ɔlá hɛ́ kwu agege kwú ɔ̄ ú nyɔ̄ í háyi ipú ɔgālā ámāŋ ka útāŋgōdō ŋ́. Ɔdā ō lɛ agege ce ɔ́ nɛ̄ ó gē lɛ ɔ́ ce ɛyí nū á.

²²Ɔdā dúúmā nōo tayínū, é géē je ɔ́ tɛ́ɛcɛ ɛga ogēdēē. Ó lɛ ɔdā dúúmā nēé lɛ ácí ŋmó klá anú nēé gáā pīyɛ̄ ɔ̄ wɛ̄ɛcɛ ŋ́ nɛ̄ ŋ́.

²³Ɔ̄cɛ nōo lɛ ahɔ̄ opɛ́ɛla, kóō pó ɛlā nyā!”

²⁴Ó klla da uwá kahíníī, “Aá jāhɔ̄ lɛ ɛlā nɛ̄ n gáā ka nyā, ‘Ɛdɔ kú íne ékpó nāa bī le kɛpɔ̄ tū ācɛ ā, nɛ̄ Ɔwɔicō géē bī le kɛpɔ̄ tū uwɔ dúú á. Ɛpɔ̄ kú uwɔ kōō í lɔnɔ fíyɛ́.

²⁵Ɔ̄cɛ nōo lɛ odée ā Ɔwɔicō géē je lɛ ɔ́ fíyɛ́, anɔ́ɔ ɔ̄cɛ nɛ̄ ó lɛ ɔdā dúúmā ŋ́ mā, ó kōō wɛ oligíi nɛ̄ ó lɛ ā, é géē mīyɛ ɔ́ ŋmá ɛgiyí nū.”

²⁶Ujísɔ̄si yɔ̄ ī kɛlā gɔbū kahíníī, “Ajɔ̄ɔ̄cɛ́ kú Ɔwɔicō lɛbɛ̄ɛka ɔ̄cɛ nōo nyī īkpō tū ipú ɛhɔ̄ ā.

²⁷Ó le iyɔ̄lā gbo ɔtú, ó le héyī. Anɔ́ɔ ó yɔ̄ ī yɛ gicō gaajɛ ɔlɛ́ɛnɔ, ɛplá eko nyā īkpō ā le bū yɔ̄ gē jɛ̄ ɛɛ́. Nááná o jé ɛ́gɛ́nɛ̄ īkpō ā yá ɛ́ɛ́ nɛ̄ ó bū klla yɔ̄ gē jɛ̄ ā ŋ́.

²⁸Ajɛ ī yá kú īkpō kóō bū klla jɛ̄ á. Ó lɛ ɔpílɔ́ tá wɛ̄ɛcɛ aflɛ́yí, cɛ́ɛ́ ɛyí īkpɔ̄dā ā le bɛ̄cɛ ámōōmɛ. Cɛ́ɛ́, ámōōmɛ ā, ɔdɛ̄hɔ̄ ā le cɛyí mla īkpō nɛ̄ɛ̄nɛ̄hi.

²⁹Eko nɛ̄ īkpō ā le jé, ɔgílɛjí ā bī ɛwa gbɔɔ́ ō hɛ́ ɔ̄, ohígbū ka eko o cē ɔdɛ̄hɔ̄ le yá ɛɛ́.”

³⁰Ujísɔ̄si dɔɔ̄kā kahíníī, “Ɔdí nɛ̄ alɔ géē lɛ ajɔ̄ɔ̄cɛ́ kú Ɔwɔicō gbla anú ā?” Ita nyá nɛ̄ alɔ í kwu o yá ɛ́ɛ́ kú ācɛ kéē jɛ́ɛyí nū ā?

³¹“Ajɔ̄ɔ̄cɛ́ kú Ɔwɔicō lɛ ɛ́gɛ́nyā. Ɔ̄cɛnyīlɔ éyi kwú īkpō kú ɔcí nēe hī ka umɔ́sitáadi, īkpō nōo nyɛ́ fíyɛ́ dúú ipú ɛcɛ ā, anɔ́ɔ ó lɛ ɔ́ nyi ipú ajɛ á.

³²Eko kpií le gla, ó le jɛ kwú pīya ɔcínɔ̄kwū. Ó kwu abɔ̄ nɛ̄ɛ̄nɛ̄hi nɛ̄ aígbáanɔ gē wā í gwó ɔlɛ́ uwā ce ābɔ̄ nū.”

³³Ujísɔ̄si bī ita ɛ́gɛ́nyā alɛwa ɔhá, áluka nɛ̄ ācɛ pó í jɛ́yí nū glá ā le tɔ́ɔna kú ajɔ̄ɔ̄cɛ́ kú Ɔwɔicō lɛ uwá.

³⁴Ó gē bī ita eko dúú nɛ̄ ó ī kɛlā lɛ ɛwa, amáŋ eko dúú nɛ̄ anú mla ayíkpó kú nū gaá bá ōfōōfūwā, ó gē ka ɛyí kú ɛjɛ̄ɛ̄jī ɔdā dóódu lɛ uwá.

³⁵Ɔnɔ̄ɔ̄nɛ̄ kú ɛci ɔ́ɔmā piíí ā, Ujísɔ̄si da ayíkpó kú nū kahíníī, “Ālɔ̄ le hɛ́ enyi bēhé ga ogbeé ɔhá kú óókpoó ā.”

³⁶Anɔ́ɔ é nyɛ̄ɛ̄ ŋmá ipú ɛwa ā. Ayíkpó ā le pɛ́ tū ipú ɔ́kɔ nɛ̄ Ujísɔ̄si húmáyī cīce ipú nū ā, anɔ́ɔ é kwú ɔ̄ ú le yɛ á. Aɔ́kɔ ɔhá nyɔ̄ mla uwá dúú.

³⁷Anɔ́ɔ igbeékpónú owu nɛ̄hi gbɔɔ́ ō tá, anɔ́ɔ úgbagwú nɛ̄hi gbɔɔ́ ō tá éŋkpɔ̄ ga ipú ɔ́kɔ ā á. Ó hile ligií kú éŋkpɔ̄ kóō le mu ipú ɔ́kɔ ā.

³⁸Ujísɔ̄si gwutá ipú igbīhi ɔ́kɔ ā lɛ ɛyí ce upílo yɔ̄ ī gbiyɔ̄lā. Ayíkpó ā lɛ ɔ́ héyī, Anɔ́ɔ é kahíníī, “Itíca, Ɔ̄conwɔ̄kpá, ó wɛ unwalu kú uwɔ ka alɔ gáā bī ipú éŋkpɔ̄ ŋ́ nɛɛ?”

³⁹Ujísɔ̄si cāŋjɛ háyicō anɔ́ɔ ó lɛ ɔ́da je lɛ owu kahíníī, “Mā uya.” Anɔ́ɔ ó da úgbagwú kahíníī, “Yɔ̄ cíí!” Owu ā mā biyoo, ó klla tá gɛ ŋ́. Anɔ́ɔ ɛga dóódu yɔ̄ hímm á.

⁴⁰Anɔ́ɔ Ujísɔ̄si da ayíkpó kú nū kahíníī, “Aá cíkā ō yúufi ŋ́. Aá lɛ ɔtūce Ɔwɔicō ŋ́ kpɔ́ nɛɛ?”

⁴¹Amáŋ ufí yá ayíkpó ā nɛ̄hi, anɔ́ɔ é gbɔɔ́ ō ka lɛ ɔ́mpa uwā kahíníī, “Ɔnyɛ yɔ̄ ā mɛ́ɛ̄? Owu mɛ́mla úgbagwú kōō ī lɛyítáajɛ lɛ ɔ́!”