Read idoma UMÁKI 5 Bible Online

UMÁKI 5 - idoma bible

UMÁKI 5

¹Ujísɔ̄si mla ayíkpó kú nū gāājɛ ogbeé kú óókpoó kú Ugálīli ipú ajɛ kú Ugerása.

²Abɔ̄ ó yɔ̄ ī bɛ̄cɛ ŋmá ipú ɔ́kɔ ā, ɔkwɔɔkwu ɔ́ɔmā, ɔ̄cɛ éyi ŋmá ipú únóji gā ɛgiyí nū. Ɔ̄cɛ ā lɛ alelékwū obɔ̄bí.

³Ó lá ɛgiyí únóji, ɔ̄cɛ dúú í ce ɔ́ odó glá ŋ́.

⁴Igbɛ alɛwa, é gē gbō ɔ̄ ikpó mla abɔ̄, amáŋ ó gē kpó agbá ā hɛ́ eko dóódu, cɛ́ɛ́ ó lɛ odó ā kpó ca ŋmá iyīnu ikpó. Ɔ̄cɛ dúú í lɔfú jɛ̄ nōo ī bī ɔ̄ bá ajɛ glá ŋ́.

⁵Ɔlɛ́ɛnɔ mla otú dóódu ó gē yɛ gicō gajɛ ɛplá aúnóji. Ó klla ī yɛ ga ɛfu, yɔ̄ gē dɛ̄gba, gē bī ɛcɔ̄ le hɛ́ iyīnu iyē.

⁶Ó yɔ̄ ɛga o ligbó ɛ́ɛ́ nɛ̄ ó má Ujísɔ̄si á, anɔ́ɔ ó le inya kwu wā í le okwúukwu kwajɛ iyɔ̄bū nū á.

⁷Anɔ́ɔ ó lɛ ɔkɔ cɛyí le ɛgba dɛ̄ kahíníī, “Ujísɔ̄si Ɔyínɔ̄nyīlɔ kú Ɔwɔicō nōo lɔfú fíyɛ́ dúú ā! Ɔdí nāa í dɔɔ̄kā ŋmá ɛgiyí um ā? N bī iyē kú Ɔwɔicō le gbɔ̄ɔkɔ ga awɔ, ā híī yá um itala ŋ́!”

⁸Ó ka ɛ̄nyā ohígbū ka Ujísɔ̄si yɔ̄ ī ka ka, alelékwū obɔ̄bí kóō le bɛ̄cɛ ŋmá ipú ɔ̄cɛnyīlɔ ā!

⁹Anɔ́ɔ Ujísɔ̄si le ɔ̄kā da ɔ́ kahíníī, “Ɔdí wɛ iyē kú uwɔ ā!” Ɔ̄cɛnyīlɔ ā cīla ka, iyē kú anúɔ wɛ Ulíjɔn, ka aá lɛwa nɛ̄hi íbí.

¹⁰Anɔ́ɔ ó yɔ̄ gē gbɔ̄ɔkɔ lɛ Ujísɔ̄si kóō híī nū alelékwū obɔ̄bí ā ŋmá ajɛ ɔ́ɔmā ŋ́.

¹¹Ɔ́wá nɛ̄ɛ̄nɛ̄hi kú aókóome bá abɔ́ɔ, é bá gē lé ɔdolé ɛháajɛ ɛfu éyi abɔ́ɔ.

¹²Anɔ́ɔ alelékwū obɔ̄bí ā le ɔkɔ gbā lɛ Ujísɔ̄si kóō lɛ uwá nū ga ɛgiyí aókóome ā, cɛ́ɛ́ kú aá le pɛ́ tū ipú uwā.

¹³Ujísɔ̄si le ɛga je lɛ uwa kéē nyɔ̄, anɔ́ɔ aálelékwū obɔ̄bí ā le pɛ́ wɛ̄ɛcɛ ŋmá iyē kú ɔ̄cɛ ā, anɔ́ɔ é le pɛ́ tū ipú aókóome ā á. Abɔ̄ é le pɛ tū ipú aókóome ā, ɛjɛ̄ɛ̄jī ɔwá kú aókóome ā nēe lɛbɛ̄ɛka ulá igwó ā le kwu ga ɛháajɛ ɛfu gaá le pɛ́ tū ipú ísu.

¹⁴Ācɛ o gbō ɔ́wá kú aókóome ā le kwu nyɔ̄ gaá le ɔ̄kā ā ca klɛ́ɛcɛ ipú igelī nɛ̄ŋcɛ́ mɛ́mla aɛ́ga nɛ̄ ācɛ o hɛ́hɔ̄ bá ā.

¹⁵Anɔ́ɔ eko nēé wā kéē má Ujísɔ̄si ā, é lɛ ɔ̄cɛ nōo tɛtɛ lɛ alelékwū obɔ̄bí alɛwa ipú nū ā má. O cīce abɔ́ɔ lɛ úwé wiyē, eyī klla le gbo ɔ́ gɔɔ. Anɔ́ɔ ācɛ ā le kpó hídáagó á.

¹⁶Ācɛ nēe má ɛ́gɛ́nɛ̄ Ujísɔ̄si nū aálelékwū obɔ̄bí bɛ̄cɛ ŋmá ipú iyē kú ɔ̄cɛ ā lɛ ā mla ɔdā nōo yá ɔwá kú aókóome ā, le ɔdā nōo yá ā kpó ka lɛ ācɛ ā.

¹⁷Anɔ́ɔ é da Ujísɔ̄si kóō nyɛ̄ɛ̄ ŋmá ajɛ ɔlɛ́ aá.

¹⁸Abɔ̄ Ujísɔ̄si yɔ̄ gē ga ipú ɔ́kɔ ā, ɔ̄cɛ nōo lɛ aálelékwū obɔ̄bí tɛtɛ ā gbɔ̄ɔkɔ lɛ ɔ́ kɔ́ɔ̄ cɛ̄ lɛ anúɔ nyɔ̄ mla anú.

¹⁹Amáŋ Ujísɔ̄si í cɛ̄ kóō nyɔ̄ mla anú ŋ́, ó da ɔ́ kɔ́ɔ̄ Kwúcē igbīhi ga ɔlɛ́ gá ɛgiyí ācɛ ɔlɛ́ nū, cɛ́ɛ́ kɔ́ɔ̄ ka lɛ uwá ɛ́gɛ́ ɔdā nɛ̄ Óndú ā yá lɛ ɔ́ mɛ́mla ɛ́gɛ́nɛ̄ ó ményinyi nū lɛ ā.

²⁰Anɔ́ɔ ɔ̄cɛ ā nyɛ̄ɛ̄ ŋmá abɔ́ɔ anɔ́ɔ ó le yɛ tá igelī nɛ̄ŋcɛ́ igwó á, yɔ̄ gē da uwā ɔdā nɛ̄ Ujísɔ̄si yá lɛ ɔ́ ā. Anɔ́ɔ odúúdú ācɛ le kpó hídáagó á.

²¹Ujísɔ̄si kwúcē igbīhi ga ogbeé ɔhá kú óókpoó ā. Ɛwa kú ācɛ le jīla tū ɔ̄ okónu óókpoó ā.

²²Otrɛ̄yí kú ɛgogbɔ̄ɔkɔ nɛ̄ŋcɛ́ éyi, nɛ̄ iyī nū wɛ Ujáyīrɔsi ā gā, anɔ́ɔ eko nɛ̄ ó lɛ Ujísɔ̄si má ā, ó gaá gbo klá ajɛ le okwúukwu kwajɛ iyɔ̄bū nū.

²³Anɔ́ɔ ó gbɔ̄ɔkɔ lɛ Ujísɔ̄si nɛ̄ɛ̄nɛ̄hi yɔ̄ í ka kahíníī, “kócōō wā í lɛ abɔ̄ ce ɔyínɔ̄nyā kú um ɛyí, cɛ́ɛ́ kú ōcē kú nū kóō mɛ, kú ō yēeyī.”

²⁴Ujísɔ̄si le yɛ mla anú. Ācɛ alɛwa yɔ̄ ī nyɔ̄ mla Ujísɔ̄si. É le pɛ́ klá anú ŋmá ɔkíkā dóódu.

²⁵Ɔ̄cɛnyā éyi yɔ̄ abɔ́ɔ nōo húmáyī hóóyī iháyí igwɛ́ɛpa.

²⁶Ó móōwē nɛ̄ɛ̄nɛhi ipú abɔ̄ kú aólobócí. Ɛ̄nyā cɛ̄ lɛ ɔ́ kwú ɛjɛ̄ɛ̄jī ije kú nū ú ŋmó tū ōcē ā, amáŋ ikɔkɔ nɛ̄ ōcē kú nū ā í tētēyi ā, ó yɔ̄ ī bɔ̄bí tōōtɔ̄ɔ̄.

²⁷Ó lɛ ɔ̄kā pó ka Ujísɔ̄si ɔ́ɔ gē hɛ́ ācɛ tá ŋmá ōcē. Anɔ́ɔ ó wā ŋmá igbīhi nū ŋmá ipú ɛwa gaá lɛ abɔ̄ kwu úwé kú nū á.

²⁸Ó le ka lɛ iyinū ka, “Ɔ́dāŋ nɛ̄ n kōō lɛ abɔ̄ kwu úwé kú nū kénékēē n géē lɛ ɔbɔ́lā.”

²⁹Anɔ́ɔ ikpííkpo ɔ́ɔma oyī nɛ̄ ō yɔ̄ ī hɛ́ ā mɛ. Ó kē le jé ɛ́gɛ́nɛ̄ iyē kú nū mɛɛ lɛ ā, ka anúɔ le hɛ́tá ŋmá unwalu kú anúɔ ɛɛ́.

³⁰Ɔkwɔɔkwu ɔ́ɔmā Ujísɔ̄si le jé ka ɔfú ɔ́ɔ nyɛ̄ɛ̄ ŋmá iyē kú anúɔ ɛɛ́. Anɔ́ɔ ó pīyeyī má ójila ā, anɔ́ɔ ó dɔɔ̄kā kahíníī, “Ɔ̄nyɛ le abɔ̄ kwu úwé kú um ā?”

³¹Anɔ́ɔ ayíkpó kú nū tóohi kahíníī, “A má ɛ́gɛ́nɛ̄ ācɛ yɔ̄ ī jīla tū uwɔ lɛ ā, ɔdíyá nāa ī dɔɔ̄kā ɔ̄cɛ nōo lɛ abɔ̄ kwu uwɔ ā?”

³²Nááná ā ó yɔ̄ ge leyī táajɛ kóō lɛ ɔ̄cɛ nōo lɛ abɔ̄ kwu ɔ́ ā jé.

³³Amáŋ abɔ̄ ɔnyā ā le jé ka anúɔ le hɛ́tá ā, anɔ́ɔ ó le bɛ̄cɛ, yɔ̄ ge yúufi ī fīyégbúlú. Ó kwú okwúukwu ú kwajɛ iyɔ̄bū Ujísɔ̄si, anɔ́ɔ ó lɛ ɛjɛ̄ɛ̄jī ɔkwɛ̄yi kú ɔdā nōo yá a kpó ka lɛ ɔ́ á.

³⁴Ujísɔ̄si da ɔ́ kahíníī, “Adá um, ɔtū nāa le ce Ɔwɔicō ā cɛ̄ lɛ ōcē kú uwɔ mɛ ɛɛ́. Nyɔ̄ ɛbɔ́, kú aa lɛ ɔbɔ́lā lɛ ŋmá ōcē kú uwɔ mɛ́ɛnɛ.”

³⁵Ɛpleko nɛ̄ Ujísɔ̄si yɔ̄ gē kɛlā nyā ā, olɛhɔ éyi ŋmá ɔlɛ́ Ujáríyɔ̄si wā í da ɔ́ kahíníī, “Ɔyí uwɔ nɔ̄nyā ā gekwú ɛɛ́. Ɔdíyá nāa í junwalu lɛ Itíla ā kpɔ́ ɛ́ɛ́ mā ā?”

³⁶Ujísɔ̄si lɛ ahɔ̄ gwō ɛlā nēé ka ā bónū, amáŋ ó da Ujáríyɔ̄si kahíníī, “A híī yúufi ŋ́, cɛ̄ ɛlā Ɔwɔicō kénékēē.”

³⁷Anɔ́ɔ ó cɛ̄ lɛ ācɛ ɔhá dóódu nyɔ̄ mla anú gɛ ŋ́, ń táafú ŋ́ ayíka Upíta mla Ujémīsi mɛ́mla ɔyínɛ́ nū nɔ̄nyīlɔ Ujɔ́ni.

³⁸Eko nēé gāājɛ ɔlɛ́ kú otrɛ̄yí kú ɛgogbɔ̄ɔkɔ ā, ó má útú nɛ̄ ō hɛ́ abɔ́ɔ ā. Ó pó ɛ́gɛ́nɛ̄ ācɛ bá gē tɛ̄gíkwū, klla bá gē jikwū gbōmgbōm lɛ ā.

³⁹Ó le bēé ga ipú inu, anɔ́ɔ ó da uwá kahíníī, “Ɔdíyá nɛ̄ aá í wu iyī aá ɔtū klíicō ī jikwū ā? Ɔyí ā í kwú ŋ́, ó yɔ̄ ī gbyɔ̄lā nɛ̄!”

⁴⁰É gbɔɔ́ ō yɛhɛ tū ɔ̄, anɔ́ɔ ó lɛ ɛjɛ̄ɛ̄jī uwā kpó nū gɛcɛ, kwú ádā mla ɛ́nɛ́ ɔyí mɛ́mla ayíkpó kú nū ɛtá á ú, anɔ́ɔ é le pɛ́ tá ipú inu ɛga nɛ̄ ɔyí ā gwutá ā.

⁴¹Ó kwú ɔyí ā abɔ̄ ú, anɔ́ɔ ó ka “Talita kúmi” nɛ̄ ɛyí nū wɛ, ‘Ɔyínɔ̄nyā nɛ̄ŋcɛ́, n da uwɔ ka, nyāŋjɛ.’”

⁴²Anɔ́ɔ ɔkwɔɔkwu ɔ́ɔmā ɔyí ā nyāŋjɛ, anɔ́ɔ ó gbɔɔ́ ō yāwu í yɛ bilíbilí ipú inu á. (Ó wɛ iháyí igwɛ́ɛpa.)

⁴³Amáŋ Ujísɔ̄si pi uwá ɔhā lɔfú lɔfú kéē híī da ɔ̄cɛ dúúmā ɔdā nōo yá ā ŋ́. Anɔ́ɔ ó da uwá kéē lɛ odée je lɛ ɔ́ kóō lé.