Read idoma UMÁKI 6 Bible Online

UMÁKI 6 - idoma bible

UMÁKI 6

¹Ujísɔ̄si nyɛ̄ɛ̄ ŋmá abɔ́ɔ anɔ́ɔ o kwúcē le tá igelī nɛ̄ŋcɛ́ kú ɔlɛ́ nū á. Ayíkpó kú nū tá ɔ̄ ɔkwu.

²Ɛ̄cī usábāt ó gbɔɔ́ ō nwū ɛlɔ̄ɔwɔicō ipú ɛgogbɔ̄ɔkɔ ā. Ācɛ alɛwa bá abɔ́ɔ, é le kpó hídáagó eko nēé pó ɔdā nɛ̄ ó yɔ̄ í nwū ā. Anɔ́ɔ é dɔɔ̄kā kahíníī, “Iní nɛ̄ ó bī aɔ́dā nēe bá nyā ŋmá? Íjéeyī nɛ̄hi nyá nēe je lɛ ɔ̄ lɛ ā dúú? Iní nɛ̄ ó bī ɔfú ō le yúklɔ́ idáagó kú nū ŋmá ā?

³Ó wɛ ɔ̄cɛ ɔgbɔ̄cí ā yɔ̄ ā ŋ́ nɛɛ? Ó wɛ anú wɛ ɔyí Umeri ā ŋ́ nɛɛ? Ó wɛ anú wɛ ɔyínɛ Ujémīsi mla Ujósɛ̄fu, mla Ujúdasi mɛ́mla Usáyímɔ̄ni ā ŋ́ nɛɛ? Ayínɛ́ nū nɔnya í lā amānyā ŋ́ nɛɛ?” É tá ka aá cɛ̄ɛ̄lā nū ŋ́.

⁴Ujísɔ̄si da uwá ka ɛjɛ̄ɛ̄jī ācɛ gē lɛ ojīlīmā ce ɔcomɛ́ɛbɛ ń táafú ŋ́ ayíka ācɛ nēe lā igelī ékpónú mla anú ā mla aɔ́máapú nū mɛ́mla ācɛ kú ipɔ́ɔnū ɔlɛ́ nū.

⁵Úklɔ́ o hídáagó nɛ̄ ó lɔfú yá abɔ̄ ōfōōfūnū ā wɛ ka o lɛ abɔ̄ ce ācɛ odoōcē ōhī ɛyí lɛ uwá hɛ́tá. Ó yúklɔ́ o hídáagó ɔhá dóódu gɛ ŋ́.

⁶Ó le hídáagó nɛ̄ɛ̄nɛ̄hi, ohígbū ka ācɛ ā í lɔtūce ɔ́ ŋ́. Anɔ́ɔ Ujísɔ̄si le tá aéyīpɔ́lɛ́ nēe yɛ abɔ́ɔ biílí ā yɔ̄ ge nwū ācɛ ā ɛlɔ̄ɔwɔicō.

⁷Ó lɛ ayíkpó igwɛ́ɛpa ā hīgwú, anɔ́ɔ ó lɛ uwá tɛ̄hɔ̄ gɛcɛ ɛpɛɛpa. Ó je íkwu lɛ uwá lɛyíkwu aálelékwū obɔ̄bí.

⁸Ó klla je ɔ́da lɛ uwá kahíníī, “Aá bī ɔdā ɔhá dúú mla iyī aá ipú iyāwu nyā ŋ́, ń táafú ŋ́ okwutɛ ōfōōfūnū. Aá bī igbō ŋ́, aá bī ɛkpa kú ācɛ o bɔdā ŋ́, aá híī bī ije ipú alítā ŋ́.

⁹Aá lɛ áblákpá wu ikpó, amáŋ aá híī bī úwé ɛpa ŋ́.”

¹⁰Ó klla da uwá kahíníī, “Ɛga dúú nēé mīyɛ aá, aá klá inu ékpó ɔ́ɔmā jāā gbéeko nɛ̄ aá nyɛ̄ɛ̄ ŋmá igelī nɛ̄ŋcɛ́ ɔ́ɔmā.

¹¹ Ɔ́dāŋ́ ka aá gā ipú igelī nɛ̄ŋcɛ́ dúúmā nɛ̄ ācɛ ā í mīyɛ aá ŋ́, nēé ke jāhɔ̄ lɛ aá ŋ́, aá nyɛ̄ɛ̄ ŋmá abɔ́ɔ kú aá lɛ úmúlá kú ajɛ abɔ́ɔ gwō bónū ŋmá áblákpá kú aá. Ɔ́ɔmā í mafú lɛ uwá ka Ɔwɔicō géē yá uwā italā!”

¹²Anɔ́ɔ é le pɛ́ gɛcɛ nyɔ̄ gaá tɔ́ɔna lɛ ācɛ kéē le pīyabɔ̄ ŋmá íne kú Ɔwɔicō nēé gē bīya ā.

¹³É nū aébilíi alɛwa ŋmá iyē kú ācɛ, é kē lɛ anɔ̄ kú ɔcí nēé hī ka olīifu ā nyā ācɛ alɛwa o doōcē iyē, anɔ́ɔ ke lɛ uwá hɛ́tá á.

¹⁴Uhérɔ̄du, ɔcɛ́ ā lɛ ɔdā nɛ̄ Ujísɔ̄si yɔ̄ ī yá ā pó, ohígbū ka ācɛ yɔ̄ ī pó ofu kú úklɔ́ o hídáagó nɛ̄ Ujísɔ̄si yɔ̄ ī yá ā ɛjɛ̄ɛ̄jī ajɛ kú ugálīli ā. Ācɛ ohi yɔ̄ ī kahíníī, “Ujɔ́ni oyúbatísim le héyī ŋmá ɔlékwū ɛɛ́! Ɔ́ɔmā yá ɛ́ɛ́ nɛ̄ ó lɔfú yá aɔ́dā o hídáagó nyā glá á.”

¹⁵Ācɛ ɔhá ka ɔ́ɔ wɛ Ɛláyíja nɛ. Ācɛ ɔhá klla ka ɔ́ɔ wɛ ɔcomɛ́ɛbɛ éyi lɛbɛ̄ɛka ācomɛ́ɛbɛ kú íkée ā nɛɛ.

¹⁶Eko nɛ̄ Uhérɔ̄du lɛ ɔkā ā pó ā, ó kahíníī, “Ujɔ́ni oyúbatísim nɛ̄! N cɛ̄ lɛ uwá lɛ ɔ́ īkpɛ̄yí hɛ́, amáŋ ó le héyī ŋmá ɔlékwū ɛɛ́.”

¹⁷ Uhérɔ̄du le ɔ́da je kéē lɛ Ujɔ́ni kwú, kéē lɛ ɔ́ abɔ̄ mɛ́mla ikpó gbō, cɛ́ɛ́ kéē kwú ɔ̄ ú nyɔ̄ í tá agbá. Uhérɔ̄du yá ɛnyā ohígbū Uheródīyasi, ɔnyā ɔyínɛ́ nū, Ufílīpu nɛ̄ ó lɛ ā.

¹⁸Ujɔ́ni oyúbatísim yɔ̄ gē da Uhérɔ̄du koó lɔhi kɔ́ɔ̄ lɛ ɔnyā kú ɔyínɛ́ nū ŋ́.

¹⁹Anɔ́ɔ Uhérodiyasi gbɔɔ́ ō wɔ́tū Ujɔ́ni, ó tíne kóō lɛ ɔ́ ŋmó, amáŋ ó ŋmó ɔ̄ glá ŋ́ ohígbū Uhérɔ̄du.

²⁰Uhérɔ̄du gē yúufi kú Ujɔ́ni ohígbū koó jé ka Ujɔ́ni wɛ ɔ̄cɛ olɔhi nōo kē tīihɔ, anɔ́ɔ ohígbū ɔ́ɔmā, ó gē lɛ ɔ́ tū céé kú ɔda dúú kóō yá ɔ̄ ŋ́. Eyī gē yá ɔ̄ ká yɔ̄ ī jāhɔ̄ lɛ ɔdā nɛ̄ Ujɔ́ni gē ka ā, nááná nɛ̄ ɛlā nɛ̄ ó gē ka ā gē je unwalu lɛ ɔ́ nɛ̄ɛ̄nɛ̄hi eko dúúmā nɛ̄ ó le pó ā.

²¹Amáŋ eko nɛ̄ oblatū kú ɛ̄cī nēé ma Uhérɔ̄du ā le yá ā, Uhérodīyasi lɛ ɛga nɛ̄ ó húmáyī dɔɔ̄kā ā má. Anɔ́ɔ Uhérɔ̄du lɛ ucɛ yá klɛ́ɛcɛ lɛ odúúdú ācɛ nɛ̄hi kú igɛ́mɛ́nti, mla aótrɛ̄yí kú aícɔ́ɔja mɛ́mla ācɛ ojīlīmā kú Ugálīli.

²²Ɔyínɔ̄nyā kú Uhérodīyasi wā ipú inu gaá lɛ ijē jē, anɔ́ɔ ɔtū kē le he Uhérɔ̄du mla aúgbɔga kú ɔlɛ́ nū. Anɔ́ɔ ɔcɛ́ ā lɛ ɔ̄kā da ɔyínɔ̄nyā ā ka, ɔdí nɔ́ɔ dɔɔ̄kā ā? Ó ka anúɔ géē je ɔdā dúú nɔ́ɔ dɔɔ̄kā ā lɛ ɔ́.

²³Ó le okónu ce lɛ ɔ́ ka, ɔ́dāŋ́ ka ɔ́ɔ kōō dɔɔ̄kā o hɛ́ ɛpa kú ajɔ̄ɔ̄cɛ́ kú anúɔ, anúɔ géē je lɛ ɔ́.

²⁴Anɔ́ɔ ɔyínɔ̄nyā ā le tɛ́ɛcɛ le ɔ̄kā da ɛ́nɛ́ nū ka, ɔdí nɛ̄ anúɔ géē ba ɔ́ ā? Ɛ́nɛ́ nū tá ɔ̄ ohi ka, īkpɛ̄yí kú Ujɔ́ni oyúbatísim.

²⁵Ɔyínɔ̄nyā ā páápa le tá ɛgiyí ɔcɛ́ ā, anɔ́ɔ ó da ɔ́ ka, anúɔ tíne kú ɔ̄ lɛ īkpɛ̄yí kú Ujɔ́ni oyúbatísim hɛ́ tá ipú oflēnjē gé lɛ anúɔ ɔkwɔɔkwu ɔ́ɔmā.

²⁶Ɛ̄nyā cɛ̄ lɛ ɔtū le bīya lɛ ɔcɛ́ ā nɛ̄hi, amáŋ ohígbū okónu nɛ̄ ó ce ipéeyí aúgbɔga ā, ó tá ɛlā nɛ̄ ɔyínɔ̄nyā ā ka ā glá ŋ́.

²⁷Anɔ́ɔ ó lɛ ɔ́da je lɛ ícɔ́ɔ́ja éyi kóō nyɔ̄ gaá lɛ īkpɛ̄yí kú Ujɔ́ni bī wā bōōbū. Ícɔ́ɔ́ja ā nyɛ̄ɛ̄, le tá ipú agbá, anɔ́ɔ ó lɛ Ujɔ́ni ŋmó, lɛ ɔ́ īkpɛ̄yí hɛ́.

²⁸Anɔ́ɔ kwú īkpɛ̄yí ā ú tá ipú oflēnje, kwú ɔ̄ ú gé lɛ ɔyínɔ̄nyā ā, anɔ́ɔ ó kwú gé lɛ ɛ́nɛ́ nū á.

²⁹Eko nɛ̄ ayíkpó kú Ujɔ́ni lɛ ɔ̄kā nyā pó ā, e gā gaá kwú okwū nū nyɔ̄ í nyi.

³⁰Ayíkpó ā pīyɛyí wā ɛgiyí Ujísɔ̄si, anɔ́ɔ é lɛ ɛjɛ̄ɛ̄jī ɔdā nēé yá kpɛ́mm ā mla ɔdā nēé nwū ācɛ ā kpó ka lɛ ɔ́ á.

³¹Ācɛ alɛwa nɛ̄ɛ̄nɛ̄hi yɔ̄ ī pɛ́ wā klla yɔ̄ ī pɛ́ nyɔ̄ nɛ̄ ó cɛ̄ lɛ Ujísɔ̄si mla ayíkpó kú nū má ɛga lé ɔdōlé ŋ́. Anɔ́ɔ ó da uwá kahíníī, “Ālɔ̄ ga ɛga nɛ̄ alɔ géē bá ōfōōfū alɔ, cɛ́ɛ́ kú aá le mlɛ́nyɔ́ lígíí.”

³²Anɔ́ɔ é le pɛ́ tū ipú ɔ́kɔ ōfōōfūwā le pɛ́ tá ɛga éyi nōo le hɛ́fu hī ācɛ tá.

³³Ācɛ alɛwa má uwá abɔ̄ nēe pɛ́ gē nyɔ̄ ā, é kē lɛ uwá jéjúuma bōōbū, ohígbū ɔ́ɔmā, ācɛ ā le inya kwu ŋmá odúúdú igelī nɛ̄ŋcɛ́ gbɔbū le yɛ ajɛ ɔlamu le tá abɔ́ɔ gbɔbū lɛ Ujísɔ̄si mla ayíkpó kú nū.

³⁴Eko nɛ̄ Ujísɔ̄si le bɛ̄cɛ ŋmá ipú ɔkɔ ā, ó má ɛwa nɛ̄hi kú ācɛ, anɔ́ɔ é le tū ɔ̄ eyīnyinyi, ohígbū keé lɛbɛ̄ɛka álá nēé lɛ ɔ̄cɛ o leyí kwu uwā ŋ́ mā. Anɔ́ɔ ó gbɔɔ́ ō nwū uwā ɔdā alɛwa.

³⁵Eko nɛ̄ ɔ̄nɛ̄ gbɔɔ́ ō gbo ā, ayíkpó kú nū le pɛ́ wā ɛgiyí nū yɔ̄ gē ka ka otú ɔ́ɔ gaá bī ɛɛ́, ɛga nɛ̄ aá bá ā í kē kwu ɔlɛ́ dúúmā ajaajɛ ŋ́.

³⁶É da ɔ́ kɔ́ɔ̄ lɛ ācɛ ā nū ga ɔlɛ́ kú ɛhɔ̄ mɛ́mla eyīpɔ́lɛ́, o yá ɛ́ɛ́ kéē lɛ ɔdōlé má le lá lé glá.

³⁷Ujísɔ̄si da uwá kahíníī, “Aá abɔ̄yī aá, le odée dɔɔ̄kā lɛ uwá kéē lé.” É da ɔ́ ɔ̄kā ka, “A dɔɔ̄kā kú ālɔ̄ lɛ ikpēégo ofigwó ŋmó tū igbō nɛ̄ alɔ í je lɛ uwá í lé ā nɛɛ?”

³⁸Anɔ́ɔ Ujísɔ̄si lɛ ɔ̄kā da uwá ka, “Igbō ɛmulá nɛ̄ aá lɛ āa? Aá nyɔ̄ gaá lɛ ɔ́ má.” Eko nēé gaá lɛ ɔ́ jila, lɛ ɔ́ má ā, é da ɔ́ kahíníī, “Igbō ɛhɔ̄ mla ɛbéenyi ɛpa.”

³⁹Ujísɔ̄si lɛ ɔ́da je lɛ ayíkpó kú nū kéē da ācɛ ā kéē lɛ iyī uwā kɔ̄ ígwíígwu, cɛ́ɛ́ kéē cīce ɛyí ácí ɛ̄mɛ̄ɛ̄mɛ̄.

⁴⁰Anɔ́ɔ ācɛ ā má cīce kwu ɔgbɔɔgba, ipú ígwíígwu kú ofɛhɔ̄ ofɛhɔ̄ mla igwú kú ofɛpa cigwó ofɛpa cigwó á.

⁴¹Anɔ́ɔ Ujísɔ̄si kwu igbō ɛhɔ̄ mɛ́mla ɛbéenyi ɛpa ā ú, je eyī gicō má ɔkpáncō, lɛ ahínyá tá Ɔwɔicō. Ó lɛ igbō ā cē anɔ́ɔ ó kwú kpó lɛ ayíkpó ā kéē kɔ̄ lɛ ācɛ ā. Ó klla kē lɛ ɛbéenyi ɛpa ā kɔ̄ lɛ odúúdú uwá.

⁴²Ɛjɛ̄ɛ̄jī ācɛ ā le lé jɛ̄ iyī uwā.

⁴³Anɔ́ɔ iwili kú igbo mla ɛbéenyi nōo hile nɛ̄ ayíkpó ā kpó ŋmá ajɛ ā, wɛ ómbili igwɛ́ɛpa.

⁴⁴Áluka kú ācɛnyīlɔ nēe lé ɔdōlé ā wɛ ulá igwɛ́ɛpa ce ofigwó.

⁴⁵Ɔkwɔɔkwu ɔ́ɔmā ó cɛ̄ lɛ ayíkpó kú nū le pɛ́ tū ipú ɔ́kɔ cɛ́ɛ́ kéē bēhé nyɔ̄ ga Ubɛtisayída nōo yɔ̄ ogbeé ɔhá kú óókpoó ā gbēyī nū, abɔ̄ ó yɔ̄ gē nū ɛwa ā ga ɔlɛ́ ā.

⁴⁶Eko nɛ̄ ó lɛ ńŋ́móō tá ācɛ ā, ó nyɛ̄ɛ̄ le tá ɛyí ɛfu éyi kóō gbɔ̄ɔkɔ.

⁴⁷Eko nɛ̄ otú le bī ā, ɔ́kɔ ā yɔ̄ ɔtāhɛ̄ óókpoó ā ɛ́ɛ́ nɛ̄ Ujísɔ̄si yɔ̄ ajɛ ɔlamu ōfōōfūnū.

⁴⁸Anɔ́ɔ ó le má ka o pɛ́ ɔ́kɔ gɔbū ā le lɔnɔ tū ayíkpó kú nū, ohígbū ka owu yɔ̄ gē tá ŋmá iyɔ̄bū uwā, anɔ́ɔ ɛplá obúgwū o tógwú aflɛ́yí mla ɔ́mpa ā, o yɔ̄ gē yāwu eyī éŋkpɔ̄ ī wā ɛgiyí uwā. Ó kōō gáā gla uwá dúú.

⁴⁹Amáŋ é má ɔ̄ abɔ̄ ó yɔ̄ gē yāwu eyī éŋkpɔ̄, é gbɛlá koó wɛ inambo nɛ̄, anɔ́ɔ é lɛ ɛgba dɛ̄ á.

⁵⁰Ufi lɛ odúúdú uwá kwú eko nēé lɛ ɔ́ má ā. Ujísɔ̄si lɛ ɛlā ka lɛ uwá bōōbū. “Aá lɔtū lé, ami nɛ̄. Aá yúufi ŋ́.”

⁵¹Anɔ́ɔ ó le bēhé wā ipú ɔ́kɔ ɛgiyí uwā, anɔ́ɔ owu ā mɛ tāajɛ miyooo á. Ayíkpó ā le kpó hídáagó,

⁵²ohígbū kéē jɛ́ɛyí kú úklɔ́ o hídáagó kú ɔwɛ nɛ̄ igbō mla ɛbéenyi ɛpa ā le jɛ̄ ācɛ úlá igwɛ́ɛpa cofigwó ā ŋ́, ohígbū ka ɔtū kú uwā le lɔfú, é klla cɛ̄ ɛlā ā ŋ́.

⁵³É le hɛ́ óókpoó ā igbó gā ajɛ kú Ugenésareti, anɔ́ɔ é kwú ɔ́kɔ kú uwā ú wāajɛ á.

⁵⁴Abɔ̄ é bá gē nyɛ̄ɛ̄ ŋmá ɛgiyí ɔ́kɔ ā, ācɛ le Ujísɔ̄si jéjúuma bōōbū.

⁵⁵Anɔ́ɔ é bá gē kwinya ɛga dóódu kú ajɛ ā, anɔ́ɔ ɛga dúúmā nēé le pó koó yɔ̄ nɛɛ, é gē bī ācɛ odoōcē o gwutá ɛyí ákplata gé lɛ ɔ́.

⁵⁶Anɔ́ɔ ɛjɛ̄ɛ̄jī ɛga dúú nɛ̄ Ujísɔ̄si nyɔ̄ ā, eyīpɔ́lɛ́, igelī nɛ̄ŋcɛ́, aɔ́lɛ́ kú ɛhɔ̄, ācɛ gē kpó ācɛ odoōcē kú ɔlɛ́ uwā gā ɛga ōlihī anɔ́ɔ é gē gbɔ̄ɔkɔ lɛ ɔ́ kóō cɛ̄ lɛ ācɛ odoōcē ā kéē lɛ abɔ̄ kwu okónu ogwu kú úwé kú nū kénékēē, anɔ́ɔ ōcē kú odúúdú ācɛ nēe lɛ abɔ̄ kwu ɔ́ ā mɛ á.