Read idoma UMÁKI 8 Bible Online

UMÁKI 8 - idoma bible

UMÁKI 8

¹Eko ɔhá kpɔ́ ɛwa nɛ̄hi wā í le jila tɔ̄há. Eko nɛ̄ ɔdōlé kú uwā mɛ ā, Ujísɔ̄si lɛ ayíkpó ā hīgwú anɔ́ɔ ó da uwá ka,

²“Ācɛ nēe bá mbaa í tū um eyīnyinyi ohígbū ka é húmáyī bá pi um ŋmá ɛ̄cī ɔ́mɛtá yɔ̄ mɛ́ɛ̄ á, é kē lɛ ɔdā dúúmā nēé ī lé gɛ ŋ́.

³Ɔ́dāŋ́ ka n cɛ̄ lɛ uwá i pɛ́ ga ɔlɛ́ ipú áncā, ācɛ ōhī kú uwā lɔfú hɛ́kwú ɔwɛ glá, ohígbū ka ācɛ ōhī kú uwā ŋmá ɛga oligbó.”

⁴Ayíkpó kú nū da ɔ́ ɔ̄kā ka, iní nɛ̄ ɔ̄cɛ ɔ́ɔ í má ɔdōlé nōo í jīla ācɛ nēe bá ā? É klla ka ɛga nɛ̄ aá bá ā kē wɛ ipú ígbíli.

⁵Ujísɔ̄si da uwá ɔ̄kā kahíníī, “Igbō ɛmulá nɛ̄ aá bī ā?” É tá ɔ̄ ohi ka igbō ahāapa nɛ.

⁶Ó lɛ ɔ́da je lɛ ɛwa kú ācɛ ā kéē cīce ajɛ. Anɔ́ɔ ó lɛ igbō ahāapa ā kpó, ó lɛ ahínyá tá Ɔwɔicō, ó lɛ uwá kpó cē, anɔ́ɔ ó kwú uwā ú kpó lɛ ayíkpó kú nū kéē kɔ̄ lɛ ɛwa kú ācɛ ā. Anɔ́ɔ ayíkpó ā le yá ɛ́gɛ́nɛ̄ ó ka ā.

⁷É lɛ ɛbéenyi lígíí dúú. Ujísɔ̄si lɛ ahínyá tá Ɔwɔicō ohígbū ɛbéenyi ā, anɔ́ɔ ó da ayíkpó kú nū kéē lɛ uwá kɔ̄ lɛ ācɛ ā dúú.

⁸Ɛjɛ̄ɛ̄jī ācɛ le lé jɛ̄ iyī uwā. Iwili kú ɔdōlé ā nōo hile nɛ̄ ayíkpó kpó ŋmá ajɛ ā wɛ ómbilí ahāapa.

⁹Ācɛ nēe bá abɔ́ɔ ā lɛbɛ̄ɛka ācɛ úlā igwó āa. Anɔ́ɔ ó lɛ uwá nū ga ɔlɛ́ eko nēé lɛ ɔdōlé lé kwɛyí ā.

¹⁰Anɔ́ɔ ɔkwɔɔkwu ɔ́ɔ́mā, anú mla ayíkpó kú nū le pɛ́ tá ipú ɔ́kɔ, anɔ́ɔ é le pɛ́ i yɛ tá ajɛ kú Udalimanúta.

¹¹Ācɛ Ufárisīi ōhī le pɛ́ wā ɛgiyí Ujísɔ̄si, anɔ́ɔ é gbɔɔ́ ō táafú mla anú á. É tíne kéē jé ɔ́dāŋ koó ŋmá ɛgiyí Ɔwɔicō ɔkwɛ̄yi. Anɔ́ɔ é da ɔ́ kóō lɛ ɔdā ō hídáagó éyi yá nōo í mafú ka Ɔwɔicō tū ɔ̄ wā ɔkwɛ̄yi á.

¹²Amáŋ Ujísɔ̄si lɛ owu hīlatá, anɔ́ɔ ó kahíníī, “Ɔdíyá nɛ̄ ācɛ kú eko nyā gē dɔɔ̄kā ɔdā ō hídáagó ā? Ehée, n̄ da aá, é gáā je ɔdocābɔ̄ ɛ́gɔ́ɔmā dúú lɛ ācɛ nēe bá nyā ŋ́!”

¹³Ó klla kwúcē í tá ipú ɔ́kɔ mla ayíkpó kú nū, anɔ́ɔ é gbɔɔ́ ō gā ogbeé ɔhá kú óókpoó ā á.

¹⁴Ayíkpó ā le mlanyī o bī ɔdōlé ga ipú ɔ́kɔ eko nēé pɛ́ ga ipú nū ā, ń táafú ŋ́ ayíka igbō ékpónú ōfūnū.

¹⁵Ó pi uwá ahɔ̄ kahíníī, “Aá lɛ ɛlá kwu ɔ́, aá klla leyī kwɛcɛ ohígbū ɔdōnīgbo kú ācɛ Ufárisīi mla ákú Uhérɔ̄du.”

¹⁶É bá gē ka lɛ iyī uwā ka, ɔ́ɔ ka ɛ̄nyā ohígbū ka aá í lɛ igbo dúúmā ŋ́.

¹⁷Ujísɔ̄si lɛ ɔdā nēé bá gē ka ā jé, anɔ́ɔ ó da uwá ɔ̄kā kahíníī, “Ɔdíyá nɛ̄ aá bá gē kɛlā lɛyíkwu o ka ka aá lɛ igbo ŋ́ māā? Aá jé ɛ́ɛ́ ŋ́ nɛɛ ámāŋ ka, aá jɛ́ɛyí nū ɛ́ɛ́ ŋ́ nɛɛ? Aá jé ɔdā dúú glá ŋ́ nɛɛ?”

¹⁸Aá lɛ īkpēyī, nááná aá mɛ́ɛbɛ glá ŋ́ nɛɛ? Aá lɛ ahɔ̄ aá lɔfú pó ɔdā dúú ŋ́ nɛɛ. Aá blakwu ɔdā dúú glá ŋ́ nɛɛ?

¹⁹Eko nɛ̄ n cē igbō lɛ ācɛ úlā igwɛ́ɛpa ceofigwó ā, ómbili omōomu kú iwili nōo hile ā ɛmulá nɛ̄ aá túbá ŋmá ajɛ ā?” É da ɔ́ ka igwɛ́ɛpa.

²⁰Ujísɔ̄si da uwá ɔ̄kā kahíníī, “Eko nɛ̄ n cē igbō lɛ ācɛ úlā igwó kéē lé ā bɛ́ɛ, ómbilí omōomu kú iwili ɛmulá hile nɛ̄ aá túbá ŋmá ajɛ ā? É da ɔ́ ka ahāapa.

²¹Ó da uwá ɔ̄kā ka, anɔ́ɔ é kōō jɛ́ɛyí nū ŋ́ kpɔ́ áā?

²²Eko nēé ga ajɛ kú Ubɛtsáyída ā, ācɛ éyi le opeyī éyi bī gé lɛ ɔ́, anɔ́ɔ é gbɔ̄ɔkɔ lɛ ɔ́ kóō lɛ ɔ́ hɛ́tá.

²³Ujísɔ̄si lɛ abɔ̄ tū ɔ̄cɛ opeyī abɔ̄ ŋmá eyīpɔ́lɛ́ ā ga eyɛ̄ɛ̄cɛ kú nū. Eko nōó lɛ ahɛ tá tū ɔ̄cɛ ā eyī, Ujísɔ̄si kwu abɔ̄ ú ce ɔ́, anɔ́ɔ ó da ɔ́ ɔ̄kā kahíníī, “A lɔfú má ɔdā dóódu glá āā?”

²⁴Ɔnyīlɔ ā jeyī má icō anɔ́ɔ ó kahíníī, “Īī, n gē má ācɛ, amáŋ é lɛbɛ̄ɛka ɔcí nēe bá ī yāwu ā.”

²⁵Ujísɔ̄si klla kwú abɔ̄ ú klá ɔnyīlɔ ā eyī kpɔ́. Eko nyā mɛ́ɛ̄ ā, ó pléyī kú nū lɔfú lɔfú anɔ́ɔ ō gbɔɔ́ ō mɛ́ɛbɛ á. Anɔ́ɔ ó le ɔdā dóódu má péee á.

²⁶Ujísɔ̄si lɛ ɔ̄cɛ ā nū ga ɔlɛ́ nū. Anɔ́ɔ ó pi ɔ́ ahɔ̄ ká ɔ̄ híī kwúcē ga eyīpɔ́lɛ́ ā gɛ ŋ́.

²⁷Ujísɔ̄si mɛ́mla ayíkpó kú nū le pɛ́ nyɛ̄ɛ̄, le tá aéyīpɔ́lɛ́ nēe kwu ajɛ kú Usísarīya Ufilipayi ajaajɛ ā. Abɔ̄ é bá yɔ̄ ī nyɔ̄ ɔwɛ ā, ó lɛ ɔ̄kā da uwá kahíníī, “Aá da um ɛ́, ɔ̄nyɛ nɛ̄ ācɛ ka n wɛ ā?”

²⁸ É tá ɔ̄ ohi kahíníī, “Ācɛ ōhī ka, a wɛ Ujɔ́ni oyúbatísim, ācɛ ɔhá ka, a wɛ Ɛláyíja, ɛ́ɛ́ nɛ̄ ɔ̄cɛ ɔhá ā ka a wɛ éyi kú ācomɛ́ɛbɛ á.”

²⁹Anɔ́ɔ ó da uwá ɔ̄kā kahíníī, “Aá ā bɛ́ɛ? Ɔ̄nyɛ nɛ̄ aá ka n wɛ ā?” Upíta tóohi kahíníī, “Awɔ wɛ ohɔ́nyɛtá á.”

³⁰Anɔ́ɔ Ujísɔ̄si pi uwá ahɔ̄ kéē híī da ɔ̄cɛ dúúmā ɔdā dúú lɛyíkwu anúɔ nóó.

³¹Anɔ́ɔ Ujísɔ̄si da ayíkpó kú nū kahíníī, “É géē yá ami nōo wɛ Ɔyínɔ̄nyīlɔ kú Ɔ̄cɛ ā ōwē nɛ̄hi, anyākwɔ́cɛ mla aótrɛ̄yí kú ācogwɛ́ɛya mla aítíca kú íne géē tá ɛlā kú nū. É géē je ɔ́ ŋmó, amáŋ é géē je ɔ́ héyī ŋmá ɔlékwū ɛ̄cī ɔ́mɛtá.

³²Ó ka ɛ̄nyā tɛ́ɛcɛ cāā lɛ ayíkpó kú nū. Anɔ́ɔ Upíta lɛ ɔ́ hīgwú gɛcɛ ŋmá ɛgiyí ayíkpó ohile ā, anɔ́ɔ ó le ɛ̄gba dɛ̄ tū ɔ̄ á.

³³Amáŋ Ujísɔ̄si pīyeyī má ayíkpó kú nū, anɔ́ɔ ó lɛ ɛgba dɛ̄ tū Upíta kahíníī, “Nyɛ̄ɛ̄ ŋmá ɛgiyí um, Ebilíi, ɛlá nāa gbo ā í ŋmá ɛgiyí Ɔwɔicō ŋ́, amáŋ ó ŋmá ɛgiyí ɔ̄cɛ ɔlamu nɛ̄!”

³⁴ Anɔ́ɔ Ujísɔ̄si lɛ ɛwa nēe jila bá ā hīgwú mla ayíkpó kú nū, wā ɛgiyí nū. Anɔ́ɔ ó kahíníī, “Ɔ́dāŋ ka ɔ̄cɛ dúúmā tíne kóō yɛce um kóō leyī gwō iyī nū bónū, cɛ́ɛ́ ó kwú ɔcóōnyɔ́kpá kú nū ú ce ɔkɔ cɛ́ɛ́, kóō yɛce um.”

³⁵Ohígbū ka ɔ́dāŋ ka ɔ̄cɛ dúúmā tíne ká ā nya oyēeyī kú nū tá, ó géē hɛ́ ɔ̄ abɔ̄, amáŋ ɔ̄cɛ dúúmā nōo kwú oyēeyī kú nū í tónú ohígbū um mɛ́mla ohígbū ɔkōōlɔhi ā, é géē nyá ɔ́ tá,

³⁶Ile nyá nɛ̄ ó í tū lɛ ɔ̄cɛ, ɔ́dāŋ ka ó lɛ odúúdú aɔ́dā kú ɛcɛ nyā lɛ, amáŋ nɛ̄ á yēeyī ŋ́ bɛ́ɛ? Ó lɛ itene dúúmā ŋ́.

³⁷Ó lɛ ɔdā ɔhá dúúmā nāa lɔfú yá ká ā yēeyī glá ŋ́.

³⁸Ɔ́dāŋ́ ka ɔ̄cɛ dúúmā gē yúwēyī um mɛ́mla ɛlā nɛ̄ n gē nwū ā, eko kú ācobɔ̄bíipú nēé je Ɔwɔicō ŋ́ nyā ā, ami Ɔyínɔ̄nyīlɔ kú Ɔ̄cɛ géē híhó ka ń jé ɔ̄cɛ ɔ́ɔmā ŋ́ eko nɛ̄ n géē wā mla ɔfú nɛ̄hi kú Ádā um mla aálelékwū otɛ̄hɔ̄ kú nū ā.