Read idoma UMÁKI 9 Bible Online

UMÁKI 9 - idoma bible

UMÁKI 9

¹Anɔ́ɔ ó da uwá kahíníī, “N yá kú aá le jé ka, ó lɛ ācɛ ōhī nēe bá amānyā nēé gáā kwú ŋ́ jāā gbéeko nēé lɛ ajɔ̄ɔ̄cɛ́ kú Ɔwɔicō mla ɔfú kú nū má.”

²Ɛplá eko nɛ̄ ɛ̄cī ɛhīlī le gla ā, Ujísɔ̄si kwu Upíta mla Ujémīsi mɛ́mla Ujɔ́ni ú, le yɛ tá ɛfu olicō éyi, ɛga nēé bá ofōōfūwā cíí. Abɔ̄ é bá abɔ́ɔ ā, iyē kú Ujísɔ̄si kwú pīyabɔ̄ ipéeyī uwā,

³anɔ́ɔ úwé kú nū kwú pīya ɛnɛ̄hɛ́ gbɔɔ́ ō ceyī ŋmaáŋmaá, tɛ́ɛ́hɛ́ ɛ́gɛ́nɛ̄ ɔ̄cɛ dúú í lɔfú na ɔ́ tɛ́ɛ́hɛ́ lɛ ā glá ŋ́ mā.

⁴Anɔ́ɔ ayíkpó ɛtá ā má Ɛláyíja mla Umósīsi yɔ̄ ī kɛlā mla Ujísɔ̄si.

⁵Anɔ́ɔ Upíta da Ujísɔ̄si kahíníī, “Itíca, ó lɔhi abɔ̄ nɛ̄ alɔ bá amānyā a! Ālɔ̄ géē ce áklɔ̄kpɛ ɛtá, éyi wɛ ákú uwɔ, éyi wɛ ákú Umósīsi anɔ́ɔ ɔhá wɛ ákú Ɛláyíja.”

⁶Ó jé ɔdā nɛ̄ ó yɔ̄ ī ka ā ŋ́, ohígbū ka ufi yá anú mla ācɛ ohile ɛpa ā nɛ̄ɛ̄nɛ̄hi.

⁷Anɔ́ɔ ojuja gā gaá klá uwá á, anɔ́ɔ é pó ɔkɔ ŋmá ipú ojuja ā kahíníī, “Ɛ̄nyā wɛ ɔyínɔnyīlɔ kú um nōo he um ɔtū nɛ̄hi, aá jāhɔ̄ lɛ ɔ́.”

⁸Anɔ́ɔ igbeékpónú, é pīyeyī yɛjīla, amáŋ é má ɔ̄cɛ ɔhá dúúmā gɛ ŋ́, Ujísɔ̄si ōfōōfūnū yɔ̄ mla uwá mɛ́ɛ̄ á.

⁹Abɔ̄ é gāajɛ ŋmá ɛyí ɛfu ā, Ujísɔ̄si le ɔ́da je lɛ uwá kahíníī, “Aá da ɔ̄cɛ dúúmā ɔdā nɛ̄ aá má nyā ŋ́, jāā gbéeko nēé kwú ɔyínɔnyīlɔ kú ɔ̄cɛ ú héyī ŋmá ɔlékwū.”

¹⁰Anɔ́ɔ é bī ɛlā ā ɔtū, amáŋ igbo alɛwa é ge miya ɛlā ā mla iyī uwā gē kahíníī, “Ɔdí wɛ ɛyí kú o héyī ŋmá ɔlékwū nyā ā?”

¹¹É lɛ ɔ̄kā da Ujísɔ̄si ka, ɔdíyá nɛ̄ aítíca kú íne ā gē ka ka Ɛláyíja ɔ́ɔ géē wā gbɔbū ɛ́ɛ́ kú ohɔ́nyɛtá kóō wā ā?”

¹²Ó tá uwā ohi kahíníī, “Ɛláyíja géē wā ɔkwɔ̄ɔ̄kwɛyi gbɔbū, o yá ɛ́ɛ́ kóō lɛ ɛjɛ̄ɛ̄jī ɔdā dóódu tútū. Nááná ɔdíya nɛ̄ ɛlɔ̄ɔwɔicō ka ka Ɔyínɔnyīlɔ kú Ɔ̄cɛ géē móōwē nɛ̄hi, ācɛ kē í tá ɛlā nū ā?

¹³Ká n̄ da aá, Ɛláyíja gā gbɔbū ɛɛ́, é kē yá ɔ̄ ōwē nɛ̄ɛ̄nɛ̄hi ɛ́gɛ́nɛ̄ ɛlɔ̄ɔwɔicō tɛtɛ ka tɛ́ɛcɛ lɛ ā.”

¹⁴Eko nēe gaá tá ayíkpó ohile ā, é má ɛwa nɛ̄hi le jīla tū uwa biílí. Anɔ́ɔ aítíca kú íne ōhī kē bá yɔ̄ ī táafú mla uwá.

¹⁵Eko nɛ̄ ācɛ ā lɛ Ujísɔ̄si má ā, é le hídáagó nɛ̄ɛ̄nɛ̄hi, anɔ́ɔ é lɛ inya kwu gā ɛgiyí nū gaá lɛ okónu hɛ́ tū ɔ̄.

¹⁶Ujísɔ̄si da ayíkpó kú nū ɔ̄kā ka ɔdí nɛ́ɛ bá yɔ̄ ī táafú mla uwá lɛyíkwu ɔ́ ā?

¹⁷Ɔ̄cɛ éyi ŋmá ipú ɛwa ā tóohi kahíníī, “Itíca, n bī ɔyínɔnyīlɔ kú um gé lɛ uwɔ, ohígbū ka ó lɛ alelékwū obɔ̄bí nōó cɛ̄ lɛ ɔ́ kɛlā glá ŋ́.

¹⁸Eko dúúmā nɛ̄ alelékwū ā lɛ ɔ́ kwú nɛɛ, ó gē lɛ ɔ́ fíyaajɛ, cɛ́ɛ́ okónu kú nū gē cūūwū. Ó gē hīla ayīnu, cɛ́ɛ́ iyē kú nū gē ŋmó cikɔ́ɔ́. N da ayíkpó kú uwɔ kéē lɛ alelékwū obɔ̄bí ā nū tɛ́ɛcɛ, amáŋ é nū ɔ̄ glá ŋ́.”

¹⁹Ujísɔ̄si da uwá kahíníī, “Aá wɛ ācɛ nēé lɛ ɔtōōce ŋ́! Eko nyá nɛ̄ n géē yɔ̄ mla aá gaá kwu ā? Eko nyá nɛ̄ n géē cībū aá gáā kwu ā? Lɛ ɔyínɔnyīlɔ kú uwɔ ā bī gé um!”

²⁰É lɛ ɔ́ bī gé lɛ Ujísɔ̄si ā. Abɔ̄ alelékwū obɔ̄bí ā lɛ Ujísɔ̄si má ā, ɔkwɔɔkwu ɔ́ɔmā ó cɛ̄ lɛ ɔyínɔnyīlɔ ā gbɔɔ́ ō fīyégbúlú, cɛ́ɛ́ ó fīyaajɛ gbɔɔ́ ō miyaajɛ, ūwū gbɔɔ́ ō cē ɔ̄ okónu.

²¹Ujísɔ̄si da ádā nū ɔ̄kā kahíníī, “Eko nyá nɛ̄ ó yɔ̄ lɛ ā ŋmá yɔ̄ ā?” Ádā nū tóohi ka oŋmífī nɔ́ɔ wɛ ɔyípɛ̄nɛ̄ŋ́cɛ́ ā.

²²Ádā nū klla yɔ̄ ī kɛlā lɛ Ujísɔ̄si gɔbū kpɔ́ kahíníī, “Igbɛ alɛwa alelékwū obɔ̄bí ā gē tū ɔ́ ga ipú ɔlá mɛ́mla ipú éŋkpɔ̄, o yá ɛ́ɛ́ kóō lɛ ɔ́ ŋmó. Méyīnyinyi alɔ, tá alɔ abɔ̄, ɔ́dāŋ koó tū uwɔ ɔtɛ́!”

²³Ujísɔ̄si ka, Īī, ɔ́dāŋ́ nɛ̄ ó tá awɔ abɔ̄yī uwɔ ɔtɛ́! Ɛjɛ̄ɛ̄jī ɔdā dóódu gē tɔ́ɔtɛ́ lɛ ācɛ nēe lɛ ɔtōōce ā.”

²⁴Anɔ́ɔ ádā ɔyí ā dɛ̄gba tɛ́ɛcɛ igbeékpónú kahíníī, “N cɛ̄, amáŋ ó nwuné jɛ̄ ŋ́. Tá um abɔ̄ ká n̄ cɛ̄ fíyɛ́!”

²⁵Ujísɔ̄si le má ka ɛwa kú ācɛ ā yɔ̄ ī pɛ́ wā gáā yɛ jīla ɔ́ tá, anɔ́ɔ ó lɛ ɔ́da je lɛ alelékwū obɔ̄bí ā kahíníī, “Aá nēe wɛ alelékwū obɔ̄bí odahɔ̄ mla odokónu ā, n je ɔ́da lɛ aá kú aá le pɛ́bɛ̄cɛ ŋmá ipú iyē kú ɔyínɔnyīlɔ nyā ká aá híī kwúcē ga ipú iyē kú nū gbóógbóō gɛ ŋ́!”

²⁶Anɔ́ɔ alelékwū obɔ̄bí ā lɛ ɛgba dɛ̄, cɛ̄ lɛ ɔyí ā kóō fīyégbúlú kpákpá, anɔ́ɔ ó gā ɛcɛ ŋmá iyē kú nū á. Ɔyínɔnyīlɔ ā gwutá ajɛ bɛ̄ɛka okwū ā, anɔ́ɔ ɛjɛ̄ɛ̄jī ācɛ gbɛlá kɔ́ɔ̄ gekwú ɛɛ́.

²⁷Amáŋ Ujísɔ̄si lɛ abɔ̄ bī ɔ̄ abɔ̄lɔ́na kwú ɔ̄ ú je gicō ŋmá ajɛ, anɔ́ɔ ó māháyi icō á.

²⁸Ɛpláko nɛ̄ Ujísɔ̄si le tá ipú inu ā, ayíkpó kú nū lɛ ɔ̄kā da ɔ́ wɛɛlɛ kahíníī, “Ɔdíyá nɛ̄ alɔ í nū alelékwū obɔ̄bí ɔ́ɔmā tɛ́ɛcɛ glá ŋ́ mā?”

²⁹Ujísɔ̄si da uwá kahíníī, “Ɔkɔ ō gbā lɛ Ɔwɔicō mla okónu ō gwū ōfōōfūnū lɔfú nū alelékwū obɔ̄bí ɛ́gɛ́nyā tɛ́ɛcɛ glá á.”

³⁰Ujísɔ̄si mla ayíkpó kú nū nyɛ̄ɛ̄ ŋmá abɔ́ɔ, anɔ́ɔ é le bū ipú Ugálīli. Ó dɔɔ̄kā kú ācɛ ɔhá dúú kéē jé ɛga nɛ̄ ó yɔ̄ ā ŋ́,

³¹ohígbū ka ó yɔ̄ ī nwū ayíkpó kú nū ɛlā. Anɔ́ɔ ó da uwá kahíníī, “Ācɛ géē yá ibīyājɛ tū Ɔyínɔnyīlɔ kú Ɔ̄cɛ, é kē í ŋmó ɔ̄. Ɛ̄cī ɔ́mɛtá le gla ó géē héyī ŋmá ɔlékwū.”

³²Amáŋ ayíkpó kú nū í jɛ́ɛyí kú ɔdā nɛ̄ ó nwū ɔ́ɔmā ŋ́, ufi nōo yá uwā ā í kē cɛ̄ lɛ uwá da ɔ́ ɔ̄kā ŋ́.

³³É gā Ukapánɔm, ɛplá nɛ̄ ó le tá ipú inu ā, Ujísɔ̄si lɛ ɔ̄kā da ayíkpó kú nū ɔdā nēé yɔ̄ gē táafú nū ŋmá ɔwɔɔwɛ ā.

³⁴Amáŋ é tá ɔ̄ ohi ŋ́, ohígbū kēé bá gē táafu mla iyī uwā ɔwɛ lɛyíkwu ɔ̄cɛ nōo cɛgbá fíyɛ́ dúú ipú uwā ā.

³⁵Ujísɔ̄si má cīce, anɔ́ɔ ó lɛ ayíkpó igwɛ́ɛpa ā hīgwú, anɔ́ɔ ó da uwá kahíníī, “Ɔ̄cɛ dúúmā nōo dɔɔ̄kā ō wɛ ɔ̄cɛ o cɛgbá fíyɛ́ dúú, cíkā ō kwú iyī nū ú pīya ɔ̄cɛ nɛ̄ ó cɛgbá ŋ́, fíyɛ́ dúú ā, cɛ́ɛ́ ó kwú pīya ɔ̄cɛ nōo ī cɛ̄ odúúdú ācɛ ɛhɔ̄.”

³⁶Anɔ́ɔ ó kwú ɔyípɛ̄ éyi ú gaá háyi ɔtāhɛ̄ uwā. Ó kwú ɔyí ā ū ce abɔ̄ anɔ́ɔ ó da uwá ka,

³⁷Ɔ̄cɛ dúúmā nōo mīyɛ éyi kú ayí nēe bá nyā iyē kú um, kē mīyɛ um dúú. Ɔ̄cɛ dúúmā nōo kē mīyɛ um, ó wɛ ami ofōōfū um nōó mīyɛ ā ŋ́, amáŋ ó mīyɛ ɔ̄cɛ nōo tū um ɛhɔ̄ ā dúú.”

³⁸Ujɔ́ni da ɔ́ kahíníī, “itíca, alɔ má ɔ̄cɛ éyi nōo bī iyē kú uwɔ yɔ̄ gē le nū alelékwū tɛ́ɛcɛ, alɔ da ɔ́ kóō mā ohígbū ka ó wɛ éyi kú alɔ ŋ́.”

³⁹Ujísɔ̄si da uwá kéē híī ci uwá ŋ́, ohígbū ka ó lɛ ɔ̄cɛ dúú nōo bī iyē kú anúɔ le yúklɔ́ o hídáagó nɛ̄ ɔkwɔɔkwu ɔ́ɔmā nɛ̄ ó klla gbɔɔ́ ō ka ɔdōbɔ̄bí lɛyíkwu anúɔ glá ŋ́.

⁴⁰ Ujísɔ̄si klla kɛlā gɔbū kpɔ́ ka, ohígbū ka ɔ̄cɛ dúúmā nɔ́ɔ wɛ olɛlā kú aá ŋ́, kē wɛ ɔya kú aá.

⁴¹ Ó klla kahíníī, “Ɔkwɔ̄ɔ̄kwɛ̄yi, n̄ da aá ka ɔ̄cɛ nōo lɛ éŋkpɔ̄ je lɛ aá gwá ohígbū ka aá gē tá Ohɔ́nyɛtá ɔkwu, Ɔwɔicō géē gbā ulé nū lɛ ɔ́.”

⁴²Ó kē yɔ̄ ī kɛlā kpɔ́ kahíníī, “Ɔ́dāŋ́ ka ɔ̄cɛ dúúmā le yá kú éyi kú ayípɛ̄nɛ̄ŋcɛ́ nēe bá nyā kéē cɛ̄ɛ̄lā kú um gɛ ŋ́, ó géē lɔhi lɛ ɔ̄cɛ ɔ́ɔmā fíyɛ́ ɔ́dāŋ keé lɛ ígbɛ́cɔ̄ gbo bá ɔ́ ɔkɔ cɛ́ɛ́ é kwú ɔ̄ ú tá tū ipú ísu.

⁴³ Ohígbū ɔ́ɔmā, ɔ́dāŋ ka abɔ̄ kú uwɔ í cɛ̄ gā awɔ cɛ̄ɛ̄lā Ɔwɔicō gɛ ŋ́ má nɛ, lɛ ɔ́ hɛ́ tónū! Ó í lɔhi gā awɔ fíyɛ́ ká ā le tá ajɔ̄ɔ̄cɛ́ kú Ɔwɔicō ɛga nāa géē lɛ oyēeyī opiyóó mla abɔ̄ éyi ikɔkɔ nāa géē bī abɔ̄ ɛplɛ́ɛpa ga ipú ɔlá íkɔtɔ, ipú ɔlá nōo gē nyí ŋ́ mā ā.

⁴⁴

⁴⁵Ɔ́dāŋ́ ka ikpó kú uwɔ ī yá ká ā cɛ̄ɛ̄lā Ɔwɔicō gɛ ŋ́ má nɛɛ, lɛ ɔ́ hɛ́ tónū! Ó lɔhi gā awɔ fíyɛ́ ká ā le tá ajɔ̄ɔ̄cɛ́ ɛga nāa géē lɛ oyēeyī opiyóó mla ikpó éyi ikɔkɔ nāa géē bī ikpó ɛplɛ́ɛpa gā ipú ɔlá ikɔtɔ ā.

⁴⁶

⁴⁷Ɔ́dāŋ́ ka ikpēyī kú uwɔ í cɛ̄ gā awɔ cɛ̄ɛ̄lā Ɔwɔicō gɛ ŋ́, lɛ ɔ́ wú tónū! O lɔhi ga awɔ fíyɛ́ ká ā le tá ajɔ̄ɔ̄cɛ́ ɛga nāa géē lɛ oyēeyī opiyóó mla ikpēyī ékpó, ikɔkɔ nāa géē bī ikpēyī ɛplɛ́ɛpa, cɛ́ɛ́ é kwú uwɔ ú tɛ́ɛcɛ ga ipú ɔlá ā.

⁴⁸Abɔ́ɔ ā, ɛkɔ̄ nēe gē lé ɛbɛ́ uwá ā í gē kwú ŋ́, ɔlá nōo gē yi uwá ā í kē gē nyí ŋ́.”

⁴⁹É géē bī ɔlá le na ɔ̄cɛ dóódu yēŋēē ɛ́gɛ́nɛ̄ é gē bī ɔmā le yá ɛbɛ́ nēé le gwɛ́ɛya kóō le yēŋēē ā.

⁵⁰ Ɔmā lɛ ɔhi, amáŋ ɔ́dāŋ nɛ̄ ɔmā í lɔnyɛ gɛ ŋ́, á gáā yá ɔ̄ kóō lɔnyɛ glá ŋ́. “Aá lɔnyɛ tū iyī aá bɛ̄ɛka ɔmā ā, aá bá ɛbɔ́ mla iyī aá.”