Read idoma ULÚKU 10 Bible Online

ULÚKU 10 - idoma bible

ULÚKU 10

¹Eko nɛ̄ odée nyā le yá kwɛyí ā, Óndú ā lɛ ācɛ nēe yɛce ɔ́ ofɛtá cigwó ɔhá fu, anɔ́ɔ ó lɛ uwá ɛpɛɛpa tɛ̄hɔ̄ kéē nyɔ̄ gɔbū ga igelī mɛ́mla ɛga dóódu nōó miya ka anúɔ gáā nyɔ̄ ā.

²Ó da uwá kahíníī, “Īkpɔ̄dɛ̄hɔ̄ ā nwuné nɛ̄hi, amáŋ ācocɔ̄dɛ̄hɔ̄ í nwuné ŋ́. Aá gbɔ̄ɔkɔ lɛ Óndú nōo wɛ Óndú kú ɛhɔ̄ ā kóō lɛ ācocɔ̄dɛ̄hɔ̄ kpó wā fíyɛ́ kéē géē lɛ īkpɔ̄dɛ̄hɔ̄ kú nū kpó cē.

³Aá nyɔ̄! N yɔ̄ gē tū aá ɛhɔ̄ gɛcɛ bɛ̄ɛka ayí álá nēé tū ga ipú aɔ́gwú ā.

⁴Aá híīī bī alítā ámāŋ ɛkpa ámāŋ áblákpá ɔmpa ŋ́. Aá híīī māháyi hokónu tū ɔ̄cɛ dúúmā ɔwɛ ŋ́.

⁵Eko dúúmā nɛ̄ aá le tá ipú inu dóódu nɛɛ, ɔdā aflɛ́yí nɛ̄ aá í ka ā wɛ, “Ɛbɔ́ kóō yɔ̄ mla ɔlɛ́ nyā!”

⁶Ɔ́dāŋ nɛ̄ ɔ̄cɛ nēe lā abɔ́ɔ ā wɛ ɔ̄cɛ ɛbɔ́, okónu kú ɛbɔ́ nɛ̄ a hɛ́ ā kóō yɔ̄ mla anú.

⁷Aá klá ɔlɛ́ ɛga ékpónú ɔ́ɔmā, yɔ̄ ī lé yɔ̄ ī gwá ɔdā dúú nēé je lɛ aá ā, ohígbū ka ɔ̄coyúklɔ́ cíkā ō mīyɛ ulé kú nū. Aá híīī yɔ̄ ī yɛ ŋmá ɔlɛ́ ɔ̄cɛ éyi ga ɔlɛ́ ɔ̄cɛ ɔhá ŋ́.

⁸Eko dúú nɛ̄ aá le yɛ tá ipú igelī dóódu nēé mīyɛ aá, aá kóō lé ɔdā dúú nēé je lɛ aá.

⁹Aá hɛ́ ācodoōcē kú igelī ā tá ŋmá ōcē kú uwá cɛ́ɛ́ kú aá da ācɛ abɔ́ɔ kahíníī, “Ajɔ̄ɔ̄cɛ́ kú Ɔwɔicō wā í kwu uwá ajaajɛ ɛɛ́.”

¹⁰Amáŋ eko dúú nɛ̄ aá le tá ipú igelī éyi nēé mīyɛ aá ŋ́, aá nyɛ̄ɛ̄ ga ipú uláyi kú ɔlɛ́ ā cɛ́ɛ́ kú aá kahíníī,

¹¹‘Ó kōō úmlá kú igelī kú ɔlɛ́ aá nōo bá alɔ ikpó ā, alɔ lɛ ɔ́ gwōbónū kóō ce ijáalí tū aá. Amáŋ aá le jé ka ajɔ̄ɔ̄cɛ́ kú Ɔwɔicō má kwu aá ajaajɛ ɛɛ́!’

¹²N da aá ɛlā ɔkwɛyi ka Ɔwɔicō géē méyīnyinyi Usɔ́dɔm fíyɛ́ igelī ɔ́ɔmā!

¹³“Ōwē nɛ̄hi géē yɔ̄ ga uwɔ, Ukorásin! Ōwē nɛ̄hi wɛ ákú uwɔ dúú Ubɛtsayída! Ɔ́dāŋ ka ɔdā o hídáagó nēé yá ipú aá, nēé yá ipú aígelī kú Utáya mɛ́mla Usídɔn ā nɛɛ, ācɛ kú abɔ́ɔ géē yɛ í má cīce, lɛ úwé ekwu kpó wiiyē, cɛ́ɛ́ é le ewo mī klá iyī uwā iyē, kóō mafú lɛ ācɛ ka é le pīyabɔ̄ ŋmá íne nɛ̄ é bīya ɛɛ́!

¹⁴Ɔwɔicō géē ményinyi Utáya mɛ́mla Usídɔn fíyɛ́ aá ɛ̄cī nēe géē kɛpɔ̄ tū ācɛ ā.

¹⁵Amáŋ awɔ ā, Ukápānɔm, é je uwɔ pīya ɔlɛ́ nōo lɔfú fíyɛ́ odúúdú aígelī nɛɛ? Ɔwɔicō géē tá uwɔ wāajɛ ga ipú ɔlíkɔtɔ.”

¹⁶Ujísɔ̄si da ayíkpó kú nū kahíníī, “Ɔ̄cɛ dúú nōo mīyɛ olɛhɔ̄ nɛ̄ aá cɛ̄ ā, ami nōó mīyɛ á. Amáŋ ɔ̄cɛ dúú nōó tá ō jāhɔ̄ lɛ aá, ami nōó tá á. Ɔ̄cɛ dúú nōo kē tá um, Ɔwɔicō nōo tū um ɛhɔ̄ ā nōó tá á.”

¹⁷Ācɛ ofɛtá cigwó ā pīyɛyí wā ɛgiyí Ujísɔ̄si mla éeyē nɛ̄hi gaá da ɔ́ kahíníī, “Óndú, aálelékwū obɔ̄bí ā kōō lɛyítáajɛ lɛ alɔ eko nɛ̄ alɔ le iyē ká uwɔ hī lɛ ɛgba dɛ̄ tū uwā ā!”

¹⁸Ujísɔ̄si kahíníī, “N má Ebilíi eko nōó míya wāajɛ ŋmá icō, lɛbɛ̄ɛka ɔwɔ olímanya ā.

¹⁹Aá jāhɔ̄! N le íkwu kpó lɛ aá ɛ́ɛ, cɛ́ɛ́ ka aá lɛ ikpó da ɛgwā mɛ́mla ɛna ocɔ̄cɛ. N lɛ ikwú je lɛ aá kú yá odúúdú ɔfú kú olɛlā ā lé ɛɛ́. Ɔdā dúú í gáā yá aá ágbe glá ŋ́.

²⁰Amáŋ aá gwéeyē fíyɛ́ ohígbū kéē lɛ iyē kú aá tá tāajɛ ajɔ̄ɔ̄cɛ́ ɛ́ɛ́ ikɔkɔ nɛ̄ aá í gwéeyē ohígbū ka alelékwū obɔ̄bí tɛ́ɛ́yí wāajɛ lɛ aá ā.

²¹Ɛpléeko ɔ́ɔmā, Alelékwū Ihɔ cɛ̄ lɛ Ujísɔ̄si gwéeyē nɛ̄hi anɔ́ɔ ó kahíníī, “Ádā um! Óndú kú ɔkpáncō mɛ́mla ɛcɛ! N tá awɔ ahínyá ohígbū ka ɛlā ɔkwɛ̄yi nɛ̄ a kwú tayínū ŋmá ɛgiyí ācojeeyī mɛ́mla ācojɔ́dā ā, a lɛ ɔ́ mafú lɛ aógwuda nēé jé ɔdā dóódu ŋ́ mā. Īī Ádā, n tá uwɔ ahínyá ohígbū ka ɛ̄nyā wɛ ɔdā nɛ̄ a miya kóō yá á.”

²²Ó klla kahíníī, “Adá um kwú ɛjɛ̄ɛ̄jī odée ú kpó ga um ɛɛ́. Ɔ̄cɛ dúúmā í jé ɔ̄cɛ nɛ̄ Ɔyínɔ̄nyilɔ ā wɛ ā ŋ́, ń táafú ŋ́ Ádā ā ōfōōfūnū. Ɔ̄cɛ dúúmā í jé ɔ̄cɛ nɛ̄ Ádā ā wɛ ā ŋ́, ń táafú ŋ́ Ɔyínɔ̄nyīlɔ ā, mɛ́mla ɔ̄cɛ nɛ̄ Ɔyínɔ̄nyīlɔ ā tíne ō ma ɔ́ fú lɛ ɔ́ ā.”

²³Anɔ́ɔ Ujísɔ̄si leyi pīya tá ayíkpó kú nū, anɔ́ɔ ó da uwá ōfōōfūnū uwā kahíníī, “Aá gwéeyē, aá nēe má aɔ́dā nɛ̄ aá má ā.

²⁴N da aá ka ācomɛ́ɛbɛ mɛ́mla aɔ́cɛ́ alɛwa kú ācɛ Ísrɛ̄lu tíne kéē má ɔdā nɛ̄ aá má ā, amáŋ é má ɔ̄ glá ŋ́. É kē tíne kéē pó ɔdā nɛ̄ aá pó ā, amáŋ é pó ɔ̄ glá ŋ́.”

²⁵Ɛ̄cī éyi ɔ̄málɛ éyi wā gáā já Ujísɔ̄si má. Ó dɔɔ̄kā kahíníī, “Utíca, ɔdí nyá nɛ̄ n géē yá piíí ɛ́ɛ́ ká n̄ lɛ oyēeyī nōó ī mɛ ŋ́ mā ā?”

²⁶Ujísɔ̄si tá ɔ̄ ohi kahíníī, “Ɔdí nyá nēé tá tū ipú ɔkpá kú íne āa? Ɔdí nɛ̄ a jé ŋmá anú āa?”

²⁷Ɔnyīlɔ ā tá ɔ̄ ohi kahíníī, “Bī odúúdú odo kú uwɔ, odúúdú ɔtū kú uwɔ mɛ́mla odúúdú ɔfú mɛ́mla ɛlá ōgbo kú uwɔ le yíhɔtū tá Ɔwɔicō. Cɛ́ɛ́ ɔ́mpa awɔ kóō he uwɔ ɔtū bɛ̄ɛka iyī uwɔ ā.”

²⁸Ujísɔ̄si tá ɔ̄ ohi kahíníī, “Ohi nɛ̄ a cīla ā lɔhi íbí. Bī ɔdā nɛ̄ a ka ā le yúklɔ́ cɛ́ɛ́ ā géē yēeyī piyóó.”

²⁹Amáŋ ɔmálɛ ā tíne kóō mafú ka anúɔ wɛ ɔ̄cɛ o jɔ́dā, anɔ́ɔ ó le ɔ̄kā da Ujísɔ̄si kahíníī, “Ɔ̄nyɛ wɛ ɔ́mpa um ā?”

³⁰Ujísɔ̄si tóohi kahíníī, “Ɛ̄cī éyi, ɔ̄cɛ éyi yɔ̄ ī wúlatū ŋmá Ujerúsālɛm yɔ̄ ī ga Ujérīko. Anɔ́ɔ ó gaá gwōtū ipú abɔ̄ kú ācohéjulúgwu á. É lɛ ɔ́ ŋmíjē nɛ̄hi, lɛ ɛjɛ̄ɛ̄jī ɔdā dóódu kú nū kpó ŋmá ɔ́ɔ iyē, anɔ́ɔ é mā ɔ̄ tá okwōōkwū á.

³¹Ɔ̄cogwɛ́ɛya éyi le hɛ́ wā í yɔ̄ ī wúlatū ɔwɛ ɔ́ɔmā piíí ā. Amáŋ eko nōó lɛ ɔnyīlɔ ā má ā, ó kwú cēbla abɔ̄ ɔhá kú ɔwɛ ā.

³²Ɔ̄cɛ Ulífāyi éyi wā abɔ́ɔ, ó le yɛ gaá lɛ ɔ̄cɛ ā má, anɔ́ɔ ó kwú bū abɔ̄ ɔhá kú ɔwɛ ā le yɛ á.

³³Amáŋ ɔ̄cɛ kú Usamérīya éyi yɔ̄ ī bū ɔwɛ ɔ́ɔmā ga iyāwu. Eko nōó lɛ ɔnyīlɔ ā má ā, ó le tū ɔ̄ eyīnyinyi.

³⁴Ó le yɛ tá ɛgiyí ɔnyīlɔ ā, lɛ ejé mɛ́mla anɔ̄ tū ágbe kú nū, anɔ́ɔ ó le ɔ́ gbō á. Ó kwú ɔnyīlɔ ā ú ce ɛyí ijakī kú nū, anɔ́ɔ ó lɛ ɔ́ bī ga inu kú aúgbɔga á. Ó leyīkwu ɔ́ abɔ́ɔ lɔɔlɔhi.

³⁵Oŋmɔ́ɔ̄cī nū, ó lɛ ikpīije nɛ̄hɛ́ ɛpa kpó lɛ ɔ̄cɛ nōo gē leyīkwu inu kú aúgbɔga ā, anɔ́ɔ ó da ɔ́ kahíníī, “Leyīkwu ɔ́ lɔɔlɔhi gbēyī um, eko dúú nɛ̄ n kwúcē wā í yɛ ɔwɛ nyā kpɔ́, n géē gbā ɔdā ɔhá nɛ̄ a ŋmó tū ɔ̄ ā.”

³⁶Anɔ́ɔ Ujísɔ̄si lɛ ɔ̄kā kú nū ŋmɛ́yí mɛ́mla ɔ̄kā á. Ó kahíníī, “Ɛ̄nyá kú ācɛ ɛtá nēe bá nyā yá ucē kú ɔ́mpa ɔ̄cɛ tū ɔ̄cɛ nēé hɛ́ ɔ̄ éjulúgwu āa?”

³⁷Ɔmálɛ ā tóohi kahíníī, “Ɔ̄cɛ ɛ̄nɛ̄ o ményinyi nū ā nɛ̄.” Ujísɔ̄si tóóhi kahíníī, “Ayíka a nyɔ̄ í yá ɛ́gɛ́ nɛ̄ ɔ̄cɛ ā yá mla ɔ̄cɛ ɔhá mɛ́ɛnɛ.

³⁸Abɔ̄ Ujísɔ̄si mɛ́mla ayíkpó kú nū bá gē nyɔ̄ ɔwɛ ā, ó gā eyīpɔ́lɛ́ éyi, anɔ́ɔ ɔnyā éyi nēé hī ka Umáta ā mīya uwá wā ɔlɛ́ nū á.

³⁹Ó lɛ ɔyínɛ́ nɔ̄nyā éyi nōo lé ka Umerí nōo cīce pi ikpó kú Ujísɔ̄si. Ó yɔ̄ ī jāhɔ̄ lɛ ɔdā nōó yɔ̄ í nwū ā.

⁴⁰Umáta ā yɔ̄ ī gicō gaajɛ yɔ̄ í yá odée, anɔ́ɔ ó gā ɛgiyí Ujísɔ̄si gaá da ɔ́ kahíníī, “Ó kwú uwɔ iyē abɔ̄ ɔyínɛ́ um nɔ̄nyā habɔ̄ ɔdā dóódu tá ce um abɔ̄ kú um yá odúúdú úklɔ́ ā ŋ́ nɛɛ? Da ɔ́ kóō wā í tá um abɔ̄!”

⁴¹Óndú ā tá ɔ̄ ohi kahíníī, “Umáta, Umáta! A yɔ̄ í gicō gajɛ lɛyíkwu ɔdā alɛwa.

⁴²Amáŋ ɔdā ékpónú ōfōōfūnū cɛgbá á. Ɛ̄nɛ̄ o le kpaakpa ā nɛ̄ Umerí je á, ɔ̄cɛ dúú í kē gáā mīyɛ ɔ́ ŋmá abɔ̄ kú nū glá ŋ́.”